في السلك بابكر سلك مجراهو وين؟ !! * للعلم فقط * حقو الإذاعة الرياضيه تعرف إنو إتحاد القضارف عندو رئيس * ورئيس إتحاد القضارف عندو تلفون * ومفتوح لأى زول يتصل بيهو * هذا للتذكير * عساها بل لعلها تفتكر للقصه دى * وياحبذا لو الإذاعة الرياضيه ( المحايده ) تتصل برئيس إتحاد القضارف * أهو برضو ينوبكم ثواب * وممكن المتصل يقود الحوار للإتجاه الهو دايرو * مافى خوف * أيها الناس * فى كل القضايا تظهر أهمية إذاعة المريخ * وقناة المريخ * فالإعتماد على قنوات وإذاعات تدعى المهنيه والحياديه * وتعمل لصالح إتجاه محدد مللنا منه كثيراً * وأثر الإذاعات والقنوات على تهويد وتنصير النشء واضح جداً وباين * حقو نلحق الحته دى * هى الإذاعه كلها بتكلف كم؟ * تلاتة مننا لو باعوا عرباتهم * بنسمع من أمدرمان إذاعة جمهورية المريخ * ناسنا يدعموها بالإعلان فيها * ودخل إتصالات شعبنا أولى بيهو إذاعتنا * ومبارياتنا تنقلها إذاعتنا * الإذاعه الإف أم الزمن ده ما صعبه * سااااااهله * زى تلفون الدلاقين الكانوا بعملوهوا الشفع زمان داك * منتهى السهولة مع التكنولوجيا * وأإولادنا وكوادرنا هم المشغلين للناس إذاعاتهم * نستقطبهم ونريحهم على الآخر * وزيتنا فى بيتنا * غرفتين وإستقبال بتعمل إذاعه * يعنى تأجر شقه صغيره * غرفة إستوديو تقسمها على إتنين * مترين ونص ومتر ونص * وغرفة مكتب فنيين * والهول إستقبال * مكتب مدير ما محتاجه * هو الإف ام دايره ليها إداره ومجلس إدارة ورئيس مجلس إدارة كمان؟ * أيها الناس * الأيام ورتنا ناسنا من الناس الما ناسنا * وورتنا منو المحايد ومنو البحفر لينا تحت تحت وبعمل محايد * حقو نكون واعيين * وإذا دعينا للمقاطعه * يكون الشفوت جاهزين * وجربناها قبل كده مع جهات عديدة * لى الليله ما قامت ليها قائمه * أيها الشفوت * كلامى واااااااضح * المهم * نغمة إعادة تراورى ظهرت * وظهرت الى جانبها نغمة الإستغناء عن غارزيتو * وهى نغمة جاءت لكى تتناغم مع نغمة عودة تراورى * بالله عليكم * أفيد تراورى ولا غرزه؟ * وهل يقارن تراورى بغرزة؟ * وهل قدم تراورى قبل كده لى فريق عشان يقدم لينا نحنا؟ * موش ياهو تراورى المتسيب * الأنانى * الناعم فى الملعب * بتاع حركة ملكه جانسى ولا تراورى تانى؟ * نسيتوا؟ * النسيان وعفا الله عما سلف ده الجهجه الناس طول عمرهم * برا تراورى بلا فلقة راس وبرا تقاعس * وصلنا مرحلة اللعب الجماعى * واللعب بغيرة * واللعب الضاغط * واللعب لأجل الشعار * دايرين ترجعونا مرحلة تراورى تانى ليييييييييييييييه؟ * أيها الناس * فانيلة تراورى تتغسل بالجاز أول حتى يلبسها غيرو * الله فكانا منو فكونا منو يا ونسى * المهم * التسجيلات ليست تكويش وتكويم ساكت * التسجيلات فن وحاجه وحسن إختيار * ويجب علينا ممارستها بهذه الكيفيه * والسته بتاعين ابوكسكته إن شاء الله يكونوا قبضوا * مايكون كلام ساكت * وتبقى القصة الباقى ليك والباقى مرتبات * ودخل دار الرياضه أمدرمان بسيط * وأصبروا لينا * المهم * مستوى اللياقة الذى ظهر به المريخ فى مباراة دنقلا * بطال شدييييييييييييد * وعله آخر الموسم الطويل الممل * ولكن علينا ان نشكر أولادنا على المستوى المتميز القدموهوا طوال الموسم إلا من هنات بسيطه * نشكرهم على تميزهم فى اى شى * أما أفريقيا * فكفانا ترشيح الإتحاد الأفريقى لنا للفوز بالكأس * المهم * وليد البشرى الهلالابى قال لى : * إنت شابكنا القانون ياخذ مجراهو القانون ياخذ مجراهو * مجراهو ده وين؟ * قلت ليهو مجراهو خور ابوعنجه ولى دار الرياضة طوالى * لكن الأهلة لو حريفين * يمشوا الفاشر * ويزوغوا من كورتنا الهنا * يبقوا زاغوا من كورتين * وزوغان كورتين ما بنزل لى دار الرياضه * كده يضمنوا ما قابلونا وما نزلوا وما جابو القسيمه للإتحاد * فكره يا كردنه * طلع الكسكته وفكر فيها * لكن إستعجل * الزمن ما فى صالحك * وسفرة ماكسيم ما مشكله * إحتمال ما يجى * الراجل قال ما ممكن يلعب سنه كامله براى * ومن حقو يا كردنه * زول زى ماكسيم ده ما بختوهوا خفير للمواسير يا اخوى * أيها الناس * هل من قناة شجاعه تعرض لنا الأخطاء التحكيميه فى الدورى؟ * هل من رجل شجاع فى اى قناه * يجيب لينا بلنت النسور فى الدورة الأولى الما عدوهوا؟ * ويجيب لينا بلنت كوفى الما إتحسب فى الدورة الأولى؟ * ويجيب لينا بلنت الجماعه ضد أهلى مدنى؟ * وضد مريخ الفاشر؟ * لو ما يخطئ ولا يظلم * كان أسى نزلتوا بدون إنسحاب * كان مع امل عطبره مفكرين فى الصاعدين منو * أيها الناس * مجراهو خور ابوعنجه وبس * أيها الناس * إن تنصروا الله ينصركم * أها * نجى لى شمارات والى الخرتوم * أكان شفت يا والينا * قالوا ابو القنفت بى مليون بقى بيتباع لينا * حاجات غريبه بقت تحصل فينا * وتحصل لينا يا والينا * ابوالقنفت بى شناتو دى مليون شنو البجيبوا يا والينا؟ * زمان بجيب البخت والحظ هكذا أهالينا قالوا لينا * يكونش ده قصدهم يا والينا؟ سلك كهربا ** ننساك كيف والكلب لما سمع أبوالقنفت بجيب مليون حكه أضانو بى رجلو الورا وقال .. أبوالقنفت العفن ده !. والإنسان لسه مجانى؟ !! والي لقاء سلك