العتب مرفوع هيثم كابو الترجي طاير والعقرب (سمو فاير) !! * نحمد الله العلي القدير الذي وضع فريق الترجي التونسي في طريقنا حتى نثأر لأخوتنا الوصايفة، ولكننا لا نستطيع أن نعدهم بأن هزيمتنا لعملاق باب سويقة ستصل لخمسة وستة أهداف لأن ما فعله التوانسة بهم – لا قياس عليه – باعتباره أمر غير عادي، و(الهلال معروف كيسو فاضي) .. ! * كيس الهلال جاب للبلد الكلام ..و(الله يجازي الكان السبب في تسجيل الحمام) ..! * حمام خذل الناس وأدهش ترباس .. ! * (تربسة) في الإستاد في تونس خلى الوضع زابط والجو رايق ، ومشى يشرب موية جاء لقى الهلال مضروب خمسة في تلاتة دقائق .. ! * أجمل مافي مقابلة المريخ للترجي أن التوانسة سيدخلون اللقاء وفي أذهانهم النتائج الأسطورية التي حققوها في مبارياتهم مع الهلال، الأمر الذي سيفيد الزعيم كثيراً في النزال .. ! * تقع على عاتق الزعيم إعادة هيبة الكرة السودانية بعد فضائح الهلال المتواصلة مع التوانسة وهزائمه الثقيلة .. و(حقيقي ارشيفكم يخجل يا السودّتوا وش القبيلة) .. ! * تعالوا شوفوا لقاءات الكبار، و(متعوا نفسكم بالزعيم قدام الترجي، ودائماً المريخ بقامة الرهان وبحجم التحدي) .. !! * أكتر حاجة بتزعل الوصايفة (شقلبة العقرب في الميدان وضبيحة الخرفان) ..! * الشقلبة مستمرة و(الضبيحة بنعذبكم بيها مرة مرة) .. ! * الضبيحة بتفك العوارض وبتريح المارد .. ! * ناس محمد عبد الماجد قالوا خايفين علي المريخ .. (كتر خيركم ما بتقصروا .. وانتو لو بتخافوا علي زول كان خفتوا على ترباس الراجل لما سمع خبر الخمسة وقعت من رأسو العمة ودخل في صدمة) .. ! * معليش يا تربسة دا حال الدنيا والهلال .. و(ما تهتموا للأيام ظروف و(ترجي) طبيعة الدنيا زي الموج تجيب وتودي) .. ! * نحنا عندنا ما تهتموا للأيام (خروف وتحدي) .. ! * نحنا دايرين نضرب الترجي عشان ناخد تاركم، و(زعلة كدا من الكوكي بتاعكم) .. ! * أصبح الترجي التونسي الآن من أقوى المرشحين لنيل بطولة الكونفدرالية .. ! * الكونفدرالية التي حقق لقبها الأخير الأهلي المصري لن نبخل بها على الترجي .. ! * لم يقابل الوصايفة فريق حقيقي في مشوارهم الأفريقي حتى الآن ..(ويلا أدخلوا علي الكنغو عشان تعرفوا مستواكم والكونفدرالية محمداكم) ..! * من الصعب على الهلال الوصول لمجموعات الكونفدرالية حتى ولو قابل بعد نزوله من الأبطال فريقاً متواضعاً كالرصاصات الملاوية .. ! * لم نكن نعرف أن الترجي يمثل عقدة للوصايفة لهذه الدرجة حتى رأينا فرحتهم لنبأ مقابلة الزعيم لعملاق باب سويقة .. و(إن كان من تعدونه فريقاً لا يقهر هو ترجي، فنحن مريخ الصمود والتحدي) ..! * سيرة الترجي جهجهتكم .. و(مساكين ربنا يحل عقدتكم) .. ! * الضايق لدغة العقرب بخاف علي الترجي ويتكهرب .. ! * لا بد أن يدرك إعلام الهلال أن المريخ سيضع لفريقهم عقدة الترجي في المنشار .. !! * ونحن في (العقدة) بأس يتجلى .. ! * طبعاً بصراحة كدا يا بكري المدينة (انا معجب بحكاية انو كردنة زعيم أمة الهلال وشايف القصة دي لايقة