صلاح إدريس معاكساته للهلال تفرض عليه أن يقدم لجماهير أمة الهلال اغنية (أعذريني) """"""""""""""""""""""""""""" الكاردينال مطلوب منه أن يثبت للهلال صدق أغنيته (زول بريدك زي ما في) """""""""""""""""""""""""""" الهلالاب عمر بخيت (المعلم) بكل تجلياته – بعد (12) سنة قالوا ليه كفاية – المريخاب متمسكين بجمال الوالي (12) سنة """""""""""""""""""""""""""""""""""" لو عاوزين تجيبوا (ميسي) الهلال – إلّا تشفوا ليكم ند للهلال غير (المريخ) """""""""""""""""""""""""""""""""" • امس تحدثنا في هذه المساحة عن رئيس نادي الهلال السابق تحت عنوان (الحان صلاح ادريس) ، والصدفة وحدها هي التى تجعلنا نكتب اليوم تحت عنوان (كلمات اشرف الكاردينال) بعد حوار الكاردينال امس الاول في قناة النيل الازرق..ليكتمل الاداء كلمات ولحنا. • فان كان الاول (ملحن) اشتهر كثيرا لحنه لاغنية (اعذريني) فان الثاني (شاعر غنائي) اشتهرت كذلك اغنيته (زول بريدك زي ما في). • وما فيش حد احسن من حد. • اعذريني قدمها الفنان سيف الجامعة وقدم اغنية الكاردينال الفنان كمال ترباس. • صلاح ادريس في حاجة شديدة الآن لكي يقدم لجماهير الهلال وامته قاطبة (اعذريني) بعد المعاكسات التى قام بها صلاح ادريس في التسجيلات الاخيرة. • والكاردينال يحتاج ايضا ان يثبت لامة الهلال وجماهيره صدق مشاعره للهلال حينما كتب (زول بريدك زي ما في). • نشوف. • نتوقف اليوم للحديث عن (كلمات) الكاردينال التى قالها في حواره مع محمد فضل الله في برنامج (البحث عن هدف) بقناة النيل الازق...وليس (كلمات) شعره. • اولا لا بد من القول ان اشرف الكاردينال كان مقنعا في ردوده الى حد بعيد (لاحظت ذلك في هلع المريخاب) ..قدم الكاردينال دفوعات منطقية وخطوات مبشرة. • يمكن ان تحس بذلك من خلال الشارع الهلالي فيما توفر لنا من (انطباعات) فقد كان الكاردينال صادقا في طرحه – لذلك وجد القبول من جماهير الهلال. • ربما انتقد البعض على اشرف الكاردينال بعض اجاباته وكلماته وتشبيهاته – لكن في الحقيقة هو لم يتجاوز فيها – كما ان اللغة الرياضية ولغة الكورة هي تلك اللغة التى تحدث بها الكاردينال في التلفزيون. • لذلك انتقاد البعض لبعض كلماته لم يكن منطقيا – فهو قد اختار لغة وتشبيهات قريبة من الشارع الرياضي. • نحن نتحدث في البدء عن الظواهر الايجابية في اللقاء – ومن دون شك سوف نتحدث في نفس هذه المساحة عن السلبيات. • من ايجابيات الكاردينال في حواره التلفزيوني انه كان سعيدا بالهلال وكان متمسكا بالرئاسة التى اعلن تمسكه بها لمدة (25) عاما – وهذا تقدير للهلال وتمسكا به رغم ان مجلس الهلال صرف اكثر من (14) مليار في (5) اشهر فقط...وهذا رقم (بطفش الرؤساء). • كان الكاردينال منتشي بالهلال العظيم – لتظهر عظمة الهلال. • صلاح ادريس كان قد اشار في حوار سابق له مع صحيفة (الصيحة) ان الكاردينال لن يصمد طويلا في رئاسة الهلال وان هروبه من الهلال امر سوف يحدث قريبا. • ربما يقول صلاح ادريس ذلك من منطلق (هروبه) هو في دورته الثانية عندما قدم استقالته من اجل الترشح لرئاسة الاتحاد العام وترك الهلال في ظروف صعبة ووضع خطير وهو مثقل بالديون والالتزامات