* إنه المارد لا كذب، إنه حامل الجويات ومفجر البراكين واللهب ..! * لو كان المريخ فريق كرة قدم فقط لما جعلناه يصبح العصب والنبض والإحساس، ولما احتكر الإهتمامات وتحكر بالقلب واستحوذ على الحواس ..! * يظل المريخ وطن وفكرة وروح وقناعة وعشق وإنتماء، فهنئياً لكم بإكسير الحياة يا محبي الفانلة الحمراء ..! * للفانلة الحمراء روحها الخاصة، ونكهتها المغايرة، واختلافها النوعي الذي لا يعرفه سوى الصفوة، ومن شدة حبنا للمريخ فإننا نتمنى الا يكتشف أحد ميزات ذاك العشق السرمدي حتى يصبح حصرياً علينا أننا لم نمت يومها بتخمة الفرحة ..! * عشقنا للمريخ ترجمه المرهف عبد الوهاب هلاوي يوم قال : هلا هلا ريدنا ليك يعلم بي الله ودمنا الجاري في عروقنا جاري في خيوط الفانلة * المريخ الذي قهر عزام التنزاني أمس الأول في ملحمة الفداء قدم نجومه محاضرة في كرة القدم، بينما رسم جمهوره لوحة باذخة الجمال لمعنى العشق والإنتماء ..! * ومن لم يكن مريخياً فعليه أن يهجر اليوم تشجيع كرة القدم على جناح السرعة لأنه سيفعلها غداً، بعد تلف الأعصاب و(حراق الروح) وحينها لن يجدي عض بنان الندم ..! * كان لون الدم يوم أمس الأول عنواناً للقلعة الحمراء التي جسّدت معنى المؤازرة وعلمّت بقية الفرق كيف يكون الحب والعشق والإنتماء ..! * وللأحمر دلالاته في كل وقت فما بالك في ساعة الفداء، وهكذا هم الصفوة دوماً على إستعداد للتضحية بالأرواح والمهج والدماء ..! * لله درك أخي محمد النصري وانت تنشد : يا مريخنا يا المالك زمام إحساسنا يا الطالع ونازل دوام مع أنفاسنا سودانك مشرفو ديمة رافع رأسنا لون الدم شعارك ودا البزيدو حماسنا * ويوم أمس الأول كان الحماس يدخل لإستاد المريخ قبل الجميع، والإصرار يشع من عيون اللاعبين والمشجعين والإعلاميين والإداريين ..! * لم يلعب المريخ أمام عزام مباراة كرة قدم فقط، بل خاض واحدة من ملاحم الفداء التي تُشرِف الوطن وستظل قصة ترويها الأجيال على مر الزمن ..! * يحسب لرئيس المريخ جمال الوالي انتباهته لضرورة تسجيل المباراة لقناعته بأنها ستكون واحدة من الملاحم الحمراء الخالدة، لذا فقد قال يوم المباراة : (يا جماعة فعلاً قررنا عدم التلفزة، ولكن لا بد من التسجيل حتى تصبح ارشيفاً في سجلات الزعيم، ويستمتع بها صفوة الخارج والولايات ومن وقفت ظروفهم سداً أمام دخول الإستاد من الجماهير) ..! * سجلت قناة النيل الأزرق الملحمة وبثتها عقب نهاية المبارة بساعة واحدة لتثبت للجميع أن الزعيم حقق أنتصاراً ساحقاً (لا فيهو شق لا طق) ..! * دا كلو كوم وقون (العقرب) كوم..!! * بكري بدأ قص شريط الاهداف ..و(العقرب جاب الأول وقال لسه ما داير اتشقلب) ..! * قلنا للمدينة .. (يا بكري اتشقلب، قال يا جماعة القون دا فتحة خشم لسه بدري علي الشقلبة) ..! * المدينة دا يوم بكتل لي وصيفابي ..! * واحد هلالابي عاقل قال لي : (تعرف يا أستاذ لو دا فريقكم عوجة ما بتجيكم .. لكن نحنا للشفناهو في كورة زنزبار لو دا فريقنا الله يعينا) ..! * مشكلة إعلام الهلال أنه يريد خداع جمهوره رغم تلفزة المباراة ..! * يا جماعة حرام عليكم الناس شافت الكورة و(الفيكم اتعرفت) ..! * طبعاً بعد النيل الأزرق بثت الملحمة ناس محمد عبد الماجد دخلت فيهم خلعة ما مرقت لحدي هسه ..(ونحنا يا حماده لو باريتونا بنجيب ليكم جلطة ودي المناظر والفيلم لسه) ..! * مفروض الملحمة دي يا مزمل ناس النيل الأزرق يجيبوها في رمضان بدل (أغاني وأغاني) ..! * ويا كبسور أعمل حسابك من مريخ السر قدور ..! * ملحمة استثنائية .. محاضرة في فنون كرة القدم ..