في السلك بابكر سلك مرجوعه فى مسماها * أبغض الحلال عند الله الطلاق * لكن القسمه ممكن تودى الناس ليهو * بى فرصنا فى الطلاق دى * النسوان متطنقعات علينا * يعنى لو بقت سيك سيك معلق فيك * كان سون لينا شنو؟ * فى مصر إذا حصل الطلاق * الشقه من حق الزوجه * بى عفشها وشفعها * الراجل يشيل شنطتو ويمرق * عشان كده تلقى المرا طابقه الراجل تحت اباطها وماشه بيهو فى شوارع القاهره * بغم ما يقدر يقولها * تلقاهو رافع البنطلون فى اباطو والحزام فى القلب * مجلط الصوفتين الفضلن ليهو بالكريم * والكرش تحت الحزام مدوره * مليانه مسقعه * كرهان يومو الأسود ذاتو * لكن بغم ما بقدر يقولها * نحنا هنا * المرا تشيل شنطتها وتمشى * براها بتشيلها * برغم انو شرعاً مفروض تقعد فترة عدتها فى منزل الزوجيه * عسى ربنا يؤلف بين القلوب من جديد * ووقتها إذا حصلت المحنه * وتجددت الحنيه * والنفوس إتطايبت * القصه ما محتاجه مأذون ولا إشهار * الرجعه بتتم بى كلمه * بى تصرف * بى همسه * بى اى شى بتتم * وبرغم ذلك النسوان عندنا يلفحن شنطتهن ويفرتقن * المهم * لكن الحق يقال * الزوجه عندنا بقت تصرف مع الزوج سوا سوا * مرات بتصرف أكتر منو * وفى بعض الأحايين المصاريف ذاتها تديها ليهو * وده النوع المأجر راجل * الله لاجعلكم من الرجال المأجرين * لأنو الإخلاء بتم لى أسباب كتيره * منها الحاجة الماسه * وقد يكون عدم السداد فى الظروف دى هو السبب الأساسى والشائع * لكن أكثر حاجه غايظانى * الواحد تلقاهو ساكن مع نسابتو * حق الكهرباء ما يدفعو * ويقول ليك داير أعرس تانى * معقوله؟!!! * أها * فى رجال بشهروا الطلاق * الواحد يتنفخ قدام الناس * ويقول للمرة طلقانه * ويحكى للناس * قلت ليها وقالت لى * قمت قلت ليها طلقانه * نحنا مابنفع معانا كلام زى ده * وإذا رجعت للقصه بتلقاهو حيوان ساكت * حتى الطلاق ما قصدو * وإنما قصد الإفصاح به ليتدخل الأجاويد * ويحلوا الموضوع * او يتدخل واحداً ليهو شنب * يحلف طلاق مرجوعه فى مسماها * أيها الناس * الراجل الداير يطلق * ما بجعجع ساكت * بشيل الورقه وبسلمها للمرا او لى أهلها * ده النوع الرجعتو ان لم تكن مستحيله بتكون صعبه شديد * وزى ده نوع الطلاق البأدب المرا لو كانت خارجه على الأدب والإحترام والقانون والشرع * أها * كردنه بجعجع بالإنسحاب ليهو شهر * داير الأجاويد يتدخلوا * لو عندك طلاق يا كردنه * شيل ورقة الإنسحاب وسلمها للإتحاد * عشان تانى لو درت الرجعه إلا بى عقد جديد * وموافقه جديده * ومهر جديد * ودى الورقه يا كردنه وبطل جعجعه * ولا نقطنا بى سكاتك * ولو وديت الورقه * والمرا أهلها طلعوا زى ناس محمد سيد احمد ديل * تانى تشمها قدحه * تانى أمريكا ما بترجعها ليك * أقول ليك * أخارجك من الورطه دى * لملم عفشك وأمشى الفاشر بدل تمشى الأولى * ومرجوعه فى مسماها * أيها الناس * الشفوت نعم الرجال * ومبادرة قروب أحباب لدعم تسجيلات المريخ * مبادرة رائعه * أتت من ناس ماغريب عليهم الدعم * عملوها كتير وفى صمت كبير * وهناك قروبات أعدت العدة لصيانة المدرجات والسياج والنادى والتشجير * جمعوا من المال ما يكفى لذلك البرنامج الرائع * وأعدوا للعضوية مفاجأة * التفاصيل قريب ده بنوريكم ليها * وده الدورا لأساسى للقروبات * دعم النادى والعضوية والمشاركة فى كل المناحى * لكن لسه الشركات ما قادرة تغطى مشروع الرصيد كويس * يا عزيزى مرتضى بترى شدوا حيلكم معانا شويه * أيها الناس * مجلسنا الجديد يحتاج لوقفتنا الشديدة معه وحوله * ولا أظننا نحتاج لتوصيه * ننصرهم ظالمين او مظلومين * ونناصرهم من أجل الإبقاء على رايتنا عاليه خفاقه * الكيمان والتكتلات ما حبابها * ممكن نكون مجلس ومعارضه * وهى صورة صحيه جداً * ولكن يجب ان يكون المجلس محترماً يؤمن بالمعارضه ويحترمها ويحترم فكرها * وممكن ان تكون معارضه بناءه لا هدامه * تحترم المجلس والكيان ولا تعمل للعرقله وتبخيس الأشياء * فكثير من الناس إعتادوا على معارضة الكيان والإرتماء فى احضان الأعداء (ودى خيانه عظمى) * وقت ان يكون فى المعارضه * زى ديل لاحبابهم والله لا أعادهم * المهم * لانريد تسرعاً فى التسجيلات * ولا تخبطاً * ولا حركات صور ساكت * وقون المغربيه أخير من ميه * المهم * المريخ وأهلى شندى والخرطوم ومريخ السلاطين * عليهم حمل راية الوطن فى الموسم الأفريقى الجديد * محتاجين لإعداد جيد * وثقة بالنفس وطموحٍ عالٍ * الموضوع ما لعب * ما نبقى زى الناس البشاركوا تمنين سنه وبيمرقوا كيت * وآخرتها بلبسوهم الطاقيه * الكسكته يا عمك * أيها الناس * لا جوديه ولا يحزنون * بالقانون وللقانون * ما تبقى زى البنطون * لا مرسى لا مينا ولا قانون * أيها الناس * إن تنصروا الله ينصركم * أها * نجى لى شمارات والى الخرتوم * أكان شفت يا والينا * الدنيا دى بتعاكس فينا * نخت الشاى يبرد علينا * نخت البارد يسخن لينا * ما يا يبردوا الإتنين لينا * يا يسخنوا الإتنين علينا * دى شنو المعاكسه دى يا والينا؟ * الشافع يدفعنا دم قلبنا دروس ويسقط لينا * نفكوا عكس الهوا تدوهوا بوش وينجح لينا سلك كهربا ** ننساك كيف والكلب بدون شطه بحرد الأكل وفى صحنو بخليهو لينا؟!! والي لقاء سلللللللك � � �