· مستقبل الهلال مع وليد الشعلة وولاءالدين سوف يكون ممتد بالانتصارات والبطولات باذن الله
· الصحف الرياضية تحصل اية كارثة او خسارة ..تحمل (المسؤولية) وتشيل الليلة كلها
· هلال الموسم القادم سوف يكون الاخطر ..وسوف يعيد الزمن الجميل لعصر الهلال الذهبي
· وفد الهلال لمدني للتفاوض حول ولاءالدين كان بقيادة الفريق عبدالرحمن سرالختم ..مع ذلك يحاول جمال الوالي ان يحرج قيادات بهذا الوزن
------------------------------------------
· هناك الكثير من الانتقادات التى توجه للاعلام الرياضي ..وتوجه اتهامات لبعض (الاقلام) انها سببا في رفع معدل (العصبية) ، وان كنا لا نعفي انفسنا – إلّا اننا نقول ان الكثير من الاشكاليات سببها (الاداريين).
· في ناس لو (الجبنة) عملت ليهم تسمم – بقولوا ليك : (كلو من الاعلام الرياضي).
· الواحد فيهم يقوم الصباح يلقى نفسو محاصر بالمويات – يقوم يقول ليك : (ناس الجرايد الرياضية ديل لو ما غرقونا ما برتاحو).
· اصلو ما برتاحو.
· كلو من ناس الجرايد.
· في ناس مشروع الجزيرة دا فشلو بردوه للاعلام الرياضي.
· يقولوا ليك هو ناس مزمل ابوالقاسم فايقين لينا من (الشكاوي).
· شكاويكهم بقت اكتر من نقاطهم.
· ديل وقت ما لقوا ليهم حاجة يشتكواها ..اشتكوا من المطرة.
· الصحف الرياضية تحصل اية كارثة او خسارة ..تحمّل (المسؤولية) وتشيل الليلة كلها.
· وحقيقة الامر ان (البلاوي) كلها اساسها الاداريين.
· وهم بطبيعة الحال جزء في الكثير من الاشكاليات ...والمعوقات التى تعيق سير الحركة الرياضية.
· كل الازمات التى تحدث في الوسط الرياضي محركها الاساسي (الاداريين) ، وان تصدى لها الاعلاميون وشالوا (وش القباحة) ساكت.
· كثير من القضايا يتصدر لها الاعلاميون بحافز او بدون حافز من اجل الاداريين.
· هم وراء اي مصيبة.
· زي الزول البكون شايل انبوبتو وحايم بيها اليوم كلو.
· لكن ..(ندخل على الجد).
· تبقى في كل الاحوال مشكلة الكورة في السودان او مشكلة الرياضة عامة سببها الاول والاخير مجالس الادارة ورؤساء الاندية والاتحادات.
· اديكم مثال بيدعم مبدأ (العصبية) – باعتبار ان التدخل الاداري كان في منطقة غير مسموح فيها بذلك التحرك.
· ح تقعدوا تتلفتوا لي وتقولوا الحاصل شنو؟.
· ح اقول ليكم – يعني ح اقفل العمود على النقطة دي.
· انتوا قاعدين.
· وانا قاعد.
· ما في حاجة فاتت.
· مجلس ادارة نادي الهلال كان قد ابرم اتفاقا ووقع عقدا مع لاعب الهلال السابق بكري المدينة بعد انتهاء فترته مع الهلال.
· الناس كلها – شافوا الكلام دا.
· شوبير تلاتة يوم بتكلم في الموضوع دا للساعة اتنين صباحا في الفضائيات المصرية.
· البلد كلها عارفة الموضوع دا ..(زي ازمة البنزين وقت تحصل في البلد).
· انتوا استعداداتكم للخريف يا ناس الولاية كان ماسكها (محسن سيد).
· الصحف الرياضية والمواقع كلها تداولت خبر توقيع الهلال عقدا مع بكري المدينة وقد نشرت الصحف صورة لبكري المدينة ورئيس نادي الهلال اشرف الكاردينال واللاعب يوقع عقدا مع الهلال...وفعلت ذلك صحف المريخ نفسها.
