البدوي ل(الحراك السياسي) : الموازنة استهتار بالدستور و القادم أسوأ    أسعار تذاكر مونديال "قطر 2022" تثير غضب جماهير العالم    استدعوا الشرطة لفض شجار عائلي.. ثم استقبلوها بجريمة مروعة    بعثة المنتخب في الخرطوم .. الشاعر: حافزنا دولاري ضخم للإجادة .. ونُجدِّد ثقتنا في الجهاز الفني    لجان التحقيق.. حبر على ورق المجازر!!    دراسة.. إدراج الفول السوداني في نظام الأطفال الغذائي باكراً يساعد على تجنب الحساسية    أبرز عناوين الصحف السودانية السياسية الصادرة يوم السبت الموافق 22 يناير 2022م    أبرز عناوين الصحف السياسية السودانية الصادرة اليوم السبت الموافق 22 يناير 2022م    المُستعمر والنُّخب المهزومة نفسيّاً!    السيسي يزور الخرطوم اليوم السبت    سايقا صلاح أتسمعني؟؟    فلسفة الكراهية الرياضية    القحاطة قالوا احسن نجرب بيوت الله يمكن المرة دي تظبط معانا    سهير عبد الرحيم تكتب: إنهم البطاحين لا كذب    أزياء جديدة للمريخ للموسم الجديد    الصخور المتشققة والمتحللة تحت أساسات سد النهضة    بنك السودان يعلن السعر التأشيري للدولار الأمريكي ليوم السبت 22 يناير 2022    المريخ يؤدي مرانه الأساسي لمواجهة الزمالك ويستقبل الدوليين بالإثنين    بنك السودان يعلن السعر التأشيري للدولار الأمريكي ليوم السبت 22 يناير 2022    حريق بمعسكر هلال الفاشر    حكومة القضارف ورابطة كردفان والشرطة يحتفلون ببعثة هلال الابيض بسدي أعالي نهر عطبرة وستيت    بالصورة.. طلبات الزواج تنهال على فتاة سودانية عقب تغريدة مازحة على صفحتها    حادث مفزع .. جثة محاطة بأكثر من 100 ثعبان!    ضبط أدوية منتهية الصلاحية ومستحضرات تجميل بالدمازين    ابنة أخت إلهام شاهين : «معنديش مانع أقدم إغراء.. وهذا أسوأ أعمال خالتي»    أصالة تكشف سراً: زوجي طلب مني قص شعري وطلباته أوامر    عثروا عليها بعد (77) عاما.. قصة الطائرة الأميركية "الغامضة"    ضبط أدوية منتهية الصلاحية ومستحضرات تجميل بالدمازين    والى القضارف المكلف يتفقد مشروع المياه بسدى عطبرة وسيتيت    شاهد بالفيديو.. "الطليح" المثير للجدل والتندر يجدد دعوته لتناول "مديدة الحلبة" كمضادة للبرد    الولايات المتحدة.. العثور على جثة رجل محاطة بأكثر من 100 ثعبان    صوت أسرار بابكر يصدح بالغناء بعد عقد من السكون    تأثيرات سلبية على الدماغ.. دراسة تحذر من أضرار النوم أثناء مشاهدة التلفزيون    منتدي علي كيفك للتعبير بالفنون يحي ذكري مصطفي ومحمود    مجلسا السيادة والوزراء يجيزان الموازنة ورسوم قطاع الاتصالات    ضبط سُكّر مُنتهي الصلاحية بشرق دارفور    أبرز عناوين الصحف السودانية السياسية الصادرة اليوم الجمعة 21 يناير 2022م    المشي السريع يقلل خطر الإصابة بقصور القلب    بعد القلب… زرع كلية خنزير في جسد إنسان لأول مرة    الرحلة التجريبية الأولى للسيارة الطائرة المستقبلية "فولار"    بعد نجاح زراعة قلب خنزير في إنسان.. خطوة جديدة غير مسبوقة    العلماء يتوقعون موعد انفجار الشمس وهلاك كوكب الأرض    التفاصيل الكاملة لسقوط شبكة إجرامية خطيرة في قبضة الشرطة    ضبط أكثر من (8) آلاف حبة كبتاجون (خرشة)    سراج الدين مصطفى يكتب.. مسامرات    الفاتح جبرا
 يكتب: وللا الجن الأحمر    القبض على شبكة إجرامية متخصصة في تزييف العملات وسرقة اللوحات المرورية    مباحث شرطة ولاية الخرطوم تكشف غموض بلاغ نهب سيارة نصف نقل    الدفاع المدني يخلي عمارة سكنية بعد ميلانها وتصدعها شرق الخرطوم    تأجيل تشغيل شبكات ال5G بالمطارات بعد تحذير من عواقب وخيمة    اعتداء المليشيات الحوثية على دولة الإمارات العربية ..!!    ما كفارة وحكم الزوج كثير الحلف بالطلاق؟    في الذكرى التاسعة لرحيل الأسطورة محمود عبد العزيز….أبقوا الصمود    سناء حمد: اللهم نسألك الجنة مع ابي ..فنحن لم نشبع منه    مجلس الشباب ومنظمة بحر أبيض يحتفلان بذكري الاستقلال    طه مدثر يكتب: لا يلدغ المؤمن من جحر العسكر مرتين    حيدر المكاشفي يكتب: الانتخابات المبكرة..قميص عثمان    مجلس وزراء الولاية الشمالية يبدأ مناقشة مشروع موازنة 2022    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



