★★نبض الصفوة★★ ★★امير عوض★★ ★ما بتعرف.. و عايزه تغرف★ https://m.facebook.com/nabddalsafwa/ ★كالعادة.. صفعة و درس جديد في إسترداد الحقوق.. ★أعاد "كوماندوز" المريخ الأمور إلي نصابها الصحيح.. ★كل الصور السابقات.. و المداد المهروق في الصحافة الزرقاء طلع شمار في مرقة.. ★من حقهم أن يحلموا.. و من واجب المريخاب إيقاظهم من "أحلام زلوط".. ★البرالمة الذين لا يفقهون في قوانين الإنتقالات يحاولون التطاول علي زعماء البلد!! ★إدارة أوصلتها خبراتها النادرة لشراء "كرت هاوي" في سابقة أضحكت علينا "كروت العالم" و سجلتها موسوعة غينيس في باب (الغباء المستفحل).. ★و مع ذلك إمتدت أيديهم نحو الكشف المريخي (المحرم) بأمر الصفوة.. ★هنا.. و تغير الوضع تماما.. ★لم يعد الأمر بمثابة إنتقال نجم هاو من كشوفات النادي نحو الضفة الأخري.. بل تحول الأمر لشكل التحدي و التعدي علي الكرامة المريخية الأبية.. ★المريخ.. كبير البلد.. زعيم أندية عموم السودان.. فكيف يتجرأ الأقل منه قامة و يعبثون في كشف لاعبيه.. ★الدماء الحمراء أصابها الغليان في العروق.. و الكرامة المريخية مست و إنتاشها البعض في ليل بهيم.. ★لهذا جاء الرد المريخي قاسيا و صلبا و مميتا.. ★قطع اليد التي إمتدت لتعبث بأكبر كيان رياضي في سودان المريخ.. ★و ليعلم الكل و ليدرس الموقف للأجيال القادمة.. بأن كبير البلد لا يضام و في مريخي واحد نفس يدخل و يخرج.. ★من ملئت تصاويره الصفحات لا يدري عن عظمة شعب المريخ و عنفوان ثورتها و شدة غضبتها التي تقتلع الأشجار من جذورها.. ★لهذا كانت الصفعة قوية و قاتلة.. لأنها جاءت بغضب عارم و أصابت في الصميم.. ★كرامة المريخ و حفظ هيبته هما الأساس في المقام الأول.. قبل النظر لسلوك اللاعب.. ★المريخ أوجع بضربته لأنه أكد حقيقة وحيدة.. و هي أن الكبير كبير.. و العين لا تعلو علي الحاجب.. ★و إسترد المريخ فلذة كبدة في معركة الكرامة و إحقاق الحق رغم أنف من ظن في نفسه عظمة أغرته بها الأموال.. ★بضربة شيبوب.. تكون جوبا هي منطقة إنتصارات الزعيم الحصرية علي وصيفه المستثني.. ففي الذاكرة كاس جوبا.. تسجيل أسامة أم دوم.. ملحمة ألوك.. ★إنتهي الدرس. ★نبضات أخيرة★ https://m.facebook.com/nabddalsafwa/ ★ضربة بالجهة الفيها الحديدة.. ★صور و إحتفالات و مباركات و نكات.. و في الآخر إنتهي العزاء بإنتهاء مراسم الدفن.. ★البعض يحلم و يعد الأيام لحساب السنة و النصف.. و البعض الآخر يمني نفسه بالإعارة بعد ستة أشهر.. ★الحمد لله الأحلام ما بقروش.. و أهو حلمه تفوت و لا حد يموت.. ★المحيرني مقبول ده.. الزول ده متأكدين أنو هو مدير الأعمال!! ★بي طريقتو دي الأعمال بتكون راحت في حق الله.. ★ده أي زول حرسو.. ملصو.. ★شعيرية يقصر.. ★ده بيدوهو زول كامل الدسم.. برجعوا جواز.. ★بيتو اتملأ جوازات.. ★أصلو قالو من هو صغير عندو مشكلة مع الجوازات دي.. ★بحبها.. خلقة ربنا.. ★من يتعرف عليك بشيل جوازك شدة.. ★لو مات زول في حلتهم.. الناس تعزي و تشيل الفاتحة.. هو بسأل عن جواز المرحوم!! ★الناس في شنو و انت في شنو يا مقبول.. ★مسكوك الوك.. رجعتو جواز.. قلنا ما فيها حاجة.. صغير و بتعلم.. ★تاني رسلو ليك شيبوب.. تقوم تمسك الجواز و تنوم.. ★بالجد يا مقبول.. تصرفك مرفوض.. ★مقبول.. مرفوض.. ★أوعه من مقبول مرفود.. ★والله آدم كان كويس.. بي كراتينو كان كويس.. ★دورو بنتهي في يا ادم جيب الكرتونه.. ★بعد ده ادم ملص العقرب.. ★البركة في الصورة.. ★مقبول ده جوازاتو دي الا يفتح بيها مكتبة.. ★الغريبة