· واللاعب اكيد ما كان بوقع عقد على (قصيدة) جديدة للكاردينال.
· الامر تعدى ذلك ..وجاءت تفاصيل الخبر ان اللاعب استلم (800) مليون جنيه من رئيس نادي الهلال اشرف الكاردينال.
· اي زول عارف المعلومة دي.
· والصور لافة في المواقع زي (علبة الحلاوة) يوم العيد.
· بالمناسبة عملتوا شنو في الحلاوة.
· الحلاوة بقت نار.
· راعي الضان في الخلا ..عرف ذلك الخبر ..وسلمت الجماهير ان اللاعب اتفق مع الهلال وووقع عقدا معه.
· الناس عارفة الكلام دا – إلّا جمال الوالي.
· جمال الوالي شال الخبر دا ورماهو في البحر زي الما حصل حاجة.
· يمكن جمال الوالي يحسبها (شطارة).
· ويمكن (فهلوة) منو.
· ممكن.
· ممكن (ضجيج) اعلامي وبحثا عن المزيد من الاثارة.
· لكن تبقى العملية ما حلوة – زول وقع مع الهلال واستلم (800) مليون جنيه – وصورو نزلت في الجرايد والمواقع البخليك توقع معاهو تاني شنو يا جمال الوالي.
· قد يكون جمال الوالي قصد ان يحرج اشرف الكاردينال وصورو منشورة في الصحف مع بكري المدينة.
· تتفقوا يا الكاردينال وتتدفعوا القروش كمان واللاعب يوقع في المريخ.
· قانونيا بنلوم (الكاردينال).
· ولا بنغشو.
· وبنقول ليه فرطت في اللاعب.
· لكن من ناحية اخلاقية كدا اللوم الاكبر على جمال الوالي الذي اتفق مع لاعب وقع عقدا مع الهلال.
· حسب ما نشره الزميل احمد الحاج واشار الى ان سفر محسن سيد وملاحقته للمنتخب الاولمبي كان القصد منه تغيير اتجاه ولاءالدين لاعب الهلال القادم باذن الله.
· جمال الوالي تحرك نحو اللاعب بعد اتفاق مجلس الهلال مع مجلس ادارة نادي الاهلي مدني والتى قدمت موقفا تشكر عليه.
· الجرايد جابت الخبر.
· والمواقع تداولت صور مجلس الهلال مع مجلس الاهلي مدني.
· وفد الهلال كان بقيادة الفريق عبدالرحمن سرالختم ..مع ذلك يحاول جمال الوالي ان يحرج قيادات بهذا الوزن.
· مثلما كان التحرك نحو بكري المدينة امر غير مقبول من جمال الوالي بعد تعاقده مع الهلال – يبقى تحرك المريخ نحو ولاءالدين واللاعب اوراقه مع الهلال امر غير لائق.
· لماذا يتحرك مجلس المريخ في هذه المنطقة – وهو الذي يحدثنا عن (الشكاوي) – والمثل والقيم والقانون.
· ليس هناك بطولات في هذه الخروقات.
· المهم عندنا ان يكون عند اشرف الكاردينال (دواء) لهذه الاختراقات.
· الكاردينال الآن هو في امتحان حقيقي.
· تقبل الكاردينال (صفقة) المريخ مع بكري المدينة – واظن ان عوض الهلال سوف يكون اكبر في ولاءالدين.
· لذلك يبقى مرفوض ان يفرط مجلس الهلال بمثاليته في (ولاءالدين) .. لن نقبل (تراجع) آخر في هذا الامر.
· الكاردينال نجح بامتياز في تسجيل وليد الشعلة والذي حاول مجلس المريخ تعطيل قيده في الهلال بعد ان اوحى المريخ للاتحاد العام بايقاف اللاعب بسبب المنتخب الاولمبي.
· هذا يثبت ان تحرك مجلس المريخ كان نحو (وليد الشعلة) ايضا بعد اتفاق الهلال مع اللاعب ومجلس الاهلي الخرطوم.
· الهلال استطاع ان ينتصر على الاعيب الاتحاد العام ومكر المريخ ونجح الكاردينال في قيد وليد الشعلة في كشوفات الازرق.
