• لم استغرب من المستوى الضعيف الذي ظهر به لاعب المريخ المحترف اليوغندي موتيابا. • لاعب يوغندي قصير القامة ...وقليل التجربة والخبرة وصغير السن ماذا تنتظرون منه؟. • لكن مع ذلك لم اكن اتوقع ان يفشل موتيابا بهذه السرعة. • دي مجدي ام بدة ما بعملها. • الاخ مامون ابوشيبة كتب امس عن موتيابا مطالبا بالتعجيل برحيل هذا اللاعب ...قال ابوشيبة مشكورا: • (نكرر على المريخ ان يبدأ الترتيبات لأحلال لاعبين اجنبيين فى مكانى وارغو وموتيابا في شهر يونيو وكفاية دلال..وبديل وارغو موجود ومجرب ومضمون ولا يكلف كثيرا). • المريخاب بعد وارغو بقى عندهم عقدة ...اسمها لا يكلف كثيرا. • أي لاعب يجبوه ليك ...يقولوا ليك بكلف كم؟. • عشان كدا ومثلما احضر المريخ اغلى لاعب في افريقيا ...عاد المريخ واحضر (ارخص) لاعب في القارة السمراء. • اعلام المريخ حاول في البدء الترويج لاللاعب اليوغندي بانه خريج اكاديمية يوناتيد....عشان يداروا (رخصتو). • وبعضهم قالوا ان تشيلسي يراقب اللاعب من بعيد لي بعيد. • وتحدثوا كثيرا عن الجوهرة السوداء التى ستكون ظاهرة افريقية جديرة بادهاش العالم الغربي بما تملكه من سحر. • عندما كانوا يتحدثون عن (موتيابا) تذكرت (حمد الشجرة) الذي دخل كشوفات المريخ بصورة توحى ان المريخ على موعد مع (كمال عبدالوهاب) اخر. • او جمال ابوعنجة او بدرالدين بخيت. • ونحن على نياتنا ..نشيل ونصدق. • موتيابا ...كان رهان اخر على الموهبة والسحر ...والجنون. • جعلوه على قرار الغاني (عبيدي بلية). • كل ذلك من اجل ان يجعلوا دخلوه لكشوفات المريخ ممكنا. • ونحن على نياتنا نشيل ونصدق. • نحن طبعا في البداية كنا ما مقتنعين بي حكاية محترف من يوغندي...لكن نعمل شنو مع دش اعلام المريخ السالب. • ديل يقنعوا (الحجر). • كان عندنا راي في الحتة دي. • لكن نعمل شنو؟...الزول في الدنيا دي لو قال ليه كلمة حقيقة..بقولوا عليه (حاقد). • ونحن ...والطابق التاني. • الطابق التاني هسع الدخلو شنو؟. • الاخ الزميل عصام الحاج ...قبل ان يوقع المريخ عقدا مع هذا (موتيابا) كتب في صحيفة قوون ..ان هذا اللاعب في المنتخب اليوغندي دوره لا يتجاوز احضار (قرورات) المياه. • وبظهر في اخر عشر دقايق بسخن في اللاين. • يجري كدا. • يدخل المباراة..ويطلعوا ليك (موهبة) خطيرة. • لكن ما في زول سمع كلام عصام الحاج في موتيابا..يكون طلعوا عصام الحاج (حاقد)...قالوا موتيابا دا احسن لاعب. • بالمناسبة عصام الحاج البتكلم عنو دا...عصام الحاج بتاع قوون ..يعني ما بتاع مجلس المريخ. • اللاعب الي جانب انه (يوغندي) خالى من الموهبة ...قليل الخبرة بحكم السن التى اشرنا اليها. • دا لو قلت ليه افتح الماسورة ..ما عندو لياقة للموضوع دا. • لياقة يفتح بيها التلفزيون ما عندو. • قالوا ليك موتيابا دا من غرفة الملابس للميدان بكون قطع. • اضف الي ذلك فان بينية اللاعب لا تساعده حتى لأن يكون (متفرجا) لمباريات الدوري الممتاز. • دا متفرج ما بخارج معانا. • بمناسبة (المطرة) دي. • هسع وينها (المطرة)؟. • قالوا ليك ..واحد قرفان شديد...مشي لي دكتور اسنان ..قال ليه : في بنج. • الدكتور قال ليه : ايوة في بنج. • قال للدكتور : اسمع طيب ممكن تقلع لي الضروس الخمسة ديل بدون بنج. • الدكتور قبل ما يقول ليه ...