نحن قررنا نعمل (ورشة عمل) في هدف مهند الطاهر التاني ...مهند الطاهر اهدافو من كترتها في المريخ ..بقى ما بتقدر تعرفها إلا بعد ما (تنمرها). مهند الطاهر اهدافو في المباراة الواحدة عاوزة ليها (نمر)...خلي حكاية نرجع لارشيف اللاعب. الزول دا في الحضري براهو جاب ليه (ملوة) اهداف. اهدافك دي يا مهند ذاكرة 8 قيقا ..ما بتشيلها ليك. كراتين ..وشوالات ..ما بتشيلها ..بعدين الحاجات دي ذاتها ...حاجات تقليدية. حاجات ما بتتناسب مع (حداثة) اهداف مهند الطاهر. اهدافو دي ذكرتنا (صف البنزين) ....والطوبة البحجزو بيها في (صف العيش). زمان (الرغيف) دا كان بالصف ..لو عاوز ليك (11) رغيفة إلا تجيب اذن سفر. لو عاوز ليك (20) رغيفة ..إلا تكتب طلب لوزارة الداخلية ..توضح فيه الاسباب الخلتك تطلب الكمية الكبيرة دي من الرغيف. مالك؟. وفي شنو؟. والحاصل ايه؟. وان شاءالله خير. دا كلو عشان عاوز ليك 20 رغيفة. والله زمان 20 رغيفة في (مناسبة) ما بصروفها ليك. بتذكر زمان كدا ..في واحد قريبنا عندو (سماية). الزول دا مشي اجر ليه (50) رغيفة من محل مناسبات ..زي (الكراسي) ..ورجعها بعد المناسبة مباشرة. الرغيف كانوا بأجروا للمناسبات زي (الصيوانات). الرغيف قربوا يدخلوا لينا (الصرافات)...مع الدولار واليورو والجنيه الاسترليني. يعني لو عاوز ليك (رغيف)...إلا تملأ ليك (استمارة) زي كأنك عاوز (عملة صعبة). هسه اهداف مهند الطاهر دا ..بقت زي (الرغيف)..في الوقت الحالي دا...ما زي رغيف زمان. متوفرة في أي ملف. محل ما تقبل تلقى ليك (فرن). المضحكني ..ومكسر سنون الحاجة (بخيتة) ..ناس المريخ فرحانين بالاهداف (الجلاكسية) الجابها سكواها. ويشهد الله الحاجة (بخيتة) ما عندها أي ذنب. ناس المريخ فرحانين باهداف جاءت من ضربات جزاء (وهمية). يا ريت لو الاهداف دي كانت من ضربات جزاء حقيقية. اهداف من ضربات جزاء ..وفي ضربات الجزاء ..ضربات جزاء (وهمية). الاهداف الزي دي مفروض تخجلوا منها. دي اخير منها تبيتوا القوا. تاني رجعنا لموضوع الرغيف. بعدين انتوا لو عاوزين تكرموا زول ..كرموا الحكم الزامبي ...هو البستاهل الجائزة. لو انتوا اهداف من ضربة جزاء وبصورة غير شرعية ..فرحانين بيها كدا ..نحن نعمل شنو مع اهداف مهند الطاهر (المشكلة) دي؟. قالوا في جماعة من ناس المريخ ..قرروا يكرموا (ضفر) ويمنحوه جائزة ...قاموا اتراجعوا في اخر لحظة. الجائزة اعترضت. قالت ليهم انتوا كمان ما تبالغوا. قالوا احسن الجائزة نمنحها سعيد السعودي... (ضفر) ما بستاهل ليه جائزة. ضفر دا لو جاب ليه عشرين هدف ..مفروض ما تشتغلوا بيه ..زول حنث القسم ..جائزة شنو البمنحوها ليه؟. خسارة الجائزة ساكت. المهم يا جماعة ..نحن قررنا بي فهم كدا ..نعمل ورشة عمل حول هدف مهند الطاهر التاني. الهدف الذي سجل في شباك عصام الحضري من جبال طوكر. انت يا الحضري تعال نسألك سؤال. انت يا الحضري حارس شنو؟. مهند الطاهر دا أي كورة شاتها فيك دخلت ..من جوة الخط ...ومن برة الخط. قلنا ليكم الزول دا كبر ..ما صدقتونا. طبعا في مباراة القمة الافريقية مباراة الذهاب ..الحضري فقد احد اسنانه. هسع قالوا ليك عصام الحضري فقد ليه (5) اسنان بعد هدف مهند الطاهر التاني. عليه ..