أي حفلة بقدم محاضراته التى جاء ذكرها وبخش لينا في (جنة العشاق القلوب مرتاحة أنت يا قلبي الما لقيت ليك راحة) الله يستر تسلم الكاردينال ملف اللاعبين الأجانب بنفسه وسيقوم بإكمال كافة عمليات التفاوض رئيس الهلال قاربت فترته من الانتهاء في الهلال وهو إلى الآن لم ينجح إلّا في (مكسيم) الكاردينال أول رئيس بتعاقد مع المحترف براهو – وبنهي التعاقد مع المحترف براهو * أخبار أمس ذكرت أن أشرف سيد أحمد الكاردينال الذي عاد للبلاد أمس الأول تسلم ملف اللاعبين الأجانب بنفسه وسيقوم بإكمال كافة عمليات التفاوض بجانب الوقوف بنفسه على سير اللاعبين المرشحين للانضمام للهلال حتى لا يقع الهلال ضحية للسماسرة و كان رئيس الهلال قد سلم ملف الأجانب في الموسم الحالي للفنيين. * الله يستر. * الله يستر من (الكشافات) التى طلعت ضاربة. * ما عاوز أقول شيء. * لكن والله ما بنقدر نسكت. * بنقول كلامنا. * نحن قبل كل فترة للتسجيلات بنسمع نفس هذا الكلام. * هذا الكلام (بضبانته) زي ما بقولوا – قاعدين نسمعوا قبل التسجيلات. * الحاجة الغريبة – ما هذا الكلام الذي نسمعه. * الشيء الغريب – إننا قاعدين نصدق الكلام دا. * وبنصدق. * قبل أي تسجيلات بنسمع هذا الكلام : (تسلم الكاردينال ملف اللاعبين الأجانب بنفسه وسيقوم بإكمال كافة عمليات التفاوض بجانب الوقوف بنفسه على سير اللاعبين المرشحين للانضمام للهلال حتى لا يقع الهلال ضحية للسماسرة و كان رئيس الهلال قد سلم ملف الأجانب في الموسم الحالي للفنيين). * يعني بفهم في الموضوع دا الكاردينال والفنيين ما بفهموا. * معقولة بس. * زمان في حلتنا كان عندنا زول عامل لينا فيها (فنان). * وأنو زول موهوب. * وأن البلد دي ما بتقدر المواهب. * والناس ما قادرة تستوعب إمكانياته الفنية الكبيرة. * الزول دا كان في أي حفلة يمسك ليك (المايك)..الوقت داك ما كان اسمو (مايك). * الوقت داك كان بقولوا عليه (مكرفون). * مكرفون (سليقة) كدا. * الزول العامل لينا فيها فنان دا كان بمسك (المكرفون) دا وبدينا محاضرة في نظافة الحي. * ومحاضرة في فصل الخريف. * ومحاضرة في أمل دنقل. * ومحاضرة في غسان كنفاني. * وبعد ما يكمل محاضراته دي بدخل لينا على (جنة العشاق القلوب مرتاحة أنت يا قلبي الما لقيت ليك راحة). * ما عندو غير الأغنية دي. * أي حفلة بقدم محاضراته التى جاء ذكرها وبخش لينا في (جنة العشاق القلوب مرتاحة أنت يا قلبي الما لقيت ليك راحة). * الأغنية دي طبعاً أخدت ليها وقت كانت مسيطرة فيها على كل الحفلات. * أكشاك الليمون. * باصات الجريف. * حافلات الثورة. * كلها كان بتلقاها مشغلة (جنة العشاق القلوب مرتاحة أنت يا قلبي الما لقيت ليك راحة). * الزول العامل لينا فيها فنان دا ..كان في حفلات التخريج ..يمسكنا ليك محاضرات في نظافة الحي. * ومحاضرة في فصل الخريف. * ومحاضرة في أمل دنقل. * ومحاضرة في غسان كنفاني. * ثم يدخل لينا في (جنة العشاق). * حفلات العرس ..نفس البرنامج. * حفلات الوداع. * الليالي الثقافية. * المهرجانات. * شغال معانا كدا. * نظافة الحي. * ومحاضرة في فصل الخريف. * ومحاضرة في أمل دنقل. * ومحاضرة في غسان كنفاني. * وجنة العشاق. * الناس بقوا وقت يشوفوه طالع في المسرح وماسك (المكرفون)..بقولوا ليه عليك الله أدخل لينا في (جنة العشاق) طوالي – محاضراتك دي نحن فترنا منها. * حفظناها حفظ. * خش في (جنة العشاق). * الكاردينال هسع شغال معانا بي نفس النظرية. * قبل أي فترة تسجيلات نحن بنسمع بالكلام دا. * (تسلم الكاردينال ملف اللاعبين الأجانب بنفسه وسيقوم بإكمال كافة عمليات التفاوض بجانب الوقوف بنفسه على سير اللاعبين المرشحين للانضمام للهلال حتى لا يقع الهلال ضحية للسماسرة و كان رئيس الهلال قد سلم ملف الأجانب في الموسم الحالي للفنيين). * الخوف من (بنفسه) دي ذاتها. * عشان الموضوع يبقى ليكم واضح في كل فترة تسجيلات الكاردينال بكون هو الذي يشرف على التسجيلات. * حكاية اللجنة الفنية. * واجتماعات غرفة التسجيلات. * وقدامى لاعبي الهلال – دا كلو كلام ساكت. * الكاردينال لو بيختار المحترفين عن طريق لجان تسجيلات وناس مختصة – ممكن يجيب محترفين على مستوى. * لكن المشكلة أن الكاردينال بيختار براهو. * عشان كدا ما في مهاجم بكمل الموسم في الهلال. * أي محترف جابو الكاردينال ...