وصفت الفنانة المصرية عبير صبري الجمهور "بالناس الهبلة" وذلك في تعليقها على اتهامها بالتحريض على الفجور خلال المشاهد الساخنة التى قدمتها فى فيلمها الاخير "عصافير الجنة". وقالت عبير خلال برنامج بلسان معارضيك" الذي يذاع على قناة "القاهرة والناس" ويقدمه الاعلامى اللبناني طونى خليفة رداً على كل من وجهوا لها إتهامات بهذا الشأن: دي ناس هبلة اللى بتتكلم الكلام ده .. يعنى مش هحترمهم حتى .. لما فيلم مهم زي "عصافير النيل" ورواية لابراهيم أصلان ومن إخراج احمد علي يتقال عليه كلام **** وصغير تبقى دي ناس هبلة وأنا ما أردش عليهم. وأوضحت صبري عندما سألها طوني خليفة ماذا تقصد ب "الهبل" قالت: الهبل فى فكرهم .. ناس سطحيين .. يعنى واحد يسيب فيلم مهم جداً ويسب الافكار اللى فيه ويتكلم عن بوسة !!.. ده معقد وعنده كبت وعنده مشاكل يحلها بعيد عننا.. أنا فخورة اني اشتغلت فى الفيلم ده.. لان الفيلم مش بيخاطب الغرائز. وعن مصطلح السينما النظيفة و المشاهد الساخنة قالت : أنا عاوزة أمارة على الكلام ده .. ده كلام سطحى وكلام عيال صغيرة.. أنا ماعنديش أفلام فيها إثارة.. ومصطلح السينما النظيفة أنا مختلفة معاه لأني مش فاهماه اصلاً.. اللى أعرفه إن فى سينما جيدة وغير جيدة. أما مشهد المايوه الذي ظهرت به في فيلم "أبناء الشيطان" فأوضحت عبير صبري قائلة: عروسة فى شهر العسل نازلة مع جوزها "البسين" (تقصد حمام السباحة) هتنزل لابسة إيه جلابية ؟.. السيناريو مكتوب كده. وعن مسألة خلعها الحجاب واتهامها بالتلاعب بالدين نفت عبير صبري ما كل تردد وقالت: أنا ما تلاعبتش بالدين ولا حاجة .. أنا لبست الحجاب فى توقيت كنت مقتنعة بالخطوة اللى كنت بعملها ولما خلعته كان فى ظروف خاصة. وأضافت صبري موضحة دوافعها فى خلع الحجاب: الناس فاهمة إن إرتداء الحجاب لازم يكون له أسباب.. أنا لبست الحجاب لانى كنت مهيأة نفسياً فى التوقيت ده .. وكان عندى شعور إنى محتاجة للتقرب لربنا كتير .. حصل عندنا فى العيلة وفاة طفلة رضيعة .. غصب عنى فكرة الموت والحساب والحاجات الكبيرة دي خطفتنى جداً وقتها. وتابعت : الموروث الثقافى والدينى فى المجتمع العربي يري إن المرأة إذا أرادت التدين تلبس الحجاب .. فيمكن إني تسرعت شوية وبدل أنى آخد الموضوع " ستب باي ستب" ( تقصد خطوة خطوة) أخدت خطوة أنا راضية وسعيدة بها. واستطردت : مش معنى أنى خلعت الحجاب إنه مش فرض .. أنا دلوقتى مش قادرة أتحمل مسؤولية الخطوة دي بسبب ظروفى النفسية والشخصية والعملية .. أنا فضلت إن الوضع يبقى مظبوط. وفى النهاية وجهت الفنانة المصرية كلمة للمخرجة ايناس الدغيدي عندما طلب منها مقدم البرنامج التعليق على حديثها السابق عن الحجاب عندما دعت إلى الله " ربنا ما يكتبه عليا". قالت عبير صبري: "كوني زي ما أنتى لا كما يريد الناس .. هو ده الصدق"، موضحة أنها لا تؤيد إيناس في ما قالته على الاطلاق نهائياً إنما تقول رأيها فيها فقط !!.
