في الوهم الكبير والانهماك ، ما لسة بتبوح بي ولاك!!! لا عرفت هل الله ابتلاك بي هؤلاء ، أو جيت براك؟! وانت بتكَشْكِر لحميدتي..!! زي ما بتبشِّر للبشير كنت بتكبِّر للهلاك ، شن جدَّ في الناس الوهم، والحمى ذاتا ، مرارة الضوق والطعم، شن جدا في بدلة عساكراً حايمة بالموت المكشِّر ..!! بس تبشر وما مهم..! فاقعةْ المرارة، خطب تطمِّم آااااه يا خسارة الناس تأيّد، وتنسجم..!! يا حال ملكَّك في الجسارة، البوت مع عيشة السجم، تمشي وين الخطوة في الأرض المسمَّمة والمصمَّمة لي فنانا لغم لغم، لمتين بقيف مطر الهوان..! والخوف ممدد.. في الضمير… العَن هوى الوطن انترم! شن جدَّ في غبش المرابين الملاعين،، والأيادي الناشفة بِتبَشِّر،، والدماغ الناشفة الطوعاً تلين غاسلاها مايكات المنصات بالطنين ، شن جدَّ؟! لسة الحالة طين، نفس الدبابير والطبنجات، العفاريت الابالسة والشياطين، شن جدَّ شن؟! لا ادوك عين، لا الله قال، شن جدا في الفهم الطشاش ، كاسر محاريت النضال، والورد مات، والفرع فتَّاهُ الهَشَاش، فقر المزارع والبيوت، والحصاد اليود عماش، شن جدَّ؟ من غير اليخوت، لي زول غرق وخلافو عاش، شن جدَّ وين ورينا ماش ونحن في الترس القبيل من أجل سودانا بنموت علي تولي 15 أكتوبر 2020 أريزونا