عادل امام في المسلسل العربي (فرقة ناجي عطا الله) كان يختزل الازمة العربية كلها في جملة واحدة (زي سواق القندران الفرحان بي مراياتو – كل مرة يقيف يمسحهم). عادل امام كان يكرس لجملة واحدة في المسلسل اشبه بالغلوطية وذلك عندماوجد ان الصراع في المنطقة العربية ...(صراع عربي عربي) مننا وفينا...وان اصل الداء هى الخلافات التى بيننا.. لذا كان عادل امام يشرح لفرقته في مشاهد مختلفة وفي حلقات متعددة من المسلسل الازمة العربية متمثلة في : ( دول واقعين مع دول ..ودول بضربوا دول ...نقوم نجيب دول شوية على دول عشان دول ما يضربوش دول). وتشريح الجملة ..يقول ان الصراع في كل الدول العربية صراع اما قبلي او مذهبي. عادل امام يفعل ذلك رغم ان مسلسله يناقش الصراع العربي الاسرائيلي ...وتدور احداثه عن كراهية العرب لليهود ...والعكس ...لكن مع ذلك فان عادل امام مازال في أي حلقة يؤكد ان (دول بضربوا في دول)...اي ان حقيقة الازمة (عربية)...رغم من ان ظاهرها (اسرائيل). لكن الواضح ان المشكلة في العرب ...وفي اختلافهم وصراعاتهم. في فلسطين الصراع بين (حماس وفتح) ...وعلى رأي عادل امام ...(دول بضربوا في دول ...يقوم يحصل ايه ..دول يكتلوا دول ...دول يعكوا مع دول لمن دول عينهم تطلع...الدولة تتراجع). وكل من دول!!. في لبنان الصراع الطائفي ادخل لبنان في حروبات داخلية استمرت لمدى بعيد ...وفقدت بسببها لبنان الكثير من شبابها وكوادرها ولبنان دولة اشبه بالبستان لكن الحروب جعلت ارضها تحمر بعد ان اخضرت ...والسبب هو في ( ان دول واقعين مع دول , ودول مش بيحبو دول , وان دول لا مع دول ولا مع دول, لأن دول ضربوا دول , دول يسكتم؟). والصراع في العراق لا يبعد عن ذلك كثيرا ...(لأن دول عندهم رأي في دول ...ودول موش مقتنعين بي دول...دول قاموا مكروا بي دول..دول ركبوا رأسهم ستين يمين إلا يأخذوا حقهم). دول يسكتم؟. ويمكن القول ان (دول ودول) في العراق يمثلهم (الشيعة والسنة)..وعلى هذا يمكن ان تضرب دول بي دول...والمستفيد الاول (امريكا واسرائيل). او العدو بصورة عامة. ما يحدث في لبنان وفلسطين والعراق يحدث في معظم الدول العربية ...والسودان قبل الانفصال كان نمذوجا لدول ودول ودول كمان...والصراع بين الشمال والجنوب يدفع السودان ثمنه غاليا. هو نحن فهمنا دول ..عشان تجيب لينا دول...طيب دول ذنبهم شنو؟. (ودول عايزين يخلعوا دول ويركبوا على دول، راحوا دول ضاربين في دول .. المشكلة بقت بين دول ودول...نقوم نعمل ايه عشان نحل المشكلة ...نقوم نفصل دول من دول). دول يمشوا وين؟. دول يتنيلوا في ستين نيلة ...هذا هو الفهم العربي ..وعلى هذا النهج للأسف الشديد نسير. وعلى ذلك قس...مصر والبحرين والسعودية واليمن وليبيا الخ. لاحظوا اني الي الان ما جبت سيرة الهلال والمريخ. لكن اكيد انتوا براكم فهمتوا الحاصل. زمان نحن كان عندنا استاذ عربي ..النوع البدخل شنبو الفصل قبالو. الاستاذ دا كان وقت يكون عاوز يدينا قصيدة جديدة ..بنعرفو من قميصو. كان بكون لابس ليه قميص جديد وقت يكون عاوز يدرسنا قصيدة جديدة. الموضوع ما عاوز شرح ...(لأن دول عاملين فيها خلاص ...