سودارس : عبد السيد المسيح والعقبي!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

عبد السيد المسيح والعقبي!

بدون حجاب خالد عزالدين نشر في قوون يوم 09 - 12 - 2014

* بصراحة الخبر ده عجبني جدا في صحيفة الصدى وحبيت تشاركوني بعض الثقالات هنا ..اول حاجة تعالوا نقرأ الخبر بعدين نتثاقل !
* (أخطر الجزائري هشام العقبي محترف المريخ الجديد إدارة النادي باختياره للمنتخب الجزائري للمحليين وبالتالي سيتأخر اللاعب لبعض الوقت ولن يتمكن من الانضمام لتحضيرات الفرقة الحمراء للموسم الجديد ولكن الجهاز الفني بالمريخ لن يكون منزعجاً لعدم انضمام اللاعب لأنه كان يواصل نشاطه بصورة طبيعية مع ناديه في الدوري حتى قبل ساعات من التعاقد مع الأحمر )
* لا اعتقد ان من يقرأ هذا الخبر يمكن ان يشك ولو للحظة بان هشام العقبي ليس لاعب المريخ خصوصا وان اعلام المريخ لا يعترف بالتعاقدات خارج نطاق اتحاد كرة القدم السوداني .. يعني لو ده اعلام الهلال ممكن نقول اعلام الهلال اعلام متقدم ومتصالح مع اللوائح الدولية ويعترف باي عقد بين اللاعب والنادي حتي ولو كان خارج اتحاد كرة القدم السوداني لان اعلام الهلال يدافع عن فكرة حصرية التعاقد بين النادي واللاعب .. فاعلام الهلال يعتبر اللاعب المتعاقد مع النادي هو لاعب النادي .. اما اعلام المريخ فلا يعتبر اللاعب متعاقدا الا اذا كان التعاقد بموافقة اتحاد كرة القدم السوداني وبالتالي فان اعلام المريخ يؤكد علي ان العقبي وقع مع المريخ واصبح لاعبا حسب هذا الخبر للدرجة التي اعتذر فيها اللاعب عن المشاركة في بداية الاعداد ! حلوة .. زولك ده مستعجل جدا قبل ما يوقع في الكشوفات بعتذر عن بداية الاعداد .. نشوف العذر الاقبح من الذنب .. السيد العقبي او السيد كاتب الخبر بقول انو اللاعب سيكون مشغولا اثناء بداية اعداد المريخ باعداده مع منتخب الجزائر للمحليين ! يا الله .. لاعب المريخ الجزائري يواصل اعداده مع منتخب الجزائر للمحليين ! والله جائز برضو يكون الاتحاد السوداني قال ليهم ممكن لاعب محترف في المريخ يلعب في بطولة امم افريقيا للمحليين ! جائز ؟؟ لكن نمشي للمنتخب ذاتو .. والله قدر ما فتشت وبحثت عن اسم اللاعب في لائحة اللاعبين المختارين لمنتخب المحليين ما لقيتو ! جائز اكون غلطان ..جائز يكون اسم اللاعب ما منشور في الانترنت مع المنتخب ! لكن انا خائف يكون اللاعب لا في منتخب المحليين ولا في المريخ ولا في اعداد المريخ ولا في اعداد منتخب الملحيين وكمان عامل حوار في صحيفة الزعيم وقال هو ما اخطر ادارة النادي بتوقعيه للمريخ .. وناس المريخ ناشرين الخبر رغم انو اعلام المريخ ذاتو قال انو المريخ اكمل اتفاقه مع النادي ..يا اخوانا!
* نرجع للخبر الذي يتحدث عن لاعب المريخ الجديد هشام العقبي مع ملاحظة مهمة وهي ان اعلام المريخ وطوال الحديث عن اللاعب في البداية كان ينسبه الى نادي وفاق سطيف حتى ان احد الاخوة في منتدي كورة جزائرية ضحك علينا وقال ( الاعلام السوداني رايحة ليهو سنه ) عشان العقبي كان في وفاق سطيف زماااان ومشي نادي (بلعباس) الناس ديل اصلا كده بحبو (الفوشير) يعني اسم(بلعباس) ده ما عاجبهم من ناحية ومن ناحية تانية طبعا هو فريق ما عندو انجازات زي وفاق سطيف ! كبير كوم كده قالوا انو المريخ يفاوض لاعب وفاق سطيف ياخي ديل احتفلوا بانجازات الحضري تقول جابها مع المريخ واختاروا بكري المدينة افضل مهاجم سوداني ونسوا انو افضل دي مع الهلال ! سيرة بلعباس دي ما جابوها الا بعد ما رئيس النادي قال المريخ ما اتصل بينا ذاتو عشان نفاوضو في اللاعب ؟ معليش يا رئيس الناس ديل كانوا بتفاوضو مع رئيس نادي وفاق سطيف !!
* نرجع للخبر تاني .. قال ليك اللاعب اخطر ادارة المريخ بتأخره بعض الوقت عن بداية اعداد المريخ مع العلم انو اعداد المريخ نفسو تأخر بعض الوقت ! وما عارفين ادارة النادي الاخطرها اللاعب .. اوعه يكون اخطر صديق علي صالح لانو صديق ذاتو ما حيكون في المعسكر الاعدادي الا اذا نجح انقلاب جديد !
* الجماعة ديل طيبين خلاص .. قالو اللاعب بقى لاعب المريخ رغم انو معلوماتو ذاته ما دخلت السيستم .. وكل المعلومات عن اللاعب اتضح انها غلط .. ده لاعب متعاقد مع نادي حتجيبو كيف من غير موافقة ناديه .. امكن علي طريقة مجدي عبد اللطيف يا خالد .. جائز يكون سكرتير الاتحاد الجزائري زي سكرتير اتحاد بورتسودان !!
* نهاية الخبر تقول (المريخ لن يكون منزعجا لان اللاعب كان يواصل نشاطه مع ناديه حتى آخر مباراة )ما اظن الموضوع محتاج لثقالة زيادة ده براهو بتثاقل !
الهلال والصليب !
* نمشي كمان لخبر اهتم به الاعلام المريخي وحاول التهكم به على الهلال
* .. قالوا شعار الهلال الجديد فيهو صليب . وانو الهلال نفى هذا الامر !والشئ الطبيعي ان شعار (الهلال)ما ممكن يكون معاهو (صليب) فالهلال شعار محبب للمسلمين والصليب شعار محبب للمسيحين ! ولا نود ان ندخل في جدل ديني لاننا في النهاية رياضيون فقط نقول ان مؤسس المريخ هو ( السيد عبد السيد المسيح فرح ابوسيفين)
* يعني ناس المريخ ديل لو عندهم ود مع تاريخ ناديهم المؤسس في المسالمة مفروض يكون شعارهم الصليب مع النجمة واحتفالاتهم الرئيسية باعياد الميلاد ووجبتهم المفضلة الفسيخ !

انقر هنا لقراءة الخبر من مصدره.