النصري – حكاية (طنبور) بتكلم (21) لغة سيداحمد عبدالحميد رفع سعر (لوري التراب) بعد ان كتب (رمال حلتنا) الاهداء اشعر احيانا اننا لا نحتاج الى أن (نكتب)– نحتاج الى (نحتجب) فنحن نزحم القراء الكرام ب (حروف جر) لا داعي لها. يجروك من (رقبتك). قيل ان (نجيب محفوظ) عندما دخل جامعة القاهرة كلية الاداب لدراسة (الفلسفة) تحسست الفلسفة - (الفصل الخامس في مقرر السنة الثانية في كلية الآداب قسم الفلسفة) تحسست (شولاتها) . ناس الفلسفة اهم شيء عندهم (الشولة). الفصل الخامس في مقرر الفلسفة يا ربي فيه شنو؟. اكيد فيه (الغراب النبيه). زمنا نحن الغراب النبيه كان بدرسونا ليه في الابتدائي هسع مع جامعات الزمن (الهملة) دي بكون دخل الجامعة. ود صوت العرب باكات تيمان واحد جابو ليه تيمان ...سمى الاول (بله) ..والتاني (موسى)..وقال ليهم لو جاكم سيد البيت في العيد دا وقال عاوز قروش الايجار – قددوا ليه (عيونو). بله وموسى من يوم السماية وقفوا ليك في الباب. نص خاص قسمت باقيك في الصباح اتلخبط الليل بالنهار ... كان الصباح داخل غلط ام الغلط كان في (الديوك) يوم كان (صياحها) قبل تقوم متريحة بي ريحة الدعاش يا ممطرة في كل زمان الناس هنا من فرحتهم ..كان قسموك ناس قسموك مع القمح يرموك في الطمي في التُقي في الموية – في النيل يوم يفيض شفناك في لون الشروق في لمة الناس في العصر ختوك في التموين (كرت) في الصرفة والعيد والصغار ما كان بيشبه طلتك انك تغيب يا طالي بي رغم الغياب يا مستغيب لمن تجي وتكون هنا – او بس هناك ما فارقة في كونك حضور او كان غياب في كل مواقيتنا بتجي لو كان تجي...او ما تجي لو كان حضور – او كان غياب حاضر مع كل الظروف محمد بتاع قندران بتاع قندران دخل ليه في (حيطة). الحيطة قامت بعد ساعة ونص وقالت لبتاع القندران (فلاحتكم) دي لو بتعملوها في (غزة) كان حررتوا الاراضي المحتلة. بس فلاحتكم في عثمان ميرغني. حاجة حريصة حاجة حريصة قالوا ليها ناس الفلك قالوا العيد يوم الاتنين. قالت ليهم لو (الهلال) غلب في الكنغو من يوم الاحد بنعيد. البوني وسعدالدين ابراهيم (اطراف) الصحافة السودانية مشاركة جميلة كانت من الدكتور عبداللطيف البوني والشاعر والكاتب سعدالدين ابراهيم تمثلت في (غارات) صحفية (ساخرة) كانت منهما بمثابة عيدية جميلة قدمها البوني وسعد للناس في صحيفة قوون. البوني وسعدالدين ابراهيم هما من (اعمدة) الصحافة السودانية ..الاول عبر عموده (حاطب ليل) والثاني عبر عموده (النشوف اخرتا) وكثير من الاعمدة الاخرى والمساهمات الفعالة في الاذاعة والتلفزيون والدراما. كثير من الصفات والمواهب تجمع بين البوني وسعد – ربما يتفوق الاخير فقط بشاعريته التى اثرى بها الاغنية السودانية فكانت (العزيزة) وعن حبيبتي بقول لكم ..وابوي..وغير ذلك من الاعمال الجليلة. لكن البوني ليس بعيد عن ذلك فقد اصدر العديد من الروايات ...وكانت له اعمال درامية وتلفزيونية واذاعية شهيرة. البوني بكتب في الصفحة الاخيرة (طرف شمال)...وسعدالدين ابراهيم بكتب (طرف يمين) في الصفحة الاخيرة ..وان كان سعد الدين ابراهيم عنده (طلعات) في الهجوم وبحاول مرات يدخل النص. يعني باختصار كدا ومن غير زعل ...