* يوم قالت (زرقاء اليمامة) لقومها (أرى شجراً يسير) ضربت القبيلة كفاً بكف وتاهت العقول مابين معرفتهم لقدرة الزرقاء على النظر لمسافات بعيدة وعدم منطقية ماقالته لهم :- (اذ كيف بالشجر أن يسير) , ومادروا أن (الغزاة) احتاطوا لبصر الزرقاء الثاقب بحمل فروع الشجر وتغطية أجسادهم بها ما استطاعوا الى ذلك سبيلا ..!! * فعل العدو بأهل الزرقاء الأفاعيل بعد هجومهم على القبيلة ليدرك الجميع من بعد فوات الأوان معنى حديث زرقاء اليمامة (أرى شجراً يسير)..!! * تجاهلوا حديث الزرقاء واعتبروها مزحة ولو تدبروا فيه لما وصلوا الى ما آل اليه حالهم، وهكذا هو اليوم حال (الوصايفة) شاركوا في سيكافا ثماني مرات ولو كانوا يدركون أن الزعيم سيظفر بثلاثة كؤوس منها لتجنبوا المشاركة فيها مطلقاً، وقاطعوا مجرد مشاهدتها ناهيك عن اللعب فيها ..!! * لو كانت عند (نادي أخوان فاطنة) زرقاء يمامة لكفتهم شر السخرية بدلاً عن هذه الجقلبة والتخدير، ولحذرتهم من المشاركات السيكافية بقولها (أرى "فرحا" يسير) ..!! * رغم مشاركتهم فيها لثماني مرات قالوا إن سيكافا بطولة ضعيفة، مما يؤكد أنهم هم الأضعف ..!! * أذا كان مستوى سيكافا ضعيف (انتو يا خالد عز الدين كيف)..؟؟ * يضحكون على أنفسهم كل صباح، ولا وقت لنا لنضحك عليهم فنحن مشغولين بحزمة من الأفراح ..!! * أعلن بالأمس نائب رئيس الجمهورية حسبو محمد عبد الرحمن عن تحفيز الدولة لجالب الأنتصارات الجوية بمبلغ خمسة مليارات مع (ستمية مليون هدية لأبطال المريخ كحرباشات) ..!! * (الحرباشات) دي بتجنن ناس خليفة ..!! * بكري المدينة فعلاً (ملك الجري) ..!! * بكري المدينة مفكوك و(جاري) علينا ..!! * جاري اانتقال .. (ويا الكاردينال جهز الدولار) ..!! * خمسة مليار ما كتيرة يا سعادتك .. (غايتو عصرتو علينا بالحوافز يا سعادتك) ..!! * سيكافا جات بخيرا .. (ودي بطولة مافي مثيلا) ..!! * دروشة الوصايفة عينة، قالوا سيكافا بطولة متواضعة قلنا ليهم جيبوا لينا كأس البطولات الما هينة ..!! * كنت اعتقد أن سيكافا ورمت (فشفاش) محمد عبد الماجد وحده، ولكني فوجئت بأن هدف وانغا قد فتك بمبارك البلال وأصابه بذبحة (جوية) ..!! * لو باريتوا المريخ دا يا الرشيد بعمل ليكم سكتة قلبية ..!! * آخر نصائح الوصايفة قدمها لنا حسن فاروق عبر برنامجه (زمن أضافي) الذي يقدمه على اذاعة هلا عندما طالبنا ونحن ضيوفا عليه في حلقة الأمس بضرورة (ترشيد الأفراح)، وقال وصدره يغلي كالمرجل إن فرحة المريخاب أكبر من حجم البطولة ..!! * المؤسف أن من يتحدث عن (أوزان) أفراح البطولات الخارجية لم يعرف غير (الطيران) عبر الخطوط (الجوية) ..!! * لم يسبق لهم الفوز بكأس خارجية ويريدون أن يحدثونا عن (أوزان الفرحة الجوية) ..!! * نحنا بنجيب الكأسات وانتو حددوا لينا حجم الفرحة والأوزان.. و(ما تنسوا شيلوا الشكوى ودوها لوزان) ..!! * يعني يا حسن بتفتكر خمسة كيلو فرحة كفاية بترجح الميزان ..(غايتو الوصايفة حالتهم تزعل ونقاشهم يخجل) ..!! * كلما قالوا لنا رشدوا الأفراح رددنا عليهم بحفل جديد ..!! * أمبارح يا الرشيد حرم النور متعت الجمهور .. و(الكسرت في اعلام الوصايفة جبرت في جمال فرفور) ..!! * النيران جواكم مشعللة ونحنا أفراحنا مدورة ..!! * بالمناسبة يا الرشيد الليلة عندنا كمان (أوفر نايت)، وانتو بهناك الوضع عندكم جايط ..!! * قلتو لي الكاف مستهدفكم .. (الا يكون عايز يبدأ استهداف الأندية من الصفر) ..!! * لو حتى نبدأ من الصفر .. (الفرحة) لازم تستمر ..!! * غايتو الأمين البنا يوم بكتل ليهو وصيفابي بأغنية ..(وسجل سجل يا سجل التاريخ النصر المؤزر الحققو المريخ) ..!! * حفلة امبارح فاقدة ريحانة الصفوة عصام محمد نور، والأحمر المليان طرب طلال حفلة عفواً طلال حلفا (معليش يا حسن فاروق الحفلات كترت علينا) ..!! * كل ما المريخ يجيب جوية انتو محتاجين نجيب ليكم صبر ..!! * إتصبري ..!! نقش أخير * (الكارديطار) ممكون ختو في رقبتو بلاوي ادوهو فريق ضعيف اسمو الهلال خمساوي قالوا ضامنين التأهل و(فيتا) لابد وناوي و(الكاف) لي صعودهم إلا يقلب حاوي ..!
