سودارس : (سيدا) اكتر من كدا يعمل شنو؟..إلا يدفع ليكم فاتورة فندق الحضري!!

لجان مقاومة النهود : مليشيا الدعم السريع استباحت المدينة وارتكبت جرائم قتل بدم بارد بحق مواطنين كم تبلغ ثروة لامين جمال؟ شاهد بالصورة والفيديو.. حسناء الشاشة نورهان نجيب تحتفل بزفافها على أنغام الفنان عثمان بشة وتدخل في وصلة رقص مؤثرة مع والدها حين يُجيد العازف التطبيل... ينكسر اللحن شاهد بالفيديو.. في مشهد نال إعجاب الجمهور والمتابعون.. شباب سعوديون يقفون لحظة رفع العلم السوداني بإحدى الفعاليات أبوعركي البخيت الفَنان الذي يَحتفظ بشبابه في (حنجرته) جامعة ابن سينا تصدم الطلاب.. جامعات السوق الأسود والسمسرة من رئاسة المحلية.. الناطق الرسمي باسم قوات الدعم السريع يعلن تحرير النهود (فيديو) شاهد بالصور والفيديو.. بوصلة رقص مثيرة.. الفنانة هدى عربي تشعل حفل غنائي بالدوحة تتسلل إلى الكبد.. "الملاريا الحبشية" ترعب السودانيين بحضور عقار.. رئيس مجلس السيادة يعتمد نتيجة امتحانات الشهادة السودانية للدفعة المؤجلة للعام 2023م إعلان نتيجة الشهادة السودانية الدفعة المؤجلة 2023 بنسبة نجاح عامة 69% والد لامين يامال: لم تشاهدوا 10% من قدراته احتجز معتقلين في حاويات.. تقرير أممي يدين "انتهاكات مروعة" للجيش السوداني هجوم المليشيا علي النهود هدفه نهب وسرقة خيرات هذه المنطقة الغنية عبد العاطي يؤكد على دعم مصر الكامل لأمن واستقرار ووحدة السودان وسلامة أراضيه منتخب الشباب يختتم تحضيراته وبعثته تغادر فجرا الى عسلاية اشراقة بطلاً لكاس السوبر بالقضارف المريخ يواصل تحضيراته للقاء انتر نواكشوط الحسم يتأجل.. 6 أهداف ترسم قمة مجنونة بين برشلونة وإنتر استئناف العمل بمحطة مياه سوبا وتحسين إمدادات المياه في الخرطوم هيئة مياه الخرطوم تعلن عن خطوة مهمة هل أصبح أنشيلوتي قريباً من الهلال السعودي؟ جديد الإيجارات في مصر.. خبراء يكشفون مصير المستأجرين باكستان تعلن إسقاط مسيَّرة هنديَّة خلال ليلة خامسة من المناوشات ترامب: بوتين تخلى عن حلمه ويريد السلام إيقاف مدافع ريال مدريد روديغر 6 مباريات تجدد شكاوى المواطنين من سحب مبالغ مالية من تطبيق (بنكك) ما حكم الدعاء بعد القراءة وقبل الركوع في الصلاة؟ عركي وفرفور وطه سليمان.. فنانون سودانيون أمام محكمة السوشيال ميديا تعاون بين الجزيرة والفاو لإصلاح القطاع الزراعي وإعادة الإعمار قُلْ: ليتني شمعةٌ في الظلامْ؟! الكشف عن بشريات بشأن التيار الكهربائي للولاية للشمالية ترامب: يجب السماح للسفن الأمريكية بالمرور مجاناً عبر قناتي السويس وبنما كهرباء السودان توضح بشأن قطوعات التيار في ولايتين تبادل جديد لإطلاق النار بين الهند وباكستان علي طريقة محمد رمضان طه سليمان يثير الجدل في اغنيته الجديده "سوداني كياني" دراسة: البروتين النباتي سر الحياة الطويلة خبير الزلازل الهولندي يعلّق على زلزال تركيا في حضرة الجراح: إستعادة التوازن الممكن التحقيقات تكشف تفاصيل صادمة في قضية الإعلامية سارة خليفة الجيش يشن غارات جوية على «بارا» وسقوط عشرات الضحايا وزير المالية يرأس وفد السودان المشارك في إجتماعات الربيع بواشنطن حملة لمكافحة الجريمة وإزالة الظواهر السالبة في مدينة بورتسودان ارتفاع التضخم في السودان شندي تحتاج لعمل كبير… بطلوا ثرثرة فوق النيل!!!!! انتشار مرض "الغدة الدرقية" في دارفور يثير المخاوف مستشفى الكدرو بالخرطوم بحري يستعد لاستقبال المرضى قريبًا "مثلث الموت".. عادة يومية بريئة قد تنتهي بك في المستشفى وفاة اللاعب أرون بوبيندزا في حادثة مأساوية 5 وفيات و19 مصابا في حريق "برج النهدة" بالشارقة عضو وفد الحكومة السودانية يكشف ل "المحقق" ما دار في الكواليس: بيان محكمة العدل الدولية لم يصدر ضبط عربة بوكس مستوبيشي بالحاج يوسف وعدد 3 مركبات ZY مسروقة وتوقف متهمين الدفاع المدني ولاية الجزيرة يسيطر علي حريق باحدي المخازن الملحقة بنادي الاتحاد والمباني المجاورة حسين خوجلي يكتب: نتنياهو وترامب يفعلان هذا اتعرفون لماذا؟ من حكمته تعالي أن جعل اختلاف ألسنتهم وألوانهم آيةً من آياته الباهرة بعد سؤال الفنان حمزة العليلي .. الإفتاء: المسافر من السعودية إلى مصر غدا لا يجب عليه الصيام بيان مجمع الفقه الإسلامي حول القدر الواجب إخراجه في زكاة الفطر

