* في الحياة العامة بيقولوا : (الضحك بدون سبب قلة أدب) .. * مع إنو الزول ممكن يضحك بسبب ولكن يظهر للناس أنه ضحك بدون سبب .. * يعنى مثلاً : مرات بتتذكر ليك نكتة أو موقف وأنت في المواصلات فتضحك دون مقدمات فيحس الناس أن ضحكتك هذه (قلة أدب) ليس إلا .. * زمان لما تشوف ليك زول ماشي براهو وقاعد يضحك بتستغرب .. * بتقول الزول ده مجنون .. * لكن هسه مع الواتساب ده بتستغرب لما ما تشوف ليك زول بيضحك براهو .. * مع الواتساب الضحك بقى فردي وليس جماعى .. * تلقى الناس في البيت قاعدين يومين ما في زول بيضحك مع التانى .. * لكن نفس الناس ديل الواحد لو جاتو رسالة في الواتس يضحك لحدى ضرسو الأخير .. * غايتو جنس غايتو ؟؟ * الذى هو أسوأ من الضحك بدون سبب هو الضحك في بيت البكى .. * الضحك في بيت البكى حاجة سيئة جدًا .. * ممكن الزول يبكى في بيت العرس لكن عيب الزول يضحك في بيت البكى .. * والهلال والمريخ كلاهما يبكى في محل هو ليس مناسباً للبكاء .. * الهلال يبكى في بيت الفرح .. * دور المجموعات الأفريقية هو (فرح) ولكن الهلال يبكى في بيت هذا الفرح من ظلم التحكيم .. * ومشاركة المريخ في سيكافا هو (بيت بكى) ومع ذلك المريخ يضحك في هذا البيت الحزين .. * يفرح المريخ بالمشاركة في بطولة مجهولة الهوية مثل فرحته بالمشاركة في دورة حوض النيل التى نظمها وخسر فيها أموال طائلة ثم خرج من دور الثمانية .. * هذا فرح يشبه الضحك بدون سبب .. * وجمال الوالى الشهير ب(عزو) يكاد يقتلنا من الفرح .. * في عز هذه السيول والأمطار يلعب جمال الوالى دور الكومديان .. * ينتزع منك جمال الوالى الضحك حتى ولو كنت أنت في بيت بكى .. * أمبارح في صحيفة (الزعيم) جمال الوالى قال (حاجتين اتنين مثيرات) للضحك .. * الحاجة الأولى (عزو) قال : (مشاركة المريخ في سيكافا قرار فني) .. * وفرحة جمال الوالى بالقرار الفنى تؤكد أن مشاركات المريخ في (السيكافات) السابقة لم تكن بقرار فني .. * لو كانت بقرار فنى لما احتفى جمال الوالى بهذا المشاركة التى تمت بقرار فنى حسب ما قال .. * الحاجة التانية .. * عزو قال : (المريخ سيشارك في سيكافا من اجل الاعداد) .. * قال من أجل الإعداد .. * هو قال كده .. * إعداد شنو يا عزو ؟؟ * هى فضل فيها إعداد ؟؟ * لمتين المريخ ده بيشتغل إعداد ؟؟ * مشو الدوحة لعبو مع البايرن قالوا ده إعداد لدورى أبطال أفريقيا .. * طارو على يد كمبالا سيتي قبل ما يلحقو الكونفدرالية قالوا ده إعداد لبطولة حوض النيل .. * طارو من حوض النيل على يد تشيتي من دور الثمانية قالوا الدورة كانت آخر فرصة لتقييم اللاعبين قبل الشطب .. * هسه مشاركين في (سيكافا تو) قالوا إعداد .. * أنا والله العظيم نفسي أعرف المريخ ده بيستعد لشنو ؟؟ * والله إلا تكونوا بتستعدوا للتمارين .. * لكن إعدادكم ده ما ظاهر .. * ما في زول قاعد يحس بإعداد المريخ ده .. * حتى اللاعبين ما بيحسوا بالإعداد ده .. * لأنو اللاعبين البيشاركوا مع المريخ في سيكافا سيتم شطبهم نهاية الموسم .. * في لاعبين شاركوا في حوض النيل تم شطبهم .. * وحالياً اللاعبين الذين سيقوم المريخ بإعدادهم في سيكافا سيتم شطبهم .. * والسنة الجاية المريخ سيسجل لاعبين جدد يتم إعدادهم في سيكافا الجاية ومن ثم يتم شطبهم قبل حوض النيل القادمة .. * هكذا هو المريخ .. * أقول ليكم حاجة .. * البتعملوا فيهو ده ما عندو علاقة بكرة القدم .. * الشغلانية دى ممكن تكون أى حاجة لكن ما كرة قدم .. * الحل الوحيد جمال الوالى ده يبقى رئيس (الكاف) كما ورد في خبر (قوون) أمس .. * لو بقى رئيس الكاف عليَّ بالنعمة يريحكم راحة ما بعدها راحة .. * تانى حظكم تلعبوا بتشكيلة فيها سبعة لاعبين وأربعة حكام .. * أربعة حكام معاكم في التشكيلة ده غير حكم الوسط ورجل الخط الأول والتانى .. * يعنى تانى المريخ ما بيحتاج يستقبل ليهو حكم في صالة كبار الزوار .. * تانى لا ح تستقبلوا حكم في صالة كبار الزوار ولا ح تقدموا مركوب نمر هدية لأى حكم .. * ح تشبعوا بطولات عليَّ بالقسم .. * لو في لاعب من الخصم عاين لبله جابر ساكت جمال الوالى بيجمد نشاط الفريق الخصم .. * بختكم والله .. * عموماً المريخ سيطير اليوم إلى رواندا للمشاركة في سيكافا .. * وبعثة المريخ ستذهب اليوم ب(البص الأحمر المخطط) إلى المطار .. * أخيرًا البص الأحمر اليوم سيخرج من النادى .. * البص ده جابوهو مخصوص عشان يقوم بنقل اللاعبين من وإلى المطار أثناء المشاركة في دورى أبطال أفريقيا .. * وطبعاً الجماعة طارو من التمهيدى ولم يتهنو بالبص .. * شخصياً لا أستبعد أن يكون المريخ قد قرر المشاركة في سيكافا عشان خاطر البص .. * بص ب(الغاء) .. * و..و.. * وفي بعدك يا غالى ...(بيتنا وقع) ..