وعملا بالمادة ج 47 ..قررنا نعمل ورشة العمل الاتية في هدف مهند الطاهر التاني. اول حاجة ..جيبوا ليك سبعة دكاترة عيون. اقل واحد في الدكاترة ديل ..(صلعتو) بتسد الشارع. يعني ما تيجبوا لي (دكاترة) ساكت. الدكتور الشاطر بتعرف بي (صلعتو) زي (الدولار). عارفين الدكاترة السبعة ديل لي شنو؟. ديل عشان يكشفوا لينا (نظر) عمكم عصام الحضري. عصام الحضري قالوا الكورة (المتغوبشة) البتجي مع المغارب ما بشوفها. نحن عاوزين الدكاترة ديل يشفوا لينا الحكاية دي ..عشان بعدين ندعم الورشة بهذا الملف الرسمي للشوف. انت تعال هنا يا عصام الحضري ..كورة مهند الطاهر دي لو ما شفتها ..ما سمعت صوتها. قالوا ليك مهند الطاهر دا وقت يشوت الكورة بتعمل ليها صوت زي الرعدة. الكورة تجي فاتة شووووووووو. قول يا الحضري انت ما شفت كورة مهند الطاهر ..معقولة بس ..ما سمعت ..شوووووووو. تاني يا الحضري لو سمعت شوووو...اقع ساكت ..شمال او يمين ...يمكن تصدف معاك. اها يا جماعة نطلع من حكاية الدكاترة السبعة. الورشة حقت الهدف التاني لمهند الطاهر ...عاوزة (اوركسترا) الاذاعة. جيبوا لي ناس محمدية وعربي والله جابو. شوفوا لي ناس الاذاعة القدام ديل ...وجيبوهم لي. عاوزين الاوركسترا ...تعزف لينا (السلام الوطني)...باقي ناس ضفر وبلة جابر ..ديل قاعدين يلخبطوا ..بين هدف مهند الطاهر التاني وبين السلام الوطني. نحن عاوزين نوريهم الفرق. تصوروا ...مهند الطاهر وقت شات الكورة ..ناس ضفر وبلة جابر افتكروا الكورة دي (السلام الوطني)..كلهم قاموا وقفوا. طيب قول ناس ضفر وبلة جابر ..فهموا ان الهدف التاني الذي سجله مهند الطاهر دا ..هو (السلام الوطني)...ناس ليما وباسكال والحضري ..بتلفتوا مالهم. على العموم لازم نثبت الموضوع دا في الورشة. لازم نطقطقه. واحدة ..واحدة ..ناس ضفر ديل بفهموا الحكاية دي. الشيء الغريب ..عصام الحضري. عصام الحضري مالو؟. عصام الحضري ..قبل هدف مهند الطاهر كان بشكي من (اللوز). انتوا عارفين كورة مهند الطاهر والتى جاء منها الهدف التاني للهلال ..شالت لعصام الحضري (اللوز). شالت ليه اللوز نهائي. بصورة جذرية. نواصل في الورشة يا جماعة بعد الاستراحة. في الورش العملية ...الناس بعملوا كدا. الاستراحة انتهت. عاوزين لينا 13 روسي كدا ....جداد لنج ..عشان يطبقوا لينا النظرية دي في الواقع. اصلو هدف مهند الطاهر دا ..بالمنطق كدا ..ما بجي. بالحساب ..وواحد زايد واحد ..وننزل بالواحد ونطلع بالاربعة ..برضو ما بجي. الهدف دا عاوز ليه (13) روسي ...يشرحوا ليكم العملية من بدايتها. من تمرين الهلال. الهدف دا ...ما في ناس بفهموا لينا غير (الروس). الشيء دا عاوز ليه (روس) عديل كدا. الشيء دا إلا (روس). هسع نجيب لينا روس ..يقعدوا يشرعوا لينا. اول حاجة طبعا الروس ديل بطلعوا ليك (ضفر) دا ما لاعب كورة. بشيلوا برة من حسابتهم. تاني حاجة ...(الشغيل) دا ..بلعبوا طرف. نص شنو البيعلب فيه (الشغيل). الشغيل دا النوع البيلعب ليك (باك)...ووقت يلعب ليك (باك) المدرب كمان بقول ليه : (اوعك تتقدم). تتقدم تمشي وين بي (كورتك) دي. يا الشغيل عشان اكون واضح معاك ...كورتك دي من خط 18 حقكم ..