صلاح عمل (الهلال ب) في شندى واشرف ح يعمل (هلال الحبشة) !!
نشر في قوون يوم 19 - 07 - 2014

في رمضان الدنيا ساخنة والناس زهجانة ، مع إنو رمضان عمرو ما كان شهر زهج ولا شهر ضيق اخلاق ولكن نفوسنا غير المتطايبة جعلت الشارع السوداني في رمضان اشبه ب(حلبة المصارعة) الكل يصرخ ويجوط ولا احد يتقبل الآخر ، في المواصلات وفي السوق (المشاكل مدورة) ، ونسبة المشاكل وضيق الاخلاق تبلغ ذروتها في الفترة الزمنية التى تسبق آذان المغرب وتنتشر بشكل اكبر وسط (السواقين) الذين يتسابقون في شوارع الظلط الضيقة اصلا فيتسبب ذلك في حوادث مؤسفة يروح ضحيتها الابرياء من ابناء هذا الشعب الكريم فيصبح لون الظلط (احمر من كثرة الدم) ، ان هذه الدنيا (الزول النشيط ما بيلحقها والزول الكسلان ما بتفوتو) والرزق مقسوم وما في زول بيشيل ليهو رزق زول ولذلك الرجاء التعامل بذوق ورفق مع الشارع العام كما نرجو توسيع الاخلاق في هذه العشرة الاواخر من الشهر الكريم وهى العشرة التى يتحرى فيها المسلمون (ليلة القدر) التى هى خير من ألف شهر .
الكاردينال يعمل على (تحبيش هلال السودان)
صلاح عمل (الهلال ب) في شندى واشرف ح يعمل (هلال الحبشة) !!
عندما فشل رئيس نادى الهلال الأسبق في الإنتخابات قبل الماضية بنادى الهلال والتى فاز فيها البرير إتجه صلاح نحو وطنه الصغير شندى و(زعلة ساكت) عمل أهلى شندى الذى إعتمد في عامه الاول (عمود فقرى) مكون من مشاطيب الهلال بقيادة القائد حمودة بشير ونادر الطيب والنعيم وغيرهم من اللاعبين حتى اطلق الناس على الاهلى (الهلال ب) ، والآن هاهو صلاح يفشل في انتخابات نادى الهلال للمرة الثانية على التوالي مما يرجح انه (زعلة ساكت) سيصرف كل ما يملك من اجل ان يصبح الاهلى (هلالا كامل الدسم) ، رئيس نادى الهلال الحالى اشرف الكاردينال عرف بحبه الكبير لدولة اثيوبيا وارتباطه العملى بها الشئ الذى جعله (فرحه ساكت) يختار اديس معسكرا للازرق والكل يعلم ان اديس مكانا غير مناسب لمعسكر الفريق في هذا التوقيت بالذات ، الواضح ان كل معسكرات الهلال في فترة رئاسة اشرف ستكون في اديس كما يتوقع ان يكون المحترفون الاجانب القادمين (حبش وبس) فإذا فشل اشرف في صناعة هلال حبشي فأنه قطع شك سيعمل على (تحبيش الهلال السودانى) وربنا يستر .