· هذا نجاح يحسب للكاردينال.
· نحن ننتظر الآن نجاحا آخر من الكاردينال في قيد ولاءالدين في كشوفات الهلال بعد التدخلات (الحمراء).
· الزميل أحمد الحاج كان قد اشار الى ان الاتحاد تدخل في الامر مثلما تدخل في قضية وليد الشعلة وذلك بجعل مباراة الاهلي مدني امام المريخ المباراة الاخيرة للاهلي في الدوري.
· والتخطيط يبدو هنا واضحا ...اذ برمج الاتحاد المباراة في ذلك التوقيت حتى يتمكن المريخ من (خطف) اللاعب.
· لذلك انتباه مجلس الهلال امر لا بد منه – والتعامل مع هذه التحركات بحسم وحزم شيء يفرضه لدغات الهلال من هذا الجحر.
· المثالية التى يتعامل بها الهلال في هذا الامر – هي التى تفقدنا (نجوم التسجيلات) وتباعد بينهم وبين كشوفات الهلال.
· ولاءالدين بحكم (الورق) الآن لا يفصله من كشوفات الهلال إلّا فترة التسجيلات.
· ومثلما نجح الهلال في الظفر بالورق – عليه ان ينجح بالظفر باللاعب – وقد وجدت جماهير الهلال في (ولاءالدين) مبتغاها الذي تبحث عنه.
· مستقبل الهلال مع وليد الشعلة وولاءالدين سوف يكون ممتدا بالانتصارات والبطولات باذن الله.
· في ظني ان الكاردينال سوف يكون في امتحان آخر في التسجيلات القادمة ..والكاردينال لا ينقصه المال ولا الدهاء للخروج بالدرر التى يريدها الهلال.
· خاصة ان مجلس الاهلي مدني مشكورا وافق على اطلاق سراح اللاعب للهلال.
· ومواقف مجالس الاهلي مدني المختلفة دائما تبقى مشرفة – ودائما هم قدر الكلمة التى يقولونها.
· فقط مطلوب من مجلس الهلال بقيادة الكاردينال الانتباه والحذر.
· الهلال الحالي يشرفنا كثيرا ويتقدم في كل البطولات.
· هلال الموسم القادم سوف يكون الاخطر ..وسوف يعيد الزمن الجميل لعصر الهلال الذهبي.
· تخيلوا الهلال في الموسم القادم بالاضافات التى ينشدها مجلس الهلال الحالي.
· حاجة لا تتخيل.
· الروعة كلها سوف تكون في هلال الموسم القادم.
· ..........
· ملحوظة : اما انتوا فانتظروا مريخاب الجنوب.
هوامش
· جمال الوالي بركز في ورقة الهلال.
· جمال الوالي بيبص في ورقة زميلو.
· كل سنة كدا.
· يا الكاردينال غطي ورقتك...(المراقب) ما جايب خبر.
· استاد المريخ بالطريقة دي مفروض في (الخريف) يعملوه (حوض سباحة).
· استثمروا في الموية دي.
· مباراة الاهلي شندي تاني اجلوها.
· وعشان الاتحاد يغطي الموضوع قام بتأجيل مباراة الهلال امام مريخ كوستي.
· لا تأجيل مباراة الاهلي شندي قانوني ..ولا تأجيل مباراة مريخ كوستي قانوني.
· الاندية دي ذنبها شنو تتمرن وتعسكر لمباراة بعد شهر.
· الجماعة ديل عندهم محترفين واجهزة فنية عاوزين يمشوا اهلهم.
· تأخروهم بالصورة دي عشان خاطر المريخ.
· الدوري انتهى.
· مباراة المريخ والاهلي شندي اتوقعها تلعب في الموسم القادم.
· ندعوا فريق الامل لضبط النفس.
· اصبروا يا ناس الامل.
· شوفوا الجماعة ديل نهايتهم شنو؟.
· ..........
· عاجل : خلوا استاد الخرطوم جاهز – مباراة مازيمبي يمكن تجيب ليها مطرة.
