بي فريقكم دا – الموسم القادم ..اسامة عطا المنان إلّا يطلع ويلعب ليكم (رأس حربة) صريح ..بدل اللف والدوران البعمل فيه دا ناس المريخ ديل ما بيخجلوا ..فريق منسحب بيسجل في ناس ولاءالدين وعمار الدمازين وابوعاقلة ..وفريق ما انسحب بيسجل في خالد النعسان ناس كريمة ديل ناس بتاعين (شعر) وربابة ..تمشوا ليهم بي ناس بكري المدينة ورمضان عجب ...ما حرام عليكم...عندكم (نفير) انتوا مريخابي زعلان قال لي و الله الاتحاد العام دا لو عندو كرامة كان مفروض بعد الكاردينال ما قال عليهم اتحاد (اللقيمات) ..(قصيدة) ما يخلوه يسجلها * الحالة المادية الصعبة التى يمر بها المريخ اليوم خلتهم يسجلوا لاعب بنوم في المباراة من اول خمسة دقائق. * قالوا ليك طلب الفول بقوا يقعدوا فيه (11). * غير الاحتياطي الواقفين بيسخنوا برة. * خالد النعسان قالوا ليك (والكلام دا ما يطلع من العمود دا) - قالوا ليه قوم سخن...قال ليهم هي متين صبحت؟. * نوم شديد. * مريخابي زعلان شديد ..ما عاجباهو تسجيلات المريخ ..قال لي انتوا تعالوا هنا الهلال دا يقول منسحب وما بيلعب تاني.. وبيسجل في ناس (ولاءالدين). * ناس ابوعاقلة ديل سجلهم للمرافعات. * ولاءالدين دا جابوه مع الشركة الصينية. * مهندس مساحة. * عاوزين تعملوا بيه شنو؟. * دي ما طريقة دي. * بعدين ناس المريخ ديل ما بيخجلوا ..فريق منسحب بيسجل في ناس ولاءالدين وعمار الدمازين وابوعاقلة ..وفريق ما انسحب بيسجل في خالد النعسان. * تسجيلاتكم دي إلّا تتمها ليكم (لجنة الاستئنافات). * ومحمد سيد احمد بساعدكم بالتصريحات. * وهمد ب (البيانات). * همد البيانات التى طلعها في المريخ ..في فصل الخريف ما قاعد يطلعها. * في السيول والامطار والفيضانات ما قاعد يتجرس لينا بالصورة دي. * لكن يا مريخاب ..بي امانة شديدة كدا. * بي صراحة. * بي فريقكم دا – الموسم القادم ..اسامة عطا المنان إلّا يطلع ويلعب ليكم (رأس حربة) صريح ..بدل اللف والدوران البعمل فيه دا. * ما يلعب تحت المهاجمين. * يلعب مهاجم صريح. * نحن فترنا من (الغتغتة). * لكن اسامة عطا المنان بنفعكم في (المكتب) احسن من (الملعب). * هو عليكم الله اسامة عطا المنان لو عندو كورة المنتخب بتهزم اربع مرات على التوالي. * المنتخب تقول ملقطنو من محطة السكة الحديد. * المنتخب لعبوه في الخرطوم اتهزم. * ودورة الابيض اتهزم. * مشوا بيه كريمة اتهزم. * لافين بيه زي حملة التطعيم من ولاية لي ولاية. * تقول حملة انتخابات عليا. * بعدين ناس كريمة ديل ناس بتاعين (شعر) وربابة ..تمشوا ليهم بي ناس بكري المدينة ورمضان عجب ...ما حرام عليكم...عندكم (نفير) انتوا. * عازمنكم (حفير). * غايتو الموسم لو كان موسم حصاد ..