من يتدخل لتقريب وجهات الخجل
هيثم والمريخ .. خجلانين من بعض !!
المريخ هو اكثر نادى في افريقيا (شخصيته مهزوزة) ولذلك لا يستطيع المريخ اتخاذ قرار قوي لان العود الاعوج لابد ان يكون ظله اعوجا ايضا ، المريخ احتاج لكثير من الوقت من اجل اصدار قرار بحق هيثم مصطفى الذى خلع الفانلة الحمراء ورفض الانتظام في التدريبات (رجالة كده) ، وبعد شهور إستجمع المريخ شجاعته المفقودة اصلا واصدر قرارا مهزوزا وهو الآن يريد التراجع عن القرار حتى ينخرط هيثم في التمارين ولكن المريخ خجلان من التراجع وبالمقابل هيثم خجلان يقول لناس المريخ رجعوني ، وبما ان الطرف الاول خجلان من الطرف التانى والعكس صحيح فنحن نقترح ان يتدخل محمد الشيخ مدنى ويقرب وجهات الخجل فيعود هيثم للمريخ او يعود المريخ لهيثم .

ود الياس معجب ب(الضُرس) !!
في ظل الحملة الشرسة التى يشنها الاعلام ضد الفنان الشاب طه سليمان سجل رئيس نادى المريخ الاسبق محمد الياس محجوب اشادة كبيرة بطه في الحوار الذى اجرته معه صحيفة (الهدف) قبل يومين ، حيث اعتبر ود الياس طه من افضل الاصوات الشبابية الموجودة في الساحة وقال انه يملك رصيدا طيبا من الاغانى ، اشادة ود الياس بالضرس جاءت في الوقت الذى تمارس فيه كثير من الاقلام حملة منظمة من اجل إغتيال طه معنويا .

في رمضان .. المطر بعد الفطور زي الحافز مع المرتب !!
هيئة الارصاد الجوى في تصريح مضحك قالت ان المطر في الخرطوم سيصب كل خميس وجمعة ، وتصريح ناس الارصاد قابلها الناس بكثير من التعليقات الساخرة فكان التعليق الاكثر ظرفا هو : (دى مطرة ولا بت طالعة من الداخلية) ؟؟ كلام الناس الارصاد طلع كلام بتاع نشرة جوية ساكت الخميس جاء ومشى فينا لا شفنا مطرة ولا شافتنا مطرة ، والمطر في الخرطوم وتحديدا في رمضان بيصب بعد ما تبتل العروق ويثبت الأجر ، المطرة بتجي بعد المويات وفي ذلك هى اشبه بالحافز الذى تستلمه ثانى يوم من صرف المرتب .

مهاجم مطوتو في جيبو
المدافع البيقطع الكورة من بكرى لازم يكبر عكازو !!
بكرى المدينة هو اكتر لاعب سودانى عندو ارشيف حافل بالمشاكل والخروج عن النص سواء كان ذلك مع زملائه داخل الفريق او الاجهزة الفنية او لاعبي الفرق الاخرى ، ولكن الملاحظ يجد ان مشاكل بكرى كلها مع (اولاد البيت) ، مرة ضرب ايكانغا ومرة مشكلة مع كوليبالى ومرة مع ميشو والقائمة تطول حتى تشاجر اخيرا مع المحترف المحترم سيسيه ، بكرى في احدى المرات هدد زميلا له ب(المطوة) وهذا سلوك مرفوض ولا يشبه الهلال ولا لاعب الهلال ، إذا استمر بكرى بطريقته هذه فنتوقع ان يدخل كل مدافع ارض الملعب وفي يده عكاز تحوطا لعضلات بكرى ونرفزته ومخاشناته التى تتجاوز حدود اللياقة ، مجلس الهلال مطالب بأن يهذب سلوك بكرى حتى لا يفرتق نسيج الهلال الاجتماعى .
مكالمة لم يرد عليها !!
فائزة عمسيب كثير من المبدعين عندما يصرعهم المرض يغادرون الى الأردن بحثا عن الشفاء ، و(الدراما السودانية هى المريض الوحيد) الذى لم يفكر فى الأردن حتى الان .. غيابك عن الساحة الفنية يزيد من أوجاع الدراما التى بالضرورة تحتاج ل(الشجر الكبار) لان المتلقى يبحث دوما عن (الصمغ).

