السلام عليكم ورحمة الله ايها الشرفاء الأحرار أحييكم تحية الحرية والنضال انا الفنان والشاعر احمد عبد الله البنا احمد الفرجوني اعلن مساندتي وانضماني للعصيان. ويللا يا كيزان حجوركم نحن بالجد والصراحة كله كله ما بندوركم يعلم الله من حضوركم جا الفساد داخل معاكم يشبه الدجال ظهوركم جيتوا بالكضب المدبّج بالحقايب فوق ضهوركم يللا يا كيزان جحوركم جيتو بي فقه التمكن والتحلل ومن قصوركم ظنكم بتغشوا الله تخسأوا ويخسأ غروركم يللا يا كيزان جحوركم جُرتوا قايلين الليالي ما بتدور يوم تجوركم من مقاصد الدين مرقتو وعشتوا بالتلفيق وزوركم يللا يا كيزان جحوركم في الأذى اتعديتو طوركم ونتّن الجو من بخوركم الفساد بالغتو فيه وبيه متزايد عبوركم يللا يا كيزان جحوركم الكمش زي الحوامل داخلة في تاسع شهوركم غايته رب الناس يساعد خلوا داية الحي تزوركم يللا يا كيزان جحوركم من صريح مال اليتامى بالنهب عليتوا دُوركم وبالزكاة وحق المساكين مترفات بالزيف قصوركم يللا يا كيزان جحوركم يا الاذيتو الدين أذية ويا النسيتوا ضلام قبوركم خادعتكم وانخدعتو وعشعش البوم في وكوركم يللا يا كيزان جحوركم يا النهبتوا خزاين الله وسقتوا للنسوان مهوركم سوقوا نسوانكم تلاتات واربعات تفضح اموركم يللا يا كيزان جحوركم غايتو بديكم نصيحة خافوا من عاقبة فجوركم اركبوا الطايرات وسافروا قبل ما الزايرات تزوركم يللا يا كيزان جحوركم في انتظاركم غايته حاجتين قلبوهن شوفوا شوركم المحاكم والقضايا ولا غربة بلا نهاية فيها عزرائيل يزوركم يللا يا كيزان جحوركم.
