(طيارة جات بي فوق ) للاستاذ هاشم صديق طيارة جات بي فوق يا حاج أنا ……… شاقّه السما المطلوق عارفه البلد ممحوق و ( رادارنا ) دون ( طايوق ) يا حاج أنا ………….. طيارة جات بي فوق يا حاج أنا اتْضَرّعت واتبخترت زي ( جقهّ ) خاشّه السوق يا حاج أنا …………. جايانا من ( صهيون ) يا حاج أنا تتحدي زي ما يكون وأصلو البلد ممكون سكن الطشاش في عيون حِس الوطن معدوم الا الهوان مضمون يا حاج أنا ………….. طيارة جات بي فوق يا حاج أنا لا ( والي ) شاف لا ديش ومدفعنا كان ملفوف بردان وجوه الخيش يا حاج أنا ……….. جات خاشّه دون تصديق لا رخصه لا تفتيش سواقا ما اتكلم لا حيّا لا سلّم لا حتي قال معليش والناس هموم في هموم مشغولة بس بالعيش وضيق الحشا المحروق ما صنقعت لي فوق يا حاج أنا …………. ………… طيارة جات بي فوق يا حاج أنا عيونها كشافات صواريخها هدّامات خَشّت علي الخرطوم والناس نعاس للنوم كسرت علي اليرموك اتفجّر المصنع والصوت دوي وفرقع . الناس جرت حافية لا فاهمه لا شايفه بس من جحيم خايفه يا حاج أنا ……….. ناس جرت لابسه وناس باللخمه كان جاريه ما حاسه ما لابسه لو في الكراع شبشب لا حتي أي هدوم بس الصراخ مطلوق واتشقق الحلقوم يا حاج أنا …………. الناس تقول - يا ناس ( الصاخّه ) جات بي ليل جاتنا القيامة تقوم . اتطايرن دانات واطاقشت عربات و اتفرتقت ( قعدات ) واتكسّرت ( كاسات ) . السرة ( بت تمانين ) في ( الجكّة ) ( بت عشرين ) وادريس وليد مرسال كان بمشي بالعكاز أصبح بطل جمباز طار فوق ونطّ السور سبق الجموع جاري زي التقول ( هايس ) دايس علي البنزين ………….. ناساً تقع بالخوف وفي ثانية تاني تقوم طارت سقوف وقعت واتهدّ واتكوّم بي ( دانه ) ( سوق بعشوم ) يا حاج أنا …………. ………… طيارة جات بي فوق خشّت سمانا تحوم كسرت علي اليرموك حرقت حشا الخرطوم بعد الرغيف والسوق واللقمه ما بتحوق صبح الهوان مطلوق ( اسرائيل ) هنا يا حاج أنا …………. الله ليك من مغسة اليرموك يا حاج عطا والله ليّا كمان من كضبة الوالي يا حاج أنا ، صرح وقال للناس - ( الوضع ما مقلق ) و ( الحاله حسه تمام ) - أصلو الحريق يا ناس شرارة جات طايرة من مكنه نارا ( لحام ) وحسه الأمور ( هدأت ) والجو ( نسيم ) وسلام ما تصدٌّقو العُملا والخونه في الاعلام . طيارة كيف يعني تدخل سمانا تحوم ؟! وتجينا من من بره لامن تصل ( خرطوم ) ؟! وتضرب كمان صاروخ في المصنع المعلوم لمّا الحديد بالنار أصبح كمان ( لكُوم ) ؟! ………….. - اهمال وبس حنشوف ونلقي دليل ………….. عامل لحام مهمل ( يلحم ) في ( نص الليل ) ؟!! يمكن ( عميل ) مدسوس زرعوه جّوه الحوش أو يمكن التحقيق يلقاهو زول مهبوش راكب ( حمار النوم ) . …………… يا حاج أنا خلي الهوان والسوق شوف الضمير ممحوق و ( حبل الكضب مطلوق ) زمن الصِدِق مسروق …………… كنا العُزاز ما ( نُوق ) وكت الحقارة نثور الدم يفور في عروق . حسه البلد مفتوح وبقت الكرامة جروح ووش الخجل محروق ياحاج أنا ………….. …………. ( في الجو طيارات ) ( اسرائيل ) هنا يا حاج أنا ………… في بحرنا ( مدمرات ) ( ايران ) هنا يا حاج أنا …………. ………… طيارة جات بي فوق خشت علي الخرتوم كتلت ( جداد ) التوم ………… الله ليك يا حاج عطا والله لي يا حاج أنا …………. ليمون سقايتو عشيه والمويه لا ملقيّه لا محرية ………… مقطوعه من صبحية يا حاج أنا . 29/11/2012
