# انتشرت في ولاية الخرطوم حدائق الهواء الطلق. الناس يعشقون الخضرة والماء والوجه الحسن، لذا وجدت الحدائق التي انتشرت في العاصمة المثلثة وتجدها في الخرطوم في شارع الغابة وشرق المطار وقرب صالة المعلم وغرب كبرى القوات المسلحة وشرق الزوادة بالقرب من موقف شندى، وفي امدرمان حديقة ميدان البحيرة وفي شاطئ الموردة شرق صالة الخليل وجنوب صالة الريفيرا وجنوب صينية المهندسين. # حدائق حبيبي مفلس ومتلش وما مريش يؤمها الشباب المرتبطون. ظواهرها ليس فيها بوفيهات او عربات آيسكريم، يتواجد فيها بائعو التسالي والترمس والكبكبي اغلى ما فيها بائعو موية الجركانة وبائعات الشاي والقهوة، كما ان من ظواهرها ليس فيها عربات هايس او امجاد فروادها اما يأتون كدارى او يستعملون الركشات يعنى الخطيب ممكن يمشى بي قلب قوى وانه ضامن ما حيصرف الكثير من المال. مفلس وعرفناها اما متلش فمشتقة من التلاليش اي الشلاليف ومعناها الشفتين والزول المتلش معناها زول زعلان ومبوز اي (مادي بوزه) (اعوذو مده بوذه). # وبمناسبة الفلس جاء في الاخبار في الصحافة العدد رقم 5891 (مشردان مجريان يعيشان في احد الكهوف بضواحي العاصمة المجرية بودابست، وانهما كانا يبيعان الخردة ورثا سبعة مليارات دولار بعد ان ابتسم لهما الحظ وورثا هذا المبلغ الخرافي من جدتهما الألمانية التي كانت حادة الطبع وقاسية وهجرت اسرتها وفقدوا الاتصال بها بين عشية وضحاها اصبحا مليارديرين «ويرزق من يشاء بغير حساب»). # وجاء في الاخبار ايضاً ان طالبا مودلوفياً ورث مليار دولار تركها له عمه. هذا الطالب اصر على اكمال دراسته الجامعية. هدايا الحلقة: 1/ شحات في منطقة التقاطعات التى تقف فيها الحركة عند اشارات المرور طلب من سائق اللاند كروزر ان يعطيه كرامة. الراجل اداه الف جنيه وقال ليه شكراً لكن بالطريقة دي حتجنن ليك شحات. 2/ جعلي غني جداً وجد المصباح السحري دعكه طلع ليه العفريت قال ليه شبيك لبيك ماذا تريد؟ الجعلي قال ليه ماذا تريد انت يا ابن الكلب. 3/ رئيس دولة فقيرة ذهب في زيارة لاحدي الدول الغنية استقبله رئيسها ورحب به وقال خذوه الى قصر الضيافة. الزائر قال لي لا انا عايز بدل سكن. 4/ واحد شمشار لقى زحمة سأل احدهم ماذا هناك؟ قال ليه حادث وفيه ميت خشى في الزحمة وقال للجماعة زحوا انا عم الميت قاموا عاينوا ليه باستغراب وافسحوا له ولمن دخل لقى الميت حمار!. 5/ دولة غنية تبرعت بشحنة ادوية الى دولة فقيرة، رجعوا الشحنة لانه مكتوب على الادوية تؤخذ بعد الاكل!. 6/ جعلية ولدت الشافع وهو نازل قال للداية ابعدي يدك انا حأنزل براي!. 7/ ما هو الفرق بين الزوجة والارهابي؟ الارهابي ممكن تتفاوض معاه. 8/ واحد اقليمي حلف لو ولده نجح يذبح خروف. سألو عن النتيجة قال ليهم الخروف نجا من الذبح!. 9/ الولد قال لامه ابوي اصلع ليه؟ قالت ليه الصلعة علامة الذكاء قال ليها عشان كده انت شعرك طويل!. 10/ واحد اسمه حنفي كان بمشي وينقط. 11/ ديك الشايقي دق ديك الجعلي. الجعلي قال للشايقي الفي الديوك اتعرفت كدي امرق لي لي برة!. 12/ عريس من اصحاب الخيال اصحابه قالوا ليه ماشين نجيب الثلج. قال ليهم كويس بس عزلوا السآآآقط!. 13/ كمساري مشى يتزوج مهره كان ناقص كتب الباقي على ظهر القسيمة!. 14/ سباك اتشاكل مع مرته ضربها «بالكوع». 15/ واحد اتشاكل مع مرته قال ليها بعد اطلع من تحت السرير حأوريك قالت ليه حتوريني شنو يا جبان؟ قال ليها حأوريك الدم النازل من وشي!. 16/ رباطابي لقى ليه جعلي بيبرم في شنبه الطويل قال ليه اذاعة امدرمان دي لقيتها ولا لسة!. خاتمة: الرسول صلى الله عليه وسلم استعاذ من الكسل والفلس، وسيدنا على قال لو كان الفقر رجلاً لقتلته. اللهم اغننا بحلالك عن حرامك، وبفضلك عمن سواك.
