محمد الحسن ابنعوف يادكتور … فى شن دكترتك ؟ دام لا راى .. ... لا فكره سويه .. وشن ولوك يا والى الغفله والخرطوم ملانه اسيه ؟ جانا السيل هدالنا بيوتنا غتس حجر البنيه النيه ... دام الكل شغال بالواسطه دغمسه ساهى ومحسوبيه ... شارع الظلت الحول ماتمه ومال الشعب الكلو اتخمه شالو اولاد الارزقجيه ... ناس تجميل العاصمه تراهن مرقو سرارق وكلمنجيه ... وكل شركات اولادكن تلغف نار الوجعه بتوقد حيه... والطياره الجات من بره خيمه وسكر وبطانيه... اشلبوها رفاقتك بدرى واتقسموها شليه شليه .... ديرتك فيها تلاته بحور خزان شلال ومياه جوفيه .. ولسع فيها الرقدو عطاشه أكبر غايتن الحنفيه .. ولسه الكارو تبيع فى المويه بالجركانه و بالكوريه .. ولسه فى ناس بالكهربا تحلم داخل عاصمة الالفيه .. فى التعليم والصحه بلاوى .. يا دكتور الراس الخاوى .. من تسعين راجين لاهسه .. قلتو السيخ والطوب إتقسى . ناس شايفين عمرانكن ضاوى .. مستشفانا بتبنى النمله ومستشفاكن ببنى الحاوى .. وطبعا نحنا ولا هميه .. التعليم يا وجعى عليهو درعتوهو هوى السمساره وتاكلين أمرو على الجوكيه .. مدرسه خاصة .. بشتنة خاصة .. ملعبه خاصة .. لا ميدان لا حصة مكتبة لا فى رياضة ولا جمعية .. فى أوضتين وبرندة مدارس .. فى أوضتين وبرندة كوارس .. جيل الغد ياسيادة الوالى لا تاريخ لا عندو هوية .. الطابور أحساس بالذات .. الطابور تصحيح للفات . الطابور وإذاعة المدرسه يا دكتور تكوين شخصيه .. دام رصاص عسكورك غنى .. كل ما يوم قانصلو وليه .. اسم الشارع ودفع الدية .. ماهن تمنك يا عوضية .. علبة بوهية وخمسه حدايد طرف الشارع يا جوكيه .. امن نحنا صعاليك ساكت ولا تحاكمو عساكر الوالى ولا نجيب التار زنديه .. والدستور البدى حصانة .. انو رصاص الدوله يغنى وكل ما يوم قانصلو وليه .. الا يكون دستور لوليه…