النصرى في (الشروق) .. قتل بارد !!
في سباق القنوات المحموم في شهر رمضان المعظم تراهن كل قناة على برنامج بعينه ليكون هو الأكثر مشاهدة بين جميع البرامج في القنوات على نحو ما تفعل قناة النيل الازرق عبر برنامجها الاشهر (أغانى وأغانى) ، قناة الشروق من جانبها راهنت على الفنان محمد النصرى الذى يظهر في خلال (30) حلقة عبر برنامج (مع النصرى) الذى تعده الإعلامية عفاف حسن أمين وتقدمه المذيعة اسراء ، حيث جذب البرنامج كثيرا من الجمهور الذى يتشوق لمعرفة الجوانب غير المرئية في حياة النصرى ، وتقوم الشروق ومن خلال ضيوف الحلقات باضاءة كل الجوانب الخاصة بالنصرى إلى جانب تقديم عدد كبير من اغنياته والاستماع لافادات شعراء الاغنيات ، محمد النصرى إختارته الشروق لكى يحدث الفارق ويدخلها دائرة المشاهدة بقوة سيما في ظل البرامج المتنوعة التى تقدمها القنوات وتحديدا في الزمن الذى يعقب الافطار ، لم ينصر النصرى الشروق ولو ان القناة كسبت احترام وتقدير قطاع واسع من جمهور المشاهدين خاصة المهتمين بأدب الغناء الشمالى وعشاق النصرى وكل متذوقي المفردة الشايقية وصوت الطنبور ، ولكن تجربه التوثيق للنصرى في ثلاثين يوميا إعتبرها الكثيرون (قتل بارد) لهذه التجربة ولذا نفر عدد كبير من المتابعين من البرنامج سيما ان مقدمة البرنامج اسراء عادل ليست هى من مذيعات الصف الأول.

ان شاء الله تغلبك ب(البيض) وتغلبها ب(الذرة)
وراء كل (ديك وفى) جدادة هدية ورضية !!
عزيزي القارئ في الصورة تظهر هذه (الجدادة) وهى راضية ومرضية (تبُوس) أو (تُقبل) قدم زوجها العزيز (ديك الحلة) في مشهد أكيد أنه ابكى بقية (الجداد الفاقد حنان) ، الصورة تثبت ان الجدادة الهدية والرضية في العادة تقابل وفاء الديك بهذا التعبير الصادق الذى نحسد عليه نحن بني البشر ، هنيئا لهذا الديك بهذه الزوجة المخلصة وهنيئا لهذه الجدادة بهذا الزوج السعيد وان شاء الله (تغلبك بالبيض وتغلبها بالذرة) .

الزول في التلاجة والبيبسي في السرير !!
قلوب الناس في رمضان تخفق كلما شاهدت (مكيف) أو (مروحة) أو (تلاجة) أو حتى (لوح تلج) ، وهذا الشاب (المتجرس) اخرج البيبسي وكل انواع البارد من التلاجة وفضل ان يمضى ساعات النهار داخل التلاجة في محاولة للترطيب بينما ترك البارد مستلقيا على السرير .

