*قبل كدا كتبت عن الفنان مصطفى السني وقلت إنو زول (محظوظ) ساااااكت. *أها...الناس دي كلها ماريحتني. *البقول ليك: (ياخي دا زول مخضرم)...والبقول ليك: (يازول...مصطفى دا معتق)..وبرضو يجيك واحد (مشاتر) كدا يشبكك: (علي الطلاق مصطفى دا الوحيد البيغني صاح).! *إنتو الناس دي مالا بقت كدا..؟ *بقت تحب (كسير التلج) بطريقة تخليك (تبرد) وإنت في (عز السخانة).! *ياجماعة...إنتو جادين إنو مصطفى السني دا (مخضرم)..؟ *طيب إنتو جادين إنو (مُعتق)..؟ *(معتق) بين السماء والأرض..!!! *كدي خلونا جادين شوية. *إنتو عارفين إنو ود السني دا من غير أغنيات أبو داؤود بيكون عامل زي شنو..؟ *زي المكيف من غير (موتور). *هسي بذمتكم في زول بيمشي يشترى ليهو مكيف مافيهو (موتور).؟ *هسي واحد من (كسارين التلج) حيجي ناطي لي في العمود دا ويقول لي: (أنا).! *ياخي إنت ب(النيني). *إنتو (النيني) دا شنو..؟ شربكة: *يامصطفى ياأخوي...والله أسمع كلامي دا وخليك من الناس (الحربويات) ديل. *يازول سيب أغنيات أبو داؤود دي في حالا، وأمشي أعمل ليك غناء خاص تقدر تقنع بيهو الجمهور السوداني دا. *إنت يامصطفى ماعارف إنو الجمهور السوداني دا (صعب) يقتنع بي فنان سااااكت كدا..؟ *خلاص ياجماعة...من الليلة مصطفى شكلو حيسمع الكلام وحيمشي يعمل غناهو الخاص...وبي كدا يبقى (موتور) قائم بي ذاتو، وممكن كمان (يركب) في أي مكيف تاني.!!! شربكة ونص: *إنتو قصة (الموتورات) البضرب بيها المثل الليلة دي شنو..؟ شربكة ونص وخمسة: *يابت...والله إنتِ (موتور) حياتي ذاتو...(اللهم إني صايم).!