المادية الكبيرة فكان ذلك هروبا من صلاح. • بنى صلاح ادريس هروب الكاردينال من ذلك المنطلق – خاصة ان الصرف في الهلال ارتفع والاستحقاقات الواجبة السداد على الهلال كثيرة – ما تركه صلاح ادريس من (ديون) يجعل اي رئيس يهرب. • لكن الكاردينال اعلن عن بقائه واستمراره (25) سنة في الهلال. • طبعا (25) سنة كتيرة – الهلالاب ما بقدروا يستحملوا الكاردينال اكتر من دورة واحدة. • لو جبت لينا (ميسي) ذاتو – الهلالاب ديل اكتر من (3) سنوات ما بستحملوك. • بي جوهرتك الزرقاء يا الكاردينال ما في زول بقدر يستحلمك اكثر من ثلاث سنوات. • كمان ما تبالغ (25) سنة ليه؟. • وقت انت ح تقعد (25) سنة – ليه استكترتوا على عمر بخيت (12) سنة. • نحن ما زي المريخاب – استحملوا جمال الوالي (12) سنة – وقت جمال الوالي يقفل تلفونو – المريخاب كلهم بمشوا يتكسروا في بيت الوالي. • في الهلال ما في كلام زي دا. • الهلالاب عمر بخيت (المعلم) بكل تجلياته – بعد (12) سنة قالوا ليه كفاية – المريخاب متمسكين بجمال الوالي (12) سنة. • صلاح ادريس بعد دورتين في الهلال – فشل مرتين في الانتخابات من اجل العودة مرة اخرى رئيسا للهلال. • قالوا ليه نهي رئاسة. • رغم النجاحات التى يحفظها الكثيرون لصلاح ادريس في الهلال اختلفنا او اتفقنا معه...فشل صلاح ادريس مرتين في الانتخابات. • الهلالاب قالوا ليه السما قريب. • البرير ايضا كمل دورته – وذهب. • والغالب ان يكمل الكاردينال دورته – ويأتي رئيس جديد للهلال. • جمال الوالي شغال (اعادة) في الرئاسة. • نعود الى حوار الكاردينال التلفزيوني ونقول ان رئيس الهلال اظهر هيبة الهلال وقدرته عندما اكد ان الهلال يملك المال وانهم في استطاعتهم احضار ميسي. • ميسي ممكن يلعب في الهلال. • لكن ميسي ما ممكن يلعب ضد بلة جابر. • لو عاوزين تجيبوا (ميسي) الهلال – إلّا تشوفوا ليكم ند للهلال غير (المريخ). • ميسي دا ما بلعب ضد المريخ – وناس وديدي الفاتح والفاضل ابوشنب. • دي مشكلتو بس. • لو ما ناس ضفر وبلة وعلي جعفر والريح علي (الزهور والوردي) ممكن ميسي يجي يلعب في الهلال. • حكاية لو عاوزين نجيب ميسي ذاتو بنجيبو (ريحتنا). • وشفقت ليكم الجماعة. • قالوا الكاردينال بفتش في تلفون لي وكيل ميسي. • ادوه (5) تلفونات لوكيل ميسي – كلها طلعت مقفولة. • لو الكاردينال لقى تلفون وكيل ميسي قبل نهاية التسجيلات – طوالي بوقف التفاوض مع البرازيلي كروز. • بنقلب على (ميسي). • كمان نحن بنلعب. • من بشريات حوار الكاردينال التعاقد مع شركة الثريا بمقابل مالي يصل ل (3) ملايين دولار – هذه طفرة كبرى يجب ان تحسب لرئيس الهلال. • اضافة الى (بيت الهلال) الذي اصبح بشهادة البحث ملكا للهلال – هذا انجاز عظيم ..وامر يشكر عليه المجلس وهو من دون شك شيء يحسب من الانجازات العظيمة لمجلس الكاردينال. • كذلك يحسب للكاردينال (بص الهلال) – وهو امر فيه الكثير من الاحترافية. • زمان الخرطوم دي بقولوا ليك الواحد لو لقى فيها سكن وعربية ما بكون عندو اي مشكلة. • هسع الهلال جمع بين البيت والعربية. • دا الشغل الصاح. • اما التسجيلات – فهي اشياء لا يمكن ان نتحدث عنها الآن – سننتظر الموسم لنرى ان حقق الكاردينال نجاحا في ذلك الملف ام اخفق فيه؟...