اتعلم يتصور كمان.. ★مشتري ليهو كرت هاوي و يتصور.. ★يعني لو جاب اللاعب كان نحت تمثال و عملو نصب تذكاري في جوبا.. ★نجي للمهم.. ★الحساب ولد.. ★في 25 ألف دولار جاتنا مع ولدنا.. ★هدية.. ★زي دعايات التلفزيون.. ★إشتري كمبيوتر و أحصل معاهو علي خلاط هدية.. ★ولدنا مشي فاضي جانا شايل 25 ألف هدية.. ★نرجعها واللا نلهفها.. ★انا شايف نتصل علي شيخ نستفتي فيها.. ★غنيمة الحرب بترجع يا ربي.. ★نسينا نغني حبه.. ★توعدنا و تخلف (بالصورة).. و عامل فيها بتبني المقصورة.. ★دخلوها و صويرها قام.. انا فوقكم بقول تمام.. ★بحلم معاك أنو الصور لحظة فرح راحت بعيد.. ★معليش حنوقف الغناء لأنو جيرانا عندهم بكاء.. ★شايبين فرشون.. ★قصدي فارشين شيبون.. ★في الجواز اسمو شيبوب والله شيبون يا مقبول.. ★تلقي لي الان ما عارف.. هو فاضي من الصور.. ★قلتو لي اسمو العراب.. ★القوة الضاربة.. ★بالجد ضاربة لكن.. مدتها منتهية من شهور.. ★فترتو كلها قضاها صور.. تقول جاي رحلة.. ★غايتو لو دي ادارتك.. الجوهرة الزرغاء دي ما بتوصلك شهر اربعة.. ★ده لو ما كتائب الموج الازرق شالتك.. ★صورك الكتيرة دي ذكرتني الشفع البكتبوا في اي حيطة تذكار من فلان.. ★يشخبطوا الحيط و العمدان كلها.. ★صورتك في أي موضوع بقت عنوان فشل ليهو.. ★شايفك قبل يومين متصور في الجوهرة الزرغاء.. ★ربنا يشوفها ما تخمها كتاحه و ترميها.. ★بالجد هي 12 عمود بس.. ★استاد ده واللا برندة.. ★12 عمودك دي اللوحة الالكترونية ما تثبتها.. ★الهلالاب ديل لو مفتحين يجيبوا خبراء يشوفوا الحاصل.. ★الروح غاليه.. ★الراجل ده اتصور هناك يبقي انتهي منها.. ★نبلع حبوب شنو يا فطومه قلتي.. ★طمام واللا مصران.. ★كم شبه في اليوم.. ★قصدي كم حبه؟ ★انتي موش اعتزلتي؟ ★الفتح نفسك شنو تاني؟ ★بكرة بنسألك القفل نفسك منو تاني؟ ★المره دي الله اعلم تستمري ناطقه.. ★اتبروا منك في بيان.. ★خليكي سياسية.. الشغل ده شورتك فيهو نتائجها واضحة.. ★محمد عبدالماجد كان داخل علي جدول سبعة.. ★أعد يا محمد.. ★هذا المشترك لا يمكن الوصول إليه حاليا.. ★خالد عز الدين.. اتشيبن.. بقي لا عارف يكتب عن شيبوب واللا عن الفساد.. ★اها.. رسيناك علي بر يا استاذ.. لأنو الكار ده ما كارك.. ★رمضان فرش قبل يبردو الجنازة.. ★من ليلو بقي يحنن.. ★بالله يا يوسف السماني جهز لي حلقة سريعة الليلة مع الدكتور.. ★البكاء لو ما مشي الاذاعة الرياضية بكون ما عندو طعم.. ★البكاء إلا تحررو الإذاعة الرياضية.. ★جمهور الهلال مسكين.. ممكون و صابر.. ★لا دوري لا كاس.. لا الوك لا شيبون.. ★المريخ فاز بالبطولات.. و الهلال شال الجوازات.. ★جوازين و كرت.. ★دي انجازات الهلال في الموسم.. ★محترفين.. و اندرزينهو.. و قومة و قعدة.. ★و النتيجة النهائية.. جوازين و كرت.. ★في ذمتك يا كردنة دي دايرة ليها محترفين.. ★لكن بيني و بينكم الكرت ساهل.. صعبة الجوازات.. ★جوازين في البرد ده.. بي الشئ الفلاني.. ★كمان ما تقول الكتروني.. ★يستاهلوا مهرجان والله.. ★انتو عملتو مهرجان للعدالة يغلبكم تعملوا مهرجان الجوازات الشعبي.. ★ادعو معاكم فريق الغزالة جاوزت.. ★حنجيب ليكم عمر الجوزلي يعلق للمهرجان.. ★المهم الجوازات دي انجازها ما يضيع.. ★نتمو بكرة لو ربنا احيانا. ★نبضة أخيرة★ الدايرنا جوة قلوبنا يعمل عشو.. و المابينا بي جمر الفراق بنتشو.. و البجي للزعيم طغيان مكرفس وشو.. قسما كان بقالنا الجنة ما بنخشو.. تابعوني خلال صفحتي بالفيس بوك: نبض الصفوة https://m.facebook.com/nabddalsafwa/
