* سبحان الله الذي لم يُعِد بنطلون (الشارلستون) لواجهة الموضة من جديد بينما أعاد حذاء ("ديكور" شول) .. ! * إن كان (دكتور شول) ماركة أحذية عالمية فإن (ديكور شول) آخر صيحات الموضة الآن، بينما آخر ألبوم للفنان (علي كبك) حمل أسم (مريخ كوستي شبك) .. ! * مريخ كوستي هزم التحكيم وقهر الظروف، و(سيمبو بالطريقة دي بجيهو غضروف) .. ! * يا خوفي علي سمبو من الانزلاق الغضروفي .. ! * سيمبو منعوه من دخول الإمارات بسبب الإيبولا، وممكن من الليلة يمنعوه من دخول (المقبرة) بسبب الغضروف .. ! * ديكور نفضت شبهة الإصابة بالإيبولا الحايمة حول سيمبو .. ! * إذا كان السيراليوني يدعى سيمبو، فإن ديكور سمو فاير، و(سمحة المقدرة والضرب في المقبرة) ..! * كانت بالأمس (المقبرة)، وقالوا عليها الآن (الجوهرة)، وكل المعطيات تشير إلى أنها ستصبح غداً (المحفرة) ..! * من حفر حفرة للجوهرة ستصبح حفرته محلاً للتهكم والتندر والمسخرة .. ! * الكاردينال (يحفر) للجوهرة والطابور (يحفر) للفريق ..! * فعل الغاني (ود موسى) كل ما تريد المعارضة فعله، ولم يترك (ديكور) شيئاً للطابور .. ! * (الطابور) لم يعد خارج أسوار النادي بل أصبح بين لاعبي الفريق ..(لكن دي ما غلطة اللعيبة دي غلطة الكاردينال الخلاهم يعيشوا في ترطيبة) .. ! * قالت الناطقة في مقالها عقب التعادل المُر ان مشكلة لاعبي الهلال أن كردنة وفر لهم الحوافز والراحة والمرتبات بينما لم يتعودوا في الماضي على الحوافز وكانت أحسن الأحوال بالنسبة لهم عندما تكون لديهم مرتبات لم يتم دفعها و(شوية متأخرات) .. ! * يا فطومة الأولاد ديل ما بتنفع معاهم الترطيبة والحوافز والراحة ..(خلي كردنة يمسك يدو شوية ويدفع ليهم براحة براحة) ..! * البشوف سيمبو مع ديكور يقول (متهم الإيبولا) دا مما جاء من سيراليون ما شاف قرش وغرقان في الديون .. ! * يا سيمبو البشوفك تلهث وتقابض يقول الزول دا ظروفو زي الزفت ولسة ما قابض ..! * يا كردنة لازم تمسك يدك شوية و(سيبك من الصرف البذخي الشديد وضروري بعد كدا يكون في ترشيد) ..! * كردنة صرف على الفريق كتير والرشيد أمبارح قال ليهم (الناقصكم شنو .. والمحترفين على قفا من يشيل) .. ! * الناس ديل يا الرشيد ناقصاهم العين الحمراء .. و(لازم الريس يلاقي اي لاعب يقول ليه "فتِّح عينك" وسيب الحركات وشد حيلك في المباريات) .. ! * بالمناسبة : عندما قال كردنة للكابتن بشه (فتِّح عينك)، بدلاً من أن يستفيد بشة من نصائح الريس و(يفتح عينو شوية) قام (بفتح صفحته في الفيس بوك) وكتب بوست بعنوان : (فتح عينك .. سبحان الله) .. ! * ونعم بالله يا كابتن .. (الريس عايز مصلحتك) بدل تفتح (صفحتك في الفيس) يا ريت (تفتح صفحة جديدة) ..! * لكن يا كردنة نحنا كلمة الحق بنقولا : (بشة ما بستاهل يقولو ليه فتِّح عينك) دا لاعب عاقل ومنضبط وكبير .. (كلامك دا قولو لسمبو الرفع ضغط الجمهور وقعد يتفرج في ديكور) .. ! * يا كباتن الله يعينكم وبرضو (فتِّحوا عينكم) .. ! * فجَّر مريخ كوستي ثورة الغضب ..