(طبعا من غير ما يزعل بله وموسى الزومة) ..انا بعتبر عبداللطيف البوني (موسى الزومة) الصحافة السودانية ..وسعدالدين ابراهيم (بله جابر) صحافتنا السودانية. وعلى كدا اقفل الحتة دي – عشان عاوز ارسل الصفحة ..الوقت اتأخر شديد ..والمطر شغالة ..والكهربة تمشي وتجي. لكن سوف اعود الى الاعزاء اساتذتنا عبداللطيف البوني وسعدالدين ابراهيم خاصة اني حاورتهما الاثنين (اذاعيا)..وقالوا الكثير من الاسرار والحاجات التانية الحاميانا كلنا. علي تفتيحة علي تفتيحة قال لي زوجتو اسمعي بعد كدا موضوع (سلطة الروب) دي ارخيها. بعد كدا خلاص رمضان انتهي لا عاوزين نشوف لينا سلطة روب ولا اغاني واغاني. سؤال زي البرجل مريخابي شفت – (ندي المريخاب حاجة عشان ما يقوموا يزعلوا لينا في العيد). اصلهم قاعدين ساكت. سيكافا ما عندهم. مريخابي شفت قلت ليه انت تعال هنا الهلالاب ديل هاجموا (حكم) مباراة المريخ والاهلي الخرطوم ليه؟...الحكم عمل شنو؟. المريخابي الشفت قال لي الهلالاب ديل يكونوا فاكرين (راجي عبدالعاطي) حكم الراية. احتمال الناس في الترويح وفي التهجد والعمل الصالح ... واحد سألوه قالوا ليه اكتر حاجة بتحبها في رمضان شنو؟. قال ليهم (سلطة الروب)...لكن بشرط الزبادي ما يكون (حامض). اي زول همو في بطنو. هسع شايفين ليكم (احتمال) هنا. حكايات النصري للتداول بعد الافطار استطاع محمد النصري عبر بنامجه (مع النصري) ذو الحكايات المتعددة ان ينافس لوحده برنامج (اغاني واغاني) الذي يشارك فيه اكثر من(9) فنانين بتركيبات مختلفة وامزجة متعددة. (9) فنانين يقدمون لونية مختلفة في الاغنية السودانية وبمصاحبة اوركسترا تامة مع مقدم محترف وصاحب تجربة عريضة وفي قناة ذات مشاهدة عالية – استطاع محمد النصري ان يثبت وجوده في ذلك البرنامج او ان يشكل منافسة حقيقية على البرنامج الذي امتد لاكثر من (9) سنوات على شاشة النيل الازرق يقدم في وقت محدد ومعروف. محمد النصري بطنبور يتكلم اكثر من (21) لغة عرف ان ينافس اوركسترا كاملة – ربما ما خرج ما (حنين) من طنبور النصري صاحب القدرة العالية في العزف عليه جعل الناس اكثر ادهاشا بقدرات تلك الانامل وهى تتلاعب باوتار الطنبور لتخرج كل تلك الانغام. لونية محمد النصري المعروفة وايقاع (الدليب) الذي يقدمه في حضرة عبدالمنعم ود العوض الذي استنطق الآلة الايقاعية فكانت بذلك السحر الاخاذ. هذه اللونية المحددة نافست لونيات وايقاعات مختلفة يقدمها برنامج (اغاني واغاني) ذات الشعبية العالية في المشاهدة وفي الانتماء. مع ذلك كانت حلقات النصري تمتد بنا لتسرق الناس من كل الفضائيات وتجلسهم حضورا (مع النصري) ..واقلهم متابعة ينتقل من الشروق الى قناة النيل الازرق تجاوزا للفواصل الاعلانية. فكرة اعداد البرنامج كانت رائعة ..وتدوير (الحكايات) لتكون في كل يوم حكاية جديدة مع ضيف مختلف..واغنيات تتناسب مع الحكاية والضيف جعل (الرتابة) لا تعرف طريقها للبرنامج ..