انهم احسن تيم ..ودول ما سألين في دول ..وما شايفين في الدنيا غيرهم – دول على دول يخربوا الحكاية ويرحوا على كدا دول ودول). احساس دول على شعور دول ...الدنيا باظت. بعدين لو جينا للجد ...المشكلة كلها من دول ...يكتبوا ويولعوا الحكاية ...يقوم دول يهاتروا ويسخروا من دول..دول ما يعجبهم الكلام يقوموا يردوا على دول. المشجع المسكين يقرأ كلام دول ..يقوم يصدق ..ودول يقرأوا كلام ديك ..يقوموا يقولوا اشمعنا. تجي المباراة ..دول يدخلوا في دول ...المباراة تولع...يتضح لينا ان لا دول ولا دول نافعين. لو ما فهمتوا حاجة يكون السبب من دول ...عشان دول بلبدوا ..ويلدغوا في النهاية. اصلو دول ..بشتغلوا المباراة بالحرب الباردة ...يسخنوا ليكم الجماعة..دول ينفعلوا يخرجوا من طورهم. ادخلكم على دول ..وإلا دول. انا عارفكم ..كلكم عاوزني اتكلم ليكم عن دول..لكن بالجد نخشي ان يأتي مردود الكتابة سلبا ...لأن دول بقوموا يتنفخوا يدخلوا المباراة بالتعالي دا ..دول من اول 10 دقايق يجيبوا ليهم هدف ..يخلصوا على دول. نقوم نحن نقول لو دول عملوا كدا ..ما كان دول جابو قون ..ولا دول لعبوا دول ما كان دول سيطروا على نص الملعب. لكن برضوا نحن ما بنخلي دول. عشان المباراة يوم الوقفة ...والعيد ...والجرايد ما معروف ظروفها كيف؟..احسن نأخذ حقنا من الان. لذلك نحن دول ح نقطعهم ليكم قبل المباراة. دول اسألوني منهم انا. احسن اكون حريف ..أخذ حقى من هسع ...لكن برضو بعد المباراة ما بنخلى حقنا ...دول لو فازوا ح تشوفوا (من الغلاف للغلاف) ايام العيد. اصلو نحن ما بنلعب...ولا بنتلفت. بس ان شاءالله ..نغلب...وخلوا الباقي علينا. دول قالوا حارسهم سافر ...قال عندو ارتباط مع منتخب بلاده ...والشغل دا حسب خبرتي المتواضعة ..شغل مخارجة. دا شغل خوف. يكون الشغيل ما طمأنو. زول عنده مباراة يوم السبت ...كيف يرجع يوم الخميس ..اي قبل 48 ساعة من المباراة. يا جماعة الله.. الموضوع دا ..موضوع (خوف) ..ما تقعدوا تبرروا لي (دول) ساكت. هم الحكام وصلوا. الحكام والمراقب ومنسق المباراة جميعهم وصل ..ولقوا الحارس مافي. اها دا ما شغل خوف. دا ما شغل رجفة. انا اول مرة اشوف لي مباراة حكامها بصل قبل مباراة حارسها. بعدين الجماعة دول قالوا ليك جابوا ليهم (مهاجم) سنغالي ...هدفو شايلو معاه في (كدراته). قبل ما يربط الكدارة ..بربط الهدف. ولا بيلعب. سانيه دا بذكرني ليك الزول الشهيتو فاتحة للاكل...اي حاجة يجبوها ليه يضربها. لو جابوا ليه (سخينة) بقوم بيها. طبعا الزول الشهيتو فاتحة ..من يجيبوا ليه (الصينية) بسأل اول حاجة من (الشطة)...وما مهم عنده في الصينية في شنو؟. بخم ساكت. الزول من يسأل من (الشطة)..اعرف طوالي ان الزول دا خطر. اها سانيه دا شغال بالنظام دا. الكورة بلقاها قدامو بخمها. طبعا سانيه دا بدخل المباراة بي (شطتو). الكورة يصلحها ليك بالشطة والليمون ..ويرسلها ليك للمرمى. الحضري لقى الموضوع بعد (سانيه) ما مقسم معاه ...هو ناس سادومبا ما مريحونا...كمان تيجبوا ليه سانيه. ليه ...الحضري دا عندو باقى عمر ...