و(الله يجازي الكان السبب) .. ! * السبب منو يعني .. (لو ما ديكور إلا يكون علي كبك) ..! * إذا كان علي كبك فنان وهمي، (فالحاجة العملا سيمبو دي زول وهمي ما بعملا) ..! * قال يس علي يس أمس ان سيمبو لم ينل حقوقه كاملة بعد فقد استلم 10 ألف دولار من جملة 40 ألف دولار ..(لو كدا مفروض سيمبو دا ما تلوموه يا كاردينال) .. ! * لكن حتى ولو كان سيمبو قد استلم فقط مبلغ 10 ألف دولار فيجب أن يحافظ على شباك فريقه نظيفة، خاصة وأن نظافة شباك الهلال لا تحتاج لحارس كما انها غير مكلفة .! * لازم يا كردنة تعمل خصومات شاملة ..و(تحمِّل كبك المسؤولية كاملة) ..! * بالمناسبة : أجمل أغاني علي كبك في ألبومه الجديد رائعته الضجة (أرميني في الشرك وقطِّع لي الشبك) ..! * ناس في الشرك والانزلاقات وناس شاغلة كل الشبكات .. ! * والعاجي ديكور موسى كشف حقيقة الشبكة الأكبر ..و(يا سيمبو سيب حركات الأولاد الصغار دي وحقو تكبر) .. ! * تكبر كيف يا سيمبو والجوهرة مشرفة عليها شركة ألعاب أطفال .. ! * سيمبو .. من شابه شركة جوهرته فما ظلم ..! * وكلو من ديكور .. جهجه الوصايفة وحير العقول ..! * إنطلاقات ديكور موسى حاجة مدروسة ..! * (ديكور) موسي يا (ديكور) موسى (ديكور) موسى للرجال خوسة يوم جانا (الوصيف) مضروب علي ضهره (الصفر) مقلوب ابكنه يا (مهيرات) حي ووب حليل (الوصيف) الوسدوه الطوب نقوش متفرقة * قام قروب (صفوة المريخ العالمي) بالتضامن مع صحيفة الصدى عصر أمس بتكريم نجمي المريخ علاء الدين يوسف وبكري المدينة، وكذلك كرّمت المجموعة الفارسين جمال ابو عنجة وعاطف القوز نجمي مانديلا وفي الخاطر شريط هزيمة الزعيم للترجي التونسي قبل سنوات طوال ..(ولا عزاء للكاردينال) ..! * شكراً لشباب ملتقى الصفوة العالمي، ونأمل أن تتواصل مثل هذه المبادرات فالقصة ما (شوية ديكور وبهرجة وتعادلات) ..! * قال خالد عز الدين أمس (الكاردينال رئيس الهلال لن نحوله لجمال)، ويا خالد إذا كردنة عمل ليكم ربع العملو الوالي .. (مفروض ما تحولوه لجمال مفروض تبنوا ليهو تمثال) . * إذا مشروع الجوهرة اكتمل مفروض يا ناطقة قبل الافتتاح تبنوا تمثال الكاردينال .. (ما تفتروا يا جماعة علي زول جاي يبني ليكم ويساعدكم والراجل بحقو ما شاحدكم) ..! * وين الوفاء لكردنة العطاء ..وشكراً لشباب ملتقى الصفوة العالمي على لفتة التكريم التي جسدت كل معاني الحب وتواصل الأجيال والانتماء . * دعم الزعيم مسؤولية جمهور الصفوة العظيم .. ! * 2870 لدعم المريخ وصناعة التاريخ * ادعم فريقك وعبِّد طريقك ..! نقش أخير * يا الداعم ما ليك تنين ركز مع تمنية وعشرين سبعين
