بالعربى الكسيح محمد الطيب الأمين زى بوليس السكه حديد !!
* لجنه الإستئنافات حالها هذه الأيام لا يختلف كثيرا عن حال (أم العروس) من حيث (الدخول والمُروق والكبكبه) .. * بالأمس (اجلت) اللجنه قرارها واليوم ليس أمام (أم العروس) إلا ان تقول كلمتها .. * وبعد كلمة (أم العروس) المتوقعه اليوم او غدا سيكون (للهلال العريس) كلام وكلام ، بينما لا نتوقع ان يكون هنالك (كلام لأخو العروس الذى هو المريخ) .. * سريعا جدا تعلم الخندقاوى (الشتائم) و(طول اللسان) ظنا منه ان الشتائم ستصنع منه رئيس قادم للهلال .. * مطلوب من الخندقاوى (الكلمه الطيبه) في هذه الفتره فهو (برلوم) في مجتمع الهلال وعليه ان (يسمع ويصمت حتى يتعلم) .. * ومطلوب من اعلام الهلال ان لا (يشتُم) الخندقاوى لان الرجل يدعم الهلال .. * في الزمن العلينا ده البيدعم بالقروش ما بيستاهل الشتيمه ، وكمان العندو قروش ده ما بيعنى إنو يشتمنا ويعمل لينا فيها (الطيب عبد الله) عليه الرحمه .. * يبقى يا الخندقاوى امسك خشمك عليك واى دعم تقدمو للهلال على العين والرأس بس ابعد من الشتائم .. * بدون مقدمات قالو إن مازيمبي فاوض علاء الدين يوسف .. * وده ما الخبر .. * الخبر إنو قالو مازيمبي عرض (500) ألف دولار لعلاء الدين (بصمه) .. * و(500) ألف دولار يا حبيبي تعادل (5) مليار .. * وال(5 مليار) دى كان عزو جاب بيها (وارغو) .. * والله صحى .. * طيب السؤال .. لماذا فاوض مازيمبي علاء الدين ؟؟ * هل عشان علاء الدين (كتم انفاس) ساماتا ومباراة الكنغو إنتهت تعادل بفضل جسارة فييرا وقوته ؟؟ * ولا عشان علاء الدين جاب قونين في كدبايا ؟؟ * ولا يمكن عشان علاء عمرو (22) سنه ؟ * غايتو جنس غايتو ؟؟ * إعلام المريخ ده بعد مرات بجيب (خارجيات) .. * علاء الدين ساماتا (يمشى ويجى فيهو) زي (بوليس السكه الحديد) .. * مازيمبي شنو البيجيب علاء الدين (34) سنة ب(500) ألف دولار .. * ممكن تقولو غارزيتو قدم علاء الدين هديه لكاتومبي ضمن صفقه (مباراة الكنغو الانتهت بثلاثيه) .. * مش إنتو قلتو غارزيتو (بااااع) في الكنغو ؟؟ * مش قلتو كده ؟؟ * خلاص علاء الدين جزء من صفقه البيع .. * وعشان ما تطلعو بينا العالى .. تشكيلة المريخ دى كلها ما بتجيب (500) ألف دولار .. * قبل كده قلتو مازيمبي عايز اكرمالهادى سليم وإحنا صدقنا الحنك .. * وتانى قلتو ضفر وإحنا برضو صدقنا الحنك .. * لكن المره دى جبتوها كبيره وقلتو علاء الدين .. * وكلامكم تقولو لزول قاعد يركب (مقعد النص) .. * شوفو ليكم زول ما عندو (خالتو في الكنغو) وقولو ليهو الكلام ده .. * لكن إحنا اولاد تسعه ودافننو سوا .. * قال مازيمبي قال .. * مجلس إدارة نادى أمبده عمل (تصويت) بين الاعضاء لحسم امر إنتقال نجمه الموهوب ابو عاقله بعد ان تقدم الهلال والمريخ بطلب لكسب اللاعب .. * عدد الاعضاء العملو ليهم التصويت (9) عضوء .. * التسعه ديل سبعه منهم صوتو لصالح الهلال مقابل صوتين للمريخ .. * وطبعا ده الشي الطبيعى يا جماعه .. * هسه مش كابتن المريخ راجى عبد العاطى ؟؟ * عدد الهلالاب في بيت ناس راجى عبد العاطى بيكون اكتر من عدد المريخاب ده لو كان في مريخاب اصلا .. * اى بيت سوداني عدد الهلالاب اكتر من المريخاب والحاجة دى ما دايره نقاش اصلا .. * ولذلك غير مستغرب من اداره أمبده ان تصوت لصالح الهلال .. * امبده ما دايره المريخ ولكن عشان المريخ ما عندو كرامه ح يمشى ل(خال اللاعب) و(حبوبه اللاعب) و(بت عم اللاعب) .. * ما عندهم كرامه .. * وتسجيلات اللاعبين بواسطه (الخيلان والاعمام وبنات الجيران) هذه ثقافه ادخلها عزو .. * لكن ان شاء الله ابو عاقله من نصيب الهلال لان هذه هى رغبته ورغبه اسرة نادى امبده ورغبتنا إحنا برضو .. * اول ما ابوعاقله يصل من يوغندا طوالى يدخل غرفه الهلال عشان ينسجم مع ولاء الدين خارج المعلب .. * وبمناسبه يوغندا .. * الله خلق العين (تحت الحاجب) .. * ومن الله خلقنا ما شفنا لينا (حاجب بى فوق للعين) .. * وفي (الريده) الشاعر قال : (العين ما ما بتعلا على الحاجب وحبيب الروح ما بتعلا) .. * و(الوطن) في كل مكان في الدنيا هو (حاجب) وما دونه (عيون) إلا السودان فهو (عين) وما دونه حاجب .. * وتمرد (لعيبة المريخ على المنتخب) سببه ان السودان في نظرهم (حاجه أقل من المريخ) .. * تقاعس لاعبو المريخ وبطريقه غير مباشره رفضو الانضمام للمنتخب .. * وقد كان قرار الاستاذ المربى احمد بابكر شجاعا وهو (يطرد) لعيبه المريخ من المنتخب ويحولهم للجنة الانضباط .. * ولو كان عندنا رئيس إتحاد صحى صحى على بالقسم لعيبه المريخ ديل تانى (ضُمنه) ما يلبعو .. * لكن وين ؟؟ رئيس إتحادنا شخصيتو أهون من (جناح البعوضه) .. * لو شداد في .. شويه عيال زي ديل ما بتمرودو على المنتخب .. * كونو المريخ يقيف ضد الهلال في مباراة يمثل فيها الهلال الوطن ما مشكله ، وكونو جمهور المريخ يستقبل فريق اجنبي جاي يلعب مع الهلال برضو ما مشكله ، لكن المشكله والكارثه الوطن ينادى ولعيبه المريخ عاملين اضأن الحامل طرشاء .. * ودى خيانه والسكوت عليها خيانه أكبر .. * لو إعتذر لاعب واحد ما مشكلة لكن أربعه يرفضو الانضمام دى المشكلة .. * في الهلال (بشه) زعل كثيرا لانه مصاب ولم يتم اختياره للمنتخب ، وفي المريخ الاختاروهم زاغو ، وده الفرق بين هلال الوطنيه ومريخ (نجمه فكتوريا) .. * خلى بالك لعيبه المريخ ديل إحتمال يكونو فاكرين المنتخب ماشى يلعب مع مازيمبي عشان كده زاغو .. * ما بعيد .. بيكون فاكرين المباراة بين الصقور والغربان .. * والله صحى .. * من جديد تجددت إصابات (بكورى المدينه) .. * وأنا لاحظت إنو (بكورى) إصاباتو بقت كتيره زى إصابات يوسف بلايلي في الدورى الجزائري .. * لاحظت كده .. * واى زول طبعا حر في (ملاحيظو) .. * عموما .. عاجل الشفاء لبكورى المدينه .. * أحمد الباشا سيذهب للاهلى شندى (ردا للجميل) الذى قدمه القطب المريخى صلاح ادريس والمتمثل في اللاعب (محمد سيلا) الذى سجله الارباب للمريخ متكفلا بكل نفقات الصفقه .. * إتوقع ان نطالع عنوان عريض في (صحيفه الصدى) يقول : الارباب يتكفل بمحترف من العيار الثقيل للمريخ) .. * كل شي وارد يا مولانا .. * (تحت تحت) قالو في زول (حرش) ديكور بتاع مريخ كوستى واداهو قروش عشان يهزم الهلال .. * ولو الكلام ده صاح .. يبقى الزول الحرش الزول ده المفروض يشوفو ليهو فريق تانى لانو ديكور إنفعل بسبب انه (محرش) .. * لعب ديكور مليون مباراة مع مريخ كوستى وما حصل إنفعل إلا قدام الهلال والسبب معروف .. * والله العظيم يا جماعة الهلال ده عظيم عديييييييل .. * داير تعرف عظمة الهلال شوف الناس الشغالين ضد الهلال .. * الهلال كبير ولن يصيبه إلا المكتوب وحق على الاهله ان يفتخرو بأنهم هلالاب .. * إذنكم يا جماعه عايز اضحك … * هههههههههههههههههههه .. * إتذكرت البودى قاردات والطباخين والطياره الخاصه .. * قلت لي يا غارزيتو لقت خاتم دهب مدفون في الفاشر ؟؟ * هسه يا جماعه مصير خاتم الدهب ده شنو ؟؟ * هل غارزيتو شال الخاتم ورسلو لزوجتو بمناسبه عيد ميلادها ولا الخاتم ده اصبح من ممتلكات المريخ ؟؟ * قال ليهم : انا لقيت خاتم مدفون والمريخ سيفوز بكأس الابطال .. * والجماعه صدقو كلا الخواجى العجوز .. * وعاشو الدور .. * وساقو معاهم (10) بودى قارد و(5) طباخين و(2) فنيين بتوعين فحص هوا .. * ساقو الجماعه ديل وثقته كبيره في الخاتم .. * ووصلو الكنغو .. * والمباراه بدت .. * وعينك ما تشوف إلا (الخاتم) .. * يعرفوكم حناطير كيف ؟؟ في خاتم بجيب بطوله ؟ * غايتو جنس غايتو ؟؟ * المهم .. * الآن (سقف طموحات) الهلال هو (الجوهره الزرقاء) ، وسقف طموحات المريخ هو (إيجاد رئيس مريخابي لخلافه الوالى) .. * خمسه أيام المريخ يبحث عن رئيس (مريخابي) ولم يجد .. * كل الروؤساء الموجودين في السوق هم هلالاب .. * ولذلك نحن نقترح لأهل المريخ ان يقومو (بتجنيس) العمده سعد ويجيبوهو رئيس لناديهم .. * جنسو سعد العمده وجيبوهو رئيس للمريخ تفاديا لهذا الفراغ الذى يعيشه الضل .. * ضل ب(الحاء) .. * ونركب صافنات ونجيبه (هلالابيه) واصلو الزول بموت والذكرى تفضل حيه .. * و..و… * وحنانك حبيبي وين ….(جُزلانك) ..