الي ان نلتقي قسم خالد علينا جاااااااااي ! خبر اسفل الصحفة الاولى بالزميلة قوون لفت نظري .. لفت نظري لان من كتب الخبر هو الاخ الحبيب خالد عزالدين .. وخالد من عادته لا يكتب خبرا الا ان يكون خبرا صحيحا … الخبر يتحدث عن دلالة كبرى ستقام بنادي المريخ في السادس من مايو المقبل بنادي المريخ .. والمعروض في هذه الدلالة للاسف الشديد منقولات تخص نادى المريخ عبارة عن كراسي فاخرة ومكيفات ومنقولات اخري بسبب تعثر المريخ في سداد ما عليه من ديون تخص احدي الشركات العاملة بنادي المريخ في مجال المنشاءات التي قام بتشييدها ! ازمات المريخ هذه الايام لا تحدها حدود .. فريق الكرة سيواجه الترجي .. والرئيس المحبوب قرر التنحي .. والشركات تحجز علي ممتلكاته .. الغريب في الامر حقيقة ان الاعلام الاحمر لازال يتحدث وينتقد ويقلل من شان السيد الهلال .. اقوليكم يا سلك ان شخصيا حاجز المكيفات .. وانت يا كابو كراسيكم الحمراء دي ما عايزنها .. وانت يا مزمل خلي لي اجهزة الكمبيوتر احتمال الواحد يفكر في تاسيس صحيفة اهو برضو بتنفع رغم انني علي قناعة تامة ان هذه المنقولات 50 مليون ما بجيبا والشركع عايزة 280 الف دولار .. خلونا من السعر الموازي نقول بالسعر العادي في البنك اضربو في 5 جنيها شوفو حاصل الضرب بيكون كم وتعالو نعمل (شيرينق) اصلكم حبايبنا وحرام نتفرج عليكم كدا وحاجتكم بدللو فيها ! خلونا من الشرينق دا رائكم شنو نكلم ليكم الكاردينال وم ال8 مليون دولار المجهزة للجوهرة يديكم منها 280 الف دولار والباقي نحن ناس الهلال بنتمو برااااانا ! يعني بعد الدلالة يا سلك ما ح يكون تاني في مقصورة رئاسية ولا مقصورة ذهبية ولا مقصورة حتي خشبيه .. بس داير اعرف الشاشات مشت وين وليه ما دخلوها في الدلالة؟؟؟ هسي يا كابو لو اشتريت ليك شاشة .. وكلمت طارق تفاحة يشتري معاك كم شاشة يزيد بيهم شاشتو في (تفاحة كافي) مش بتكونو ما قصرتو .. اقوليكم يا كابو ادفعوا حقهم وخلوهم للمريخ اهو بتكونو ساعدتم شوية (وايد لي ايد بتجدع بعيد)! والله يا سلك ويا مزمل وسامر البشوف فصاحتكم يقول غلبتو الترجي 20 صفر وتاهلتو ومشيتو لحدي ما شلتو بطولة دوري الابطال ! ولو خجلانين من الكاردينال والله نكلمو ليكم … اصلو راجل هلالبي اصيل وهو عارف انو المريخ فريق كبير وعايزو يكون كبير طوالي عشان كدا لا يرضيه ولن يرضينا بالطبع ان تباع ممتلكات المريخ في الهواء الطلق ! نحن دايرين المريخ قوي بي مقصورتو وبشاشاتو وبي مكيفاتو عشان لما نغلبو نشعر بالزهو والفخر .. هسي نغلب لينا فريق مكيفات ما عندو ولا اجهزة كمبيوتر ولا كراسي في المقصورة يعني نقعد ليكم في (بنابر) عشان نشوف السيد الهلال نحن يا سادة عايزن المريخ كامل عشان لما نغلبو نكون غلبنا فريق بشبهنا ما فريق كراسي ما عندو ولا مكيفات ما عندو ! معقول بس يا جماعة المريخ الكبير حاجاتو يدللوها في (سوق الله واكبر) مش حرام .. هسي انا بكتب في العمود دا وقاعد ابكي للحالة الوصل ليها المريخ وعارف انو كل ناس الهلال قاعدين يبكو وبجعرو كمان بكا زي ما بكينا يوم مات والي الدين والبابا وعبدالمجيد وكل ابناء الله .. بكينا عشان حال المريخ واهل الهلال بكوا عشان دايرين المريخ قوي زيهم عشان يستمتعو لما يغلبوهو .. من هسي ضيعتو علينا الفرحة والاستمتاع بالفوز الذي سيحققه السيد الهلال علي المريخ في ختام مسابقة دوري سوداني الممتاز ! يعني نفرح لفريق مكيفات ما عندو ولا نفرح لهزيمة فريق كراسي ما عندو .. والله ضيعتو علينا الفرحة والابتهاج زاتو ..! اقوليكم حاجة خلونا من دا كلو لقيتو رئيس ولنسلفكم واحد .. وعشان ما تذعلو مننا نذكركم بان اعظم الروساء عندكم خريج مدرسة السيد الهلال (اوالعائلة) … عارفنو طبعا .. ما تمشوا بعيد الوالي الغالي بتعرفهو زي جوع بطنكم اها قولو ما هلالابي ؟؟؟ اذهبوا فانتم الطلقاء !