ايهاب اباسعيد بمشاركة الشاب ياسين ( صوت الشارع ) صوت الشارع ده بينادي بينادي لي و ليك ارفع رأسك يا سوداني بإخوانا الصوت ده وين؟ صوت الشارع ده بينادي بينادي لي و ليك اطلع يلا يا سوداني أنا صوت الشارع صوت الميدان صوت ود الحلة. صوت بت الجيران صوت الصحافة و الكلاكلة و امبدا صوت نمرة 2 و الصافية و العودة صوت المسلمين و المسحيين إهلنا صوت الشرق والغرب والجنوب الفصلوه بدمنا صوت الشمال و أهلهم الطيبين صوت السودان الملان حب حنين صوت حرية سلام و عدالة الثورة خيار الشعب ما ينكسر استحالة صوت شباب الصرخوا قرفنا بالجد شباب من اجل التغير و معانا كلمة حق صوت العسكر و الشرطة الشرفا الولاهم للوطن ما الكيزان الخونة صوت الداعي لله. العن كل الكيزان صوت الشعب يريد إسقاط النظام ………………. اسمع هوي يا خاين شعبك نحن الشعب إلينا حدود نحن الشعب الساعة يطلع لا بتمنعنا جيوش لا قيود نحن رجال شلناهم قبلك اسال مننا جيش عبود واسال مننا امن نميري وكيف في الحارة بنبقي جنود نحن الفينا صلاح سنهوري والف صلاح جاهزين للموت لا بترهبنا جيوش الدنيا لا برهبنا كلاش لا بوت لا بنتراجع عن احلامنا انو نظام القتلة يفوت انو السرقو عرقنا وزادنا باكر يطلعوا بالشلوت ………………. انا صوت الأيتام. صوت اولادالشوارع صوت الشهداء برصاص امن غادر صوت ست الشاي صوت سواق الركشة البيوتهم من الطين والتراب هو الفرشه صوت مريض بيستنجد بطبيب و هو تعبان مالاقي حق الدوا ولا حق الموت كمان صوت خريج الجامعة المالاقي وظيفة ما عندك واسطة الهجرة هي الًوسيلة انا السوط …….البيقطع العنصرية سوط ضد الظلم القهر و المحسوبية سوط ضد الفساد والرشاوي في الحكومة مليارات في الكروش وافلاس في المايقوما سوط للفرطوا في وحدة البلاد فتنوا اهلها من إخوان لاعدا سوط للقائل السودان ده ميراثهم من أصغر كوز فيهم لأكبر راسهم.