ما عاوز يضيعوا ساكت. والله دول طلعوا بعرفوا كورة صاح ....الجماعة ديل عندهم هجوم ..ح يخلى ليك دفاع دول زي (الحمام المشوي). والله قال ..وبالغلط كدا ..جيب سيرة (الحمام المشوي) لي سانيه. سانيه بموت في الحمام المشوي. خاصة الحمام البرازيلي. قالوا ليك دول جابو ليهم مدافع برازيلي ..خط 6 ما بطلع منو...ما بتقدم خطوة ...(بخاف عديل كدا يطلع من خط 6 حق فريقو). قالوا ليك ..وبواضح العباراة كدا ليما دا لو عاوز يطلع من خط 6 إلا قلب الدفاع يقدمو. براهو ما بطلع. ولا بجازف في الحتات الزي دا. ليما دا لو شاف سانيه بكتم. بكتم عديل. بتجيه صدمة ...بدخل في حالة نفسية ...وصور اشعة ..وصور مقطعية وموجات صويته. يا ريكاردو ....ما تجازف بي ود الناس ساكت. ليما دا قلبو كعب. قلبو بقيف. قلت ليكم الزول دا لو عاوز يطلع من خط 6 إلا يقدموه. تاني اعمل ليكم شنو اكتر من كدا؟. يا جماعة اكون واضح اكتر من كدا. اقولها ليكم عديل. ليما دا (برازيلي قدر ظروفك). نحن كمان ما بنعرف المحترفين. ما في برازيلي ذاتو بسرح متل التسريحة دي. تقول شايل ليه كاميرا. يا اخوي انت جاي عشان تلعب ..وإلا عشان تصور. محترف نضيف ...المباراة كلها ما بقع...(يكون خايف على المرايا الشايلها). كمان قولوا المرايا الكلمتكم عنها قبل كدا ما عارفنها. انكروها. تأكلوا وتنكروا زي (القطط). القطط هسع الدخلها شنو؟. ليما خلوه ...برازيلي غشيم ..وما عارف حاجة. ما جايب خبر ان مباراة القمة موت ...وان دول بضربوا دول. شفتوا بلة جابر عمل شنو؟. بلة جابر اتخارج زي عصام الحضري. يا زول والله انت زول عاقل. في طرف عاقل كدا ...بيلعب مع ناس نجم الدين ...المباراة كلها بحسب في (لمبات الكشافات). تقول عندو مشكلة مع عداد الكهرباء. في زول بيلعب مع موسي الزومة ..بدخل المباراة (سرحان عبدالبصير). بالمناسبة نحن الشفوت ..قررنا بعد هدف بشة في المريخ في اخر مباراة قمة ان نسمى موسي الزومة (سرحان عبدالبصير). بلة جابر الجماعة ديل قال ما بجازف معاهم. ولا بكذب. ما ممكن يضحي ساكت بي سمعة (البوفيه المفتوح). بلة جابر شاف ليه (كرت اصفر)...وقفل تلفونو ..وقعد يقرأ في الجرايد على كدا. ولا عليه. مرتاح في عضمو دا. انتوا عاوزين بلة جابر يلعب مع ليما ونجم الدين...ليه قنعان من نفسو. سانيه دا الاقوان بكل الطرق بسجلها. أي كورة عندو ليها طريقة. وعندو رأي. ما بسجل ساكت. كمل لينا فهم ناس الرابطة كوستي في الهدف الذي سجله في شباكهم. مباراة الوقفة ..سانيه عنده ليها نظام تاني. هدفها براهو. والله ناس قلق يوم الوقفة راجيهم جنس تعب. قلق والشغيل والباشا في النص. زي النص البكون فاتح من الاربع اتجاهات. نص يجب الهوا. اها نص نوع دا ...الحضري وبلة جابر ما بجازفوا معاه. دا نص زي العنقريب (الهبابة). غايتو دول ..ح يتعبوا مع دول. ودول يشيلو شيلتهم ساكت في (المطرة) دي مع دول...طبعا دول ما عندهم مشكلة مع المطرة ...لكن دول لو المطرة صبت في نيالا بتعمل ليهم حول. دول العيد السنة دي ما عيدهم ...العيد السنة دي عيد دول. ملحوظة : دول منو دول؟. هوامش نكتب قبل مباراة الهلال وجزيرة الفيل ..