* .. ولماذا يرفع إعلام الوصايفة رايات التحدي في وجه رئيس نادي المريخ جمال الوالي طالما أنهم سيأخذون (حقهم من البطش) كاملاً غير منقوص في ديسمبر، ويا ترى ما الذي يدفعهم لاستفزاز رجل لا يعرف المستحيل طالما أنهم يدركون حقيقة أن الوالي قادر على تسجيل نزار وبشه وبكري المدينة .. (وبلاش لخمة وثكلي ولولة ومانشيتات وسلموا يا الرشيد الأولاد بدون مقاومة وحركات)..!! * يا مزمل .. إستلم الأولاد (وخلي الجماعة يضربوا الثكلي ويعلنوا الحداد) ..!! * جمال الذي سجل طمبل وكلتشي وتراوري يعشق اللعب بالنار ..!! * جمال متخصص (قلع وتعلية أسعار ..ويا جماعة لو عندكم قروش أقعدوا مع ناس نزار) ..!! * قومة النفس حارة يا عطا المنان .. (سيبكم من المناورات وسلموا الأولاد بدون مقاومة وحركات) ..! * خلوا هيثم يمشي لنزار يقنعوا ليكم ..(ويا المدينة لو الناس ديل ما عندهم قروش أحسن تجينا) ..! * الميتين الف دولار الدايرين تدفعوها لهيثم جددوا بيها لنزار ..(واي تأخير الرماد كال حماد يا لجنة التسيير) ..!! * الثلاثي ضربة معلم يا والي ..(وقلنا ليكم ما تزعلوا جمال عشان ما يشلع الهلال) ..!! * عاملين فيها ملوك الفتاوى والتشريع ..(يلا شدوا حيلكم وتعالوا للتشليع) ..! * أثبت يا الرشيد ..ومالا (الأسياد) لبست سواد ..!؟ * يا جمال .. (العب بالنار وجهجه الهلال) .. (مالكم يا الرشيد دخلتكم رجفة .. انتو نادي كبير وعندكم لجنة تسيير)..؟؟ * قلنا ليكم ما تعادوا جمال الوالي ما سمعتوا كلامنا ..( يلا شدوا حيلكم وأسرجوا خيلكم)..! * (خيلكم) سابق ..!! * ما عندكم قروش وبتحذروا ..(لجنة التسيير تهدد امريكا) ..! * (الأسياد) تحذر ونحنا نهلل ..!! * غايتو يا عطا المنان (الأسياد) بتحذيراتها دي بتجيب ليكم كفوة ..!! * اتحملوا الكفوة ومفاجات الصفوة ..! * لو زعلتوا جمال بتفقدوا نص الهلال ..! * الله لا وراكم زعل جمال الوالي ..! * يا جمال طول بالك.. الوصايفة ديل ما بقدروا على زعلك..!! * نوم عيني البقي لي سهر.. وتسجيل نزار البقي لي (زعل)..!! * أقول ليك نزار تقول لي خليفة.. (الكرة جاريه عليهو وهو جاري من الكرة)..!! * جرايدكم زعلت جمال ..خلوها تعيد ليكم تسجيل بشه ونزار ..! * عدم حرص جمال الوالي على قراءة الصحف لا يعني أن برجاس لن يضعه في الصورة..!! * لو برجسة وضع جمال في الصورة أنسوا قصة نزار وخلوا الخندقاوي يجيب ليكم كم ماسورة ..! * ألم تحدثكم التجارب السابقة عن زعل رئيس نادي المريخ أم أنكم لم تسمعوا بالشاعرة المجيدة آمنة التي نظمت قصيدة (السيل بوبا) في شقيقها البطل محمود ود بساطي أحد ضباط قوة دفاع السودان عندما منحه الحكم الثنائي رتبة (بك) لشجاعته وإقدامه إبان الحرب العالمية الثانية فأنشدت قائلة: تغني ليك أم هاني ويشهدوا أهل المعاني نضيفاً خاتي ريحة الشاني كتل ديلك خبرو جاني..!! * يا مزمل .. جمال كتل موضوع نزار (خبرو جاك)..؟ * يا مزمل رد الناس ديل فايرين وناس نزار فايتين ..! * مزمل ما بخلي حركاتو دي (مشى أديس عمل حوار مع رياك مشار ومركز مع نزار) ..!! * يا حووصة .. حركاتك دي ما بقت مدسوسة ..! * نضيفاً خاتي ريحة الشاني .. فاوض ديلك وخبرو جاني ..! * بالله عليكم: ألم يأتكم النبأ..؟؟ * قلبي على أعلام الوصايفة وهو يفكر في تحذير جمال الوالي ورئيس نادي المريخ ينطبق عليه قول آمنة بت بساطي: تغني ليك ظبية الحدر ما بنبلع من وصفو مر المكنة فوقو بتكاكي والمدفع تحتو بيخر لا بيخاف ولا بيتر قدام العينيهم خُدر..!! * العينيهم خدُر ..(معناها القصة دي مع نزار فيها خواجات محترفين) ..! * يا ريس أوعى من سيرجيو ..(أعصاب الصفوة ما بتتحمل)..!ُ *تحذير اعلام الوصايفة يفتح نفس الوالي لمفاوضة الثلاثي مطلق السراح ودخول معركة تسجيلهم ..كيف لا ورئيس المريخ (تبراهو الشعبة والجنزير).. وغداً سنبري للتسجيلات مقاتلاً و(سيفو بدلي الجفير.. والعاداك وين يطير.. شقياً صادف نكير) نقوش متفرقة * (صبري) بيه.. بدري عليه..!! * صلاح آدم قال إنه أضاف بعض الجوانب التكتيكية في لعب (سيدي بيه).. (هو يا أبو صلاح سيدي بيه لعب متين عشان تتكتك ليه؟)..!! * أُدرك تماماً أني سأعاني غداً في إيجاد مقعد داخل القلعة الحمراء إذا أتيت متأخراً ولكني أرحب بكل معاناة في سبيل مؤازرة الزعيم في اللفة قبل الأخيرة..!! * الجماهير الأصيلة بتجي في اللفة قبل الأخيرة..!! * تعالوا بكرة بدري.. نتلاقى هناك في القلعة.. (كرة بكرة ما كرة تلفزيون)..!! * (نيلين) مين.. والناس على الإستاد جاريين..؟؟ *الصفوة يعرفون واجبهم ولا يستنفرون.. ولكن ما أحلى أن نلتقي في بروفة التتويج غداً لنهتف جميعاً: (يا الله درون.. يا الله درون)..!! * وكما قلنا أمس سنقول اليوم وغداً إننا لن نمل تذكير الوصايفة بهتافنا المحبب: (يا الله درون.. يا الله درون.. شربتو النيل الجاب القون)..!! * أعصاب الوصايفة لا تحتمل إتلافاً جديداً، فالرجاء من نجوم الزعيم حسم مباراة الأهلي مبكراً وعدم تكرار سيناريو مباراة النيل، ويكفي ما تعاطاه الأهلة ليلتها من أدوية ومسكنات وعقاقير..!! * حسم مباراة الأهلي مبكراً يعني انخفاض عدد المرضى بمستشفيات الخرطوم..!! * الوصايفة ليسوا في حاجة لمحترفين أجانب، فمستوى (المحترفين) الذين يأتي بهم الهلال لا فرق بينهم ومشجعي (الأولتراس) إلا في (مسقط الرأس)..!! * سيرجيو دا من أولاد وين..؟؟ * محترفو الهلال لم يحققوا أية إضافة فنية..(وحقيقي ناس سيرجيو ديل مجرد عمالة أجنبية) .! نقش أخير غير (التفاوض) ماليك تنين عرش دود الأربعين السيل بوبا يا الفوتك مو دحين جهجهت (الوصايفة) اللي التسجيلات راجين وتضرب في الخصوم شمال ويمين