رغم تأكيداته بنجاحاته في التسجيلات. • نسأل الله النجاح لكل الذين دخلوا كشوفات الهلال – الفريق الاول – والفريق الرديف. • الامر الذي يمكن ان ننتقد فيه اشرف الكادينال – هو ضعف الكاردينال الواضح في (المفاوضات). • الكاردينال لا يصلح لأن يكون مفاوضا – وهو قد فشل في هذا الجانب فشلا كبيرا. • يفضل مستقبلا ان يبعد الكاردينال من ملفات التفاوض – ان لم يبدل طريقته في التفاوض. • الناس تذكر للكاردينال عندما اوكل له مجلس الهلال بقيادة الامين البرير امر مفاوضة مهند الطاهر – فخرج الكادينال بعد جلسة المفاوضات وهو يوشك ان يفسد اي شيء. • كاد مهند الطاهر وقتها ان يرحل من الهلال بسبب تصريحات الكاردينال وكلماته التى اخرجها بعد جلوسه مع مهند الطاهر. • الآن وبعد الذي ذكره الكاردينال عن مفاوضته لبكري المدينة – وجدنا العذر لبكري المدينة في انتقاله للمريخ. • بكري المدينة لم يرحل من الهلال بسبب (المال) كما يشاع – وانما رحل من الهلال بسبب الطريقة التى فاوض بها بكري المدنية. • لا يعقل ان يقول رئيس النادي للاعب الذي يفاوضه انا ما مقتنع بيك – ولو الامر بيدي لما اعدت قيدك مرة اخرى. • ثم يضيف رئيس النادي انه يفاوض بكري المدينة مجبرا حسب رأي اللجنة – عشان هو غير مقتنع بيه. • وما بعيد الكاردينال يكون قال لبكري المدينة وخاله وشقيقه : بكري بضيع خمسة فرص والقون فاضي. • عليكم الله بعد الكلام دا لو عرضوا لي مليار دولار بتسجل – ورئيس النادي والمسيطر على كل الامور عندو رأي واضح وصريح في اللاعب الذي يفاوضه. • يا جماعة بكري المدينة ما غلطان – غلطان الكاردينال – يفضل ان يغير رئيس الهلال طريقته تلك في المستقبل. • عشان طريقتو دي (خليفة) ما بقتنع بيها. • لكن مع ذلك نحن ما بنخلي بكري المدينة – ح نحرسو في (الكشافات). • الامر الآخر الذي نلفت له نظر اشرف الكاردينال هو اننا شبعنا من (المجسمات) التى تعرض لاستاد الهلال. • وان اي مجلس سبقه عرض لنا مجسما عن استاد الهلال – وعن النادي والسفرة وغرف اللاعبين. • ما خلوا لينا حاجة. • صلاح ادريس عرض لينا خرطة لاستاد الهلال اخذت عن طريق طايرة. • ومرقناها في عهد صلاح ادريس لي صالحة. • عشان كدا (مجسماتك) دي ما مقنعة. • المشكلة ما في المجسم – والخرائط. • في ناس كسروا عديل كدا يا كاردينال ونزلوا لواري الطوب والخرسانة – وما شفنا حاجة. • مجساماتكم دي (برجاس) ممكن يعملها. • يعني ما تزحمونا ساكت. • ......... • ملحوظة : الله يستر على نزار حامد من مفاوضات الكاردينال. هوامش • بكري المدينة – عمر بخيت في المريخ. • المريخ الموسم الجديد عاوز ليك (ساعة) كاملة عشان تعرف المريخ شايت وين؟. • غايتو ح تحصل جنس لخبطة. • ناس عمر بخيت ديل يتلخبطوا بالوصافة – نحن ذاتو ما بنعرفهم. • الموسم الجديد بتوقع (النسور) يحققوا مركز الوصافة. • هيثم كابو ممكن يصحح مسارو بالكتابة عن عمر بخيت وبكري المدينة. • الله شافكم من ناس ضفر وبلة وعلي جعفر. • وجاكم كمان الريح علي (الزهور والوردي). • ........ • عاجل : اتوقع الموسم الجديد محمد صلاح يكون هداف الممتاز من (المهدية) التى اعير لها من الاهلي شندي.
