لابنريدك..ولابتريدنا لكن نحن مجبورين عليك وأنت مجبور علينا! آه يا القطن..! تلاقينا..ونلاقيك وعارفين العليك! نلعب في أرضك..وعارفنك خطير..لكن برضو هلالنا أمير! آه يا القطن..! أنت ياعزيزنا..عارف هلالنا..! نحبو ويحبنا..ونتلاقى في أصعب مباراة..وبرضو الإستسلام لا..! الإستسلام مرفوض ولا داعي للوعود..! ما بنقول فائزين..لكن متطلعين! هيثم..وعلاء وسادومبا وبكري المدينة..والكرة صعبة علينا..! رغم لحظات التواصل الرائعة..لكن المصيبة في الأهداف الضائعة! بصراحة كده..الهزيمة في بالنا..والرجفة مصعبة حالنا.. لكن برضو نثق في هلالنا..! خوفي من الدفاع..وميشو والإستسلام..! سبع نقاط..يكفينا التعادل لأنه يعتبر خصماً على القطن وليس علينا..! سيد البلد يلعب وهو الصائم..والصيام في حد ذاته بركة.. لكن الاحتياط لازم! كذاب البقول ماخائف الرجفة وصلت إلى أكثر من 100 فهرنهايت!! وأتمنى أن تعود إلينا السكينة ويريحنا بكري المدينة! الحال صعب ياناس! الهلال..ده..آه يا أبو الهل! مهما كانت الأسباب ناس (قريعتي راحت) منتظرين هزيمة كبيرة لسيد البلد! أهل الحقد..لهم أجندتهم سيعملوا بكل الأساليب لأن الهلال عندما يلعب يهرد قلوب الجماعة!! لو شفت المريخاب يوم الهلال يلعب..حالهم صعب! الواحد لو عاينت لوجهوا تحس بشرايين الحقد تنتح في رأسك! ديل.. ياربي تحمينا من ديل!! الهلال يلعب في بطولة الأندية الأفريقية الكبرى.. وهم يلعبون على هامش المنافسات وقلوبهم مهرودة!! كل واحد يقول للثاني..الجماعة ديل لوجابوا الكأس إلا نهاجر من البلد دي! وجماهير الهلال في لحظة زنقة ممزوجة بالحب! والقطن يعانقنا عصر الأحد..! في عز شهر الصيام الكريم..والله بحالنا عليم! وميشو فاطر.. طبعاً الخواجة ماعندو قضية معانا في أمور ديننا الحنيف وعقيدتنا السمحة الأصيلة! ..لكن برضو..آه..كلما نمشي خطوة تطل علينا الرجفة! منذ يومين وأنا في حالة صعبة رجفة ومصران عصبي! ناس القطن ديل ثيران هائجة..يتعاملوا معاهم كيف..!!؟ قوم إذا نظرت إليهم أحسست بالإصرار في عيونهم..! ياربي تفتح علينا بقوون واحد..كفانا! بكري ينفرد ليضربوه تحسب ضربة جزاء يتصدى لها سادومبا! كفانا..! عشاق صاحب المقام الرفيع في حالة تأهب غير عادية! أنت ياهلال الريدة..والأحلام الوعيدة..وحاة ربك بنحبك! وبرضو آه ياقطن! القطن زمان كان زعيم اقتصادنا..الأن أصبح في الكرة يسعى لودارنا..! لكن الصمود مطلوب أسمعني يا عبد اللطيف بوي وكلم معاك الجماعة.. وسيف مساوي موجود موجود..! ياعمر بخيت..أنت فاهمني.. ياسيدا..أيام الهتاف وحمل الأعناق لازم تعيدا.. ويابشة نحتاج إلى مقطوعة جديدة! والكاميروني من وجهة نظري سيواجه ضغوط نفسية لا أظنه يستطيع أن يلعب في بلده وضد فريق بلده لكن أصبروا معايا..! وأرجفوا معايا..! ده قدرنا ونعمل شنو..!!؟ ايقاعات خفيفة أغلبية المريخاب مع ناس الكاميرون..! مباراة..آه..من هذه المباراة! ماتنسوا مباراة أنيمبا هنا في الخرطوم هي الأخطر..والأهم ياكاريكا صدقني سحروك..!!والسحرك هو من سحر معز! الناس ديل لن يتركوا الهلال في حاله أبداً..! تخيلوا الهلال فاز على القطن في بلده.. طبعاً حلم جميل ومعاه كذا كيلو رجفة! المنتخب الوطني..ومازدا ولاعبو المريخ..وحاجات تانية حامياني! عزيزي كاروري.. ننتظر منك الكثير بالتعاون مع البرير وأنت أهل لحب الأهلة! دعوني أسأل..أين عبد الرحمن أبو مرين..نائب رئيس الهلال بالإنتخاب.. أين هذا الرجل الراقي الذي ظل يعطي الهلال جهده وماله ووقته وأشاد به الرئيس الراحل الطيب عبد الله كثيراً..!؟ لو لاقيتوه بلغوه سلامي! والله لو الكتابة بتحرز أهداف لأصبحت الأقلام هي النجوم التي تطل علينا دائماً! الهاتف السيار مسروق..والخط مقطوع..! الو..الو..مافي الليلة..!