[email protected] اخي العزيز شوقي البدري صعقني وصفك الدقيق لتصرفاتنا الهمجي في مقالك بسودانيل يوم الاحد الموافق 1/6/2014 بعنوان البشير العناد وقوة الراس وجعلني اتلفت يمين وشمال ذي مروحة التربيزة من هول اكتشاف الحقيقة. أخي العزيز جعلتني اتلفت حولي واحسب كل تصرفاتي وأقارنها بتصرفات اخواننا المصريين ثم ادركت حجم الكارثة التي اقحمنا فية المثقفاتية وناس العادات والتقاليد الذين رسموا لنا شخصية متنرفزة مفرطة في الجدية لدرجة اصبحت مزعجة لصاحبها قبل الاخرين.. يأخي حكاينا بايظه جداً.. انا ادركت بجد انه ينقصنا الكياسة والمقدرة علي كبح النفس ووزن الكلام وكتم الاسرار وعدم كشف مافي عقلنا والتحكم في عواطفنا والمقدرة علي الاعتزار والعفو عند المقدرة والاطلاع والاطلاع ثم الاطلاع.. بعدين حكاية الاطلاع دي حكاية تانية براها .. يأخي نحن عنطزتنا في الفاضي ساكت.. يا جماعة حملة شهادة الدكتورة في مختلف العلوم في مصر يفوقون سكان جنوب السودان الثمانية 8 مليون وبعدين الثمانية 8 مليون بتاع الجنوب ديل ذاتم مستفنهم بنظام بديع في حي شبرا مويه ونور وصرف صحي وتعليم ومترو انفاق اخر حلاوة. ونحن ماشاء الله موقفين الدنيا برجل واحد حروب ومجاعات وملاريات كوليرات حكاية.. ياخي الناس ديل شقوا الواطة ما خلوا مكان تخيل نفق عابدين يدخلك وسط البلد اربعة كيلو متر اتجاهين ذهاب واياب العربية تجري بسرعة ستين كيلو تحت الارض .. ابداع .. ابدااااع!!! يعني الشيخ الجليل متولي الشعراوي كان صادقاً في قوله مصر هي التي صدرت العالم والعلماء الي الوطن العربي. يا ود عمي شوقي الشئ الذي غمني واحزنني كثيراً ان الفرح غاب عننا وإندثر بالله احضر ليك حفلة سودانية سوف تشاهد الرجال متمحنيين بيستمعوا للفنان بيغني كأنهم في بيت بكاء والفنان بيبكي وينوح .. حرام والله حرام .. جديه زيادة عن اللزوم أونطه ساكت. بقينا فالحين بس في الحرب والضرب والدشمان والموت والدمار في حين غيرنا بيصنعوا البسمة لانفسهم بالافراح والرقص والمسلسلات والافلام.. بعدين قصة ضيق الاخلاق دي بينطبق علي السودانيين جميعاً ربنا يطول عمرك يا اخوي شوقي البدري والاوضاع تهداء كده وتسجل زيارة لاولاد عمك الجيرانكم ديل علشان تشوف العجب العجايب.. ديل مش بيكوا البحر في صرتو .. ديل بيكوا البحر في عينه عديل كده ويجعلوه عميان .. يسهل الله تمشي وتجي تحكي لينا أيه الشفته عندهم .. يا جماعة محتاجين شوية محبة ظاهرة لبعض ودعابة وطرفة وفرح .. افرحوا علشان الدنيا تفرح ليكم .. صدقوني مصرصرين وشنا ده كده لمن يوم يقع مننا.. وله كيف يا ود عمي شوقي.. يعطيك العافية ولأسرة عمنا الكبير البدري العلم والازدهار. عاش كفاح شعبنا البطل.