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

(سيدا) اكتر من كدا يعمل شنو؟..إلا يدفع ليكم فاتورة فندق الحضري!!

الاهداء نشر في قوون يوم 09 - 03 - 2013

الي الذين يمنحون اذنهم لمحمد وردي اكتنازا ب (الطير المهاجر) ...وعينهم لمهند الطاهر ترقبا ل (الهوبة)...ثم يمضوا في الشوارع ، بعد ذلك عبارة عن (مشاعر وحواس)...وانتظار للمواصلات.

يترقبون (الهوبة)...كلما دق جرس طابور الحصة الاولى....مازالوا هم مثلنا تماما يصلّحون الفول ..بهدف تراوري التاني....

هذا مني اليكم المزيد من (الهلال)

محمد
عزيزي القاريء

الرجاء ربط الاحزمة ...وذلك للمطبات الخطيرة التى سوف تمر بها هذه (الصفحة)...كما نرجو من الاطفال دون سن ال ( 47 ) عاما ...ان لا يقرأوا هذه الصفحة ، حفاظا على ارواحهم وممتلكاتهم ..وموبايلاتهم.

هسع (الموبايلات) دخلها شنو؟.

زي الزول البعزمك (سمك)...تمشي ليه تلقى عامل ليك (فطير بي لبن)..تقعد تأكل ...يقعد يتكلم ليك عن فوائد الفطير باللبن.

سندوتش بالكلمة الساخنة

انا ما عارف هيثم مصطفى دا يعمل ليكم اكتر من كدا شنو؟....سافر معاكم معسكر تونس في (برد) يجمّد الحوت في بحرو...وجاب ليكم قون ...وبقى في كل مباراة يفوز بجائزة نجومية المباراة.

يعمل ليكم شنو تاني؟.

يدفع ليكم فاتورة فندق عصام الحضري...!!.

يفك ليكم الحظر من طابق شاخور.

يتبرع ليكم بي اسمنت وحطب.

الحطب مالك ومالو هسع.

الزول دا ما فاضل ليه إلا يجيب (الخرطوش) ..ويسقي ليكم نجيلتكم العطشانة دي.

عندكم نجيلة ما عندها اي فرق من رأس كولينا.

غايتو الزول البقع منو (خاتم) في رملتكم دي تاني ما بلقاهو.

والله نحن ما قايلين المريخ دا فاضي كدا ...هيثم مصطفى الذي غاب من الهلال موسم كامل يأتي ويلقط اي حاجة في المريخ...يفوز بالنجومية ..ويسجل..ويخلي ليك (فيصل العجب) قاعد في الكنبة ..متل ناس (حقيبة الفن).