عليهو وما بلقوا زعيم أحسن منو ) ..! * غايتو زي زعيمكم دا لو عندنا نحنا دائرة كورة ما بدخلا، ولو لقى فرصة ودخل اي قطاع (صمدو بقفل ليهو البلف، وبضبط الصرف) ..! * خلونا من (بلف) عبد الصمد ونرجع ل(مواسير) كردنة ..! * كردنة قال ماشي الفيفا لانتزاع حقوق الهلال، و(بكري المدينة داير يقفل ملف الشكاوي قمة الممتاز أصلوا الود عندو باقي عقربة وشوية شقلبة) ..! * بكري ما زعلان من كلام كردنة، لكن متضايق من تخدير مجلس الهلال للجمهور و(كل يوم شكوى جديدة لكبسور) ..! * البلد دي بقت مليانة إعلانات (علاج بالأعشاب) وتصريحات (تداوي بالشكاوي) ..! * التداوي بالشكاوي مفعولو ما بقطع الزلط، و(حقو تواصلو فيهو عشان ما تفهمونا غلط) ..! * والغلط منك أصلو ما مني .. و(العقربة) دي يوم بتجنني ..! * يا (عقرب) أعمل في سيمبو زي ما انت داير لكن خلي قلبك رحيم وعاين لي الكوكي .. و(تونسي لا تكلميني .. وشقلبة لا تطمني) ..! * ما تزعجوا زعيم أمة الهلال .. (كردنة دا ما فاضي، وجاب أجهزة بتخليكم تلعبوا زي ما انتو دايرين في العالم الافتراضي) ..! * سم العقرب يتسبب في هبوط في التنفس واضطراب في القلب ..(عشان كدا حقو ناس مستشفى القلب يوم السبت يكونوا جاهزين ويزيدوا عدد السراير، لأنو المدينة سمو فاير) ..! * بكري بحسم قضية الشكوى دي صاح الصاح، و(أعملوا حساب السم النقوع اللي البدن نتاح) ..! * لو عندكم مع المدينة أي موضوع تعالوا في قمة الممتاز ..(والحساب ولد) .! * يا (عقرب) الناس ديل ما عندهم (ملسوع) أقصد ما عندهم (موضوع) ..! * الصفوة جاهزين لعبور الترجي والضرب بالعقارب حتى النصر ، حقو تكلمو الصحاف يسعف الجمهور الأزرق ويجهز المصل ..! * نحنا خايفين علي توانسة الداخل من ضرب الزعيم لعملاق بني سويقة ..! * (مصل) يا أخت بلادي يا شقيقة ..! * (العقرب) جاهز لضرب الترجي وبعد الفوز على كابوسكورب التوانسة مضروبين واولادنا (ممصلوين) بإذن الله ..! * قال كردنة من قبل ان الاتحاد متواطئ وقرار لجنة الاستئنافات بخصوص شكوى فريقه ضد المدينة لا يساوي ثمن (الصفر) الذي كُتب به ..! * قلنا ليكم قبل كدا دا الكلام البخلي العقرب يتشقلب ..! * رد (العقرب) على إعلام الكاردينال طالعناه بلوحة بلواندا، و(وحقيقي بكري دا لاعب ما عندو حل، والرد بالمصل) ..! * كردنة قال ماشي (الفيفا) ..(الظاهر أنو زعيم أمة الهلال داير يكمل فترة الرئاسة تصريحات وشكاوي واستئنافات) ..! * يا كبسور ما تخدر الجمهور ..! * هل سبق للوصايفة كسب أية شكوى تقدموا بها للفيفا ؟ ..(أبداً وطبعاً لا .. دائماً الحيثيات معطوبة والشكاوي مضروبة) ..! * أجبروهم على دفع كل مستحقات غارزيتو، ورغم ذلك هناك من يتحدث عن انتصار قانوني حققه الهلال ..(ويا جماعة كلامكم دا ما تقولوه ليه نحنا أحسن توجهوا بيه الكاردينال) ..! * حسمنا كابو وقفلنا كتابو وبقينا ناس ترجي .. و(سمحة المهلة) ..! * قلنا ليكم ما (تندرعوا) في العقرب ..(عشان الود ما يزعل وكلو ربع ساعة يقوم يتشقلب) ..! * أضرب أضرب يا (عقرب) ..!