الكاردينال نفسه انهى تعاقد الهلال معه. * الكاردينال أول رئيس بتعاقد مع المحترف براهو – وبنهي التعاقد مع المحترف براهو. * لا برجع للجنة الفنية. * ولا برجع للجهاز الفني. * لذلك نحن منذ الآن نقول إن هذه الطريقة التى يتبعها الكاردينال طريقة خاطئة. * مرة جايب لينا جوليام. * ومرة كيبي. * ومرة أبيكو. * وديل كلهم لم يكملوا موسم واحد مع الهلال. * أكتر واحد فيهم قعد (4) شهور. * الآن يفترض أن يرجع الكاردينال إلى الجهاز الفني للهلال بقيادة الروماني بلاتشي ومبارك سليمان ..عشان يختاروا عناصرهم براهم. * ويمكن إضافة فوزي المرضي وهيثم مصطفى لعملية الاختيارات دي. * الكاردينال براهو ما عندو خبرات كافية. * وتجاربه كلها فاشلة في ملف المحترفين. * ما عاوزين نكرر التجربة في كل موسم. * ملفات المحترفين بهذه الصورة ..ممكن تجيب ليكم (طباخ) خطير. * طباخ طرف شمال. * وممكن طريقتكم دي تمكنكم من إحضار (جنايني) رأس حربة ما فيه كلام. * أو سواق (لاعب وسط). * أو (غفير) حارس مرمى. * أكتر من كدا ما بتجيب ليكم شيء. * غيروا هذه الطرق التى يتم بها اختيار اللاعبين ..واتبعوا طرق حديثة في اختيارات المحترفين. * الكاردينال قاربت فترته من الانتهاء في الهلال وهو إلى الآن لم ينجح إلّا في (مكسيم). * يحتاج الكاردينال أن يضع بصمته في هذا الملف. * وبصمة الكاردينال لن تكون عن طريق اختياراته الشخصية وإنما سوف تكون عن طريق الرجوع لأهل الخبرة والاختصاص. * مع الابتعاد من (السماسرة) – لأن السماسرة ح يعملوا ليك فيها أصحاب خبرة واختصاص. * يجب أن يكون الكاردينال تعلم من تجاربه الكثيرة – حتى يقدم للهلال محترفين في قامة الهلال. * الشيء الذي يدعو للحيرة أن الكاردينال في كل فترة تسجيلات بكون هدفه (رأس حربة). * أو مهاجم صريح – لكن تأتي التسجيلات ولا يتعاقد الهلال مع اللاعب الذي يحتاج له فعلاً. * كل سنة الهلال يكون محتاج ليه رأس حربة – يقوموا بتعاقدوا ليك مع لاعب وسط. * لاعب وسط نحن نعمل بيه شنو؟. * الهلال في بطولة الأندية الأفريقية الأخيرة للأبطال خرج من المنافسات لأنه لا يمتلك مهاجم محترف سوبر. * لو كان الهلال فيه (رأس حربة) محترف – كان الهلال الآن بكون بيلعب في المجموعات. * المجموعات عديل كدا. * ما (الترضية). * عشان كدا السنة دي أول حاجة تجيبوا لينا مهاجم محترف قاطع. * ما تيجبوا لينا لاعب وسط وتقولوا لينا المدرب قال عاوز كدا. * ما تيجبوا لينا مهاجم (نص كم) وتقولوا لينا المهاجم دا بعد سنة ح يكون خطير. * من البداية جيبوه لينا مهاجم صريح. * ورأس حربة. * وخطير. * أسبوع نحن ما بننتظروا تاني. * ولا بنرجاهو. * محترف تجيبوه عشان (تربوه) ولمن يتأقلم على الأجواء تشيله – دا لا بنفع معانا ولا حاجة. * ولا عندنا ليه صبر. * ......... * ملحوظة : البركة في شيبوب. هوامش * في الهلال الآن أربع خانات خالية. * التسجيلات حتى بداية يونيو ..نحن ما بننتظرها. * ولا عندنا صبر للوقت داك. * بالمناسبة الدوري السوداني فيه محترفين جيدين. * لو عاوزين تجيبوا لينا محترفين ما معروفين ..أحسن تجيبوا لينا من الدوري السوداني دا. * مجلس الهلال يشكر على أنه أعاد عاطف النور. * هذا شيء يحسب لمجلس الهلال. * عودة عاطف النور – إضافة كبيرة للهلال. * التسجيلات 10 أيام فقط. * يعني لو ما حسمتوا مواضعيكم منذ الآن (بله جابر) ما بتسجلوه. * بلاتشي يعود الجمعة. * نتمنى أن يجد المناخ المناسب حتى يستفيد منه الهلال. * سيكافا اتأجلت. * إن شاء الله ما تقوم. * سيكافا شنو كمان؟. * الهلال عليه أن يركز في الممتاز وكأس السودان والتسجيلات. * سيكافا والحاجات التانية دي ما تشغلوا بيها نفسكم. * تسجيل محترف واحد ب (600) ألف دولار أحسن من تسجيل تلاتة محترفين كل محترف ب (200) ألف دولار. * مريخ نيالا ..هو الحصان الأسود للدوري. * النيل شندي ..فاز على الهلال وقعد يتلفت. * هلال الأبيض سوف يبدأ من مباراة المريخ. * من الأفضل أن يلعب الهلال مباراته مع الخرطوم الوطني الآن. * وأفضل كذلك أن يلعب الهلال مباراة القمة مع المريخ. * بين الدورتين الهلال يحتاج لمعسكر إعدادي. * بلاتشي بكون عاوز يضع بصمتو. * الكشافات أخبارها شنو؟. * ............. * عاجل : الهلال عاوز ليه (رأس حربة) ما (طباخ).
