بالعربى الكسيح محمد الطيب الأمين الكلام دخل الحوش !! * أهلنا بيقولو : (البيلدي المحن لابد يلولى صغارن) .. * الآن المِحنه الرياضية في السودان (أبوها) هو الإتحاد العام ، و (أمها) المريخ .. * يعنى يا مولانا المريخ يلعب دور (الأم) والاتحاد يلعب دور (الأب) في هذه المِحنه .. * والمريخ (الأم) والاتحاد (الأب) جابو لينا (مِحنه) وعايزننا إحنا (نلولى صغار هذه المِحنه) .. * والله صحى .. * لكن تلقوها عند (الغافل) .. * المِحن (الانجبتُوها دى) شدو حيلكم ولولوها .. * لكن إحنا ما بنلولى لينا مِحن ما حقتنا يا معتصم جعفر .. * وصغار المِحن كتيييييره منها : (لجنة الإستئنافات ولجنة الإنضباط ومحمد سيد احمد والمنتخب الوطني) .. * ديل كلهم يمثلون (مِحن صغيرة) تم إنجابها بواسطة العلاقة غير الشرعية بين المريخ والاتحاد .. * وهى علاقة (المهر) حقها كان (صحن لقيمات) .. * العلاقة الغير شرعية بين المريخ والاتحاد دفعو فيها شاى لبن (سد مال) ودفعو فيها صحن لقيمات (مؤخر صداق) .. * او كما قال رئيس الهلال .. * وأنا والله يؤسفني غاية الاسف ان اقول ان المنتخب الوطنى اصبح (مِحنه) .. * بلغ الهوان بمنتخبنا الوطنى ان يخسر (رايح جاي) أمام يوغندا .. * يوغندا ؟؟ * وهذا ليس إستهتارا بيوغندا وإنما إستهتارا بمنتخبنا الفاشل الذى ما كان له ان يخسر داخل ارضه لولا ان هنالك (شله) لا تعرف معنى الوطن ولا معنى المنتخب .. * بلغ الهوان بمنتخبنا الوطنى ان يخسر بهدفين داخل ارضه امام يوغندا في عهد معتصم جعفر الذى يساعده محمد سيد احمد (الاراقوز) كما اطلق عليه رئيس الهلال .. * حينما تنظر لقيادات الاتحاد حاليا ستجد ألف مبرر لخسارة منتخبنا رايح جاي امام منتخب يوغندا الذى تعلم (أ ب ت في كرة القدم) من السودان .. * قيادات تهمها المصالح ويجمعها حب المال ، فهؤلاء نجحو بدرجة إمتياز في الفشل .. * الذى ينجح في الفشل دون شك لا تنتظر منه خيرا .. * قيادات رغم (الثراء) الذى تتمتع به تفشل في شراء (موية صحه) للاعبين يلعبون بأسم الوطن .. * هم أثرياء وبخلاء في نفس الوقت .. * قيادات لا يهمها المنتخب والدليل انها ظلت تتعامل معه باعتباره (بند للأكل) ووسيلة لتحقيق غايات (خاصة جدا) .. * هم أبعد ما يكونو عن المنتخب الذى (مرمط) سمعة البلد وكل الذى يهمهم مصالحهم الشخصية وتجارتهم ونثرياتهم وسفرياتهم .. * وقد كانت ردة فعل الجمهور بالأمس طبيعيه ومعقولة في ظل هذا الفشل والتواضع .. * طردت الجماهير محمد سيد أحمد وهو يستحق ذلك .. * نتعجب والله كيف سمحت نفس محمد سيد أحمد للحضور إلى الاستاد لمتابعة المباراة .. * لماذا لا يخجل محمد سيد احمد ؟؟ * محمد سيد أحمد الذى يمثل أفشل إتحاد مر على تاريخ بلادنا ، محمد سيد أحمد هو عنوان مختصر يؤكد اننا سجمانين ورمادنين .. * والله إحنا لو ما سجمانين ورمدانين ما بيمثلنا محمد سيد أحمد .. * عملتو شنو للمنتخب عشان تلبسو جلايبكم وتلبسو البِدل والقمصان وتجلسو على المقصورة ؟؟ * عملتو ليهو شنو المنتخب ده ؟؟ * أمثال محمد سيد أحمد يجب ان يتابعو مباريات المنتخب من منازلهم .. * ولكن مشكلة محمد سيد أحمد يظن انه (أرجل راجل) في البلد .. * هكذا يظن .. * شايفو نفسو حافظ القانون ومكمل الرجاله .. * وده كضب ساى .. * امبارح طردوهو من الاستاد زيو وزى اى بتاع شغب .. * محمد سيد احمد لو عاجباهو (الجلسة في المقصورة) عليه ان يذهب مباريات المريخ .. * لكن مباريات المنتخب مختلفه لان جمهور المنتخب لا بيعرف لقيمات ولا شعيريه .. * ولو المنتخب عندكم خط (بنفسجى) إحنا عندنا المنتخب خط أحمر .. * وما فيهو لعب .. * ولا فيهو هظار .. * امشى هظر مع جمهور المريخ بعيد مننا .. * عليك الله إحنا لو ما سجمانين زاتو يقودنا محمد سيد أحمد .. * بلد فيها (1000) قانوني ومليون قيادي وفي النهاية يقودنا محمد سيد أحمد ومعتصم ومن معهم .. * كيف يستقيم العود في ظل هذا العوج والعوجات الكتيرة والمسيخه .. * أقسم بالله تلاتة أنا أكون مسؤول الواطة ما تصبح على معتصم جعفر وهو رئيس للاتحاد .. * والله اشيلو بالليل .. * قبل ما منتخب يوغندا يعود ليوغندا انا اشيل اتحاد معتصم واليحصل يحصل .. * شنو يعنى ؟؟ الفيفا ؟؟ * عقوبات شنو البنخاف منها ونتستر على واقع زي واقعنا ده .. * لو في دولة واحدة في العالم ده كلو بتستاهل معاقبة من الفيفا هى السودان .. * الفيفا لما تعاقبنا بتكون رحمتنا وريحتنا والله .. * لانو اصلا البنعمل فيهو ده لا عندو علاقة بالرياضة ولا بالادارة .. * دى ممكن تكون اى حاجة لكن لا ادارة ولا رياضية .. * وأنا اقول ليك حاجة .. * الكورة في البلد دى مستفيدين منها حوالى (15) نفر بس .. * ال(15) نفر ديل حققو مصالحهم وشيدو العمارات وركبو العربات .. * السودان ده كلو يجرى جرى الوحوش وفي النهاية المستفيد من الرياضة هم (15) نفر .. * يعنى إحنا عشان مصالح (15) نفر نقعد نخاف من الفيفا والكلام الفارغ ده ؟؟ * ياخى خليهم يجمدونا ويلحقونا امات طه .. * إحنا هسه بسبب الاتحاد ده لحقنا امات طه .. * ما في عقاب اكتر من العقاب الذى فرضه الاتحاد على منتخب .. * منتخب عاجز وفاشل لان الذين يقودونه هم افشل الناس .. * يشيلو مازدا الفاشل ويجيبو لينا احمد بابكر الفاشل الكبير .. * ولا بيهمهم المنتخب يخسر ولا يطير .. * ما بيهمهم والدليل انهم كانو عارفين سيف مساوى (موقوف) ولعبوهو امام زامبيا في سابقه لم نجد لها تفسير حتى اللحظة .. * إشراك مساوى وهو موقوف لو حصل في الهلال كنا بنقول اداراة الهلال وجهازه الفنى (بايعين المباراة الشارك فيها مساوى) .. * كنا بنقول كده ولن نرحم مجلس الادارة ولا الجهاز الفنى .. * ولكن مساوى شارك في مباراة تخص المنتخب ، ولان منتخبنا (غريب) مر الامر مرور الكرام .. * ما في زول بحاسب .. * ولا في زول قلبو على البلد دى .. * يشهد الله البيحصل للمنتخب ده عيب والله .. * وعيب كبير .. * والسكوت عليه حرام .. * الناس من اجل الاوطان بضحى بالارواح .. * وديل ما عايزين يضحو ب(الكراسى) .. * عشان كده شيلوهم وريحونا منهم .. * الشعب السودانى الذى قدم الروح رخصيه من اجل الوطن لن يغضب إذا شلنا الاتحاد وعاقبتنا الفيفا .. * معاقبة الفيفا لا فيها دم ولا فيها روح .. * يبقى مرة واحدة خلونا ننتصر للسودان ونرد له الكرامه التى انتهكها اتحاد معتصم .. * خلو الفيفا تعاقبنا .. * خلوها تجمد النشاط عشان اى زول يرجع لشغل .. * الفيفا تجمدنا عشان معتصم يرجع لشغله الاساسى في الصيدلية وينسى الكره .. * معاقبة الفيفا ستكون من مصلحة السودان .. * ديل ما بيحسو ولا بيستقليو .. * شيلوهم بره ومرحب بالفيفا .. * ما ممكن بلد كاملة ماسكه القرون ومعتصم وشلته يحلبُون .. * المنتخب ده ما حق معتصم ولا حق اسامة ولا مجدى ولا الاراقوز .. * وديل لو ما عندهم احساس ولا ضمير يبقى الوطن عندو احساس وضمير .. * وضمير البلد دى ما مات رغم محاولات التحرش الذى يتعرض له السودان من قبل هذا الاتحاد .. * الذين طردو محمد سيد أحمد امس من الاستاد هم قادرين على حماية هذا الوطن .. * ومحمد سيد أحمد الذى تم تعيينه في منصب من اجل الترضيه عليه ان لا يتحدث عن المنتخب الوطنى .. * تتحدث عن الهلال بنرد عليك ، تتحدث عن المريخ بطريقتك لكن تتحدث عن المنتخب وتعمل فيها اسماعيل الازهرى والله نطردك من الاستاد زي وزى اى زول .. * قاعد في المقصورة والمنتخب ما قادر يصمد امام يوغندا .. * القاعدة ليها شنو عليك ؟؟ * والله أنا ما زعلان للخسارة فيها عادية وثمثل وجه من وجوه كرة القدم .. * والله البيزعل إنو الاتحاد بيتعامل مع المنتخب بذات الطريقة التى يتعامل بها المجتمع مع اللقطاء والمشردين .. * المنتخب في نظر الاتحاد مجرد (لقيط) وهذا امر مؤسف والله .. * والقصة دى كده ما بتمشى يا اولاد الحلال .. * الكلام دخل الحوش .. ووزير الرياضة مفروض يشوف حل لهذه المهازل .. * أمبارح كان (طرد) وهتفافات وغدا لا يعلم إلا الله ماذا سيكون .. * اللهم إني بلغن فأشهد .. � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore � � � � � � �