* في وقت سابق كان الناس يشترون البطيخ عن طريق الخبرة والإحساس .. * العندو خبرة أول ما يهبش البطيخة كده بيعرفها حلوة ولا ما حلوة .. * والما عندو خبرة بيشتري البطيخة عن طريق الإحساس .. * يقول ليك أنا حاسي البطيخة دي حمرا وحلوة .. * بالإحساس يشترون البطيخ .. * الواحد يكون في الحب والريد ما عندو إحساس لكن في البطيخ بشتري بالإحساس .. * أول مرة في حياتي أشوف لي زول بيشتري بطيخة عن طريق الإحساس .. * لاحقاً أصبح البطيخ على السكين .. * تعزل بطيختك ويطعنوها ليك بالسكين وبعد داك تقرر .. * زمن البطيخ بالخبرة والإحساس انتهى .. * بينما المؤسف حقاً أن الهلال والمريخ (القمة السودانية) ما زالت تشتري المحترفين عن طريق (الإحساس والشكل) * أصلاً الخبرة ما في .. * لو شافوا أجنبي حالق حلاقة شاذة ولابس برمودا وعندو شويات عضلات طوالي برسلوا ليهو تأشيرة وتذكرة .. * والله صحي .. * معظم المحترفين الذين لعبوا للهلال والمريخ في عهد الكاردينال والوالي تم اختيارهم عن طريق الإحساس .. * وبعد ده سمسرة وكضب وتخدير .. * نسأل الله أن يكون (الإحساس) صادقاً هذه المرة فيما يتعلق بتسجيل الهلال للثنائي الجزائري والتونسي .. * بنقول : (على الله وعلى إحساسكم) .. * حاجة تكسف .. * السودان حالياً هو البلد الوحيد في العالم الذي تحدث فيه محاولة انقلاب كل أسبوع .. * لا أعلم هل الانقلاب أصبح سهلاً أم أن الوضع الأمني أصبح محفزاً ؟ * ثم السؤال الأهم : ترى ما الذي يعجب مدبرو الانقلاب في الانقلاب ؟ * العاجبكم شنو يعني؟ * البلد واقفة على الحديدة بعد أن ضربها أهل المؤتمر الوطني .. * ضربوها وحلبوها ومصوا دمها .. * بلد مليانة خير، بلد كانت سلة عذاء العالم وفي عهدهم أصبحت (متسوِّلة) .. * بلد في عهدهم ماشة بالشحدة .. * هذا الوطن يحتاج لضمائر وعقول .. * لا نحتاج لبطون .. * البطون التي لا تشبع لا مجال لها الآن .. * العمل (كرش) عمل والما عمل تاني ما في (كرش) بتبقي بقروشنا .. * ما في سرقة وظلم و(نهب مصلح) .. * النهب المصلح أضر بهذا الوطن أكثر من النهب المسلح .. * وغايتو جنس غايتو .. * قبل أن يعتزل ويغادر إلى المجر (خرب الهلال وش مع بشة). * عاد الآن بشة مؤهلاً ومحملاً بالشهادات فهل نشاهده داخل نادي الهلال في أي موقع ؟ * بشة بقلبه الطيب لن يعاقب الهلال وجمهور الهلال عشان الكاردينال ومجلسه الهزيل .. * بشة لاعب كبير وسيكون مدرب كبير ولذلك الاستفادة منه واجبة .. * يجب أن نفتح لبشة أبواب النادي .. * يجب أن نسلمه قطاع الشباب فهو صاحب خلق وفكر وحكمة .. * كنا نتمنى أن تكون نهاية بشة مع الهلال أجمل وأفضل من تلك التي خرج بها بعد أن ضايقوه وطردوهو بطريقة غير مباشرة .. * عموماً نراهن على أخلاق بشة وعلى دواخله البيضاء ونتمنى له التوفيق في مشواره القادم .. * المهم .. * عودة المدافع محمد المعتصم سيكون فيها إضافة لدفاع الهلال .. * كانت معاناة دفاع الهلال في السنوات الماضية مختصرة (الكيف) .. * لم يعان دفاع الهلال من (الكم) ولكنه عانى من (الكيف) * ولكن في الموسم الماضي كانت مشكلة دفاع الهلال ومعاناته في (الكيف والكم) .. * وهذا ظهر بعد إصابة عمار وحسين الشيء الذي جعل سموأل يكمل الموسم مدافعاً .. * الآن بعودة محمد المعتصم وتسجيل التونسي وسفاري ستنتهي مشكلة (الكم) ونتمنى أن تنتهي معها معاناة (الكيف) .. * وبالمناسبة .. * كلما أتذكر أن دفاع المريخ يقوده نمر أحس بكثير من الطمأنينة .. * صلاح نمر هو أول لاعب في تاريخ كرة القدم (ينعس) والمباراة شغالة وهو لاعب أساسي .. * والله صحي .. * في البطولة العربية الأخيرة أظهرت الكاميرا صلاح نمر وهو يتثاءب أثناء المباراة .. * لقطة حيَّرت العالم العربي .. * ما حصلت قبل كده .. * ما في لاعب بينعس أثناء المباراة .. * دي فضيحة .. * السنة دي لما تكون عندكم مباراة في البطولة صلاح نمر خلوهو في الفندق .. * فندق ب(الحاء) .. * غايتو الله يكفينا شر (المصدي) اللمعتو الأيام .. * ونركب صافنات ونجيبه (مدنية) وأصلو الزول بيموت والذكرى تفضل حية .. * و..و.. * ولَّا بتقول ديل ناس كانوا …. معانا في موكب 6 أبريل.