* إذا كان (جون دالتون) قد إكتشف (الذرة) وخلد أسمه في سجلات التاريخ فان محمد اسماعيل لاعب مريخ كوستي قد سجل هدفا في شبكة مكسيم .. * يعني محمد اسماعيل وجون دالتون بقو في (سرج واحد) .. * ده جاب قون في مكسيم وداك إكتشف الذرة .. * والبيسجل قون في مكسيم بيستاهل (جائزة) توازي جائزة (نجم المباراة) .. * هذا الشرف الذي ناله بالامس محمد اسماعيل يحسده عليه كل نجوم الدوري الممتاز .. * تاني محمد اسماعيل ده لو جا ماشي في الشارع الناس بتقول ليك : (ده الولد الجاب قون في مكسيم) .. * والله صحي .. * قونك ده يا أبوحميد شهر ستة بيلعبك في مريخ العرضة بمزاج .. * شهر ستة ممكن تسجل في خانة شيبوب أو في خانة ألوك .. * أصلو المريخ بيسجل المهاجمين البيجيبوا أهداف في الهلال .. * مهاجم ما جاب قون في الهلال المريخ ما بسجلو حتى لو بقي منقطها .. * ما علينا .. * وضح من خلال مباراة الأمس ان جمهور الهلال موعود بفريق يلعب الكرة (الدقاقة) .. * الجواب عنوان ، وبالامس ظهر عنوان الهلال ومع الأيام سيظهر الجواب كاملا .. * التمرحل في اللعب ظهر في كثير من الهجمات بالامس غير ان التمرير الطويل كان موجودا ايضا .. * والتغيير المنشود لن يتم بين ليلة وصباحها ولكن ما قدمه الهلال بالامس هو (عربون) لما سيقدمه الفريق في المرحلة المقبلة .. * ولن نقول ان بصمة العشري قد ظهرت لان في ذلك مبالغة ولكن نقول (الهلال فيهو شغل واضح) .. * ولولا إعتماد لاعبى مريخ كوستي على اللعب على الاجسام لكان شكل ومضمون الهلال مختلفا .. * مريخ كوستي ربما هو وضع استراتجيته على (الضرب) لتحقيق الفوز او التعادل على اسوأ الفروض .. * محسن سيد (بعد ما رص العلامات) شاف إنو انسب طريقة ممكن يلعب بيها هي طريقة (الضرب) .. * فكان العنف الزائد مع موكورو وكاريكا وولاء الدين ونزار حامد .. * ومن المفارقات .. بطاقة صفراء لموكورو وهو الذي لم يبقي في جسده شبرا إلا وفيه (شلوت) .. * نستطيع القول بأن الهلال يسير من الحسن إلي الأحسن وهو في السليم دون شك .. * واي إنتصار يتحقق على اي مريخ هو انتصار له طعم خاص .. * لما نزار حامد جابو قونو انا إتعاملت معاهو باعتباره هدف في شبكة مريخ العرضة .. * إحنا لما نواجه (المريخات الصغار) بنشوف فيهم كبيرهم الذي علمهم (لبس الأحمر) .. * والله صحي .. * واصلا كده كده كل (المريخات) في الدوري مستوياتهم واحدة .. * ما في فرق كبير .. * مريخ العرضة مستواهو زي مريخ كوستي ومريخ كوستي ومريخ العرضة مستواهما زي مستوى مريخ الفاشر .. * الفرق الوحيد هو مريخ العرضة عندو استاد عملتو ليهو الحكومة وبقية (المريخات) ما عندهم استادات .. * ده بس الفرق .. * بخلاف كده .. المريخ مريخ سوى كان في كوستي ولا في العرضة ولا في الفاشر .. * وأنا أقول ليكم حاجة .. * عيوب مريخ العرضة بتلقاها ياها زاتا عيوب مريخ كوستي .. * قول لي كيف ؟؟ * عندك مثلا ديكور بتاع مريخ كوستي ده .. * ديكور السنة الفاتت شن هجوما على مريخ كوستي وطلع في الاعلام يتحدث عن (الفول) و(الفقر) .. * بل ان ديكور هذا قذف بشعار مريخ كوستي ارضا وخرج من الاستاد (عريان) .. * وديكور أمبارح اساسي قبل الكراسي .. * الحاجة دي برضو بتلقاها في مريخ العرضة الشهير ب(نجمة المسالمة) .. * هناك عندهم ديكور وهنا تراوري .. * وتراوري وديكور نفس (الطبع الكعب) .. * ومن قبلهما عصام الحضري .. * عشان كده العيب البيكون في مريخ العرضة بتلقاهو بالكربون في باقي (المريخات) .. * خليك من ده .. * هاك دي .. وجه الإختلاف بين (لبن البدرة) و(الحليب) هو : لبن البدرة بدوهو (موية) عشان يبقى لبن ، ولبن الحليب بيدوهو موية عشان يبقى (جِير) .. * (جِير أبيض) بنكهة اللبن .. * لكن أنا دايرك تعرف إنو لبن البدرة لو أديتو موية (بنحل) .. * والمريخ كذلك .. * أي مريخ في السودان ده لو جبت فيهو هدف (بنحل) .. * بنبرش .. * بفرش .. * بفتح ليك شبكتو .. * والنظرية دي إطبقت على مريخ كوستي بالامس .. * ونفس النظرية إطبقت على (مريخ العرضة) محليا وافريقيا وعربيا .. * والله صحي .. * افريقيا السنة الفاتت ساماتا طبق هذه النظرية في المريخ .. * مازيمبي لما جاب الهدف الأول المريخ (إنحل) .. * إنبرش .. * والنظرية دي في الأردن برضو إستفاد منها فريق الوحدات الأردني وتحديدا حبيبنا شلباية .. * شلبياية جابو ليهو القون الاول ووصلها ليهم سبعة .. * وامبارح إحنا كان المفروض نوصلها سبعة برضو لكن سوء الحظ لعب دورا بارزا في اكثر من فرصة وهجمة .. * المهم .. * القادم أحلى .. * ونهمس في اذن عبد اللطيف بوي ونرجو ان يرتقي للمستوى اكثر .. * كما نهمس لنزار حامد ونطلب منه ألا يرفع الكرة .. * يا نزار عليك الله الكرة لما تجيك واطة ما ترفعها السماء .. * إحنا املنا كبير في نزار حامد الذي يعتبر من افضل النجوم في الوقت الراهن إذا استقر مستواه .. * وحسنا فعل الجهاز الفني وهو يدفع بولاء الدين اساسيا .. * ولاء الدين يحتاج لمزيد من الفرص .. * ولاء الدين يحتاج للمشاركة باستمرار وبعدها سيكون حديث الناس .. * وما ينطبق على ولاء ينطبق على بشة الصغير ومحمد محمود والثعلب .. * والحمد لله الهلال نجح في إمتحان كوستي وجا بالعلامة الكاملة .. * باقي لينا إمتحان الفاشر وبأذن الله سنحقق فيه ذات النسبة التى حققناها بكوستي .. * اما إمتحانات ام درمان فهي بالنسبة لينا زي شراب الموية .. * وأنا حقيقة بتمني من الكاردينال ان يقدم الانتصار الذي تحقق بالامس هدية لصلاح ادريس .. * نُهدى هذا النصر هدية للارباب .. * والزول البيديك هدية ما تسألو من المناسبة شنو .. * اللهم هي هدية .. * وأنا حقيقة عندي إحساس إنو الارباب بيحزن لانتصارات الهلال .. * عندي احساس كده .. * واي زول طبعا حر في (محاسيسو) .. * ولكن انتصار الهلال بالامس يجب ان يسعد الارباب لانه قد خسر من مريخ كوستي بالاربعة في آخر لقاء .. * وصلاح ادريس لو ما إنبسط بفوز الهلال على مريخ كوستي امس يبقى هو بحب المريخ حتى ولو كانت افراح المريخاب تأتي علي حساب اهلي شندي .. * علي فكرة .. * الأرباب عند المريخاب بقى محبوب اكتر من محمد الياس محجوب .. * غايتو جنس غايتو ؟؟ * و..و.. * والريدة بين الناس صلا وريدتنا ألحق حصلا ...(ان شاء الله تركب أمجاد) .
