…و…. محمد عبد الماجد جمعة (سيرجيو) . …و . ممكن سيرجيو دا يعمل ليه (جمعة). . اصلو الايام دي ..اي واحد يثور كدا بعمل ليه (جمعة). . (المصريين) ديل قالوا ليك كل تلاتة ايام بعملوا ليهم (جمعة). . ومرات الاسبوع بطلع معاهم ب (7) جمع. . عشان كدا الحياة اتوقفت في مصر بسبب (جمعاتهم) الكتيرة دي. . اذا كان اي يوم عندهم (جمعة) ح يشتغلوا كيف؟. . و…. . (وشنو تاني؟). . و . الليلة جمعة سيرجيو ..يعني سيرجيو دا يجيب لينا قونو ..ويسكت الناس ..والانتقادات الكتيرة التى اصبحت توجه على اللاعب البرازيلي. . الناس خلوا الحكومة وبقوا يهاجموا ليك في (سيرجيو). . تقول (سيرجيو) زاد السكر. . زي كأن سيرجيو دا هو (القفل) البلف. . او كأنو هو الحول المواقف. . فلاحتكم بس في (سيرجيو). . نحن في الاول انتظرناه يجيب ليه قون في التمرين .. قلنا الباقي بنتمو ليه (ضرب في الانكل). . ناس المريخ ديل جابوا ليهم (كأس) والدنيا مضلمة ، قبل ما الكهربة تدخل الخرطوم..عملوا لينا (الكأس) بطولات جوية محمولة جوا. . انتوا كأس مانديلا دا وزعتوه على خمسة. . يعني جبتوا منو جزء من القاهرة. . وجزء من اكرا. . وجزء جوهانسبرج. . وجزء من اديس ابابا. . وجيتوا هنا عملتوه لينا (بطولات محمولة جوا). . سويتوه لينا (بطولات محمولة جوا) مرة واحدة كدا. . حكايتكم دي زي (الشافع) البكون حريف ترسلو امو للجيران ..تقول ليه امشي جيب ليك (شطة). . الشافع يمشي للجيران عشان يجيب (الشطة)..يدوه الشطة يقول ليهم الحاجة قالت ليكم لو عندكم مع (الشطة) كسرة اودنا ليها. . يدوه الكسرة. . الشافع يقول ليهم لو عندكم مع (الكسرة) سكر ادونا ليه. . يدوه السكر. . الشافع يقول ليهم امي قالت لي ما تجيب السكر بدون الشاي. . يدوه الشاي. . الشافع يقول ليهم : الشاي عاوز ليه بسكويت. . يدوه البسكويت. . المهم الموضوع يجر لمن يصل حد ان يقول ليهم (الشافع) دقيقة النمشي اجيب لي سلك عشان نجر منكم (كهربة). . ثم يستأذن الشافع وهو في قمة لادب من ناس البيت عشان يمشي يجيب ليه (ركشة) يشيل الحاجات دي. . هسع بطولات المريخ المحمولة جوا بدأت من (الشطة) ووصلت حتى ان يجروا سلك من الجيران. . و… . (اكمل). . الليلة عاوزين ندعم (سيرجيو). . الزول دا اتعرض لهجوم عنيف ..الناس كلها خلت شغلتها وقبلت على (سيرجيو). . الهلالاب ذاتهم ما ريحوه. . خلوا بلة جابر وبقوا يهاجموا ليك في سيرجيو. . الهلالاب انشغلوا في رقبتهم. . مباراة اليوم امام فيتا كلوب ..يجب ألا ننظر لها على انها مباراة بين سيرجيو وفيتا كلوب. . لو اختصرنا الموضوع في الحكاية دي – يبقى نحن بنغلب في الهلال. . ومفروض ما تلوموا إلّا نفسكم. . مباراة اليوم ..هي ليست مباراة كامبوس وحده. . المباراة ليست هي كامبوس ضد فيتا كلوب. . المباراة اليوم – هي مباراة حقتنا نحن كلنا. . اي زول مشارك اصيل في مباراة اليوم ..حتى الذين يبتعدون عن استاد الخرطوم الف كيلومتر. . دعواتكم يمكن ان تصل للهلال. . بل ان دعواتكم يمكن ان تكون حاضرة اكثر من المساندة والتشجيع الذي يمكن ان يكون من جمهور الهلال اليوم في الاستاد. . النوايا الصادقة …هي طريقنا للانتصار اليوم. . حملة شرسة تعرض لها من قبل مدرب الهلال السابق نصرالدين النابي الذي اجبر على ان يقدم استقالته فرارا من هذا النقد الذي كان يوجه له. . حتى اذا استقال النابي ورحل عن الهلال عاد الناس يتحدثون عن محاسنه ويتحسرون على فقده. . الان نحن نطبق نفس الشيء مع كامبوس. . نهاجم كامبوس بصورة عنيفة …لنفقده كما فقدنا النابي ثم نعود لنتحسر على فقده. . هذه ثقافة جديدة على الهلال واسلوب حديث ظهر اخيرا في الهلال بعد ان كان سايد في المريخ. . بقى عندنا رأي في اي مدرب. . خلقنا رأي سالب عن كامبوس ..وعن سيرجيو ..واصبح نجاحهم مرفوض عندنا. . وحقيقة الامر ان نجاح كامبوس وسيرجيو صعب في ظل هذه الظروف والضغوط التى يتعرضوا لها. . كامبوس اسم كبير في عالم التدريب ..والدليل على ذلك انه مطلوب الان من اهلي القرن ومطلوب كذلك من الزمالك. . ولكامبوس الحق ان يفاوض نادي اخر اذا كان الهلال قد تعاقد معه لمدة (6) شهور فقط. . رئيس الهلال نفسه قال انه سوف يرحل عن الهلال ولن يترشح بعد ان تنتهي فترة تكليفه. . وكامبوس ليس هو (هلاليا) اكثر من الحاج عطا المنان ..لذلك لومه والهجوم عليه لأن يفاوض في نادي اخر امر غير مقبول من الهلالاب. . في ظل هذه الظروف التى يتعرض لها كامبوس والضغوط الكبيرة التى تشعره انه غير مرغوب فيه يبقى من الطبيعي ان يبحث عن نادي اخر. . لوائح لاحتراف تمنحه هذا الحق. . لذلك نقول ان الهجوم على كامبوس غير مبرر وغير مقبول وخلق رأي عام ضد المدرب امر يضر الهلال حتى وان كان ذلك المدرب غير جيد. . كامبوس اليوم قادر ان شاءالله على الانتصار. . كما ان سيرجيو قادر باذن الله وتوفيقه على التسجيل ..ليرد على كل الذين شككوا فيه. . واول اولئك الذين شككوه فيه …نحن. . نتمنى التوفيق لكامبوس. . والتوفيق لسيرجيو. . ولن يكون ذلك إلا عبر المساندة والتشجيع. . والهلال سوف ينتصر بأذن الله ..لا نخاف على الهلال ولا نخشي عليه. . قادر اليوم ان يقدم عرض رائع اخر ..وان ينتصر انتصارا يجعله يحصد النقاط الثلاث ويتصدر مجموعته. . و…. . في حرف جر وإلا حرف كر. . الواحد بقى ما عارف. . يا زول ما تلخبط. . اللخبطة وين؟. . احسن اطلع. . و… . انتهى.
