محمد عبد الماجد دق الدلجة التسجيلات دي لو استمرت يوم زيادة كان سجلوا عم (شبشه) ناس المريخ ديل – لو قاموا طبقوا نظرية (سلك) برتاحو في (عضمهم) دا. هم عندهم (عضم). عضمهم كلو بقى من (الهلال). تسجيلات المريخ بقى يحددها علاءالدين يوسف وبكري المدينة – (شغل اصحاب – اصحاب). انتوا وقت الهلال دا عاجبكم كدا – بتغالطوا مالكم؟. البقعدكم مع الجماعة ديل شنو؟. تعالوا لينا بالباب عديل – بدل ما تجونا ب (الاهلي الخرطوم). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الله شاف (رمضان عجب) من قفلة السيستم. عندكم (سيستم) زي الموبايل الصيني ..يقفل براهو. من غير سبب. ناس المريخ ديل لو عملوا بي نظرية سلك – ما كان احتجنا كتبنا العمود دا. كانوا ريحونا من كلام مامون ابوشيبة اليوماتي في (التحكيم). وعندنا (ضربة جزاء) الحكم ما احتسبها لينا. نحن الكلام القريناهو في (ضربة جزاء) وهمية ارتكبها أحمد النور مع عبدالمجيد جعفر عن معركة (ام دبيكرات) ما قريناهو. لو المريخاب اختصروا لينا الطريق. وقاموا بي حرفنة كدا – او بي (اسماعيل حسن) نزلوا لافتة (نادي المريخ) وقاموا رفعوا (قدماء لاعبي الهلال) يكون احسن. فيها شنو؟. ما فيها حاجة. بدل التحايل البتعملوا فيه دا. الجابركم شنو على الضرائب دي؟. ونقة الناس. وكلام الاعلام. الجابركم شنو في الحالة (التنكرية) العايشين فيها دي؟. عايشين في (كضبة) كبيرة. عايشين في جلباب الهلال – وبتغالطوا فينا. نزلوا لافتة المريخ وارفعوا لافتة (قدماء لاعبي الهلال). ما في زول بيسألكم؟. ما بنقول ليكم ادفعوا فرق. ولا بنسألكم من (اللون). ح نمشي الموضوع عادي. احسن تشتغلوا لينا في (النور) ..بدل (الدغمثة) البتعملوا لينا فيها دي. معقولة يا جماعة. نحن (عمر بخيت) دا جبناه (شافع) من الجريف بي (شنطة المدرسة) وسجلناه في الهلال. تجوا انتوا بعد (14) سنة تسجلوه في المريخ. ما بتخجلوا. ما بتتعلموا. الايام دي ما بتعلمكم. المدارس القريتوها دي ..كان بدرسوكم فيها (بيتزا). دا شنو دا؟. هيثم مصطفى قعد سنة في بيتهم ..قال ما بلعب. الاهلي شندي ولا المريخ. كرامة ما عندكم. احساس ساكت كدا ما في. تراوري (6) شهور ما ظهر. لمن سمن. بقى يعمل في المؤتمرات الصحفية. وانتوا ولا هنا. والمعز محجوب من قعاد الكنبة بقى زي (الحكم الرابع). ما بتشوفو إلّا في الزمن البدل الضائع. المعز محجوب من (حارس مرمي) الى (حارس الكنبة). وبتكلموا عن الهلال. فى قوة عين اكتر من كدا. وبكري المدينة هسع دي – كان واقف (6) مباريات. بعد دا كلو تجيبوا (عمر بخيت) الساعة 12 وتسجلوه. انتوا ما خجلانين. لو ما حاسيين انكم بتعملوا في حاجة غلط …كان جبتوه الساعة (12) ليلا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس لو الله مد في الاعمار (نزار حامد) دا بعد (21) سنة بكون في المريخ. وليد الشعلة بعد (25) سنة. وليد علاءالدين بعد (26) سنة. محمد عبدالرحمن بعد (24) سنة بكون في المريخ. اطهر الطاهر بعد (23) سنة. الثعلب الصعدوه امس الاول بعد (27) سنة بكون في المريخ. ما تشيلوا هم. السنين بتجري سريع. هسع بتلف. ديل لاعب الهلال لو مشى الاهلي الخرطوم بنتظروه (6) شهور ويجيبوه للمريخ. يعني (مجدي مرجان) لو شافوه في (خماسيات) ساكت بجيبوه يسجلوه في المريخ. وليد طاشين لو شافوه (جاكي) في شارع النيل ..