اطلاق سراح (8) من الاسلاميين بالضمان.. – بالله الضمنهم دا شوفو ليهو ضامن .. مشكلتكم يا فكيتهم بالضمان وهربوا يا حبستوهم لمن يموتوا اعتلالا.. انتو ما عندكم محاكم وقضاة وكدة.. لجنة فض الاعتصام تستوجب ياسر العطا. – الناس ديل يحوموا حول الحمى يوشكوا ان يعقوا فيه .. غايتو يوم يقعوا فيهو جريدة واحدة بتطلع مافي .. كلمتكم انا. مطار الخرطوم يحظر دخول القادمين من ثلاث دول. – والدول الباقية دي حاظرا الثلاث دول دي وللا نحن تعبانين ساكت؟ قرار سيادي بنزع قطعة ارض من صندوق دعم الطلاب واعادتها لجامعة الخرطوم. – هو صندوق دعم الطلاب دا قطاع خاص وللا تابع للنظام البائد وللا الوضع دا كيف.. وزمان قلعوا القطعة دي من جامعة الخرطوم وسلموها لصندوق دعم الطلاب لشنو.. قصة ما مفهومة. مطالب بمضاعفة الاهتمام بالمناطق المستردة في الفشقة. – بالله لو استرديتو حلايب وشلتين ماتضاعفوا الاهتمام بيها بس هجروا ليها مواطنين من جوة .. لانو القاعدين هناك ديل اتعمل ليهم غسيل مخ وغسيل لسان وغسيل معدة زول فيهم بقول داير يمشي مع ابوه مافي. انتهاء التصحيح واعلان وشيك لنتيجة الشهادة السودانية. – هو بالله كان في امتحان شهادة السنة دي .. زمان شهر ديسمبر دا طلاب الشهادة كانوا بمتحنوا في السمستر الاول في الجامعة.. ماعارفين غايتو السبب الكرونة وللا سب ناس تاني كدة. المالية تعلن اسعار جديدة للوقود. – ما تعلن المالية دي هي دافعة حاجة من جيبها؟.. والصفوف يوم واحد ما نقصت من 28 للبنزين لقراية ال600 جنيه.. انا ماعارف الناس دي بتجيب الفروقات دي من وين؟ توصيات بالغاء ديون السودان. – نحن مادايرين هسي تلغوا لينا الديون .. نحن دايرين ديون اضافية عشان نفك الزنقة دي. كنانة تحتفل بالجوال رقم مليون. جوال شنو دا؟ غايتو الا يكون تراب .. لو سكر والكيلو 150 جنيه وسكر مستورد ورونا انتاج كنانة دا بيمشي وين؟ القصة دي طويلة غدا نعود لوحدة الموضوع.