هذا غير (الملل) الذي يمكن ان يتسرب لمشاهد (اغاني واغاني) بسبب تكراره الدائم للقصص والاغنيات والاصوات. حتي اني اجزم ان بعض الاغنيات قدمت في سلسلة برنامج (اغاني واغاني) اكثر من سبع مرات. وهنالك اغنيات تقدم بصورة دائمة في كل موسم من مواسم اغاني واغاني. هذا لا ينقص من قدر (اغاني واغاني) فهو له الصدارة دون كل برامج قناة النيل الازرق – وقد يكون هو البرنامج الاكثر مشاهدة في برامج الفضائيات السودانية. لكن مع ذلك استطاع برنامج (مع النصري) ان يكسر تلك القاعدة وقدر ان يثبت وجوده وان يكون (نفس) جديد في الاغنية السودانية. وقد اثبتت برنامج (مع النصري) ان التخصصية يمكن ان تتفوق على التعددية. فمع تعددية برنامج (اغاني واغاني) واتساع ماعونه الغنائي إلّا ان برنامج ذو طابع خاص ولونية محددة تفوق عليه في تقديم ثقافة جديدة للاغنية السودانية مع شعراء شباب لهم بصمتهم الواضحة في مسيرة محمد النصري مثل عطا كبيتلي (شبر شك) ورامي قسم السيد (يا زول جميل). يحسب للنصري انه مع تقديمه للونية خاصة ..وتغذيته للمكتبة الغنائية بثقافة جديدة ..مع الاحتفاظ بالشكل والقالب..قدم النصري ايضا شعراء اضحوا (نجوما) في مسيرة الاغنية السودانية وحلقوا بعيدا رغم محدودية منبرهم الذي يخرجون منه شعرهم. شعراء النصري الذين غنى لهم ..استطاعوا ان يوصلوا رسالتهم وان يبلغ اثرهم للناس ..وان يضحوا نجوما في الحياة السودانية يشار اليهم بالبنان. تجربة النصري تحتاج الى مراجعات اخرى وكتابات كثيرة ..وهذا ما سوف نعود له لاحقا حسب وعدنا للحبيب (اباذر الكدرو) المريخابي النصرابي..الذي يلاحقنا دائما بالكتابة عن النصري ..وها نحن نفعل الآن في حدود البرنامج على ان نعود الى تفاصيل اوفى في الايام القادمة باذن الله. اقتراح ناس المريخ قالوا ح يشاركوا في بطولة (سيكافا). وقالوا كمان ح يشيلوا معاهم (احذية المطر). قلنا ليهم والله سيكافا دي (تموت تخلي) كتير عليها. احذية مطر شنو؟. ما تبوظوا لينا (المطر) بي سيكافتكم دي. هسع دا اقتراح. حالة ترقب امس جات مطرة. واحد شال شعورو ومرتبتو ودخل جوة في الصالون. المطرة وقفت. زولكم شال شعورو ومرتبتو وطلع يرقد برة. المطر صبت. زولكم شال شعورو ومرتبتو ودخل الصالون. المطر وقفت. زولكم طلع. المطر صبت. زولكم شال شعورو ومرتبتو ودخل الصالون. آخر حاجة زولكم قال يشوف ليه حل للموضوع دا. يا يرقد برة بدون (مرتبة). يا كمان يرقد جوة بدون (شعور). تفتكروا الحل الامثل شنو؟. شوال غتاتة انتوا يا جماعة الزول وقت يكون قاعد (يتشهق) كتير..ابوالشهيق دا ممكن يعمل ليه (جلحات). ما عارف العلاقة بين ابوالشهيق والجلحات شنو؟. لكن الحاجة العارفها صاحبنا كان بتشهق كتير – وكان عندو (جلحات). تكون جلحاتو دي من (الشهيق) البعمل فيه دا. تلقاه بدون مناسبة كدا قاعد يتشهق. انت البتتشهق ليها شنو – وقروش العيد الي الآن ما طلعتها. محسن فانلة محسن سيد المدرب العام للمريخ قالوا بتفاءل ليه ب (فانلة) كدا ..قدر ما يلبسها ما بتغلب. محسن سيد بقى يخت ليك (فانيلتو) قبل ما يخت (احمد الباشا) في التشكيلة. انتوا جمال سالم دا حارس مرمي وإلا سواق قندران. ما فهمنا منو اي حاجة الى الان. دي ما عاوزة ليها (برهان) مجلس المريخ جاب ليه مدرب اسمو (برهان). عشان تاني كل ما فيصل سيحة يقول الهدف الذي اتسجل في المريخ كان (هدف) تسلل – سيحة يقول للمشاهدين ودا (برهان) كلامي. جركانة دغالة زول قرفان شديد ..