العتب مرفوع هيثم كابو (نيمار) في خطر ..!! * وكل الأنظار تتجه مساء اليوم نحو أستاد "كورينثيانز" بمدينة ساو باولو البرازيلية بغية الإستمتاع بإزاحة الستار عن فعاليات مونديال 2014. * يخوض المنتخب البرازيلي صاحب الأرض مباراة ليست بالسهلة أمام كرواتيا التي تسعى للإعلان عن نفسها، وإن كان السودانيون قد عرفوا منذ مونديال 1950 الذي ظفرت به أوروجواي على أرض السامبا بحبهم للبرازيل وإنحيازهم السافر لنجومها ، فأن مدرب الهلال البرازيلي كامبوس قد لعب دوراً كبيراً في كراهية السودانيين للبرازيل وجميع دول امريكا اللاتينية . * ما يفعله كمبسة في كرة القدم لا علاقة له بالبرازيل من قريب او بعيد ..! * يا جماعة مدرب منتخب البرازيل (سكولاري) بقرأ الكورة (زي الحضرا امبارح) وفعلاً (بطن البرازيل بطرانة). * طبعاً .. خليفة علي حس علاقتو بكامبوس الليلة بموت موت مع البرازيل . * يا (هاليفا) ما تتعب نفسك ساي لانو كورة كامبوس دي ذاتا ما عندها علاقة لا بالبرازيل لا جزيرة الفيل ..! * هسع جزيرة الفيل ذنبها شنو .. (كيف يا خليفة ..للقافية أحكام)..! * غايتو يا خليفة (الإتكسرت في "فيتا" تجبر في "كرواتيا")..! * انتو يا خليفة بتتفرجوا ساي ولا بتستفيدوا ..؟ * النصيحة بنقولا ..بكري المدينة فائدته من مشاهدة المباريات العالمية ظاهره في رأسه ..! * (بجري) المدينة حالق زي (نيمار) عشان يقول للناس (اطمئنوا الكرة في الرأس)..! * نيمار ربنا يحفظه من (جري بكري)..! * الليلة نيمار لو ما عمل حاجة بيكون تقليد بكري المدينه لحلاقته أثر عليه ..! * يا بكري .. عليك الله خلي (الود نيما) دا في حاله ..(نيمار دا شايل هموم بلد)..! * البرازيل اليومين دي مولعة مظاهرات وإحتجاجات وإضرابات (ولو نيمار دا خت الكورة من بدري في الشبكة ..تاني مافي شافع برازيلي بولع ليهو لستك في الشارع)..! * الحكومة البرازيلية منتظره يوم الليلة علي أحر من الجمر (ولو نيمار عملا ،تاني لا مظهارات في ساو باولو لا ناس طالعة ..وحتى نحنا في الخرطوم حننسى قصة الموية القاطعة)..! * يا ربي عجوز الوصايفة سيرجو حاضر كاس العالم وين ..؟ * تعرف يا خليفة ناس سيرجيو ديل المبوظين سمعة البرازيل .. الواحد يتجاوز الخمسين سنة وعايز يلعب كرة ..(شوف ناس نيمار ديل اولاد لسه براعم.. وإن شاء الله بعد كُبر السن زولكم دا يكون لعبو طاعم)..! * (طاعم) في السن ..! * غايتو يا خليفة ..بسيرجيو وكمبسة انتهيتوا من البرازيل ..(عمليتكم دي كرواتي ما بعملا)..! * البرازيل الفيها كامبوس وسيرجيو دا طرفنا منها ..(المرة دي بنموت موت مع ميسي)..! * ميسي دا يا خليفة (رونالدو الكبير) قال أنو ما محتاج يفوز بكأس العالم عشان يكون أحسن لاعب في العالم ..(وسمحة المهلة.. وحقو انت تكلم الطاهر سادومبا وتنسوا قصة الكرة دي وتشوفوا ليك شغلة)..! * الكرة يا خليفة (ما لعب) ..الكرة (علم) وبقوا يدرسوها في المدارس ..! * تعرف يا خليفة البرتو سيليوني وزير التعليم في الأرجنتين قال أنهم حيببثوا مباريات بطولة كأس العالم التي يخوضها منتخب بلاده بقيادة الساحر ليونيل ميسي داخل المدارس وأثناء الحصص الدراسية ..(يعني لو ما حضرت قون لميسي إحتمال تعيد سنة وراء سنة لحدي المونديال الجاي)..! * هسه نحنا ممكن نكلم وزير التربية والتعليم عشان يبث مباريات الدوري الممتاز لطلاب مرحلة الأساس بس خايفين يعتبروها (أفلام رعب) ..! * مُرعبين يا أولاد ..! * بصراحة ..أشك في حرص علي جعفر على مشاهدة مباريات المونديال ..(ورجاء لا تسألوني عن الزومة)..! * يا جماعة ..القوا نظرة واخدوا نقلة ..! * يا خليفة ..الناس ديل لو منقطينها وما دايرين يضيعوا زمنهم مع مباريات كأس العالم خليهم الليلة يحضروا حفل الإفتتاح ..(في "كتمة" ظريفة بفنان راب امريكي …ايوه ايوه ..بس نجم الراب بيتبول وفنانة برازيلية مع جنيفر لوبيز صوت بدون صورة). * حفل إفتتاح كارب فاقد بله جابر ..! * بلة معروف بسمع (الحوت) وأضانو نضيفة ..الليلة لو كان في البرازيل كان أستمتع بأغنية (we are one) لكن ما مشكلة نيمار هناك و(كلنا واحد)..! نقوش متفرقة * طالما أن لجنة تسيير عطا المنان عاجزة عن التسجيل فالأكرم لها وللوصايفة حزم حقائب الرحيل ..! * كلام الحاج عطا المنان دا يا الرشيد كلام ناس ما عندهم ليكم قروش ..(وانتو فلس وكامبوس صعبة عليكم)..! * يا عطا المنان ..(الناس ديل بدون قروش يوم واحد ما بصبروا عليك ..حقو تتخارج واسمع كلامنا دا ما بتندم)..! * يا الرشيد ..الله يصبركم فلس شديد ..! * إتفلسي نقش أخير * يا (فلس) كل القبيلة تلجمو يكسر قناعتها ويفر يسكن مع البدو في الخلا وما يرضى غير الريح تجادلو وتقنعو ..!
