الزمان: ليلة صيف..متل صيفنا ده، تحديدا ساعتين كدي وبرنامج (تلفون آخر الليل) من (اذاعة صوت العرب) يبدا. المكان: بيتنا..(يابا) جدي لامي مستلقياً على عنقريبه واضعا الراديو بجانبه، فيما (يُمه) جدتي لامي تحجي فينا اطفالا ب(حجوة حدوقة وحدقدق) بتشويق قائلة: آهه لمن ست القليلة الحميراء الجرة بتكب الموية في ازيار بيتم قامت رفعت راسها وقالت لامها البتمشط في شعرها بضوء القمر: امي..هي واااي انا ما نسيت اخبرك انو انا لي 3 يوم كل ما ادور انشل الموية الا اسمع ليك صوت من جوه البحر بيقول لي:( يا ست القليلة الحميراء الماشه في القميراء قولي ل(حدوقة..حدقدق مات)! وهي بس كدي تمت كلامها الا وتشوف ليك هي وامها خلقا ما ليها حد طالعة من تحت صاج الكسرة ومن جوه بيتم كاسرة على باب الشارع وهي تطق في الثكلي وتسوي في الحي وووب على (حدقدق المات)!، وهي بالخُلعة كبت مويتها في الواطة اما امها فبقت تنقض في شعرها المشطتو بايدها وتسوي وتقول هي يا يمه بسم الله! .. اما (نحنا) وعند ذاك الحد فقد اوقعنا الراديو ارضا فيما نحن (ناطين) ل(يابا) والذي ما ان كنكشنا بصدره العاري المتعرق بعض الشيء الا وب(خُلعة) صرخنا به قائلين:( يابا..الحقنا)!. حتى اذا ما كبرت وشرفتني (جامعة الاحفاد) بالدعوة للمشاركة بورشة (اعادة كتابة الاحاجي) الحاضرتنا فيها كل من:( د. سحر الموجي، د.منيرة سليمان، د.سهى رأفت ود.منى ابراهيم) الباحثات بالجامعة الامريكية بالقاهرة والمُشكلات لمجموعة (المرأة والذاكرة)، حيث قمن المصراويات ال(4) بعرض نماذج لاحاجي ناقشن فيها معنا صورة المراة السلبية بها، ثم طلبن من كل منا اختيار حجوة واعادة كتابتها بحيث نقدم فيها المراة بصورة ايجابية لاجدني اختار حجوة (علاء الدين والمصباح العجيب) التي حينما انتبهت لانها (حكاية واحد لقى ليهو مصباح خلاهو يبقى غنيان وهو راقد على حمير قفاه) وجدتني باستهجان متساءلة: حسع عليكم الله (علاء الدين) ده للعطالة ما..عراب؟! وبعدين حكاية انو شاف الاميرة صدفة في سوق ام درمان وقام خطبها من ابوها السلطان وهي بسهولة خلت (دُخري العمر) وقبلت بيهو خلتني ب(غيظ) اسال (علاء الدين): عرفت من متين يا يابا عشان الاميرة توافق بيك ببساطة كدي..إتسكيت معاها في مظاهرات.. والا يوم بمنتهى الصراحة قالت ليك: اديني حق المواصلات؟!! حتى اذا ما وجدتني يوما جمب النيل من محاضرة عائدة، تحديدا ساعتين كدي وبرنامج (تلفون آخر الليل) من (اذاعة صوت العرب) يبدا، للبحر ناظرة نظرة ظاهرها الاطمئنان (باطنها الخُلعة) وجدتني (انط) ل(ذاكرتي) لاعيد بها كتابة اسم (حجوة حدوقة وحدقدق) ليصبح (حدوقة وحدقدق في زيارة للشرق الاوسط)، حتى اذا ما سألتموني بجدية: ما (وجه الشبه) بين (حدوقة وحدقدق) و(رايس وبوش)؟! لاجبتكم بضحكة مكتومة: خُلعتنا اطفالا..وخُلعة حكام الشرق الاوسط..كبارا!. * بالمناسبة: شروعي في تأليف وكتابة سلسلة ( أحاجي أم هايدي ) هو سبب تذكري لعمود( حجوة حدوقة وحدقدق ) .. والمصراويات ال(4)!، ومن ثم إعادتي لنشره من تاني.