الحكاية دي مستحيلة...زولكم واصل في كلامو. • انا زول صعب...حاجات زي دي ما بتهمني. • الدكتور عرفو ليك من ضحايا (محمدو)...قال احسن اروق ليهو المنقا...قال ليه تعرف نحن عندنا بنج ما بعمل أي حاجة. • زولكم طبعا عاوز ليه سبب ..قال ليه : لو ما بعمل حاجة ...بنجني ..واقلع لي الضروس الخمسة. • الدكتور قال ليه الخمسة ديل يا ود الناس ما بنقلعن مرة واحدة إلا يدخل فيك (قندران). • والقندران وقت يدخل فيك خشمك يكون (مفتوح)...عشان سنونك كلهن بي ضروسهن ينزلن. • لكن دا كلو ما موضوعنا. • موضوعنا (موبياتا). • لاعب يوغندي. • وقصير. • وصغير في السن. • الاهم من كل هذا ان اللاعب لم يكلف خزينة المريخ اكثر من 25 الف دولار ..هى كل قيمة الصفقة. • محترفين (سوق الجمعة) ديل ما عارف بتجبوهم من وين؟. • هذا المبلغ ال (25 الف دولار) فيه نصيب النادي ونصيب اللاعب والوكيل ..ونصيب سماسرة يوغندا ..ونصيب سماسرة السودان. • اذا قام أي شخص بجرد العملية حسابيا سوف يجد ان نصيب اللاعب من توقيعه في كشوفات المريخ 3 الف دولار فقط. • لاعب سعره 3 الف دولار ...هل تنتظرون منه شيئا؟. • المشجع في الدوري النيجيري سعره 50 الف دولار. • 3 الف دولار ...دا لاعب وإلا (نقالة). • المظلة حقت المواصلات بتكلف اكتر من كدا. • قالوا ليك قيمة (النقالة) في الرد كاسل اغلى من قيمة هذا اللاعب. • لدرجة ان هذا اللاعب اليوغندي عندما يتعرض لاصابة بقولوا ليه امشي بي كرعيناك ساكت ...ما تخسرنا وقود ساكت. • اللاعب دا قالوا ليك شقتو ما فيها (كهربا). • والموية بجيبوها ليه بالجركانات. • ناس المريخ ما عاوزين يخسروا فيه أي قرش. • كفاية القروش الخسروها في (وارغو). • الشيء البتحيرني ..ناس المريخ ما قادرين يصبروا على موتيابا الي شهر يونيو. • خلاص زهجو منو؟. • عاوزين يتخلصوا منو من شهر مارس. • يعني قبل 3 شهور من التسجيلات. • يا ناس هلال الساحل ..عاوز اقول ليكم حاجة. • اوعكم يقولوا ليكم نعير ليكم (موتيابا). • اوعكم تتغشوا. • انتوا تشيلوا وتقبلوا ...كفاية عليكم (قلق). • قلق قالوا ليك مدور زي الطلقة. • ناس يعيروا قلق ويجيبوا مجدي ام بدة. • دي زي الزول البشيل (المكيفات)..ويجيب ليه (مروحة) تربيزة. • بدلوا المكيف بمروحة التربيزة. • ملحوظة : موتيابا دي (ليدو) مفروض ما تلعبوه. هوامش • امس وصل هيثم مصطفي حفظ الله ورعاه من الامارات. • غياب البرنس واصابته ...خلت الناس تعرف قيمته. • هيثم مصطفى دوره مهم في المرحلة المقبلة..والهلال يحتاج ليه بشدة. • لذلك الذين يحاولون ابعاد هيثم مصطفي او محاربته عليهم ان يعرفوا ان فعلوا ذلك فانهم سوف يكونوا اول الخاسرين. • هيثم مصطفي الهلال يحتاجه ..ونحسب ان هذا الموسم هو موسم هيثم في الهلال. • مع فكر غارزيتو ..وبشة ونزار حامد .....هيثم مصطفي سوف يكون اكثر تألقا ..وتوهجا. • اتمنى ألا ينجح الاعلام المضاد في بناء جدار عزلة بين بعض لاعبي الهلال والجمهور. • لا تخلقوا (عداء) بين سادومبا والجمهور. • بعض كتابات صلاح ادريس تهز ثقة الاعلام الهلالي في بعض اللاعبين. • ما تشتغلوا بالكلام دا. • صلاح ادريس خلوه يركز مع فرانسيس. • سادومبا خلى. • في التسجيلات القادمة ..