العتب مرفوع هيثم كابو أمور (ديكور) ماشة وشبكة الترجي (طاشة) .. ! * منذ يوم أمس الأول، وكل شبكات شركات الاتصالات مشغولة، و(الدعومات الحمراء متواصلة والرجفة وسط الوصايفة حاصلة) .. ! * تعادلات الوصايفة رجعت أمس للظهور ، ورجفة الجماعة حملت توقيع ديكور .. ! * عادت الصدارة أمس طائعة للزعيم بعد فوزه على هلال التبلدي بهدف عبده جابر، بينما نجح الهلال في التعادل مع مريخ كوستي بهدف ديكور موسى.. و(يا كبسور ما دي الحقيقة .. ديكور بعمل حاجات الناس ما بتطيقا) ..! * بمناسبة رجفة الوصايفة : يا محمد عبد الماجد عندنا تخريج (رياض أطفال) لكن منتظرين شغلكم ينتهي عشان نعملو في جوهرة الهلال ..! * جوهرة الهلال أنسب مكان لحفلات تخريج (الأطفال) ..! * يا مزمل الناس ديل انتهوا من البنيان .. (لانو شايفهم أمبارح بدأوا في "الديكور" عشان التشطيب بياخد زمن طويل وداير ليهو سنة سنتين كمان) ..! * غايتو الجوهرة كمشروع ما فيها كلام .. (لكن ربنا يكفينا شر "الديكور" والأوهام) ..! * بمناسبة الأحلام والوهم : خلونا نرجع دقائق نستمتع بالواقعية والحقائق .. ! * الواقع ما يفعله الصفوة من ترويض للمستحيل هذه الأيام، و(الوهم الكبير انتظار افتتاح جوهرة الأحلام) ..! * لو دايرين تعملوا طابق شاخور محتاجين لعشرة شهور (خالي ديكور) .. ! * كردنة قال للشركة : (تجيبوا صينيين من الصين تجيبوا صينيين من المانيا انا شهر اتناشر داير استلم الجوهرة) .. ! * تترقب الخرطوم هذه الأيام وصول الجالية الصينيةبالمانيا .. و(ربنا يكتب السلامة ولو كسرتو حيطة واحدة خايفين عليكم من الندامة) .. ! * دشن المريخ مشروع (2870) فتواصلت التحويلات وانشغلت الشبكات .. ! * والوصايفة المنتظرين وصول الترجي (ظروفهم صعبة و"ديكورهم" ساحر وشبكتم كعبة) .. !! * الجماعة قالوا مراهنين علي الترجي .. (وهلال الرهان متعود على الخسران) .. !! * تعرض حارس الترجي معز بن شريفية للإصابة في أضلع قفصه الصدري في مباراة فريقه يوم الأربعاء الماضي أمام نجم المتلوي في الدوري التونسي نتيجة التحامه مع اللاعب ياسين الوكيلي مما دفع الأطباء لمنحه عشرة أيام راحة قابلة للتجديد (وجماهير الترجي خايفة، ودا الكلام البجهجه الوصايفة) .. ! * بفقده للحارس العملاق معز بن شريفية (طش الترجي شبكة) .. ! * دفاع الترجي المهزوز لن يصمد أمام هجمات بكري المدينة ووانغا ومن خلفهما كوفي وأوكرا ..(وبغياب بن شريفية الأمور بقت مية المية) .. ! * الحارس البديل سامي هلال سيجد نفسه في ورطة حقيقية ..و(ربنا شاف بن شريفية) .. ! * مشكلتنا مع حارس الترجي سامي (هلال) الاسم .. و(سيد الاسم "ديكور" وكتين يبتسم الدنيا يا ناس تنقسم) ..! * لو أراد سامي (هلال) تجنب لدغة العقرب فما عليه سوى تغيير الاسم والرقم الوطني التونسي .. و(نحنا لاعب اسمو هلال ما بنخليه يستمر يوم واحد في الأبطال) .. ! * المدينة ما برحم أي (هلال) ..و(يا سامي عاشت "الديكورات" والأسامي) ..! * فعلاً يا سامي طالما أسمك (هلال) لازم تكون إحتياطي .. ! * مشكلة الترجي الأساسية التي ستعصف به من الأبطال سببها (هلال) .. ! * انت يا (هلال) لو عندك عُقدة المدينة بحلها ليك ..و(بذكرك ماضيك) …! * ماضي الهلال مع الترجي غير مشرف ..! * لو ناس الهلال خلوا الترجي في حالو ممكن يعمل حاجة، لكن من يوم المريخ تأهل علي حساب كابو سكورب الجماعة فرحانين وعاملين فيها توانسه ..(لحدي ما شبكة الترجي وقعت وهلال ديكور طشه .. وديل لسه شغالين برشه برشه) ..! * برشه برشه يا مدلل .. الترجي مع الهلال حيتبهدل .. ! * واحد يقول ليك : (الترجي يا أخوانا لاعب مع المريخ علاقة الهلال بالموضوع شنو ) ..؟ * كيف علاقة الهلال شنو .. (ديل سايبين سانغا ومتفرغين للترجي) ..! * مشكلة الهلالاب لو ركزوا مع تيم ممكن (يشربوا) الفريق واللاعبين الأساسيين والكنبة والجهازي الفني والإداريين .. ! * قلنا ليهم الترجي دفاعو تعبان قالوا ما مشكلة في معز بن شريفية .. ! * ركزوا مع الترجي (كلام ونقة وأوهام) بصورة يومية فانفتحت شهية شباكهم لديكور وشربوا بن شريفية ..! * النقة (كسرت) الحجر ما تكسر ضلعة بن شريفية ..! * يا جماعة خلوا التوانسة في حالهم، لانو بطريقتكم دي الترجي حيفقد (أفول) مع بن شريفية واحتمال (الكاف) يستبعدو من التنافس بدل ينزلو الكونفدرالية .. ! * لو الترجي فقد أفول مفروض التوانسة يحملوا المسؤولية لديكور .. ! * فقد الترجي بن شريفية ومصيبة عملاق بن سويقة هينة .. (انتوا خليكم مع ديكور وأطلعوا من الموضوع لانو شرابكم عينه) .. ! * إتشربي .. ! نقوش متفرقة * كوستي جميلة وعزيزة و(ديكور) نسف فكرة الجوهرة ركيزة ركيزة .. ! * يجب على صديقنا يوسف ابو حميد تحفيز ديكور ..(لانو العاجي زاد شكاوي كبسور) .. ! * ناس ابراهيم عوض قطعوا الحركة .. (الجماعة ديل دخلوا في صمت انتخابي ولا شنو يا مزمل) .. ؟ * الإنتخابات بكرة يلا (اكلوا توركم وادوا ديكوركم) .. ! * ديكور مرشح دائرة الردع والمرور ..و(يا سيمبو لو عندك ذرة من كرامة ما بتقعد تاني يوم واحد في الخرطوم) ..! * الهلال .. آخر ظهور في نقطة ديكور ..! * دعم الزعيم مسؤولية جمهور الصفوة العظيم .. ! * 2870 لدعم المريخ وصناعة التاريخ * ادعم فريقك وعبِّد طريقك .. ! نقش أخير * يا الداعم ما ليك تنين ركز مع تمنية وعشرين سبعين ال سيل بوبا يا الفوتك مو دحين