جدودنا زمان ...جدودنا زمان ..وصونا على الوطن ..على التراب الغالي الما بي تمن.

انتوا وين كلتشي؟..وين امير كمال؟.

الاسماء دي بتظهر فقط في الصور.

البشوف امير كمال بتقدل بي حلاقتو الزي الردمية بالحاج يوسف دي ..يقول الزول دا نجم المباراة.

والله هيثم مصطفى بي طريقتو دي لو نزل مع جمال الوالي في استفتاء افضل رئيس عربي من ناحية الشعبية في موقع صدى الملاعب يفوز.

الوالي ما بنافس بي استقالتو دي مع البرنس.

قاعدين ساكت ..ومالين لينا الجرايد (نفخ).

انتوا كيلو الفراخ عمل كم؟.

دا شنو دا؟...الجداد الدخلو هنا شنو؟.

احتمال

في واحد ..قعد مع احمد الباشا ...فهمو ليك اي حاجة ...قال ليه باختصار كدا ...انت مع هيثم مصطفى القادم من الهلال دا ما بتنافس..(انت لاعب غير محبوب حتى من جمهورك).

الناس ما بتريدك يا الباشا نعمل ليك شنو؟.

عشان كدا يا الباشا احسن تطلّع ليك (البوم) فيه 7 اغنيات ...يمكن بعد فشلك في منافسة هيثم مصطفى في (نجومية المباراة) ...تقدر تنافس ناس وليد زاكي الدين واحمد بركات وياسر تمتام.

جمال فرفور ما بتقدر عليه ...ما تجازف ساكت.

كورتك دي ما بتغطي معانا.

هسع دا احتمال دا.

إقتراح

قالوا ليك عصام الحاج ..مشى الساعة اربعة صباحا للفندق الكان قاعد فيه الحضري.

ناس الفندق فرحوا ..قالوا ليه عاوز تدفع الحساب.

قال ليهم حساب شنو؟...الحضري عندو (شاحن موبايل) ناسيهو في الغرفة...ضرب لي من القاهرة يسأل منو ..قال الشاحن اصلي ..لو راح منو تاني ما بلقاهو.

طبعا دا حنك الناس الصعبة ...يقول ليك الشاحن اصلي ..عشان يلقوا ليهم مبرر يسألو من شاحنهم.

شفتوا عصام الحضري دا كيف؟....(شاحن الموبايل) ما بخلي.

ان شاءالله يا عصام الحاج ...(شاحن الموبايل) يلعب ليك (حارس مرمي)...ولو الكوكي كمان عاوز ينظر كلموه يقدم (الشاحن) قدام.

هسع دا اقتراح دا.

شوال غتاتة

باسكال قبل مباراة المريخ وهلال الجبال ...قبض من ناس المريخ 45 الف دولار ..(في الازمة دي).

مع ذلك باسكال (انزلق)...يا اخوي المفروض ينزلق (عصام الحاج)..دافع ليه 90 الف دولار من خزينة المريخ لباسكال ومونزا ..وما جاتو اي حاجة.

كدا اهبشوه ...بكون قلبو وقف.

عيونك ديل يا عصام الحاج ما عاجباتني ...انت زي العيان...احسن تمشي تفحص.

طن دغالة

الكوكي في المريخ (صلعتو) كبرت ...بقت فاتحة من (اربع اتجاهات)..زي صينية القندول تجيها من اي حتة تدخل.

اول مرة اشوف الكوكي ..في واحد قال لي انت تعال هنا الكوكي دا مدرب كورة ..وإلا رائد فضاء.

والله صلعتك دي فيها (حلاة) رائد فضاء.

بس يا خسارة ..وقعت لي مع ناس بلة جابر ديل ...(علوم) سنة خامسة ابتدائي ح يطيروها ليك من رأسك.

غايتو بترجع تونس من المريخ ...(عجلة) ما بتعرف تسوقها.

تسوق شنو ..وإلا شنو ..وإلا شنو مع ناس موسي الزومة ديل..الواحد فيهم لو ما شرب ليه (جردل ليمون) ما برفع ليه كورة.

شولة هندية

جمال الوالي فاز في استفتاء موقع صدى الملاعب بجائزة اكثر رئيس نادي عربي شعبية.