وما فاهم اي حاجة ..قالوا ليه تفتكر مشكلة السودان شنو؟. قال ليهم مشكلة السودان (بله جابر)..يلعبوا ليه الكورة يمر من الميدان كلو ويكمل اللاين ويعكس في (الكشافات). شفتوا البعمل فيه بله جابر دا – نفس البعملوا فيه (الجماعة) ديل – سياستهم كلها في (الكشافات). عينهم لي اسرائيل يضربوا ليك في عثمان ميرغني. تحذير لوحة الاعلانات التى سقطت على الجماهير في استاد الخرطوم في مباراة الهلال وفيتا كلوب مازالت (واقعة). رغم ان الولاية كونت لجنة ..والمحلية كونت لجنة ..والاتحاد المحلي كوّن لجنة ..والاتحاد العام كوّن لجنة – والهلال كوّن لجنة. بدل لجانكم دي لو كان رفعتوا (اللوحة) كان احسن لينا من البتعملوا فيه دا. الواحد في السودان وقت يكون عندو شغل بقوا يقولوا ليه : اسمع نكون ليك لجنة وإلّا تمشي وتجينا بعد سنة ونص. شولة هندية كل ما اشوف لي فيلم هندي بتذكر حبوبتنا (بنت الفراش) كانت بتقول لينا الواحد فيكم لمن يرسلوه الدكان اول حاجة يسأل بتاع الدكان عن (التانكي) وبعد كدا يقول ليه : (عاوز لي وقية شاي). بتاع الدكان من تجيب ليه سيرة (التانكي) بقوم يتنفض ويستقبلك استقبال كبيرفي باب الدكان. انا ما عارف القاعد يشترى (تانكي) منو..اصلو ما حصل شفت لي رف بتاع تانكي ناقص علبة. هسع علاقة الكلام دا كلو بي (الفيلم الهندي) شنو؟. انا عارف ...يمكن عشان ما حصل تابعت لي فيلم هندي حبيبة البطل لم تطلع (اخت) البطل بالرضاعة. الهنود ديل عندهم مشكلة في الحتة دي. الواحد يكون من جنوبالهند يعرس ليه واحدة من اقصى شمال الهند ..يقوم يكتشف ان حبيبتو دي (اختو) في الرضاعة. (الشيف) طه سليمان او (تاه) سليمان ومصطفى السنى (بله جابر) اغاني واغاني برنامج اغاني واغاني هذا الموسم كان فيه زحمة كبيرة جدا في الالوان. طه سليمان مرة يجي لابس ليه بدلة حمراء. ومرة يلبس ليه بنطلون منقط. ومرة يكون لابس ليه سلاسل في ايدو. ومرة سلسل عديل كدا في رقبتو. اغاني واغاني السنة دي بقى اغاني وسلاسل. مفروض الناس ديل يا ناس قناة النيل الازرق قبل ما تسجلوا ليهم تعملوا ليهم اختبارات في اللبس. ما معقولة تجيبوا لينا السلاسل والعقود دا كلها بعد الافطار مع كمية من الالوان التى لا نجدها حتى في سلطة الخضار. طه سليمان يظهر هذا العام في برنامج اغاني واغاني بملابس (طباخ)..يعني ممكن نقول (الشيف) طه سليمان. لكن هسع كلكم لو قعدتوا وسألوتني وقلتوا لي (بله جابر) برنامج اغاني واغاني منو؟. ح اقول ليكم بدون تردد (مصطفى السني) الذي ظهر في هذا البرنامج ضعيفا رغم امكانياته الكبيرة. الاغنيات التى تغني بها مصطفى السنى كلها كانت في (الكشافات)...يمكن ذلك بسبب ان مصطفى قدم اغنيات في البرنامج لم تتواقف مع طبقته الصوتية. واضح ان مصطفى السني عنده طبقة معينة بغني فيها يجب إلا يغادرها...لا في اغاني اغاني ولا في حقيبة الفن. يمكن اكثر الخاسرين في برنامج اغاني واغاني هذا الموسم هما طه سليمان الذي كان (تاه) سليمان ..ومصطفى السني الذي كان (بله). والله (بله) ما براهو. مسلسلات الحمدلله السنة دي ما تابعت لي اي مسلسل في رمضان. عشان كل ما اقعد عشان اتابع لي مسلسل ..