ما بتطلعك. ولا خطوة. اقعد قبلك. انتوا قالوا ليكم الكورة دي لعب. كورتك دي كورة تطفيش ساكت. الروس طبعا لو لقوا كورة مهند الطاهر ...(الهدف التاني) بالذات بمشوا القمر. دا صاروخ جاهز ...ماشي على القمر على طول. الروس فرصة زي دي ما بضيعوها. على كدا ...نخلي (عصام الحضري) يقدم لينا الورقة الاولى في هذه الورشة تحت عنوان (الاشعة المنعكسة من تصويبة مهند الطاهر). ضفر يقدم لينا الورقة التانية تحت عنوان ( والله ما شفنا حاجة). الحكم الزامبي يقدم لينا الورقة الثالثة في هذه الورشة تحت عنوان : (اعمل ليكم شنو حسبت ليكم ضربتي جزاء). على كدا ..ورشتنا دي بتكون انتهت ..والي ان نلتقي في ورشة تانية ...السلام عليكم ورحمة الله تعالي وبركاته. ملحوظة : الورشة دي برجع ليها تاني ..فيها حاجات ما واضحة زي هدف مهند الطاهر. هوامش في توقيت صعب ...اعلنت محكمة الاستئنافات عدم شرعية مجلس ادارة نادي الهلال. الهلالاب محتاجين في هذا الوقت ان يكونوا حول الهلال. لا اعرف كيف سوف ينعكس مثل ذلك القرار على الهلال. نتمنى فقط ان يتدارك الهلالاب الخلص الموقف ..ويقفوا مع الهلال في هذا الوقت العصيب. مجلس ادارة نادي اجتهد في حدود امكانياته ..وحافظ على صدارة الهلال في الممتاز ..وصعد الفريق للمربع الذهبي في الكونفدرالية. كذلك يحمد للمجلس اختياره للجهاز الفني بقيادة غارزيتو ..واضافاته المقدرة التى احدثها في كشف الهلال. لكن المجلس في الفترة الاخيرة ..تفرغ للصراعات ..والخلافات ..وهز استقرار الهلال. كذلك رفع المجلس يده من دعم الفريق وتوفير الحوافز والمرتبات بصورة انعكست في شكل الهلال في الفترة الاخيرة. المجلس كان ضعيفا عقب احداث مباراة القمة الافريقية الاولى يوم ان حطمت جماهير المريخ كراسي استاد الهلال. كذلك كان المجلس سلبيا ...وهو يجعل الحكم الزامبي يرتمي في حضن المريخ على هذا الشكل. ناس المريخ قوموا الدنيا ..ووصلوا لقضاء ومجلس الصحافة فقط عشان حكم مباراة الذهاب جاء في عربة واحدة مع عضو مجلس ادارة نادي الهلال. مجلس ادارة نادي الهلال اصبح يتعامل بمرونة مع المريخ ومجلسه. لكن مع ذلك يحفظ للمجلس انه صنع فريقا قويا ..لا يمكن الانتصار عليه إلا بواسطة الحكام. الهلال يملك فريقا قويا ..يهز ويرز. وهذا بالتأكيد من صنع هذا المجلس. يبقى في النهاية احترام القانون واجب على كل الاهلة ..ونتمنى ان تنتهى هذه (الجوطة) سريعا حتى لا تؤثر على الهلال. مطلوب اما تثبت هذا المجلس وتأكيد شرعيته ..او تعيين مجلس جديد ..من قامات هلالية مشرفة قادرة على ان تقود الهلال في المرحلة المقبلة. نتمنى في كل الاحوال ان يضم مجلس الهلال القادم ميرغني ادريس. الهلال يحتاج في هذه المرحلة لميرغني ادريس ..ومجموعته المتمثلة في مالك جعفر وعبدالعاطي هاشم. عجلوا لنا بالحلول ...ولا تتركوا الهلال في هذا المفترق الخطير. الهلال يلعب اليوم مباراة الموسم. مباراة اليوم امام النيل الحصاحيصا في الكاملين هى اهم مباراة للهلال في هذا الموسم على المستوى المحلي. نتمنى ان ينتصر الهلال وان يتجاوز النيل ..حتى يحافظ على صدارته للممتاز ويبقى على بعد خطوة واحدة من البطولة. رجال الهلال الاقوياء ..