* مشكلة الوصايفة ليست في لاعبيهم الذين يفرطون في النقاط بكل يسر وسهولة، ولكن مشكلتهم الحقيقية في إعلامهم الذي يستعجل السخرية ويمني نفسه بالصدارة قبل أن يخوض مباراته ويجرجر أذيال الخيبة بجدارة ..! * البشوف فصاحة إعلام الهلال ما يشوف اللعيبة داخل الإستاد و(الرجفة من الأولاد) ..! * تعادلوا مع الخرطوم الوطني، وحقاً (الأولاد) قطعوا ألسنة من يزعمون أنهم (أسياد) ..! * نسي إعلام الهلال فريقه، وأهتم بغارزيتو وتعادل الفرسان، وهاهو بسرعة البرق يحافظ على الجلوس في المقعد المناسب له ويدفع ثمن فاتورة النسيان ..! * فلت الهلال من هزيمة حقيقية والمكابرة ستقود الأزرق إلي ما لا يحمد عقباه ..! * المكابرة ستقود الوصايفة للفضائح في الدوري تباعاً، وذات المكابرة ستقود الفريق للهزائم الثقيلة في البطولة الأفريقية قبل المغادرة ..! * فريق بلا مهاجم وبتكلموا عن بكري المدينة ..! * صدق مساوي وهو يقول لأحد مشجعي الفريق أمس : (أعمل شنو انا فريق ما فيهو مهاجم بعد كدا إلا أمشي ادخلها انا في الشبكة) ..! * يا كابتن باتريك قال كاريكا دا زي ميسي ..! * أمبارح ميسي ما شفناه في الإستاد .. (الزول دا ما لعب ولا شفرو الأولاد ..؟؟). * ميسي دا انتو خاتنو لليوم الأسود ..(أحسن ليكم .. وفروه في أيام أصعب جاية عليكم) ..! * مشكلة الوصايفة أن فريقهم يحتضر، والواحد يقول ليك : (الهلال يمرض ولا يموت)..! * يا جماعة باتريك دا يكتل مدينة بضواحيها، وانتو فرطتوا في المدينة وشابكننا (الهلال يمرض ولا يموت)..! * طيب أوكي .. خلونا ناخدكم على قدر فهمكم (الهلال يمرض) معقولة يكون باتريك دا (الطبيب المداويا) ..يا جماعة خليكم عاقلين (المريض دا بموت ليكم تحت يد البلجيكي دا)..! * انتو يا مساوي طوالي (الهلال دا يمرض ولا يموت).. هسه بدل (جهجهة المستشفيات) الهلال دا لو مات ما كان ريحكم وريح نفسو ..! * تعود صديقنا المطرب الشاب (صلاح ولي) المعروف بإنتمائه الأزرق أنه كلما قابلني بعد هزيمة او تعادل للهلال علق بقوله : (تعرف النتيجة دي أحسن حاجة يا أستاذ عشان نصحى شوية لانو عندنا مباريات جاية مهمة)..! * كلما تعادل الوصايفة بالممتاز برر صلاح ولي النتيجة بأنها (جرس إنذار للمباريات القادمة .. والمرة الجاية بصحوا) وتأتي من بعدها (هزيمة أو تعادل أخر) ،وفي كل مرة الأجابة واحدة (دي أحسن حاجة عشان نصحى شوية).. و(يا صلاح انتو بتصحوا متين وتمنين سنة نائمين)..! * صحي النوم يا الفقدت نقطتين من الخرطوم ..! * أتوقع أن يستيقظ الوصايفة يوماً ما على (كابوس مزعج)..! * خير ..اللهم أجعله خير ..! * يا صلاح ولي إذا ما (صحيتوا في الدوري المحلي) أحسن (تنط) من كلامك دا ..وانت يا ولدنا (النط ) فضلة خيرك ..! * بصراحة لياقة صلاح ولي التي تظهر من خلال قفزه المتواصل بالحفلات أفضل الف مرة من لياقة كاريكا ..و(نطة) سطر جديد .! * بمناسبة : (النطة) أقصد (النقطة) أحمدوا ربنا علي التعادل و(القالوا أسياد فلتوا من الاولاد)..! * يا الله درون .. يا الله درون ..ندافع نحنا ولا نحمي القون ..! * يا مساوي ..(انت كابتن أعمل ليك مرة واحدة حاجة مفيدة عشان خاطر الجمهور وقول لباتريك بالطريقة دي بتكتل ليك زول)..! * (الحظ خدم الأزرق وجعله يخرج متعادلاً) ..أنه حديث مشجعي الهلال الذين شاهدوا المباراة بالإستاد و(أهل مكة أدرى بشعابها)..! * ملوك الرِزق ..(الاولاد ضيعوا كم قون وطلعتوا بالدرون) ..! * انتو لو ما محظوظين كان بوتاكو يكون لاعب عشان اوريكم حاجات ما خطرت على عقل رواد الملاعب ..! * انتو لو ما محظوظين بوتاكو كان يكون أساسي عشان تشوفو مآسي ..! * لو انتو أصلاً ما محظوظين مدرب تحفة زي باتريك دا البخلي يجيكم السنة دي شنو (زول زي دا مفروض يكون معاكم من زمان)..! * انتو لو ما محظوظين دا وقت يجيكم فيه سيمبو دا مفروض تكون بدأيتو معاكم ..! * انتو لو ما محظوظين خليف دا يلعب في الأهلي وعلي النور لسة معاكم ..!! * يا مساوي درنتوا أمس لانو الحظ حليفكم و(لو دا فريقكم الله يعينكم)..! * إتحظظي ..! نقش أخير * الحظ مرة واحدة ما بجيك مرتين