طبق (سد المال) يلتقط العرسان !!
أهلنا بيقولوا : (الحاجة أم الاختراع) وهذا الصنايعي لفت انظار الناس وهو يستعين بطبق دجتال من (الزعف) هو الطبق الذى تستعين به الاسر في (شيلة العروس) وتخصصه لحمل المال او ما يسمى بالمهر وقطع شك الطبق ده ما بيجيب ولا قناة حتى لو كانت (النيلين) ولكنه ربما يلتقط العرسان فهل تستعين كل بايرة بطبق سد المال خصوصا ان العيد على الابواب ؟؟

صوالين الحلاقة قبل العيد زي باص الوالي !!
من سيئات (باص الوالى) انه اعاد لنا (الشماعة) ، ومن حسنات (باص عزو) انه لا يخرج من نادى المريخ بعد خروج الفريق المفضوح من التمهيدى ، الزحمة في باص الوالى تمنحك احساس انه ترحيل مجاني ، هذا التكدس الرهيب في باصات الولاية ستعايشه (صوالين الحلاقين) إعتبارا من (27 رمضان) وحتى الساعة السابعة من صباح اول ايام العيد ، فكثير من الصوالين المميزة تجدها يوم الوقفة تحمل الزبائن شماعة هذا بخلاف الذين يحجزون بالهاتف والذين يحردون الحلاقة بسبب الصف الطويل .