عصام الحاج ..برضو لو عملوا استفتاء ممكن يفوز بجائزة اكثر امين عام لنادي عربي ...(نجيلتو) كعبة.

النجيلة دي لو دخلت بيها منافسة ..بتفوزك..(ما في زول سبقك عليها).

نجيلتكم دي انا ما عارف ليه بتذكرني ب (صور) عرس زمان ...ابيض اسود ...العروسة تلقاها لابسة قصير ...والعريس حيلو مهدود من الصرف.

هسع وينها (الشولة) الهندية هنا؟.

غايتو الزول وقت يكون عاوز ليه سبب.

موظف (عام) بالجد

موظف عمل ليه عملية جراحية كبيرة ..شالوا منو المرارة والطوحال وجزء من البنكرياس ومرتب 6 شهور.

ما حارقهو المرارة ..ولا الطوحال ..ولا البنكرياس ...حارقو مرتب ال (6) شهور ديل.

بيني وبينكم ..(الطوحال) لو خلوه ليه ...ناس (المحلية) ما بخلوه.

قندراناوي

بتاع قندران كاتب في خلفية قندرانو عبارة (ان شاءالله القيامة تقوم)...واحد جنو يسأل ...لو عندك (ضرس) يفتح ليك محضر ...قال ليه انت تعال هنا قاصد منو ب (ان شاءالله القيامة تقوم).

قال ليه : قاصد ناس الحركة ...واهل المرا.

هسع اهل المرا ذنبهم شنو؟.

ما تجيب لينا هوا يا ود الناس.

روسي في سوق ستة

روسي مشي لبتاع الدكان قال ليه عاوز لي موية فول ساكت ب (جنيه).

بتاع الدكان عاين ليه كدا ..من فوق لي تحت ..(مقاس الجزمة حفظو) ..وقال ليه ..خلاص عاوز تتعلم لي حركات السودانيين ديل ...هسع بكرة تجي تقول لي قون تراوري التاني (اوف صايد).

الطريق مغلق للصيانة

مريخابي جاتو مكالمة من رقم غريب ...فتح التلفون ...وقال : الو ...

الزول الضارب قال ليه : الو في عينك ...كمان عندك جرأة ترد...اقفل يقفلوك في كوبر ...انت ومحمد علي كلاي.

هسع محمد علي كلاي ذنبو شنو؟.

والله محمد علي كلاي ...يلم فيك يقطع ليك (اضنينك) العاملات كدا زي (اعلان الزبادي).

الحيطة القصيرة

عصام الحضري ..والباشا وضفر وامير كمال ومحمد موسي وبلة جابر ...دخلوا ليهم صندوق.

الحضري شال الصرفة الاولى ...واقنعهم يسددوا فاتورة الفندق بالصرفة التانية ...اما الصرفة الثالثة ...فقد قال لهم الحضري ...انا المرة دي ما بديكم ليها ..بموت ليكم فيها عديل كدا ...كفاية اني ما شلت الصرفة التانية.

امير كمال عاين ليه كدا ..وقال ليه: خلاص ما مشكلة ...بس الصرفة الرابعة خلوها لي.

الحضري قال ليه : لمن تجي الصرفة الرابعة يحلها الف حلال ...يمكن نجيب بيها كهربا.

في زول عاقل كدا بدخل ليه صندوق مع الحضري.

الحضري رصيدك في الموبايل بقاسمك فيه.

نظرية مستفة استغراب

وقعت فيه صاقعة ..شالوه وجري على الحوادث ...بعد 21 فتح عينو (زي الزول البعاين بي فتحة الباب)...الدكتور وقف قدامو وقال ليه : شاعر بي شنو يا استاذ ؟.

قال ليه شاعر بي انو عصام الحاج دا ما بكسب فينا خير.

الزول دا يا دكتور ..ما تشيلوه وترجعوا لينا (همد).

اتنين في نفس الحتة

وجه الشبه بين فيصل العجب وعبدالله حسن عيسي ..انهم الاتنين قاعدين ساكت.

العجب بعد هيثم مصطفى بقى زي سيد البيت البتدفع ليه مقدم 6 شهور ...ترتاح من تلفوناتو ..ودق الباب الصباح.