بيشطبوا ليه (رمضان عجب). واحد قال لي انت ناس المريخ ليه ما اعادوا تسجيل (امير كمال)؟. قلت ليه امير كمال عاوز ليه سبعة مليار جنيه. وسبعة مليار جنيه بتجيب ليها (14) عمر بخيت غير الزيادة (سيلا). اللاعب بدخل كشوفات المريخ في حالتين. يا يكون سبق له اللعب في الهلال (ودي شهادة عليا). يا يكون (مصاب). سيلا دا العاجبكم فيه شنو؟. زول (6) شهور ما رفع ليه كورة. نسى الكورة. وفكت منو؟. جايبنو تتمو به (الكنبة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس لو كنتوا عاوزين نصيحتي كان تسجلوا (حمودة بشير). عمر بخيت وحمودة بشير برجعوا ليك وسط الهلال سنة 2010. مريخابي زعلان. طالع من بيتهم يوم الجمعة العصر. قال لي نحن الظاهر اتمقلبنا. قلت ليه كيف الكلام دا؟. قال لي الظاهر نحن (الرصيد) القاعدين نحول فيه دا – قاعدين نحول فيه بالغلط. الرصيد دا الظاهر بنحول فيه لي ناس الهلال. جابوا ليهم برزايليين وجابوا لينا عمر بخيت. رصيدنا دا لو كان بمشي لي ناس المريخ – ما كان بسجلوا (عمر بخيت). المريخ بقى زي نادي المشاهدة. ناس قاعدة ساكت. فريق كل مصابين. من سيلا لي اكرا. لاعب مصاب – ولاعب متمرد. ولاعب المدرب قال ليهم في استراحة اللاعبين ما عاوز اشوفو. فريقكم بقى زي (الفيلم الاجنبي) – الواحد لو ما شاف (الترجمة) ما بفهم اي حاجة. بفتكرو الهلال. يعني بي بساطة كدا – المريخ لمن يكون لاعب مباراة مع هلال كادوقلي – ح تقعد ساعة ونص (تلف في الطبق). يقولوا ليك يا زول مالك؟. تقول ليهم – لفيت (الطبق) غلط…بدل مباراة المريخ – جاب لي مباراة للهلال سنة 2007. تخش مباراة للمريخ. بي كل حسن نية. وتقعد في مساطب الهلال. وقت الحكم يمنح (عمر بخيت) كرت اصفر …مدرجات الهلال كلها تقوم تهتف (التحكيم فاشل). وقت الحكم يطرد (بكري المدينة). جمهور الهلال يجدع بالحجارة. بقيتوا تلخبطوا الزول. تفتح المباراة في التلفزيون. تمشي الدكان وترجع – تعاين للكنبة تلقى (المعز محجوب). تعاين جوة تلقى (عمر بخيت). تتلفت يمين تلقى (تراوري). تصنقع فوق تلقى (علاءالدين يوسف). تعاين في المدرجات تلقى (احمد الباشا). تمشي قدام تشوف (بكري المدينة). تقول ليهم المريخ دا مالو بقى زي (الفول) البقلبو فيه (كبدة). قدر ما تقلب (الكبدة) في الفول – طعم الفول ما عاوز يتغير. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس عمر بخيت في المريخ زي الزول البمشي للدكتور بي كرعينو ..يطلعو منو في نقالة. منتهى عديل كدا. هلالابي عندو حيرقان…قال لي الظاهر كدا ناس المريخ ديل وقت وقعوا في مجموعة كلها (جزائريين) قالوا ما يجافزوا بي ناس امير كمال. قاموا عملوا شنو؟. قاموا جابوا ناس عمر بخيت. عاوزين يضحوا بي عمر بخيت الفالحين. انتوا عارفين؟. انا اقول ليكم حاجة واضحة وصريحة. ناس الهلال ديل وقت شافوا شناة طبع المريخاب ..قالوا احسن يرفعوا القزاز. انتوا عارفنهم عملوا شنو؟. جابوا نزار حامد واعادوا تسجيله. وجابوا الشغيل واعادوا تسجيله. جابوا سيف الدين مساوي واعادوا تسجيله. ديل مشوا ابعد من كدا – وجابوا ليك عم (شبشه) ذاتو. انتوا ما شفتوا عم شبشه ربنا يديه العافية جاء مع (مساوي). الجماعة ديل ما مضمونين. لو لقوا ليهم يوم زيادة في التسجيلات – كان سجلوا عم (شبشه). الناس ديل عندهم (نقص). عندهم مشكلة عديل كدا. اي حاجة في الهلال بحلموا بيها حلم. عشان كدا عم (شبشه) لولا اخلاصه وحبه للهلال ..ناس المريخ كان جابوه المريخ. ان شاءالله يقعد ليهم مع المعز محجوب في الكنبة. اصلو ما كانوا بخلوه. لكن انتوا يا جماعة بتتحيروا مالكم؟. البخليكم تستغربوا شنو؟. اذا كان (جمال الوالي) ذاتو جايبنو مع (المريخ) …غريبة عليهم يسجلوا (عمر بخيت). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس عملتوها ظاهرة. ……….. و كل يوم بنفقد عزيز. عادل فضل …اروع اهل الرياضية 104..رحل امس في يوم حزين. وهو الذي لم يكن يفارق مكاتب الرياضية 104 – طول اليوم كان تلقاه هناك. منو البمشي 104 ..وما بهتمو بيه عادل فضل. بخدمو بي نفسو. يجيب القهوة والشاي والموية الباردة. كان يجسد كل الادب – فيها اخلاق الملائكة. مثله ما كان لهم العيش في هذه الدنيا. اللهم ارحمه واغفر له. ولا كلمة. ……….. السيدة (ل) الحزن ما خلى لينا حاجة نبل بيها ريقنا. وقرّض على كدا.