من هو اللاعب الذي سوف يمنحه اهلى شندي للمريخ. • اهلي شندي ..بقى (جزيرة فيل) تاني. • جزيرة فيل في شندي. • حوالي 8 لاعبين من مشاطيب الهلال يلعبون في الاهلي شندي. • كنبة الهلال في شندي. • غدا الهلال يلعب مباراة امام النسور ...وهى مباراة ايضا ما ساهلة على الهلال. • خاصة وان الهلال يفقد عدد من نجومه. • رجع مساوي ...ح نفقد مهند الطاهر. • لكن برضو ما مشكلة. • الهلال في ملعبه ما زي المريخ ما بتجيه عوجة. • لو غاب كل لاعبين الهلال ..الجمهور بكون قاعد. • وجمهور الهلال بقوم بكل الادوار. • وجمهور الهلال قادر على ارهاب كل الاندية. • لذلك فان مباراة الغد ...مباراة خاصة للجمهور. • مباراة للمتعة. • المباراة هل سوف تكون في الاذاعة فقط. • الجزيرة ح تنقل الكورة بعد الدورة الاولي. • ساكت اتفرعنتوا على قناة قوون. • والنتيجة ان الجمهور كلو محروم من متابعة المباريات. • مع اتفاقية الهلال والمريخ ديل ...ما اظن تشوفو ليكم مباراة. • هدف محمدو في المريخ يسأل منه يس. • يس وريكاردو. • في داعي ريكاردو يطرد اكرم الهادي سليم. • يس دا الهدف الذي سجله فيه محمدو ...كفيل بشطبه. • فيصل موسي على ما يبدو انه سوف يتم الموسم (صور). • تاني ما عندو حاجة. • تموها تصريحات. • قلت ليكم بعد الدوري ما يبدأ...عصام الحاج بختفي. • وما حتشوفو ليه تصريحات. • أهو عصام اختفى. • لا تصريحات ..ولا عنتريات. • هل تعلموا ان المريخ منذ الان بدأ يخطط لنقل مباراة الامل والمريخ في الدورة الثانية من عطبرة لمدينة اخرى. • ديل في الرد كاسل ...حصل عليهم كدا. • في عطبرة يحصل ليهم شنو؟. • غايتو يا ناس المريخ استادكم بقى زي (الارض المحايدة). • عادي تتغلبوا فيه. • اكتر حاجة زعلتني امس ...مطالبة مامون ابوشيبة للعجب بالاعتزال. • الاعتزال قبل ان يفقد العجب محبة جماهير المريخ. • يا ابوشيبة دا العجب. • خلاص نسيتوا ال (109) هدف التي سجلها في الدوري الممتاز. • نسيتوا الملك. • نسيتوا عجبكو الهندسية. • قالوا المريخاب عاوزين يفتحوا ليهم (ورشة) صغيرة كدا لي فيصل موسي. • والله الكورة فعلا مجنونة. • العجب بكل تأريخه بقى فيصل موسي عند المريخاب اهم منه. • فيصل موسي ...بقى في كفة ...والعجب في كفة. • هانت الزلابية. • فيصل موسي ...هو ولد متين. • اصابة امير كمال ...عشان ناس المريخ مركزين في ولدنا مهند الطاهر. • راجي عاوز يتألق هذا الموسم عشان مفكوك في نهاية الموسم. • يا اعلام المريخ ...ما ترفعوا للزول سعرو. • الامين البرير قال اكتر من 500 مليون ما بدفع قرش. • اوعكم تقولوا لي (الاتفاقية). • الاتفاقية دي مع راجي نحن بنعطلها شوية. • هل سيشطب المريخ في يوينو القادم سفاري. • وهل سوف يرجع قلق. • ريكاردو غير مقتنع بي وارغو. • وكلتشي بقى لاعب (كنبة). • خلاص راحت عليكم. • ومجاهد لاعب ريكاردو المفضل ...قد يعود للمريخ في يونيو. • اصلو ريكاردو اللاعبين ديل كلهم عندو فيهم رأي. • بس يا ريكاردو ..خليك عارف. • عمر بخيت دا ما تفكر فيه. • ولا تحلم. • نجيلتنا بقت تضحك. • بقت تنطط براها. • ترقص ..وتغني. • قالوا سيدا رجع. • خلوا الملاعب تبتهج. • والدنيا تبقى ربيع. • نورت يا سيدا. • عاجل : يا حليل العجب.