يجب ان يكونوا مع الهلال في هذه المباراة. لا بد من انتصار الهلال اليوم. نسأل الله ألا يظهر لينا (جاني) اخر في الكاملين. الاخ الحبيب مامون ابوشيبة الذي مازال يكتب الي الان عن ضربة جزاء وهمية لم تحتسب للمريخ سنة 1996 تحدث عن حكم المباراة الزامبي واشاد به. وقال مامون ابوشيبة في عموده وهو الداعي الي المحبة والتسامح انه سعيد ان يحث الهلالاب بمرارة التحكيم. ومامون ابوشيبة لا يعرف ان مرارة التحكيم حرمتنا من اعظم بطولة سنة 1987م. ومامون ابوشيبة لولا حلاوة التحكيم التى تدعم المريخ ..لكان فريق المريخ الان في الدرجة التانية مع العباسية والحرية ام درمان. يا ابوشيبة بعد فضيحة (جاني)..عليك الله تاني ما تتكلم عن التحكيم. الطريف ان ابوشيبة قال مازحا ان الحكم يمكن يكون شايل اللاب توب لي شقيقة سكواها. يعني يا ابوشيبة الحكم دا ما بشيل لي سكواها (اللاب توب) إلا يحسب ليه ضربتي جزاء. يا مامون ..لو دا فريقكم ..ودا تحكيمكم ...احسن تركزوا في (النجيلة). عندكم (نجيلة) ما كعبة. الكتابة عن (كشافات) استاد المريخ افضل لكم من الكتابة عن (ضفر). ضفر دا الواحد إلا يبلع ليه صندوق بندول لو عاوز يكتب عنه. يا مامون الزول دا حالف قسم. وصية للاعبي الهلال ..ان يكونوا اليوم في الموعد. اليوم لا بد من الانتصار من اجل الهلال مباراة اليوم تساوي بطولة الممتاز كلها. الانتصار اليوم يعني الفوز ببطولة الممتاز. فريق النيل الحصاحيصا ..قد يستعمل نفس اساليب المريخ ...ومن شابه ابوه فما ظلم. لذا الحذر ..ثم الحذر. انتصروا على النيل والمريخ والاتحاد والتحكيم ..وكل الظروف التى يمكن ان تواجه الهلال في المباراة. مطلوب من لاعبي الهلال ان يكونوا اليوم في منتهى الهدوء وان يبعدوا عن التوتر والتشنج. الحكم سوف يكون ليكم بالمرصاد. اعملوا حسابكم. الحمدلله ان ايكانغا في الخرطوم. اعلموا ان النيل ..هو الوجه الاخر من المريخ. المريخ الاصلي انتصر على الهلال بواسطة (الحكام)..والنيل ان شاءالله بحكامه ..لن ينتصر على الهلال. ضحكت عندما قرأت كتابات اعلام المريخ ..وقولهم ان اعلام الهلال يبحث عن شماعة يعلق فيها الخسارة ..لذا هاجم حكم المباراة بهذه الصورة. الهلال لا يحتاج الي شماعة ..لعب الهلال بالصف التاني ..وكان لاعبي الهلال في منتهي الهدوء ..والجمهور راضي على الاداء ..والمباراة ليس مهمة ..بل ان غارزيتو فضل منذ البداية مواجهة جوليبا. يعني الموضوع اصلا ما محتاج ليه لي شماعة. كان يمكن ان يخسر الهلال بشرف ..ونقبل ذلك. لكن الخسارة بواسطة الحكم ...تبقى امر مستفز ..وامر غير مقبول. مطلوب من مجلس الهلال (غير الشرعي) ان يشكل حماية للهلال في مباراة اليوم ..وان يقوم المجلس بكل ادواره ومهامه حتى اخر دقيقة له في الهلال. واظن ان احمد ادم سوف يكون في الموعد. كما ان الامين البرير لا احد في الدنيا يشكك في (هلاليته). مجلس البرير فقد كان تنقصه التجربة والخبرة. خبرة البرير كبيرة مع الهلال ..لكن ان تكون رئيسا لنادي الهلال يحتاج ذلك المزيد من الخبرة. بل يحتاج الي خبرة مختلفة. جمال الوالي هل اصبح منطقة محظورة. هل اصبح الوالي (ممنوع الاقتراب والتصوير). عشنا وشفنا. ولسع ح نشوف. عاجل : الله معاكم.