كنا قلنا ليكم بكري المدينة ورمضان عجب وسفاري امسكوهم معاكم لحصاد البلح. * الناس ديل لو ما طلعوا (النخل) وطعنهم (الشوك) ما بيستعدلوا. * بكري المدينة كورتو بقت استئنافات – استئنافات. * شكل الاستئنافات واضح. * جلحاتو زي (اللجان). * كل لجنة في حتة. * وفي حتات منبثقة كمان. * بكري المدينة سجلوه ب (3) مليار والنقاط بتجيبه ليهم لجنة الفاتح خضر. * نمنطقكم. * نقول ليكم الكلام الجد. * المريخاب الى الآن سجلوا فقط خالد النعسان. * وخالد النعسان لو ما كان (نعسان) هو ذاتو ما كان ح يلموا فيه. * تقول عاوزين يطلعوا ليهم (شريط كاسيت). * خالد النعسان. * اللقيمات اتعكست على تسجيلاتكم. * الزول دا من هسع ما تعصروا عليه ..اعصروا على (سمير فضل) ..كورة (النعسان) دي ما كورة ممتاز. * لو فكيتوا سمير فضل بتلعبوا سنترليق. * فريق اتهزم خمس مرات في الممتاز ..وعاوز يشيل البطولة. * زولكم دا في التأهيلي نعسان ..في الممتاز ح يكون كيف؟. * امسكوا قوي في الفاتح خضر. * المريخابي الزعلان قال لي و الله الاتحاد العام دا لو عندو كرامة كان مفروض بعد الكاردينال ما قال عليهم اتحاد (اللقيمات) ..(قصيدة) ما يخلوه يسجلها. * معقولة زول يهاجم فيهم بالصورة دي ويسجل في (الجواهر). * السنة دي تسجيلاتنا كلها (جواهر). * ولاءالدين موسي. * ابوعاقلة عبد الله. * عمار الدمازين. * أحمد ميسي. * والشغل في (الجوهرة الزرقاء) عادي مستمر. * حالتهم دي (منسحبين). * يمين لو ما انسحاب الهلال ..امير كمال دا لو جاملناكم فيه بنسجلو في هلال كادوقلي. * هلال كادوقلي امس اتهزم من النهضة ربك في السنترليق. * فريق ما عندو (موقف) طبيعي يخسر. * هلال كادوقلي (قضيتو) ذاتها باعها. * طبيعي بعد الحاجات دي ما (يثبت). * الثبات عندو ناسو. * همد امس الاول قالوا طلع زعلان من اجتماع المريخ ..عشان غارزيتو مصر على ان جمال الوالي كان سبب خروج المريخ من البطولة الافريقية. * غارزيتو دا صدق. * يمين لو ما جمال الوالي ..المريخ المربع الذهبي في سيكافا ما يصلها. * غارزيتو دا نسى (ضربات الجزاء) الوهمية التى احتسبت للمريخ. * زولكم فاكر ان المريخ وصل لهذه المرحلة بمجهوداته الفنية. * مجهودتك الفنية دي يا غارزيتو (الكلاكلة) ما بتوصلك. * قال شنو؟. * غارزيتو قال جمال الوالي سبب خروج المريخ من البطولة الافريقية ...شوفوا الزول دا بعكس في الواقع كيف؟. * يا راجل. * الظريف في الامر ان الهلال بعد الانسحاب ..تسجيلاته مولعة نار. * والشغل في الجوهرة الزرقاء يخلع. * الاعمدة اليوم والتاني زايدة (متر). * قالوا ليك مدير الشركة الصينية المنفذة للمشروع قاعد بي اولاده في (الجوهرة الزرقاء). * مدام مستر فو ذاتها شغالة. * الصينيين ديل ما بلعبوا ..ناس جاديين. * في واحد طبعا ممكن ينط لي في السطر دا ويقول لي الما بلعب (الكاردينال) ما (الصينيين). * دافع ليه 60 مليار في الجوهرة الزرقاء ومنسحب من الممتاز. * عليكم الله دي في زول بعملها – لو الهلال ما عظيم. * قالوا ليك السلطة فكرت تشيل (الكاردينال)..