ليه الحنين دفاق ... والازيار فااااضيه ؟؟!!
* الفيضان ..
* والفيضان إرتبط ب(الأمطار) و(الخريف) ..
* و(السيل) هو اسم من اسماء (الفيضان) أو العكس صحيح ..
* نحن في الحياة العامة نحصر الفيضان في (الموية والخريف) ..
* ولكن الفيضان ممكن يكون في اى حاجة ..
* تعريف الفيضان هو : (الزيادة في الشئ دون الارادة) ..
* أو قل : الزيادة غير المتوقعة .. هذا هو تعريف الفيضان بحده الأدنى ..
* ولذلك ممكن يكون هنالك فيضان في الحزن وفيضان في العاطفة والشوق وحتى الكراهية فيها فيضان ..
* زيدان ابراهيم غنى : (يا المشاعرك فايضة رقة) ..
* جميل جدا هذا التعبير .. (مشاعر وفايضة رقة) ..
* والمشاعر يفترض تفيض مشاعر لكن عند زيدان ابراهيم المشاعر فاضت رقة ..
* وهذا فيضان له فوائد ..
* هسه النيل لما يفيض مرات ما بجيب موية ..
* مرة النيل فاض جاب ليهو (خشب) و(تماسيح) و(براميل) ..
* فاضت المشاعر وجابت ليها رقة ..
* في مساحة اليوم يطيب لي ان اقف عند واحدة من اجمل الاغنيات السودانية ..
* اغنية تمثل حالة فريدة من حالات الفرح والتعبير الصادق ..
* أغنية كتبها الشاعر (ابراهيم محمد ابراهيم) ..
* هى : (لهيب الشوق) ..
* اسم النص .. (لهيب الشوق) ..
* والأسم في حد ذاته له (شنة ورنة) ولذلك الاخ ابراهيم كان موفقا في اختيار الاسم لحد بعيد ..
* اللهيب (حاجة ما كويسه) ، والشوق (حاجة كويسه) ، وربط اللهيب بالشوق ابرز قوة النص ..
* قال : (فاض بي لهيب الشوق) ..
* قوة النص وجماله زادته (حنجرة الحوت) قوة وروعة حتى صارت الاغنية (تاج على رأس) اغنيات الشباب ..
* يقول ابراهيم في النص :
فاض بى لهيب الشوق و ما عارف أحوالها
الحلوة ست الناس يا ريتنى فى بالها
* الذى يحس بالشوق يرجو ويتمنى ان يكون الطرف الثانى يشتاق له بذات الدرجة ..
* يعنى القصة ما تكون شوق من (طرف واحد) ..
* عشان كده ابراهيم بواسطة حنجرة الحوت قال : (الحلوة ست الناس يا ريتني في بالها) ..
* (يا ريت) كلمة تفيد التمنى ..
* وهو يتمنى ان يكون في بالها ..
* هذا التمنى يكشف ان ابراهيم عندما كتب النص لم تتجاوز قصته العاطفية مرحلة (يا ريت) وهذا يؤكد ان العلاقة (برلومة) ..
* علاقة جديدة تقف في حدود (التمنى) ..
* ويأتى فيقول :
مزروعة فى جواى و انا زدت فى شوقها
محروسة بى ياسين وقلبى معشوقها
زى نفحة الياسمين سمحة و سمح ذوقها
* قال : (مزروعة في جواي) وقصد بذلك تضخيم مكانتها في القلب ..
* وهذا تعبير يشبه : (جنبك ومشتهيك) و(انت معاي وانا مشتاق ليك) ..
* (مزروعة في جواي وأنا زدت في شوقها) مقطع يشابه المقطع الذى غناه محمود ويقول فيه (تمر الفكى السيدو شايلو ومشتهِ) ..
* استفاد ابراهيم من الثقافة الدينية واستعان ب(سورة يس) فمنحت النص جمالا ..
* محروسه بي يس وأنا قلبى معشوقها ..
* والذى تحرسه (يس) يكون في آمان وفي حفظ الله ورعايته دون شك ..
* ختم ابراهيم الكوبليه التانى بصورة جماليه قال فيها : (زي نفحة الياسمين سمحة وسمح ذوقها) ..
* الياسمين هو سمح من حيث الشكل والمضمون ..
* يعنى يا حبيبي ما ممكن تلقى ياسمين شكلو حلو وريحتو كعبه ..
* ما في ..
* الياسمين حلو شكل وحلو ريحة ..
* وهو شبه هذه الفتاة ب(الياسمين) ليؤكد إنها (فتاة شكل ومضمون) ..
* ويقول :
ليه الحنين دفاق و قلوبنا مشتاقة
كاتلانا بى ريده و نحن عشاقها
الروعة ست الناس حارقانة أشواقها
* تدفق الحنان فيه تأكيدا على فيضان الشوق ..
* التدفق والفيضان هما (اخوان اولاد خالات) ..
* والاستعانة ب(التدفق) تؤكد اصرار الشاعر على تثبيت (فيضان شوقه) وهو ايضا ظهر في قوله (قلوبنا مشتاقة وحارقانة اشواقها) ..
* يختم ابراهيم النص قائلا :
نار الغرام فى الجوف زادت لهيب الشوق
الروعة ست الناس صاحبة معالى و ذوق
زى قمرة فى دورين يا قمرة فى دورين
أصلو الجميل معشوق
* جميل جدا والله قوله : (نار الغرام في الجوف زادت لهيب الشوق) ..
* والنار العندها لهيب هى زي (الحيطة الليها ضل) ..
* نحن نعوذ بالله من النار العندها لهيب ولكن نستمتع بنار ولهيب الشوق ..
* خلاصة القول عند ابراهيم هى : (زى قمرة في دورين) ..
* بت عبارة عن (قمر 14) .
* التحية للشاعر الجميل ابراهيم وللملحن الكبير القديل وللاسطورة محمود عبد العزيز ..
* لهيب الشوق ابدع فيها الحوت كعادته وجعل كل الشباب يحسون بالشوق حتى وإن لم يكن الشوق مشكلة عندهم ..
* والجميل ان الاغنية تحظى بكل هذا الحب والاستماع في زمن (الواتس والفيس والاختلاط في الجامعات) ..
* كل الاشياء والوسائل التى قتلت الشوق لم تقتل صوت محمود وهو يصدح بهذا النص الفاخر ..
* كنت اود ان اتحدث عن اغنية (خوف الوجع) ولكن لاسباب نفسية تحدثت بما تيسر عن (لهيب الشوق) ولنا عودة ..
* الرحمة والمغفرة للحاج محمود عبد العزيز ..
* و..و..
* وليه الحنين دفاق و...(الأزيار فاضيه) ..