6 شهور ما تشوفو...(ترتاح في عضمك دا).

وعبدالله حسن عيسي مع عصام الحاج انحصر دوره كلو في يلبس جلابيتو ..ويظهر من مهرجان لي مهرجان.

انت يا عبدالله حسن عيسي ما تبقى (بين بين) كدا ..استقالتك مع جمال ..واقالتك مع عصام الحاج.

احسن ليك تمشي نيل الحصاحيصا عديل كدا ...بدل تقعد ساكت في المريخ.

باسكالات

غريبة ناس المريخ ديل خلوا (باسكالاتهم)...بعد التعادل مع هلال كادوقلي الي الان ما في صحفي واحد طلع وقال : (اي دمعة حزن لا لا).

اكيد ناس ياسر المنا ...مدخرين الكلام دا عشان يطلعوا بيه يوم الاربعاء 13 مارس.

قالوا ليك سلك ..كل ما بنتو (اسلام) تبكي ..بقول ليها ...(اي دمعة حزن لا لا).

لا حلاوة ..لا بسكويت ..لا ايسكريم ...بس (اي دمعة حزن لا لا).

يوم سلك رجع من الشغل ...لقى عاملين ليه (دمعة) في الغداء ...سلك زعل ..وقال ليهم نحن (الدمعة) دي في المريخ ...رافضنها ...تجوا تعملوها لينا في (البيت).

مفروض يا سلك ...تغيروا شعاركم دا من (اي دمعة حزن لا لا) الي (الدمعة لو بتعين كان بدري عانتني).

وفي البيت على ذات النسق ...بدل (الدمعة) تعملوا (اسود) مطبوخ.

عليكم الله دا موش حل ..وتجاوز فعلى للدمعات.

اديكم فكرة تانية...اكتبوا (وراء البسمات كتمت دموع)..اصلو انتوا جنكم (دموع).

مريخابي (غير سلك) سألوه مسلسلك شنو؟...قال ليهم (الشهد والدموع)...قالوا ليه اغنيتك المفضلة ..قال ليهم (الدموع السائلة مني لما سالت حرقتني).

مليتوا البلد كلها (دموع)..نلقاها منكم وإلا من السيول والفيضانات والامطار.

الما شاف البرنس بخلعوا العجب

تمريرة سيدا في المريخ للمهاجمين ..بقت عزومة مراكبية ساكت

اول مباراة شارك فيها هيثم مصطفى مع المريخ ...خرج المريخاب ما مصدقين...عيونهم بقت في نص ضهرهم...وايدهم في جيبوهم ...من الاحساس بالبرد.

الاحساس بالبرد طبعا احساس جميل ..خاصة في السخانة.

طلعوا في الشارع زي الناس الراجعة من (فرم)..في وجود ازمة عيش حادة.

ولا (عيشة).

او زي شفع المدارس بعد امتحان (الرياضيات)...كل مجموعة بتكون واقفة تحت الشجرة وبحلوا ليهم في (مسألة).

يعني بحلوا ليهم في (تمريرة).

اي واحد فيهم كان ما مصدق ...زمان كنا بنقول ليكم الكلام دا ...كنتوا بتقولوا علينا اننا بنتكلم ساكت..ونحن كنا عاذرنكم ...عشان الما شاف (البرنس بخلعو العجب).

العجب هسع (كديس) ما بخلعها!!.

هسع الجماعة شافوا (البرنس)...والبرنس من قوة عينو ..مشي ليهم في فريقهم ..عشان يقنعهم ليكم ...(واحد زايد واحد يساوي اتنين)...ما عاوزين اي كلام كتير.

خلاص الموضوع دا بالنسبة لينا انتهى.

هيثم مصطفى في المريخ لاعب بدون نفس ..(مع ناس ضفر ونجم الدين وامير كمال)...مع ذلك الجماعة اقتنعوا.

طلعوا من الاستاد يوزعوا في (الحلاوة).

يا جماعة روقوا ...ما كدا.

اتقلوا شوية...ما تعملوها ظاهرة ...(ناس العجب ديل ما برضوا).

الباشا بقى يتعقد ..عديل كدا ..يجري جري الوحوش ..وهيثم مصطفى بي (تمريرة) واحدة بشيل نجومية المباراة.