ناس الارصاد الجوي يقولوا لينا بكرة ح تكون في مطرة. طيب يا ابوالشباب علاقة المطرة بالمسلسلات شنو؟. لو ما عاوز ليك سبب ساكت مع ناس الارصاد الجوي. الزول الشفقان الزول الشفقان انا بعرفو ليكم طوالي. ولا بغالطوني فيه. الزول الشفقان من يشوف ليه (شاحن موبايل) يمشي عليه عشان يركب موبايلو. الشفقة تطير. الطبع دا كعب – احسن تغيروه. ملحوظة قالوا ليك : نقل فؤادك حيث شئت من الهوى... ما الحب إلّا للزول الكل ما يشوفك يشربك حاجة باردة. مثل جديد لنج بيت ابوك لو خرب (شيل ليك سلفية من البنك). حوار من طرف واحد واحد مشى يطلب ليه يد واحدة. ابو البنت قال ليه انت حركتك دي عملتها كم مرة (المعني كم مرة اتقدمت وطلبت ليك ايد واحدة). العريس المزعوم قال عملتها (17) مرة. ابو البنت قال ليه وكانوا برفضوك ليه؟. العريس المزعوم قال ليه عشان انا مع طلبي ليد البنت بطلب يكتبو لي (بيت) بي اسمي. هسع انتوا البيت القاعدين فيه دا حقكم ولا ايجار. تحت خطين في جريدة قوون امس جاء– الهلال يبطل محاولة انقلابية للاطاحة بالحكومة الكنغولية. طيب يا جماعة ناس الهلال ديل يوم 30 يونيو 1989م كانوا وين؟. فيصل سيحة على كيفو الهلالابي اسامة جويلي قال لي امس جابو فيصل سيحة يحلل في اخطاء الحكام في مباراة المريخ والاهلي الخرطوم. ايمن سعيد عمل ليه (مخالفة) خطيرة – ضرب لاعب الاهلي الخرطوم من الخلف. سيحة ما علق على المخالفة سوى انه قال دا لاعب المريخ المصري ايمن سعيد. انت عاوز تطلع ليه (الرقم الوطني) يا سيحة..عارفنو نحن ايمن سعيد. وعارفنو مصري. ثم طالب فيصل سيحة من المخرج ان يديه اللقطة البعدها. دكتور سامي جمارك دائما بقول لي : البلد دي لو فيها اتنين (سيحة)..ما في قون بتحسب في البلد دي. إلا اقوان المريخ. يا دكتور نحن (سيحة) واحد مقوم نفسنا ..لو بقوا اتنين إلا نقلب كورة طايرة. خلينا ليكم كورة القدم يا سيحة. عامل كدا يا سيحة زي شباك تحليل الملاريا الفاتح وما فيه زول قاعد. تعريجة كل ما اشوف محسن سيد واقف في اللاين في مباريات المريخ بتذكر الزول البكون واقف في المناسبة في صواني الغداء ..كل ما يمشي على مجموعة يقوم يقول ليها : عندكم شنو ناقص؟. عندنا ناقص (الضلع) يا كوتش. لكن (فلسفة) الناس في السودان شنو – طلعوا ليهم حكمة بقولوا فيها (الضلع ما بزيدوه). القال كدا منو؟. انتوا (الحكم) دى بتجبوه من وين؟. ساكت قاعدين تخربوا علينا في المناسبات. """""""""""""""""""""""""""""""""""""""""""""""" تحري رؤية هلال السودان في الكنغو عندما يلعب هلال السودان عصر غد في الكنغو امام فيتا كلوب سوف يكون مجلس الافتاء هنا في السودان وفي كل الدول العربية والدول المسلمة يستعد لرؤية هلال شوال في المساء. ومثلما ينتظر الناس بفرحة عريضة وكبيرة ثبوت هلال شوال مساء اليوم – نحن نستبق الناس شعورا ونسأل الله في هذا اليوم المبارك واللحظات السعيدة ان يثبت هلال السودان عصرا امام فيتا كلوب وان يخرج لنا بنتيجة جيدة امام بطل الكنغو تكفل للهلال حظوظه في التأهل الى دور الاربعة. فيتا كلوب في الخرطوم نجح في الخروج بالتعادل امام الهلال في مباراة (حزينة)...