السر قدور (ذاكرة تو قيقا) ولكن !!
رصد عدد من كبار النقاد الفنيين والمتابعين لمسيرة الفن السوداني كثير من الأخطاء المؤثرة التى وقع فيها مقدم برنامج (أغانى وأغانى) السر قدور الشئ الذى جعل القناة تكثر من الاعتذار عبر شريط يمر اسفل الشاشة تصحح فيه معلومات تخص الاغنيات والشاعر والملحن هذا إلى جانب ان الاعلامي الكبير عوض بابكر مقدم برنامج (حقيبة الفن) قد صحح السر قدور في اكثر من معلومة اثناء الحلقة التى قدمت من داخل استديوهات الإذاعة السودانية ، السر قدور دون شك يتمتع بذاكرة ربما تكون (تو قيقا) وهو يشكر على هذا الجهد الذى يقدمه ولكن الأخطاء الكبيرة من شأنها ان تلحق اضرارا اكبر بالتاريخ وباصحاب الاعمال على الاقل من الناحية المعنوية ولذلك من المهم مراجعة كل معلومات السر قبل بثها منعا للضرر والحرج .


فريق كبير في العمر وصغير في المشاركات
المريخ بيمد كراعو قدر سيكافتو !!
مع كثرة المسابقات التى قدمتها القنوات في هذا الشهر الكريم كنت اتوقع ان يكون هنالك سؤال على هذه الشاكلة : (اذكر عدد المرات التى شارك فيها المريخ في سيكافا ؟؟) على ان تكون الجائزة (اسطول من السيارات) ، ولا اظن ان احدا يستطيع ان يتحصل على الاجابة الصحيحة لان المريخ احيانا يشارك ثلاث مرات في العام ويخرج في كل مرة من الادوار الاولى او الادوار المتوسطة ، خرج المريخ من تمهيدى الابطال فشارك في سيكافا جناح (حوض النيل) وخرج المريخ من دور الثمانية لبطولة الحوض وقرر الآن المشاركة في سيكافا جناح (الصحراء) وغدا سيخرج المريخ وسيشارك في سيكافا جديدة وكل هذا يحدث في عام واحد ، عقب العيد يسافر المريخ لسيكافا ، أكثر شئ يعجبنا في المريخ انه يمد كراعو قدر سيكافتو .


عزو عندو فيها مقعد ناصية
مقصورة المريخ الماسية .. الزفاف غالي والعروس (أم عيال) !!
ورد في الاخبار ان المريخ سيدشن مساء بعد غد الاثنين المقصورة الماسية بالاستاد وتأكد ان سبعة شخصيات قامت بشراء تذاكر في المقصورة الماسية وقيمة التذكرة (20) مليون بالقديم وابرز هذه الشخصيات السيد جمال الوالى الشهير ب(عزو) وعلى الفادنى قطب النادى ، قالوا من مميزات هذه المقصورة ان المقعد الذى تجلس عليه سيتم تسجيله باسمك وهنالك خدمات خمسة نجوم مثل تقديم البارد والساخن والصحف اليومية وشاشات مشاهدة مريحة وتكييف ، والله ماشاء الله الحكومة ما قصرت معاكم لكن السؤال البيطرح نفسو : (هى وينا الكورة البيعمل ليها مقصورة ماسية وفيها مكيفات ؟؟) ، عليك بالذمة كورتكم دى داير ليها مقصورة يا عزو ؟؟ غايتو جنس غايتو ؟؟ فريق بيطير من التمهيدى بيعملو ليهو كده ؟؟ والله استادكم ده والمقصورة دى بتذكرنا بالعروس البيجيبو ليها فستان زفاف غالى جدا وفي نفس الوقت هى (ام عيال) ، عروس اولادها ممتحنين الشهادة السودانية وهى ترقص بالزفاف ، هذا هو حال المريخ المائل يلبس الزفاف وهو في نفس الوقت تعبان وشبعان تعب .