والتى نتمنى ان يكون الهلال امس قدم فيها العرض الرائع والنتيجة الجيدة. رغم من ان النتيجة الكبيرة والعرض الجيد يمكن ان يشكل خطر على الهلال يوم السبت. الهلال محتاج الي انتقاد. الهلال محتاج لي شغل ..عشان يدخل مباراة السبت ..اي نجمة قدامه يسمحها ليك. وزي ما بقول كبوتش ..(اضغط نجمة وشيل التلات نقاط). اها نحن المباراة دي عاوزين الضغط. عاوزين الضغط على اصوله. الصورة التى نال بها لاعبي الهلال الكروت الصفراء في مباراة الرابطة جعلت جمهور الهلال يثور ويغضب ..رغم من ان جمهور الهلال عارف ان هذه الكروت تكتيكية ولتنظيف مسيرة اللاعب من الكروت. لكن مع ذلك جمهور الهلال غضب ..ولم تعجبه هذه الحيلة. إلا نزار حامد ...نال ليه كرت اصفر بي حرفنة لمن عويرة. قلع الفانلة وهو لم يسجل الهدف. يا نزار الصاقعة ..هو اللاعب البسجل هدف ..بنزروه بالكرت الاصفر...انت ما سجلت وقلعت الفانلة ..مفروض يدوك كرت احمر. هسع الحركة دي يشوفها الشغيل يعملها في مباراة للمريخ. الشغيل الحركة دي بتكون عجبتو. بكون منتظر اديكو يسجل ..عشان يقلع هو فانيلتو. ناس المريخ ديل انا حافظهم حفظ. شاربهم شراب. في ناس كدا ...ما عاوزين (الوقفة). لو على مرادهم ..العيد يجي قبل الوقفة. انا ما عارف ..خايفين كدا ...من الوقفة ليه؟. يا ربي يكونوا ما اشتروا (الملايات). يكون ما جابوا (الستائر). يكونوا ما اخدوا (الكعك). وإلا الخوف دا كلو من (سانيه). ايكانغا ...نزار حامد ..فييرا ...ديل ح يقفوا قبل (الوقفة). شفتوا النظام نحن عندنا كيف؟. أي حاجة عندنا بي نظام. الله يستر على دول من دول. غارزيتو قال عاوز يلعب امام المريخ ب (6) مهاجمين. قلنا ليه كيف يا غارزيتو ..انت كمان ما تبالغ ..انت قدام الرابطة ما لعبت ب (6) مهاجمين. عارفين غارزيتو قال لينا شنو؟. غارزيتو قال المهاجمين الستة الذين سوف يلعب بهم يوم الوقفة هم سادومبا وكاريكا وسانيه والطاهر حماد وليما ونجم الدين. مدرب عينو قوية. انت ليما ونجم الدين مسجلهم تحت السن ...عشان تجي تلعب بيهم مهاجمين امام المريخ. في مباراة القمة اتمنى على وجه خاص الحضري في المرمي. معظم مهاجمين الهلال عندهم تحدي مع الحضري. كما ان الحضري في السن دي اخطاءه اصبحت كتيرة. يا رب يلعب الحضري. نحن عاوزين الحضري. سانيه بالاسم طلب الحضري. قال جيبوا لي حارس عمره 45 سنة ..وأسألوني من الباقي. دول ناويين نية كعبة على دول. بالمناسبة ان شاءالله يوم الخميس نلتقى في صفحة من (الغلاف للغلاف). صفحة مع المسافرين. مع الناس الماشين للعيد. اما يوم الوقفة ...فهذا يوم اخر. ضفر قال عندو (مغص). يا اخوي انت اصلا ما لاعب ...وفر مغصك عليك. الجرسة شنو وانت قاعد في الكنبة. الموضوع ما بستاهل الجرسة دي كلها. اهلي شندي ..وحيدا يعيد برة البلد. تمنياتنا للاهلي شندي بالعودة بالنقاط الثلاثة رغم ان انتركلوب فريق صعب ..وهو مهدد حقيقي للاندية السودانية في الكونفدرالية. المستوى الذي ظهرت به الرابطة يؤهلها على الاقل على البقاء. يا ناس كوستي اجتهدوا مع هذا الفريق المحترم. عاجل : سانيه قالوا بصحى من النباه الاول ..يتسحر ويجك في كوبري الحلفايا.
