- مرات الزول بشغل روحو بقصة عابرة لاقتو كدا فجأة .. وبقوم بحاول يفتش ليها نهايات (كان ماعندها) والقصة دي بتشيل من بالو الكتير ببقي بفكر فيها في الوقت الصاح والوقت الغيرو ...القصة دي ممكن تكون قابلتو في ورقة او اغنية او سمع بدايتا في مواصلات وناس القصة نزلوا قبل النهاية وقبل محطتو ... - في تانية ثانوي كنت عاملة فيها بكتب شعر .. بكتب القصيدة الليلة وبكرة طوالي بمشي بقولا في برنامج الصباح لو كان البرنامج علينا ولو ماعلينا .. تاني قصيدة كتبتها سميتا (اتكلمي) ويبدو اني كنت (بحنس ) وبترجى في زولة عشان تتكلم .. حتي اني في نهاية القصيدة قلت ليها صمت الشجون بعمل جنون اتكلمي بلغة العيون .. اتكلمي بالابتسام .. اتكلمي وبصمت الكلام .. اتكلمي ومن غير كلام .. اتكلمي يعني اصلي ماقصرتا معاها .. اكتر من اقول ليها من غير كلام اتكلمي .. غلبني ذاتواقول ليها شنو تاني .. المهم مشيت قلتها في الطابور وكانت القصيدة رقم اتنين في شعري (كان هو اصلاً شعر) .. زميلتنا من (الصف الثالث) اظنها وبعض الظن صاح .. الحصتين الاوائل ديل مافهمت ليهن حاجة البتة ... بقي بالا مع الزولة الفي القصيدة راسا كلو اسئلة (التقول بتبقي ليها) ... قامت اتهورت و جاتنا في الفصل والحصة التالتة شغالا .. قالت للاستاذ (البدرسن )ماشة اشرب موية.... وجات دقت الباب ... الاستاذة البتدرسنا نحنا قالت ليها (نعم).. قالت ليها دايرة هناء ...دايراها (في شنو؟؟) ولا جاوبت للاستاذة طوالي جات وقفت جنبي .. قالت لي انتي يا هناء البت القبيل الفي القصيدة في النهاية اتكلمت واللا لسه ؟؟ قلت ليها تعالي بعد الحصة بوريك البقا عليها شنو (وانا اصلاً ماعارفة البقى عليها اظني).. الاستاذة دي زعلت زعل ... وزهجا كلو طلعتو فيني انا المسكينة دي ..قالت لي تاني ياهناء يابت ابراهيم نهائي ما تقولي شعر في الطابور .. قلت ليها جداً.. قال ليك انا مابسمع الكلام واللا مابسمع الكلام؟؟ .. والله يا استاذة انتي لو قلتي لي الامتحانات ما تمتحني .. وانا ما قارية ... ما بمتحن .. خلي الشعر الهين دا .. انا يا استاذة بالنوال زغباوي كدا (الشعر) خلاص حرمتو وقفلت خلاص على بابو....وفي رواية اخرى (شباكو) *الاستاذة دي انبسطت مني بسط .... ماباقي ليها إلا تديني كاس (سمعان الكلام ) *قمت مشيت البيت وختيت (اتكلمي ) دي ذاتا قدامي ولحنتها بالصح وبالكضب وجيت الصباح عزفتها وغنيتا ليهم في الطابور .. هسه انا قلت شعر ؟؟ دايرة معاي شنو ؟؟ بعد غنيتا الاستاذة جات قريب مني وقعدت تضحك .. قالت لي كان قلت ليك تاني ماتغني بكرة بتجيبها لي تمثيلية .. ... قلت ليها من هسه قولي لي ماتمثلي عشان اجيبا ليك من حيث لا تدري ...بعد داك كتبتا قصيدة قلت في نهايتا .. بس القدر ما قال كدا ورسل شمس في ضُلنا كل يوم الاستاذة دي بتجي بتسألني من ضلنا دا .. لحدي ما خليت الشعر وزرعت شجرة ما فيها ضل ...وهسة انابسلم عليها وبعتذر ليها و... وبعترف دا تحريض مني للبحث عن الحل الآخر و ... - و...... خد قلبك وامشي والله جد..