سودارس : على الأقل تكسرو (الروتين) ده !!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

على الأقل تكسرو (الروتين) ده !!

قوون نشر في قوون يوم 27 - 05 - 2014

* في قانون الحياة السودانية الذى يتعود على (البيع) ما بيخليهو ..
* في ناس الواحد أول ما يفلس ببيع موبايلو ..
* وبعد شوية يبيع (تلاجة البيت) ثم (الدولاب) ثم (البيت) ..
* ببقى مدمن بتاع بيع ..
* عموماً .. تبيع حاجاتك أحسن ألف مرة من السرقة والاحتيال ..
* والذى يتعود على إقالة المدربين سيدمن ذلك ..
* وأية تفكير في إقالة كامبوس يعنى أن الهلال قد دخل النفق المظلم ..
* كامبوس كعب ولا كويس بعد كده الناس تصبر ..
* غير الصبر مافي خيار تانى ..
* الخسارة أمام الزمالك يتحملها كامبوس بنسبة (60%) وال(40%) يتحملها اللاعبون ..
* كوليبالى براهو يتحمل (25%) ..
* كوليبالى ده لو لقيتو ليهو حجز من القاهرة مباشرة أفضل يمشى مالى ..
* محمد عبد الرحمن أفضل مية مرة من كوليبالى ..
* مباراة مصر بخيرها وشرها انتهت وأمامنا مباراة فيتا كلوب ..
* والخطورة في اللقاء القادم تتمثل في غياب الأطراف بوى وسيسيه بسبب الإيقاف ..
* وهذا يتطلب تجهيز البديل منذ الان حتى لا يتفاجأ مثلما تفاجأ خليفة بالمشاركة أمام الزمالك ..
* والأرجح أن يكون خليفة هو بديل سيسيه وفداسى بديل بوى ..
* وخليفة لو دى كورتو أفضل منو محمد عبد الرحمن في الطرف اليمين ..
* مشكلة الهلال إنو (90%) من اللاعبين مزاجيين ..
* مهند بيلعب بالمزاج ونزار اتعلم المزاج وحتى خليفة بقى عندو مزاج ..
* ونحن نقعد نبارى مزاج اللاعبين ديل لما نطلع من البطولة بمزاج ..
* نقفل ملف الزمالك ونفتح ملف جمعة جينارو وفيتا كلوب ..
* وملف جمعة أخطر من ملف فيتا كلوب ..
* خسارة الهلال غير المتوقعة جعلتنا ننشغل عن ما يحدث في ديار التمهيداب ..
* غايتو في الدنيا دى تشوف مصيبة أخوك تهون عليك مصيبتك ..
* هسه لو مشيت (حوادث أم درمان) وشفت المصابين والعيانين بتهون ليك مصايبك كلها ..
* تلقى واحد (كراعو مقطوعة وعندو شلل نصفى وسكرى وبيغسل كلى) ..
* وأنت جاي داخل المستشفى عشان عندك (طُمام) ..
* أول ما تشوف الزول المكسر ده الطمام العندك بيروح بشكل تلقائي دون أن تقابل الطبيب ..
* وده حالنا في هذه الأيام ..
* الهلالاب عندهم طمام سببو الزمالك ولما دخلوا العنبر وشافو المريخ الطمام راح بشكل تلقائي ..
* نحمد الله كثيرًا على (عافية الهلال) ..
* نحمدالله لأن إصابة الهلال هى عبارة عن (طمام) ..
* علاجنا في (الليمون) لكن إنتو علاجكم ده إلا تمشو الأردن ..
* والأردن عندكم فيها ذكريات زي الطين ..
* معقولة جامعة فكتوريا !
* فريق جامعة فكتوريا في السودان بيوازي فريق (الغرزة الجموعية) ..
* مع تأكيد أن (الغرزة الجموعية) أفضل منه وأعرق منه ..
* وصل الحال بالمريخ أن يتعادل أمام فريق (جامعة فكتوريا) ..
* قالوا تراورى بيضحك طوال ال(90) دقيقية ..
* تراورى بيضحك من سخرية القدر وتعاسة الأيام والحال الذى وصل له ..
* بطولة زي دى غير تضحك ما بتقدر تقول حاجة ..
* لو في الأبطال ممكن تبكى لكن بطولة (تأبينية) زى حوض النيل دى تضحك بس ..
* أنا والله ما فى حاجة محيرانى في البطولة دى إلا جمهور المريخ ..
* مستغرب الجمهور ده بخش الاستاد كيف وليه وعشان شنو ؟
* هسه البطولة دى الدخول بقروش ولا مجاناً ؟
* غايتو لو بقت بقروش تبقى مصيبة ..
* بطولتكم دى يفترض تكون مجانية وفيها جوائز لتشجيع الجمهور ..
* تعملوا جائزة للمشجع البيجى ومعاهو أصحابو ..
* جائزة للمشجع البيجى ومعاهو أولادو ..
* دى ونسة ما بطولة ..
* لعب عيال ساكت ..
* أطفال أفريقيا إتلمو في الخرطوم وقاعدين يتونسوا مع بعض ..
* المريخ يتونس مع جامعة فكتوريا والبوليس يتونس مع الملكية ..
* أطفال أفريقيا بتونسوا ما فيها حاجة ..
* الونسة برضو أخير من قاعد ساكت ..
* كل الفرق المشاركة في حوض النيل بتنظر للهلال على أساس أنه فريق صعب المنال ..
* بيشوفو الهلال ده زي ريال مدريد ..
* امبارح في صحف المريخ ورد أن الجماهير هتفت ضد اللاعبين ..
* الموضوع ده ما فيهو جدد ..
* جماهير المريخ السنة كلها بتهتف ضد اللاعبين ..
* ده ما خبر ..
* ولا في حاجة جديدة ..
* الخبر ده كان بيكون عندو قيمة لو قلتو : (اللاعبين هتفو ضد الجمهور) ..
* أنا هسه لو كنت بلعب في المريخ بهتف ضد الجمهور ..
* بقول ليهم : إنتو الجايبكم شنو ؟
* داخلين الاستاد لشنو ؟
* اعتبارًا من السنة الجاية فإن لاعبي المريخ هم الذين يهتفون ضد الجمهور ..
* على الأقل تكسرو الروتين ده ..
* روتين ب(العاء) ..
* و..و..
* مصابك سميرك ..

انقر هنا لقراءة الخبر من مصدره.