كانت فيها اعاصير ترابية ادت الى توقف المباراة وسقوط لوحة اعلانية على جماهير الهلال وتعرضت فئة كبيرة من الجماهير الى اصابات متفاوتة وخطيرة. مباراة الهلال وفيتا كلوب كان يحضر فيها الحزن بصورة كبيرة – وهي مباراة عوارضها كبيرة. غدا سوف يلعب الهلال والامة الاسلامية كلها تعيش في اجواء من البهجة والسعادة والبركات. عشما في فضل ذلك اليوم وفي روحانياته وفي دعوات الناس للهلال نسأل الله ان تكون مباراة الغد مباراة (فرح) تام للهلال ..وان نستبق بها العيد قبل كل الناس. وزي ما الناس بتعمل في (الخبيز)..وبتفرش في الملايات وبتركب في الستائر. نحن كمان بنجهز في هوبة مهند الطاهر وجرية بكري المدينة ..وشلعة مدثر كاريكا. برضو منتظرين العيد بي فهمنا برانا. بالمناسبة دا ..ما تزوغوا من السؤال. جبتوا هدوم الشفع. اي واحد فيكم حضر ليه (جلابية) وقعد. نحن قاعدين كدا – يا ربي المريخاب بعملوا في شنو؟. ترى نحن عندنا فهم. انتوا يا ناس المريخ (الهلال) دا وراكم وراكم – وراكم والزمن طويل. يعني العصر ح تقعدوا تتحروا في رؤية هلال السودان. والمساء كمان غصبا عنكم تقعدوا تتحروا في رؤية هلال شوال. نحن ح نفطر ان شاءالله لرؤية هلال شوال. وانتوا يا مريخاب لو قعدتوا لرؤية الهلال امام فيتا كلوب – ما اظن تفطروا. طبعا لرؤية هلال السودان إلّا يكون عندك (كرت). كرت بي ان. بدون كدا ما ح تشوفوا (الهلال). انا في الحتة دي طبعا بتكلم عن هلال السودان – عشان ما تقعدوا تلخبطوا لينا ساكت. من جانب آخر – ناس المريخ ديل ح نتحرى رؤيتهم في (سيكافا). ح يشاركوا يا ربي وإلّا ما ح يشاركوا. اقعدوا لي بس كدا من سيكافا لي سيكافا...زي المفتاح الما بفتح. """"""""""""""""""""""""""""""""""""""""""""""" استقبال جمال الوالي لجنة استقبال جمال الوالي رفعت (توصية) بعد الاستقبال الاخير لجمال الوالي. قالت في التوصية عاوزين ليهم (كسارات). عشان يكسروا في الاستقبال القادم (تلج) صاح. """"""""""""""""""""""""""""""""""""""""""""""""""""" تشاهد غدا رمضان القادم باقي ليه (17) يوم. هسع السنة تجري وتسمعوا الكلام دا. """"""""""""""""""""""""""""""""""""""""""""""""""" مع الاعتذار للاغنية حبيبي اكتب لي وانا بكتب ليك – لو حولت لي (رصيد) يكون احسن. الرصيد احسن لي من كتابتك دي. """""""""""""""""""""""""""""""""""""""""""""""""""" بداية السطر واحد اشترى ليه (خروف) وربطو قدام الباب. قال الواحد ممكن ينوم بعد كدا مرتاح. عشان عيد الضحية دا ممكن يفاجئنا في اي لحظة. الزمن جاري شديد. """"""""""""""""""""""""""""""""""""""""""""""""""" نظرية مكعبات الفلسفة شنو؟..لمن تلقى ليك زول واقف براهو – تقوم تقول ليه منتظر ليك زول؟. مالك انت؟. يمكن منتظر المرتب. في ناس من (الغتة) حقتهم ..يلقوك واقف مع صاحبك يقولوا ليك : (مالك واقف براك). زي بله جابر وموسى الزومة لو لقيتهم واقفين سوا – ممكن اي واحد فيهم تقول ليه : (مالك واقف براك). وكل واحد في ديل بعتقد انو رفيقو هو الواقف براهو – يعني بعتبر نفسو هو ما في. شفتوا عدم الثقة دا بعمل شنو؟. يشرحوا ليكم الحكاية ألف مرة. """"""""""""""""""""""""""""""""""""""""""""""""" عقوبة زي العسل واحد هلالابي (شفت)..