ناس الباشا ديل ...لسع بدري عليهم ...(دا الباشا الكان عاجبكم)...هسع وينو؟.

الباشا بقى زي الزول البتلقى واقف في بداية الشارع ..تقوم تسألو من بيت ناس فلان ..يقوم يقعد يوصف ليك.

ومن فضاهو ....يقوم يوصلك عديل كدا ..يندمك على السؤال.

دور الباشا ...بقى محصور في الحتة دي.

اما العجب ...بقى قاعد في كنبتو ..(لا بهش لا بنش)..قوم سخن ..يقوم يسخن ..اقعد ..اقعد ...ادخل في اخر 10 دقائق ..يدخل.

ولا بقول حاجة.

يا العجب الحركات البعملوا فيها معاك المريخاب ديل ..دي الجابت هيثم مصطفى من الهلال وخلتو يلعب في المريخ.

يعني مفروض طوالي يكون عندك موقف.

ان شاءالله تمشي تلعب في الرميلة ..او القوز.

طوالي مفروض تثبت (الكوكي) دا في حدو.

الزول دا ما اكبر منك كتير ..(ما تشوف الصلعة دي).

الشيء الغريب والمدهش ..هو ان الشيء الذي لم يرضاه المريخاب لهيثم مصطفى في الهلال ..مشوا ورضوه لي فيصل العجب في المريخ.

شفتوا عجائب الدنيا دي كيف؟.

يا العجب اقول ليك حاجة..شوف ليك (قارورة) شوتها...ناس سلك ديل ما بجوا إلا بالقارورات.

هيثم مصطفى في 45 يوم ..بقى (الملك)..وسيدا ..والبرنس ..والسلطان ..وانت قاعد في الكنبة.

تطلع وتدخل في (الصبارة).

ناس بلة جابر وموسي الزومة واحمد الباشا ما بجيبوا ليك حقك ..احسن تجيب حقك براك.

اعمل ليك (شكلة) مع محمد موسي...لو شايف (الكوكي) صعب عليك ..اعمل شكلة مع (محمد موسي).

بعد محمد موسي ..وسع الحكاية شوية ..وقول ما بلعب في الولايات ..اصلك انت ما بتلعب.

قول ما بقعد في (كنبة) في الولايات ...اتكلم قدر حالك ...انت اللعب شفتوا وين؟.

ح تقعد في (الكنبة) دي لي عيد الاستقلال القادم.

انت بقيت بتاع (استقلالات) ساكت.

وعشان مصلحتك يا العجب ..كلم دائرة الكورة ...ما في زول (يصورك).

ليه يصوروك؟.

انت قايل (الصور) دي حاجة ساهلة.

يكملوا فيك (الذاكرة) ساكت.

نرجع لي موضوع هيثم مصطفى ..ونقول ان هيثم بيلعب في المريخ بدون نفس ..حتى (تمريراته) القاطعة ..والساحرة بقينا ما بنشوفها في المريخ.

يمكن عشان ناس بلة وضفر وامير كمال ..ما بفهموا الحاجات دي.

هو علاءالدين يوسف الذي جاء مع هيثم مصطفى من المريخ ...ما قادر يستوعب (تمريرات) هيثم مصطفى.

خلوا علاءالدين يوسف ...موش (سلك) دا ..محامي قدر الدنيا ..وصحفي كبير ...وعندو (صلعة)...برضو ما قادر يستوعب تمريرات هيثم مصطفى.

لسع ما قادر يتجاوز (مرجحانيات) فيصل العجب.

سلك (ادروب) عديل كدا ..سلك ولوف.

سلك الولف كاتلو.

قدر ما غير النظارات ..وبدلها ..يطلع نظارة ...نظارة ..ويلبس ..وما قادر يستوعب تمريرات هيثم مصطفى.

تمريرات هيثم مصطفى عند سلك زي (امتحان الكيمياء)..وسلك من زمان كان في الثانوي مع كرار ابوعلي كان ما بحب (الكيمياء).

ناس كرار ابوعلي بحضروا حصة الكيمياء ..وسلك بمشي يلقط النبق ..في الوقت بتاع الحصة دي.

