*بداية.. أين بلوبلو من الحفلات الجماهيرية؟ أنا غائبة لسنوات طويلة من الحفلات الجماهيرية لأنها سبّبت لي مشاكل كثيرة واستدعاءات، عشان كدا بقيت أغني في المناسبات الخاصة فقط. *مشاكل مثل ماذا..؟ وما هي الجهة التي قامت باستدعائك؟ لما سجّلت حلقة في قناة هارموني مع فرقة فنون شعبية - وأنا أصلاً فنانة استعراضية - تم استدعائي من المدعي العام و(7) وكلاء نيابة.! ودا كلو ليه؟ أصلو أنا عملت شنو؟ والعالم كلو عارف إني فنانة استعراضية والآن الفنانات كلهم بيغنن وبيرقصن وشعرهن مكشوف في التلفزيون يعني بقت عليّ أنا..؟ *إذاً كيف تتواصلين مع جمهورك؟ أتواصل مع جمهوري عبر وسائل التقنية الحديثة. *ومُشاركاتك في المهرجانات؟ دي بيشاركوا فيها ناس محددين لأنو التلفزيون عندو ناس مُعيّنين، وعندما أسافر للمشاركة بالغناء في الخارج ما بتكون بدعوة رسمية، بل عن طريق المُتعهِّد، وأنا بعمل إجراءاتي وبسافر بطريقتي الخاصة وأنا عضو أصيل في اتحاد الفنانين، لكن ما حصل يوم واحد قالوا لي يا حنان دايرنك في سفرية، هم فقط بيسهِّلوا إجراءاتي لأني عضو ومحمد سيف ما بيقصر معاي. *ما هي علاقتك بالسياسة؟ نهائي ما عندي علاقة بيها وما بفهم فيها، منو البجي واللاّ منو البمشي. *كنت قبيل سنوات فنانة طبقات ارستقراطية فقط.. ما تعليقك؟ بالعكس، في بدايتي بالعكس كنت بغني في أيِّ مكان، غنّيت في (كرتون كسلا) وقتها كانت مصنفة من المناطق الصعبة من ناحية أمنية وغنيت فيها واستقبلوني في (جبرونا) ووراء الجبال، وغنيت في مناطق أصعب من كدا، والفنان في أي مكان عندو مُعجبين عشان كدا ما بغني لطبقة مُعيّنة. *هل حدث وأن تغنّيت ب(المجان)؟ العملتوا ما بتكلم عنو، الزمن هو البيحكم، وأنا أي زول دقّ بابي ما رجع ساي. *هل بداخلك حس (إنساني)؟ الفنان لازم يكون عندو رسالة، لأنو الفن ما عربات ولا بيوت، لازم تشوف المُحتاجين وتقيف مَعاهم. *- مُقاطعة - يعني ما مُتابعة موضة العربات والتلفونات؟ قبل كدا ركبت تيكو (صفارة الحكم) والمهم هي وسيلة مواصلات، والبوبار لزومو شنو..؟ وتلفوني ذاتو (اس 3) وما بغيرو نهائي. *في زمان الشريف.. هل سافرت إلى نيجيريا؟ أنا مشيت نيجيريا مرتين بدري في فترة الثمانينات قبل الشريف - في بداية شهرتي - وكان معي الفنان الراحل محمد وردي والشريف دا ظهر في السنوات القريبة دي. *ما هي الهدايا التي عدت بها من هناك؟ عدت بكميات من الذهب وب (شوالات) قروش!! *ماذا تبقت في ذاكرتك من بدايات مسيرتك الفنية؟ تبقت ذكرياتي وأنا أغني بالدلوكة في الأعراس في حيّنا وتبقت ذكرياتي في مركز شباب أمدرمان وفرقة ناس حمادة وإسماعيل أبو رأس وحيدر أبو شيبة، ولن أنسى بالطبع وقفة الصحافة معي ودورها الإيجابي في دعم مسيرتي الفنية. *هل اعترضت أسرتك على أن تصبحي فنانة؟ الاعتراض كان من خيلاني، كانوا بيشاكلوني ويضربوني وكانوا رافضين، لكن في النهاية اقتنعوا واتزوجت بشير سريع عشان أغني. *ما هي علاقتك بالصوفية؟ من بديت الغناء سنوياً بعمل ليلة ذكر بمناسبة المولد وبيجوني ناس الطرق الصوفية من زمن كنت في الهاشماب. *تزوّجت من الفنان الراحل محمود عبد العزيز وأنت أكبر منه سناً؟ أنا ما صغيرة، والحمد لله ربنا يكبر العقول، أنا ومحمود مولودين في سنة واحدة وقتها كنت في الأطفال والأناشيد ومحمود كان في التمثيل، بس أنا غنيت قبل محمود ولما اشتهرت أنا محمود كان لسه. *محمود رقم كم في العدد الكلي لزيجاتك؟ محمود الثالث بعد المرحوم بشير أبو أولادي. *هل يمكن أن نسمع بك قريباً في تجربة (رابعة)؟ إطلاقاً ما فكّرت في حاجة زي دي! *زيجة ندمت عليها؟ ولا واحدة.. لأنّها كلها اختياري الشخصي. *أول عداد؟ 10 جنيهات. *فكرة الاستعراض؟ من برامج الأطفال لازم تكون في حركة، لما بديت أغني، الفنان كمال ترباس قال لي بترقصي كويس، ليه ما تغني وترقصي؟ *الآن غلب الغناء على الرقص؟ زمان كان عندي شجاعة نهائي ما بخاف، لكن الزمن ده بقيت أخجل! *أول هدية تلقيتها في حفل؟ في حفل زواج شاركنا بالغناء فيهو أنا والفنان الراحل زيدان إبراهيم بالثورة، تم إهداء زيدان نجمة من الذهب وأنا غويشة من الذهب. *ما هي قصتك مع (كرسي جابر)؟ كرسي جابر عقد من الذهب الخالص وأول ما طلع اشتريته كان ب 3 آلاف جنيه وكنت بلبسو لأنو بيساعدني في الرقص، فهو طويل وبيتنفض بعيد مع الرقيص! *تعشقين الذهب؟ حالياً بقي ما معروف الصيني من الذهب الحقيقي وحبي ليهو لأنو كان بحفظ لي المال. *هل قُمت بإجراء عمليات تجميل من قبل؟ لا أبداً، والقروش دي عملوها للمعيشة ما للعمليات الزي دي. *أولادك.. علاقتك كيف معاهم؟ أولادي (محمد ومعزة ومعتز وتبيان) وعلاقتي بهم جيدة جداً بنساهر ونتفاكر وخاصة الصغيرة والعزيزة على قلبي بتي الصغيرة (تبيان) فهي بالنسبة لي روحي ونفسي أنا خليت السفر الكتير عشان أراعيها والسنة الجاية مُمتحنة وبدعو ربنا يوفقها. *والجيران؟ زمان في الموردة كانت الطاقات مفتوحة في بعض، الآن سكنت في حي برضو جميل واجتماعي بنتواصل في الأفراح والأتراح. *اختيارك للأزياء؟ بمشي السوق بشتري الجميل والأنيق وما شرط أكون مُتابعة المُوضة. *علاقتك بالمطبخ؟ ضحكت وقالت: (مالك ما ضقتي أكلي؟)، أنا ما من النوع البعتمد على خدمة الغير. *متى ستعتزل بلوبلو؟ والله بفكر كتير في الموضوع دا، بس بتراجع تاني. *علاقتك بالفنانة إنصاف مدني؟ والله علاقتي بالناس كلها حلوة إنصاف زولة أخت لكن كل زول ملهي بي شغلو. *وندى القلعة؟ علاقتنا كويسة. *تقييمك للأصوات النسائية الظهرت مؤخراً؟ ظهرت أصوات جميلة وأصوات أخرى ما عندها علاقة بالغناء خالص. *هل تعرّضت للظلم؟ الظلم كتير، لكن الزول في النهاية بيرفع يدو لله. *التواصل بين الفنانين؟ جيلنا متواصل حتى الآن، لكن الجيل ده ما عندو تواصل. *بعد هذه المسيرة الطويلة ماذا تتدخرين؟ الحمد لله مستورة وما في إنسان بشيل معاهو شئ، والحمد لله، أولادي شايلني كان غنيت أو ما غنيت. *رصيدك في البنك؟ ما عندي رصيد في أي بنك كفاية الحصل لي من البنوك والشيكات!