قالوا ليه المريخ عاقب هيثم مصطفى وحرمه من مواصلة نشاطه مع المريخ. الهلالابي قال ليهم دي (عقوبة) دي...دي الحاجة البكوس ليها هيثم مصطفي من زمان. هيثم لاقي يجمدوا نشاطه في المريخ. هيثم مصطفى لو على مراده كان يمسح فترته التى لعبها في المريخ كلها ب (استيكة). """""""""""""""""""""""""""""""""""""""""" سيد احمد عبدالحميد ارهق الاغنية السودانية بتراحله الدائم مفردات الشاعر سيد احمد عبدالحميد فيها (شجن) عريضا – ربما ناتج ذلك من التوجس الدائم الذي يعاني منه سيد احمد عبدالحميد ما بين السفر والعودة ..والترحال الذي عكسه بصورة واضحة في مفردة معبأ بحقائب السفر والترحال. سيد احمد عبدالحميد مثل اغلب رواد الشعر في منطقة الشايقية ..فهو يكتب ويلحن قصائده ويقدم اغنياته كاملة للمطرب نصا ولحنا. بل ان سيد احمد عبدالحميد يتغني بكلماته اولا ثم يقدم الاغنية مكتملة للفنان حتى في طريقة الاداء. اغنية (النصيب) التى تغني بها عدد من الفنانين ..منهم حنان النيل التى حامت وطافت بها في الخرطوم ثم قدمها النصري اخيرا مع مجموعة من اغنيات سيد احمد عبدالحميد. اغنية (النصيب) فيها ذلك اللوم والعتاب الذي يكون للقادمين الى البلد ..عندما يترفعوا بالزيارة في ظل ترقب يرصد جيتهم. أخلف لي وعودو عذرتو قلت نصيبو اقسام طاف كل الفريق في عيدو ودار كل البلد حام لكن طول اجازتو ابانا .. لامن كملها وقام حرام والله .. نحن البينّا أرحام سيد احمد عبدالحميد حام بنصوصه في تلك المنطقة الوجدانية الخاصة وتخصص في مجال (اللوم) هذا والعلاقات الانسانية النبيلة. طبعا حكاية انك تمشي (الاجازة) للبلد وتكمل الاجازة بدون ما تسجل ليهم زيارة – ببقى امر حار ومتعب. وهو امر صوره لنا سيد احمد عبدالحميد في اغنية (النصيب)...وحرام والله نحن البيّنا أرحام. الجميل ان سيداحمد عبدالحميد رغم انه ورّط الوجدان السوداني في حالة من حالات الشجن والحزن واللوم ..وحكي (الفراق) في صوره المختلفة إلا انه في كل نصوصه ظل ينادي بالتسامح والتصافي. في (النسائم) الاغنية التى قدمها النصري بصورة خرافية مثل تلك النهايات التى يدعو لها سيداحمد عبدالحميد. غافر برضي لي محبوبي يسعد ياهو كل مناي يرفل في نعيم الدنيا اعيش انافي محيط مأساي مايهمك عشيشنا البدري يومو الوصلتوالهبباي هايم كل عزاي طمبور يبلهجو لي الجمال غناي ياما في الغرام في مظالمة محرومين وماني براي سيداحمد عبدالحميد هو اول من لحظ نجوى (الرمال) وكتب عن شكواها ورصد (انينها) عندما رحل المحبوب. اظن ان لوري التراب ارتفع سعره واصبحت الرملة متل (الدهب) وهي يغني لها في اغنية (رمال حالتنا). يارمال حلتنا زولاً كان بآنسك ياحليلو فات رحل من بلدو روح وفاتل ولى ناس ماها هيلو الليلة يبكى دموعو سايلة نازلى مابسرك حويلو يبكى مطرطش مودر متلفت فاقد دليلو ياحليلوالكان بيطلع ينزل ومرة يشرب من سبيلو ومرة يترنم يحاكى حسو يرزم فوق نخيلو سيداحمد عبدالحميد سوف نعود اليه (تفصيلا) ايضا ...فهو يستحق الكثير من المراجعات والكتابات. حتما نعود.