أبراج (قوون) .. حظهم اليوم
محسن سيد
مهنيا : بيقولوا من يهن يسهل الهوان عليه ، والمريخ هين عشان كده انت بقيت مدربو .. عمليا : قلت بسبب المريخ خليت دخول الواتساب وأنا خايف لما مباراة القمة تقرب انت تخلى الأكل والشراب .. عاطفيا : المريخ ده لو إعتكفت ليهو في المسجد ما ح يفوت الوصافة وما بيشيل سيكافا وتأكد إنو المريخ الذى يفوز بسيكافا وهوتحت قيادة اتوفيستر لن يفوز بها في قيادتك انت وبرهان .. حظك : إنو جمهور المريخ زادو موية وبقى ما بشاكل في حالة الهزائم والسقوط .. وسواد حظك : إنو المريخ كل شهرين بيجيب مدرب جديد .. أهو حظك مع برج (عزو) .
الأمين البرير
مهنيا : أبان فترة رئاستك للهلال وقف معك الكاردينال وقفات مشهودة بدأت منذ تسجيل فلانتاين بعد ان (زاغ الارباب) واستمرت حتى إعادة قيد الغزال .. عمليا : انت رديت الجميل ووجهت عضويتك المؤثرة لمناصرة الكاردينال في موقف لن ينساه اشرف .. عاطفيا : لولا عضويتك لما فاز الشاعر .. حظك : إن انصار الكاردينال هم لا يقفون مع عودة هيثم .. وسواد حظك : ان الملحن المقيم بجده سيعمل بكل قوة من اجل اسقاط اشرف قبل نهاية دورته .. أهو حظك مع برج (الكيماوى) .
نسرين هندى
مهنيا : ظهورك عبر برنامج (أغانى وأغانى) للعام الثانى على التوالى يؤكد ان (القبه تحتها فكى) .. عمليا : البيسمع صوتك والبيشوفك لا بيقدر يقول انت كويسة ولا بيقدر يقول انت كعبة ولكن الأكيد المؤكد انك افضل مية مرة من افراح عصام .. عاطفيا : السر قدور مرات بيكسر تلج عشان كده لما يقول ليك (هايله ما تصدقي) .. حظك : إنو عدادك بعد رمضان سيكون (رامي) .. وسواد حظك : إنو الفنانات قالن انت (تمامة جرتق) .. أهو حظك مع برج (البيقن) . احمد الباشا
مهنيا : ناس المريخ عملوا (قرعة) و(إستخارة) عشان يختاروا قائد للفريق والقرعة جابتك انت .. عمليا : القادة انواع ، في قائد بقود لقدام وفي قائد بيقود للخلف وأنا ما بفسر وانت ما تقصر .. عاطفيا : إحنا سعداء جدا ان يكون قائد المريخ هلالابى بيموت في الهلال حتى وهو بشعار النجمة ولكن نجاح القائد يحتاج لجنود وفي المريخ إحنا شايفين لينا جندى .. حظك : إنو هيثم خرج من الاحمر مثل خروج الشعرة من العجين .. وسواد حظك : لو ما كسرت تلج لجمال زي ما كان بيعمل اكرم ما ح تستمر في القيادة .. اهو حظك مع برج (شلة كورال) .
كامبوس
مهنيا : الأدارة إختارت معسكر اديس ابابا وانت وافقت وقلت ان ذلك تم بالتنسيق مع المجلس .. عمليا : قلة الاوكسجين في الهضبة الاثيوبية ممكن يخلى سيرجو يروح فيها وانت تعلم (عامل السن) ليهو تأثير .. عاطفيا : من اجل مصلحة سيرجو الذى احضرته انت كان يجب ان ترفض هذا المعسكر في هذه الدولة الباردة والمرتفعة .. حظك : إنو لقيتنا مع الانتخابات ورمضان ما فاضين لسيرجو ولتنظيراتك الكتيرة في التشكيلة .. وسواد حظك : إنو بعد كأس العالم بقينا نشوفك انت وسيرجو عشرة عشرة .. أهو حظك مع برج (هليفة) .
صلاح ادريس
مهنيا : في الإنتخابات الاخيرة دقيت الدلجة وده شئ طبيعى لزول داير يدير الهلال بالتلفون والواتساب .. عمليا : زمااااان عبد الرحمن ابو مرين قال ليك : الهلال تانى إلا تشوفو في السماء وما صدقت كلامو وهسه ان شاء الله تكون عرفت حاجة .. عاطفيا : الكاردينال ليس غاية طموحنا ولكن انت لما تكون رئيسنا بتعارض الهلال اكتر من لما تكون ما رئيسنا .. حظك : إنو أهلى شندى ماشى كويس .. وسواد حظك : إنو الهلال ده تانى إلا تجيهو بالتعيين .. أهو حظك مع برج (العقال) .


انقر هنا لقراءة الخبر من مصدره.