لذلك الي الان بابكر سلك ..ما واقعة ليه (التمريرات)..اخونا سلك لسع بيعصر في (معجون) العجب.

يا سلك معجون دا ..قلت ليك شوف ليك بدلو (اراك)...بقى قاعد في الكنبة ..السنة كلها.

نرجع تاني لي هيثم مصطفى ..ونخلي سلك.

والله سلك ما عندو اي دخل بالموضوع دا ..انا دخلتو ليكم ساكت كدا بدون مناسبة ..جبتو ليكم (عرضا).

شفتوا (عرضا) دي كيف؟.

والله (عرضا) دي بلة جابر 6 شهور ..ما يستوعبها لينا ...عاوزنو يستوعب لينا تمريرات هيثم مصطفى.

على العموم ...هيثم في المريخ لاعب (مجبور)...عندو حساب مع الامين البرير وغارزيتو.

تمريراته بقت ما مقنعة زي زمان.

تشعر كدا ..ان تمريرات هيثم مصطفى بقت زي عزومة المراكبية للهاجمين..والدليل على كدا انه الي الان ما في هدف جاء من تمريرة من هيثم مصطفى.

كمان اقعدوا غالطوا في الحاجات دي.

زمان هيثم مصطفى وقت كان في الهلال ..كان لو لعب 5 دقائق بقلب المباراة.

اديكم دليل قاطع اخر.

حاجة بالاثبات.

عشان ما تقولوا نحن بنتكلم ساكت.

وعشان تعرفوا ...نحن اي حاجة عندنا بي نظام.

في مباراة الهلال وهلال كادوقلي الماضية ..في الموسم المنصرم ..استطاع هيثم مصطفى ان يهزم هلال كادوقلي براهو ..بعد ان كان هلال كادوقلي متقدم على الهلال الاب.

غير ان هيثم مصطفى ...استطاع ان يقلب المباراة ..وقد منح مهند الطاهر وسانيه تمريرات تدخلهم (طب الخرطوم).

وقتها كان هيثم مصطفى بعيدا عن المشاركة وكان مستهدفا من قبل الجهاز الفني ومجلس الادارة ..وبيلعب في الشهر كلو 10 دقائق.

هيثم في هذه الظروف استطاع ان يقلب نتيجة المباراة لصالح الهلال...ومن دون شك ان الكل يتذكر هذه المباراة.

تعالوا شوفوا الحصل هسع شنو؟.

المريخ وهلال كادوقلي في استاد المريخ وهيثم مصطفى لاعب من بداية المباراة ..والمريخ متقدم بهدف هيثم مصطفى نفسه ...يجي هلال كادوقلي ويتعادل مع المريخ.

هذا الدرس ..يجب ان تستوعبوه جيدا ..ويجب ان يقف عنده على وجه خاص هيثم مصطفى ذاتو.

عندها فقط ....سوف تعرفوا الفرق بين الهلال والوصيف ..وان مشكلة المريخ ...هو انه في كل الاحوال يأتي خلف الهلال.

مفروض تشوفوا ليكم حاجة تانية.

سلة ..وإلا سباحة ...والا بيض نعام.

كورة القدم دي خلوها لينا ...خلوها ل (الاسياد)..وشوفوا ليكم شغلة غير...انتوا على مستوى فرق الشباب ما قادرين على الهلال.

زمان كان المريخاب بعتقدوا ان سر الهلال في هيثم ..بقيادته وتمريراته ...وموهبته العالية.

هيثم الان ذهب الي المريخ ...سجل وفاز بنجومية المباراة اكثر من مرة ..وقاد فريق المريخ ...لكن مع ذلك ظلت (الازمة)...وظلت الوصافة مرض عضال في جسد المريخ ..تستفحل من موسم الي موسم.

يا عصام الحاج ...اقول ليك حاجة ..اعمل اجتماع طاريء ...ادعوا فيه كل المريخاب ..وناقشوا فيه ازمة المريخ بكل صراحة ..ابدأوا لينا من (نجيلة) استاد المريخ ...اصلكم ما بتقدروا تتحدثوا عن شيء غيرها.

نجيلتكم ...حردانة منكم.

يلا ان شاءالله يا رب (وصافة) دائمة.

انقر هنا لقراءة الخبر من مصدره.