العتب مرفوع هيثم كابو (كابو) فقد أعصابو .. !! * إن كانت كلمة (كابو) إيطالية الأصل وتعني القائد أو الزعيم، فإن (كابو سكورب) الأنغولي عرف بالاسم من هو (النادي القائد) الذي يستحق كل الألقاب والتبجيل والتعظيم ..! * إن كان لقب (كابو) يجمعنا بالفريق الأنغولي، فلا رغبة لنا في اللقب و(البركة في أخوان رمضان عجب) ..! * (كابو) أمس أولادنا مجننو ..و(اللقب) يا مزمل (دا طرفنا منو) ..! * الأنغولي دخل مباراة الأمس بحماس زائد، ليسيطر المريخ على الملعب، وسرعان ما فقد (كابو) تركيزو أعصابو ..! * انتصرنا أمس بهدفين نظيفين وكان بإمكاننا الخروج منتصرين بخمسة أهداف كأفضل رد على لجان التربص والاستهداف ..! * اللجان التي تستهدف المريخ الرد عليها بالانتصارات ..و(يلا نواصل المشوار ونخرس الشمات، وخلونا من وصايفة النجيهة الما بعرفوا الجيهة) ..! * رسم الصفوة أمس لوحة تلاقي باذخة الجمال، و(حقيقي الجمهور العظيم دائماً ما يساند الأندية الأبطال) ..! * قدم الصفوة ملحمة للتاريخ و(نأمل أن يكون أخواننا الوصايفة اخدوا نقلة من صفوة المريخ) ..! * إهدار ركلات جزاء اشكالية حقيقية ينبغي أن يضع لها الجهاز الفني الحد، فأمس أضاع وانغا ومن قبله أوكرا ..و(يا غارزيتو دي حكاية خطرة) ..! * (كابو) فقد بالأمس أعصابو ..! * كملنا الحصة الأولى خلاص : وضربنا (كابو) حتى استغاث .. !! * رغم أن اسمه الأول (كابو) فإن (سكورب) الأنغولي لم يجد منا أدنى تعاطف، وكان أمس موعده الأول مع الإعدام وبدأية مشوار اللحاق بركب (عزام) ..! * يا عزيزي مزمل : كل الجماهير الحمراء حرصت أمس على المشاركة في يوم الضرب المبرح لكابو (الفريق) و(كل الصفوة كانوا خلف الزعيم في ملحمة العبور من الخرطوم، ولا عزاء للأعداء و((المندسين)) والخصوم) ..! * إذا كان اسم الفريق الأنغولي (كابو)، فأمس لم يكن يوم كابو الفريق و(الحبيب يقول للمندس، والعدو يكلم الصديق) ..! * جمهورنا جا من بدري .. وهتافنا كان عالي .. ثنائية (لا فيها شق لا طق) ..و(يلا نكتر الضبائح قبل السفر و(كابو) يحصل عزام و(يعمل رايح) ..! * (السفرة) والضبيحة متباريات ..! * الضبائح جهجهت (الكبسوراب)، ونحنا حسمنا الجولة الأولى، و(بعد كدا نشوف فرقعة الانسحاب) ..! * أجمل مافي مباراة الأمس اللوحة الزاهية التي رسمها الجمهور .. أمس الناس اتلاقت في المقصورة والجانبية والمدرجات الشعبية وطابق شاخور والصفوة قطعوا من القلعة (تذاكر العبور) ..! * خلونا يا صفوة بعد كدا نركز مع كورة الإياب ..و(سيبونا من دوشة بتاعين الانسحاب) ..! * دايرين نضرب الأنغوليين و(العاملين فيها "منسحبين") ..! * جبنا قونين من بدري ..(قطعنا نصف المشوار، وينتظرنا في لواندا لقاء ما ساهل، وأجمل حاجة أننا أمس ضربنا كابويات الداخل) ..! * يا مزمل : ضربنا الأنغولي الجاي فاقد أعصابو و(انتهينا من جماعة الخرطوم الواقفين مع كابو) ..! * (كابو) مين والصفوة متجمعين .. ! * ضربنا الأنغولي بقونين وربنا أنقذ كابو بضياع اكتر من قون .. و(من لواندا العبور مضمون) .! * من الليلة دايرين نفتح ملف الإياب، ونرفع ضغط (ناس الانسحاب) ..! * الصفوة شجعوا علي مدار الشوطين، وطلعوا منصورين ..! * قون ضفر الأول زادنا لخطف بطاقة العبور، و(قون كوفي التاني حرقنا بيهو قلب كبسور) ..! * قلب كبسور ما نضيف ..و(يا صفوة أبقوا الصمود ما تبقوا وصيف) ..! * رد الزعيم أمس على قرارات الاستهداف واخرس المترصدين، و(اتنين كابو) هدية للكباسرة المنسحبين ..! * الزعيم غلب اتنين الكباسرة الليلة لاعبين ولا منسحبين ..!؟ * يا محمد عبد الماجد : لو دا فريقكم الانسحاب بفيدكم ..!! * أمير وعلاء الدين كانا صمام أمان ..و(الكورة المنظمة بتبدأ من الخلف والهجمات بتجي بالصف) ..! * ملصة حارس كابو لكورة أيمن سعيد المعكوسة ذكرتنا جمعة ..(ود ابييي دا وين يا جماعة لينا منو زمن) ..! * تركيز ضفر العالي دفعه لإحراز الهدف الأول بعد أن كان متخصص في أقوان الرأس والإستفادة من المعكوسات و(الزعيم ماشي لواندا يواصل الانتصارات) ..! * استمتعنا بكوفي وحرمنا غارزيتو من أوكرا مع أننا كنا نطمع في رؤية (الثنائية الخطرة) ..! * أثبت رمضان عجب أنه لاعب (بملأ الميدان) وفدائي مستعد لأداء الضريبة الحمراء في أي مكان ..! * جابسون متخصص استخلاص بدون خسائر ..و(العاجبني في كوفي دا أنو سمو فائر) ..! * ما عندنا الليلة كلام كتير ..و(تعالوا بكرة بدري عشان تعرفوا باقي التفاصيل) ..! نقش أخير * بدينا العبور من كورة الذهاب وضربنا كابو وبتاعين الانسحاب