و(حصة) ما منظور مثيلا ..! * المريخ الخطر دق الكفر ..!! * مشكلة عزام أنه تحدى المريخ فهب المارد وكسر العوارض ..! * انتو يا ناس عزام لا كلمكم باسكال لا وروكم جواسيس الهلال ..! * ألم يحدثكم الجواسيس عن أشاوس الزعيم، أم أنكم لم تسمعوا بالشاعرة المجيدة آمنة بت بساطي التي نظمت قصيدة (السيل بوبا) في شقيقها البطل محمود ود بساطي أحد ضباط قوة دفاع السودان عندما منحه الحكم الثنائي رتبة (بك) لشجاعته وإقدامه إبان الحرب العالمية الثانية فأنشدت قائلة: تغني ليك أم هاني ويشهدوا أهل المعاني نضيفاً خاتي ريحة الشاني كتل ديلك خبرو جاني..! * قلنا اننا نشفق على عزام وهو يفكر في اقتحام قلعة الداخل اليها مفقود حتى ولو كان من عتاة الغزاة، فالزعيم ينطبق عليه قول آمنة بت بساطي: تغني ليك ظبية الحدر ما بنبلع من وصفو مر المكنة فوقو بتكاكي والمدفع تحتو بيخر لا بيخاف ولا بيتر قدام العينيهم خدر * تحدي لاعبو عزام لنجوم المريخ جعل من مباراة (الخبت) ملحمة جديرة بالمشاهدة من أرض الوغى والاستمتاع بها من داخل موقع الحدث بالقلعة الحمراء، كيف لا والزعيم (تبراهو الشعبة والجنزير وسيفو بدلي الجفير .. العاداك وين يطير .. شقياً صادف نكير) ..! * أدى الصفوة واجبهم عل أكمل وجه .. وما أحلى تلاحمنا في ملحمة العبور و(حقيقي جمهور يملأ العين قطع قلب كبسور) ..! * قلنا ليكم كلموا الخصوم تأهل الزعيم محسوم ! * ضرب تمام للجواسيس قبل عزام ..! نقوش متفرقة * فعلاً المارد كسر العوارض ..! * تلاتة في الشباك و(الصفر) بهناك ..! * يا مزمل : الناس ديل زعلانين من اللافتة (الكتبنا فيها الصفر) ولا زعلانين من الصفر ..! * حقيقة (الصفر) بزعل ..! * لو زعلانين من قصة (الصفر) دي مفروض يحاولوا يجيبوا ليهم إي حاجة إن شاء الله كأس صفيح، عشان يبقوا (واحد صحيح) ..! * لو زعلانين من الصفر أمشوا اشتكونا (أصلو شكاويكم رايحة وأبواب الفيفا فاتحة) ..! * ليس مهماً أن تشعل (جويات) الزعيم النيران في أفئدة الوصايفة إعلاميين وجمهور وإداريين، ف(الأصفار) ستظل خالدة والتاريخ سيبقى محفوظاً، وكلكم يعلم أن (كبسور) ما دخل بطولة خارجية باحثاً عن كأس ثمين، إلا وخرج (صفر اليدين) ..! * يا (كبسور) لقيتنا كيف بعد العبور .. ؟؟ * حقو تختشوا شوية سوّدتوا وش البلد .. (كباسرة) وشكاوي خاسرة ..! * إختشي يا المنتظر (تشي تشي) ..! * يا بتوع الفيفا والشكاوي الضاربة ..(عزام ما اشتكى في العقرب لأنو الود جاب القون الأول ولسه ما اتشقلب) ..! * بطلوا هضربة لا يمكن قبول الشكوى قبل الشقلبة ..! * كلموا عزام يمشي الفيفا يشتكينا .. وأجهزوا لشقلبة بكري المدينة ..! * (الفيفا) مشهودة عارفاها (مشاكلكم) كتيرة موجودة والحاره بتخوضا .. (غارزيتو) يشتكي يطالب بالعندو وأنتو (أسياد) هروب والفلس جندو ما في وسطكم واحداً انكرب زندو والبعجز (يشتكي) ما بلقى البسندو و (الفيفا) مشهودة . * كل كتابات إعلام الوصايفة كانت تؤكد على أن الزعيم لن يتأهل، ونحن كنا على ثقة بخطف بطاقة العبور لذا ظللنا طيلة الإيام الماضية نحشد في الجمهور ..! * تحدثوا عن الزعيم وفريقهم محتضر .. و(الصفر) ما بشوف عوجة رقبتو ..! * الزعيم خطف بطاقة العبور وانتهى من إعلام كبسور ..! * قلنا ليكم متأهلين والقصة مسألة وقت ما صدقتونا ..و(الجوي لو قال بسوي بسوي) ..! * حتى تأتي بطول خارجية للصفرنجية سيستمر ذات الحال .. (المطار بي هنا و(الصفر) في العرضة شمال) ..! * ضبيحة و(تلاتة) مريحة ..! * رغم (التنجيم) مريخنا عظيم ..! * لم نكتب عن ملحمة الخبت بعد، ولسه ما كمل الكلام و(راجعين لجواسيس عزام) ..! * ومبروووووك يا صفوة ..! * كنا نريد الحديث عن الهلال ولكن الفاتح النقر تكفل بالمهمة وقال ان هذا الفريق الهلكان ما بمشي لي قدام ..! * بكرة إعلام كبسور بطلع الفاتح النقر طابور ..(الناس ديل لا بقبلوا الحقيقة لا بتحملوا النيران الصديقة) ..! * أجمل مافي النقر أنه انتهى من محترفي الهلال بكلام واضح وعديل، و(تاني ما تجيبوا لينا سيرة المواسير) ..! * حسب حديث النقر فإن الهلال أصبح عبارة عن مستودع مواسير ..(لكن يا ابو النقر براحة علي الناس ديل كلامك دا خطير) ..! * كنا نريد الدفاع عن مواسير الهلال، لكن يا جماعة نحنا بنفهم أحسن من الفاتح النقر ..و(يا كاردينال حالكم بطال) ..! نقش أخير * من غير المريخ يجلب الكأسات ويصنع التاريخ ..!
