صباح الأمس زارني إبن الجيران (طارق) وهو يعمل موظفاً صغيراً بإحدي المرافق الحكومية .. بعد التحية والسلام أعطاني صحيفة كان يحملها وهو يقول لي : - ما معقول يا استاذ؟ معقوله بس يا استاذ؟ بعد أن هدأته قليلاً طلبت منه أن يشرح لي الموضوع فأخذ من يدي (الجريده) وطلب مني قراءة المانشيت الرئيس والذي كان يقول (زيادة تكلفة الحج 6 آلاف جنيه) ، بعد قراءتي للمانشيت سألته : - يعني هسه تكلفة الحج هسه عملت كم ؟ - عملت 20 (مليون) - تقصد حج (سياحي) - سياحي شنو يا استاذ .. الحج الواااحد العادي ده - إنتا عندكم زول عاوز يحج السنة دي؟ - يا أستاذ ده ذاااتو الجابني ليك وبدأ ولدنا (طارق) يحكي لي في أسى عن رغبتهم منذ سنوات في تحجيج (والدتهم) .. كانو في كل عام يقوم هو وإخوته بجمع (القروش) فيفاجأون بانها (مقصرة) وأن التكلفة قد إرتفعت (ما المواد زادت وكده) .. - أها السنة الفاتت الحج كان بي 14 مليون والقروش قصرت معانا وجمعنا 12 مليون بس .. أها المسئواين قالو السنة الجاية (اللى هي السنة دي) ح يقوموا يخفضو التكلفة من 14 .. (يعني قلنا ممكن يعملوها الإطناشر الجمعناها دي) قمنا فرحنا والحاجة ذاااتا فرحت وقالت خلاس المنادي نادا ها - وبعدين؟ - بعدين المسؤولين الليلة يا أستاذ فاجأونا إنو زادو التكلفة تاااني وبقت 20 مليون هسه يا أستاذ بالله الواحد يعمل شنوووووووو ! إنتهي حديث ولدنا (طارق) ولم تنته دهشتي وإستغرابي من هذه الزيادات غير المبرره في تكلفة أداء هذه الشعيرة الإسلامية .. ولأن العبدلله ليست لديه فكرة عن التكلفة الفعلية لأداء مناسك الحج فقد قمت بالإتصال بصديقنا (حاج الوسيلة) فهو (خبير حج) إذ يقوم بأداء هذه الشعيرة بصورة شبه سنوية (أقل حاجة يكون حج ليهو 30 حجة) . - إذيك يا حاج ! - أهلا يا أستاذ - يا حاج بس عاوز منك معلومة عن تكلفة الحج السنة دي تكون زي كم؟ - شوف يا استاذ تكلفة الحج ما بتفوت ليها خمسة ألف ريال كان بالغت ! - يعني بالسوداني كم؟ - زي 10 مليون كده ! هنا تضاعفت دهشتي .. هل يعقل أن تتربح الدولة من (شعيرة دينية) وتقوم بزيادة تكلفتها وتضاعفها كمان (100%)؟ إلا ان دهشتي قد زالت بعد أن فكرت في الموضوع بصورة شموليه .. فللحج وزارة .. والوزارة أكيد عندها وزير .. والوزير عندو أقسام والأقسام أكيد عندها رؤساء أقسام ورؤساء الأقسام عندهم موظفين والموظفين أكيد عندهم رواتب والرواتب أكيد عند الناس الفوق ديل كووووولهم .. والناس الفوق ديل كوووولهم عندهم عربات والعربات أكيد عاوزه صيانه وبنزين وزيوت وسواقين .. أها أيه رايكم علي اليمين الحج ده كده بالخسارة على الوزارة .. يعني 20 مليون دي ولا راسمالو !! كسرة : اقترح ضم وزارة الحج لوزارة الإستثمار كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)+(و)+(و)+(و) كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)