واحد من الجماعة قال ليهم انتوا الناس ديل (طوبة) ما ساعدتوهم بيها وكمان عاوزين تشيلوا الكاردينال. * ناس تبنوا ليهم استادهم ..وناس تشيلوا ليهم رئيسهم البعمل في الاستاد. * ما بتجي. * واحد تاني منهم قال ليهم و الله تشيلوا الكاردينال دا ...الجوهرة الزرقاء دي لو عملتوا بدلها (عش الطائر) الهلالاب ما بقبولها منكم. * نحن عاوزين نبني جوهرتنا بي عرق هلالانا. * قرش ما عاوزنو منكم. * المريخاب بشوفوا الشغل مستمر في الجوهرة الزرقاء ..وفريقهم (خالد النعسان) ما قادر يسجلو. * قالوا ليك يعاينوا في مقاول الشركة الصينية المستر (فو) – الخلعة كاتلاهم. * يمين مع (فلستكم) دي ..همد لو لقى مقاول الشركة الصينية المنفذة للجوهرة الزرقاء..يعينو ليكم تاني يوم طوالي مدير فني للمريخ. * صيني زي دا ما بتلقوه. * صيني زي دا – عندكم في المريخ بساوي (مدير فني). * الشيء الجميل ان مستر فو الصيني قالوا ليك اتعلم ليه كلمات (عربية). * صاحبكم ناوي يقعد. * البلد عجبتو ليك. * بقى يضرب في (ام فتفت). * ويسمع في (صديق أحمد). * الصيني بقى (سوداني) عديل. * وعندو رأي واضح كمان في (لجنة الاستئنافات). * وبيشكي من قطوعات الكهرباء. * مستر فو فاهم اي حاجة. * وعارف اي شيء. * يا ناس ..يا عالم ...الكاردينال هسع انسحب من الممتاز الحركة وقفت...الكاردينال دا هسع لو وقف الشغل في الجوهرة الزرقاء ..إلّا تشوف ليكم بلد. * انسحاب ساكت جهجه ليك الجماعة. * ............. * ملحوظة : لو عاوزين تتخلصوا من غارزيتو مسكوه (صيانة) المقصورة. هوامش * مرة شفت غارزيتو بدفر ليه في (درداقة) وبردم في الملعب. * قال اللواء عادل حسين البلال عضو المفوضية الاتحادية انهم قبلوا الطعن شكلا رغم تجاوزه القيد الزمني ولكنهم قبلوه من اجل المصلحة العامة. * عينك ..عينك بعترفوا بالتجاوز. * هذا تجاوز آخر. * شفتوا الحاجات في البلد دي ماشه كيف. * البلال مفتكرها فلاحة ..قال قبلنا الطعن رغم انه تجاوز قيده الزمني. * قابلنو ليه؟. * شجاعة لفرضه اصبحت ما عندكم. * عاوزين بس يستفيدوا من عنصر الوقت. * ويلعبوا على كل الحبال. * بعدين المصلحة العامة الماسكين لينا فيها الايامات دي شنو؟. * اي واحد يتجاوز القانون يقول ليك المصلحة العامة. * يا عم روح. * بلا مصلحة عامة ..بلا كلام فارغ معاكم. * نحن فترنا من الكلام دا. * وبقى ما بغش ليه زول. * التسجيلات باقي ليها 16 يوم. * والسيستم قرب يقفل. * من هسع بقول ليكم الكلام دا. * عشان بعدين ما تجوا تقولوا لينا السيستم قفل. * لماذا لا يسجل الهلال لاعب الخرطوم الوطني لاعب الطرف السمؤال. * الهلال مازال يحتاج الى عناصر وطنية. * عاوزين اطراف سودانية. * السمؤال لاعب الخرطوم الوطني لاعب صغير في السن وبلعب شمال ويمين في الاطراف. * .............. * عاجل : غايتو لو لجنة الاستئنافات دي لمت في ولاءالدين ح تقول ليكم تسجيله ما صحيح ..شرب شاي سادة قبل التوقيع في كشوفات الهلال.
