في العام الأول من الزواج: هو: حبيبتي...انا لا اصدق انني معك تحت سقف واحد. هي: حبيبي انا لك..وانا ملكك..سأظل خادمة تحت قدميك. هو: لا...انتي لست خادمة...انتي ملكة حياتي المتوجة.! هي: وانت امبراطور دنيتي...وحاكم مدائن قلبي وحامل مفاتيحها.! في العام الثاني من الزواج: هو: اشعر انك اصبحتي بعيدة مني بعض الشئ..؟ هي: كلا...انت الذى اصبحت تهتم بعملك اكثر مني. هو: لا...انتي من اصبحتي لاتهتمين بي ولا تسألين عني. هي: اذاً لنمنح انفسنا فرصة اخرى لنقترب اكثر من بعضنا. في العالم الثالث من الزواج: هو: الا تعتقدين انك تقومين بمنح ابنائنا اهتماماً اكثر مني..؟ هي: عزيزي...الابناء صغار بحاجة للرعاية والمتابعة. هو: وانا ايضاً احتاج لحنانك..لماذا تغيرت نظرة عطفك واين ذهب حنانك..؟ هي: موجود ياعزيزي...فقط دعني اذهب لوضع العشاء للاولاد واعود اليك لنواصل حديثنا.! في العام الرابع من الزواج: هو: ياولية...ياخ وين الشبشب بتاعي الكان تحت التلاجة..؟ هي: ماعارفة والله...يكون شالو واحد من الاولاد مرق بيهو. هو: لاحول ولاقوة الا بالله العلي العظيم ياخي دي عيشة شنو ياخ. هي: معليش...حنعمل شنو...ماهم اولادنا في النهاية. في العام الخامس من الزواج: هو: والله انا عايز افاتحك في موضوع كدا. هي: قول...انا سامعاك. هو: انا قررت (اعرس)..ماعشان انا داير كدا...لكن لقيت لي واحدة مسكينة ومحمولة قلت اقيف معاها. هي: سجمي ياراجل داير تعرس علي...الليلة ووووووووووب..!! في العام السادس من الزواج: هو: والله دي حياة اخير عدمها بي صراحة يعني. هي: مالك ماعاجباك حياتنا...خلاص معناها شفت ليك شوفة. هو: شوفة شنو يامره...والله انتي كرهتيني (الصنف) ذاتو..؟ هي: دي انا...طييييب..كان كدا انا ماشة بيت ابوي. بعد مرور عشرين عاماً على الزواج: هو: انا وصلت لقرار نهائي...وهو اننا لازم نتطلق.! هي: لو انت شايف كدا...خلاص...اعمل الدايرو. هو: معقولة..؟؟..وصل بيك الاستهتار للدرجة دي..طيب انتي (طلقانة). هي: تمام...بس ماتنسي قبل ماتطلع تخت لي قسيمة الطلاق في الطربيزة البره دي عشان الصباح الف بيها السندوتشات للاولاد.! شربكة أخيرة: مفردات هذا المقال غير (شاملة ضريبة) وجود (تسلسل طبيعي) للزواج في نماذج اخرى، لذلك الرجاء تعبئة رصيدك العاطفي قبل ان تجرى اياً من مكالمات (الارتباط الابدي)...(تيت...تيت...تيت)..!!
