* وقع مدرب المريخ غارزيتو في خطأ شنيع بقرار عدم إلحاق صانع الألعاب التش بالكشف الأفريقي.. وضمه للاعب الأكثر من عادي محمد الأمين بدلاً عنه. * أمس شاهدنا لاعبي المريخ عاجزين تماماً عن الوصول لمنطقة جزاء النجم طوال الشوط الأول.. ولم تكن هناك أي تسديدات إلا من الركلات الحرة من مسافات بعيدة عن طريق السماني ورمضان.. * أفرط لاعبو المريخ من اللعب العرضي العقيم وأخطاء التمرير ولم تكن الكرة تصل لهجوم المريخ إطلاقاً لعدم وجود صانع ألعاب في الوسط لنتحسر على ابعاد التش.. * لم يهاجم النجم كثيراً ولكن القليل من الهجمات كشفت هرجلة وفوضى دفاع المريخ.. وهدف النجم القاتل في الثواني الأخيرة من الزمن الضائع سببه المصيبة باسكال بعد انبراشته العجيبة قبل عكس الكرة إلى جانب بطء أمير كمال.. * محمد عبدالرحمن لن يفيد مع الرقم 10 وكذلك نخاف على الوافد الجديد ديديه كواسي بعد منحه الرقم 17 وربنا يكضب الشينة. * القصور الوحيد في التسجيلات الأخيرة اقتصر على الفشل في ضم مهاجم متقدم من طراز إيداهور.. ولكن زاد غارزيتو النقص بإضاعة صانع الألعاب التش وعدم ضمه للكشف الأفريقي.. وعليه أن يأكل ناره في بقية مباريات المجموعة.. وكان الله في عون المريخ.. التش.. التش.. التش * عقب كسب المريخ للاعب الخرطوم الوطني محمد حامد التش.. عمت موجة غضب واستياء المواقع الاسفيرية الهلالية.. وتعرض رئيس الهلال لانتقادات عنيفة وصلت حد السخرية والإساءات.. * واضح إن الأهلة كانوا مبهورين بموهبة هذا اللاعب فأطلقوا عليه ألقاب التفخيم وقالوا إنه يشبه الهلال.. وأطلق عليه الرشيد علي عمر لقب (الأسطورة).. ولهذا جاء خبر انضمامه للمريخ مع زميله أحمد آدم بيبو كوقع الصاعقة.. ومما زاد من وقع الصدمة انضمام التش للمريخ بعد أيام من إعادة قيد العقرب للأحمر الوهاج.. * وبلاشك إن أكثر المصدومين هو أخونا محمد عبدالماجد الذي كان على ثقة شديدة بأن العقرب سيعود للهلال.. كما كان يتغزل في التش ويدبج المقالات والدرر الأدبية حوله.. وقد طالبنا البعض بنشر عمود قديم لود عبدالماجد كتب فيه عن التش متغزلاً.. ونحن نستجيب بإعادة نشر أجزاء كبيرة من ذلك العمود أدناه: * الحكاوي كانت كثيرة عن نجم الخرطوم الوطني احمد حامد (التش) إلى ان جاء واعلن عن نفسه بصورة رسمية كدا (لمن تعشق الشكولاتة) في مباراة فريقه امام المريخ. * لمسات (التش) وتحركاته ويساريته الجارحة، مع صغر سن اللاعب وطول قامته تشير الى ان الكورة السودانية على موعد مع موهبة جديدة. * نحن الهلالاب عندنا عشق مع القدم اليسار.. حاجاتنا كلها قاعدين نحققها في الحتة دي.. تنقا.. ومحمد حمدان.. وزاهر مركز.. ومهند الطاهر. * أحمد حامد بيذكرني ببدايات مهند الطاهر عندما بدأ (الهوبة) رسمياً وهو ضمن صفوف لاعبي الميرغني الكسلاوي.. وغزال الشرق جاء الهلال. * في مباراة الخرطوم الوطني امام المريخ (التش) كان بيزلق في لاعبي المريخ مدافع وراء التاني.. زي الموز.. بي كل بساطة.. بي كل سهولة. * صلاح نمر وضفر.. بيتخابطو في بعض.. متل الناس البوزعو في (البلح) بعد العقد.. صلاح نمر بعد المباراة بقى ما عندو اي علاقة بي (نمر).. صلاح ساااكت. * والتش ينزل ويطلع.. من غير ما تشعر بيه.. بي كل اريحية.. كأنه شغال في حتة تانية.. أو عنده مكتب للاستيراد والتصدير.. والفول السوداني. * او زي المغترب لمن ينزل السودان في اجازة.. شكله بكون مختلف.. وعطره مختلف.. وكلامه مختلف.. وجلابيته اللابسها ذاتها مختلفة.. وساعتو.. وموبايلو.. * التش كان بتلك التفاصيل من غير ما تشعر.. تلقى نفسك قدام التلاجة.. الوداك هناك شنو ما عارف!!.. ولو سرحت ساكت.. وقعدت في حتتك تلقى (التلاجة) قدامك.. الجابها ليك شنو؟؟ ما عارف!! * أحمد حامد التش على ما يبدو.. ودي حاجة ما بقدر احددها ليكم بي شكل قاطع.. بالع ليه (كرت) بتاع بي ان سبورت.. كرت بي جهازو.. وريموتو. * طبعا الكرت بقى ما بيشتغل إلا في جهازو. * الزول دا مرة بيديك لمحة من الدوري الاسباني.. وقت يقعد يغرف بي كراعو الشمال.. ويمر من واحد واحد.. حتة – حتة كدا.. زي لمن تكون مستعجل في مناسبة.. وتبدأ في صحن الكوكتيل من قطعة الباسطة!! * والتش مرة بيديك لمحة من الدوري الانجليزي، وقت يجدع الكورة وراء المدافعين.. ومرة كمان بتشوف فيه الدوري الايطالي.. وقت يقع في الواطة ويخلص كورته بصورة قانونية. * أحمد حامد التش.. جاء للفريق الأول.. بعد ان تم استدعائه من (الرديف) عشان يتم التمارين.. الفريق الاول كان فيه نقص.. واصابات.. قالوا يتموا الناقصة بالرديف. * جاء احمد حامد التش.. أول تمرين.. كواسي ابياه فتح خشمو.. قال ليهم الزول دا من وين؟.. قعد يسأل.. وفي نفس الوقت يستغرب.. * قالوا ليه من (الرديف).. قال ليهم خلاص يستمر مع الفريق الأول.. قبل ذلك كانت لمسات التش مع رديف الخرطوم الوطني واضحة.. قالوا ليك مرة عمل عملية في رديف المريخ.. طلع ليهم (نمر) و (ضفر) من عدم.. رديف المريخ لغاية الآن بيشرب في الموية. * المهم كواسي ابياه بي عالميته.. اندهش ليك بي التش.. استغرب عديل كدا.. طبعا الاجانب ديل ما بندهشوا بي الساهل.. ولا بيستغربوا.. ما في حاجة بتعجبهم. * التش ادهش ليك كواسي. * احمد حامد من يومها داك واصل مع الخرطوم الوطني واصبح تحت اهتمام كواسي ابياه.. المدرب الغاني اصبح يشركه في المباريات بصورة رسمية.. بل أصبح أساسياً في التشكيلة. * وذهب (التش) ابعد من ذلك.. واصبح يفوز بنجومية المباريات.. فاز احمد حامد التش بنجومية سوداني وفريقه يلعب امام مريخ كوستي.. وفاز بنجومية المباراة وفريقه يلعب امام الرابطة كوستي.. وحقق التش نجومية سوداني امام النسور.. كل هذه المباريات حقق نجوميتها على التوالي. * أحمد حامد التش المشوار أمامه طويل.. إن شاء الله نشوفه في الهلال بعد البدايات المدهشة مع الخرطوم الوطني.. قولوا يا رب. * الأشول الاخر.. الذي اعاد للطرف الشمال سحره هو طرف الخرطوم الوطني أحمد آدم (بيبو) الذي نتمناه ايضا في الهلال.. ما بطلع كورة غلط.. وبمشي على القون عديل.. ولا بتلفت.. ولا في شيء بتوقفو.. بيبو لاعب صغير في السن يلعب لمنتخب الشباب.. رصده الهلال وتمناه منذ الموسم الماضي. * اعتقد ان بيبو والتش قادران ان يعيدا للطرف الشمال في الهلال هيبته.. قادران يرجعوا لينا تاني مهند الطاهر.. ومحمد حمدان.. وزاهر مركز.. من بدري بدري يا ريت الهلال يحسم موضوع التش وبيبو. * التش يمكن ان نعتبره نجم تسجيلات نوفمبر.. وكذلك يمكن ان يعتبر احمد آدم هو المكسب الحقيقي للهلال ان ظفر به في التسجيلات القادمة.. جماهير الهلال تفضل اللاعب المهاري.. اللاعب الفنان عندها زي (الجبنة).. بكمل المزاج.. طابق تالت بدون (التش) ما بتمليء ليكم.. * *هاردلك ود عبدالماجد.. كلنا كنا نتابع التش بإعجاب وكنت عندما أشاهده يقدل بالرقم 4 أقول في سري هل سجل الخرطوم نوانكو كانو؟! * وحقيقة عدم قيده في الكشف الأفريقي أصابنا بحيرة شديدة.. ويكفي إن كل الصحف الزرقاء أظهرت الفرح والشماتة لعدم قيد غارزيتو للتش في الكشف الأفريقي.. ومعها ألف حق.. * بدقسة غارزيتو سيخوض المريخ بقية مبارياته في المجموعة بدون صانع ألعاب ويا بخت النجم والهلال وفيروفيارو!!