سودارس :

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

كورة سودانية نشر في كورة سودانية يوم 14 - 08 - 2014

محمد عبد الماجد
…و…
استاد الابيض شاف (نطيط) بكري المدينة قال انا لا جاهز ولا حاجة
نحن قربنا نعملها.
بدل الابيض عروس الرمال كنا ح نقول الابيض عروس الهلال.
السيرة كانت ح تجي من الابيض.
البص بقوم واحدة.
والعريس اتأخر شوية.
ناس الابيض عروفها.
عرفوا ليك الهلال ناوي على (فرتكة) داخلية للمريخ – قاموا قالوا لينا
المريخ دا امشوا فرتكوه بعيد مننا.
ناس الابيض ما بستحملوا (الفرتكة) دي للمريخ.
وليمون بارا – هو ذاتو ما بقبل (البشتنة) للمريخ.
احسن تتبشتنوا قبلكم في خرطومكم دي.
ما في داعي لفضائح دي في الاقاليم.
بعدين لو في لاعب من المريخ شال الكورة – في الابيض ح يمشي وين يعني؟.
ناس الابيض شيل الكورة عندهم عيب.
هنا في الخرطوم تشيلوا الكورة – ما تجيبوها راجعة – ما في زول بسألكم.
ما في زول بقول ليكم حاجة.
لكن في الابيض ما برحموكم.
عشان ناس المريخ ديل ما يقعدوا يتجرسوا فينا ساكت – ويقولوا لينا
(الغربة) حارة – ونحن ما بنستحمل..وما بنقدر على البعاد…الاتحاد قرر
يجيب المباراة الخرطوم.
جبناهم في خرطومهم دي.
اها يا ناس المريخ…بعد كدا ح تقولوا شنو؟.
ح تتعذروا بي ايه؟.
حيلكم كلها كملناها ليكم.
وصلناها ليكم حدها.
كملنا ليهم فهمهم.
ما عاوزين نتكلم ليكم عن (هدايا) علي جعفر.
او علي هدايا.
علي جعفر يتألق (85) دقيقة ..ويخربها ليك في اخر (5) دقائق.
يعني ما في اي فايدة.
علي جعفر دا – زي الدكتور البتمشي ليه ..يقول ليك والله انت ما عندك اي
حاجة – الرأس كويس – الدم كويس – الرئة كويسة – وظائف الكلي تمام – ما
عندك اي مشكلة بس اعمل لي رسم للقلب.
يندمك على اليوم الجابك ليه.
يا علي جعفر الاخطاء البتعمل فيها دي لو عملتها قدام ناس بكري المدينة
ديل ح تشرب ما بتروى.
ما تشوف (الضحك) البضحكوه معاك ناس بكري ديل.
ناس صلاح الجزولي ديل اوعك تصدقهم – ديل غدارين.
الغلطة عندهم بي قون.
لا بجاملوك – ولا بسامحوا في الحاجات دي.
ولا بفوتوها ليك.
ولا بكضبوا.
تقعد (تشهق) ليهم كدا بشرطوا شبكتكم.
الشهقة عندهم بي قون.
كل شهقة بي قون.
عشان كدا احسن يا اخوي من بدري تشوف ليك حل لي (شهقتك) دي.
ما تقعد تشهق فينا كدا – زي الزول الضارب ليه كيلو جبنة في نص النهار.
و…
(اكمل).
ما عاوزين نتكلم ليكم يا مريخاب عن خسارة المنتخب امس في نيجيريا 1-
3…عشان ما نعقدكم ساكت عن علي جعفر.
علي جعفر دا نحن بنفتش ليه تفتيش.
كايسنو كواسة.
دا لاعب عبارة عن مجموعة من (الاخطاء).
او مجموعة من (الهدايا).
ولا عاوزين نجيب ليكم سيرة لاهداف بكري المدينة وصلاح الجزولي في
نيجيريا والسودان على التوالي يا مريخاب.
نحن نسينا الموضوع دا.
نحن نسينا الكلام دا.
ما عاوزين نقول ليكم ديل سجلوا اهداف في منتخب نيجيريا في (جمال سالم)
ح يعملوا شنو؟.
جمال سالم دا كمان متل قفص البرتقال.
وبكري المدينة جنو وجن البرتقال.
بسامح في اي حاجة.
إلّا البرتقال.
إلّا البرتقال يا جمال سالم.
ما عاوزين نقول ليكم كلام بالشكل دا…(عارفنكم الشفقة كاتلاكم).
متوكل أحمد علي يشيل وينتف في (السلك).
فاكر نتف السلك بمرقو من بكري المدينة.
بكري المدينة (نتف) السلك ما بثبتو.
ولا بشتغل ليكم بالموضوع دا.
انسوا بكري المدينة عشان (الخوفة) تطلع منكم شوية.
ح ننسى بكري المدينة وهدفو في نيجيريا.
صلاح الجزولي الشباح وهدفو في مباراة الاياب.
صفحة المنتخب ح نعتبرها اتقلبت.
لكن الحاجة الما بنقدر نتجاوزها ليكم – حكاية تحويل مباراة القمة في
نهائي كأس السودان الى استاد الخرطوم.
دي وقعت ليكم يا مريخاب.
دي فهمتوها.
استاد الابيض شاف ليك (النطيط) البعمل فيه بكري المدينة والجري البجريه
(ما شاءالله) – استاد الابيض طوالي قال انا ما جاهز للنطيط دا.
شن قدرو على الحاجات دي؟.
الاتحاد المحلي في الابيض ولا كضب.
ولا جاملوا.
عرفوا ليك (النجيلة) دي ما بتنستر امام بكري المدينة.
اصلو الايامات دي (بكري المدينة) شغال زي الترزي يوم الوقفة ما شاءالله عليه.
ينزل ويطلع بالباكات.
الباك من الجري بقى زي بدال العجلة.
نفسو بقطع من اول (5) دقائق.
الباك برميل موية ما برويه من (الجري) البجريه بيه (بكري المدينة).
وصلاح الجزولي بتم ليك الناقصة.
اذا الاستاد قال ما بستحمل حاجات زي دي.
النجيلة (فترت).
ناس علي جعفر ديل يعملوا شنو؟.
الابيض عرفتها.
احسن ليكم يا ناس المريخ اتخارجوا من بدري – شوفوا ليكم بلد.
الشغل دا كبير عليكم.
استاد الخرطوم ما بستركم.
بعدين جمال سالم عندو مشكلة معروفة مع (النجيل الصناعي).
ما بعرف يلعب في النجيل الصناعي.
وضفر عندو (عقدة) من استاد الخرطوم.
قدر ما يلعب في استاد الخرطوم امام الهلال – ضفر بنضرب.
وعلي جعفر الفيه اتعرفت.
وبشه جاهز.
محمد عبدالرحمن جاهز.
مهند الطاهر جاهز.
كاريكا جاهز.
وامير كمال من هسع قاعد يشكي من (وجع الرأس).
انتوا تعالوا هنا.
هسع الكلام دا فيه حاجة بتخص الحكومة.
ولا كلمة.
ما تقعدوا تتلفتوا ساكت.
و…
وانتهى.

انقر هنا لقراءة الخبر من مصدره.